Kapitulo 16

Ang mga Tigulang sa Simbahan

“Unta kining bulawanong katuigan mao ang inyong pinakanindot nga katuigan samtang hingpit kamo nga magpakabuhi ug mohigugma ug moserbisyo. Ug ang Dios mopanalangin niadtong nangalagad sa inyong mga panginahanglan—inyong pamilya, mga higala ug mga kaubanan ug mga lider sa Simbahan.”

Gikan sa Kinabuhi ni Ezra Taft Benson

Si Ezra Taft Benson 86 anyos dihang nahimo siyang Presidente sa Simbahan. Nasabtan niya ang mga kalipay ug mga hagit nga moabut sa kaulahiang mga tuig sa iyang kinabuhi. Usa sa iyang kalipay mao ang padayong pagkig-uban sa iyang asawa, si Flora. Gisaulog sa magtiayon ang ilang ika-60 nga anibersaryo sa kasal atol sa iyang unang tuig isip Presidente. Ganahan kaayo silang mag-uban sa usag usa ug magkuyog sa pag-adto sa templo hapit kada Biyernes sa buntag. Sa iyang ika-87 nga pagsaulog sa adlawng natawhan, usa ka tawo nangutana ni Presidente Benson sa iyang sekreto sa taas, malipayong kinabuhi. “Sa wala pa siya makatubag, si Sister Benson miingon, nagpasiaw apan may kahulugan, ‘Siya dunay buotang asawa.’”¹

Sa mga tuig sa ilang katigulangon, si Presidente ug Sister Benson ganahan kaayong mogahin og panahon kauban sa ilang mga anak ug apo, ug ang ilang pamilya nagpadayon sa pagkat-on gikan sa ilang ehemplo. “Usa sa apo nga babaye miuban og puyo sa iyang mga apohan sa unang dise otso ka bulan ni Presidente Benson isip presidente, ug sigon sa ilang hangyo kanunay siyang mobiyahe kauban nila sa pagtabang ug pag-asikaso sa ilang personal nga mga panginahanglan. Ug siya mismo naka-obserbar sa iyang mga apohan diha sa panimalay—sa ilang mga date didto sa tindahan og ice cream; manglingkod sa sofa ug magkinuptanay sa kamot samtang sila mohinumdom, manganta, ug dungang mangatawa; sa mabination nila nga pakig-istoryahanay sa ilang mga home teacher ug sa uban nga mobisita.”²

Ang mga apo nakakita sa dakong panalangin nga maimpluwensyahan sa maalamon ug mahigugmaong mga apohan. “Usa ka apong babaye misulat sa iyang pasalamat human siya ug ang iyang bana gitambagan ni Presidente Benson kabahin sa lisud nga desisyon. ‘Kami nangutana nimo unsay imong hunahuna ug miingon ka, “Iampo kini. Ako may pagsalig nga inyong himoon ang sakto nga desisyon.” Ang imong pagsalig kanamo nakadugang sa among pagsalig sa among kaugalingon.’”³

Para sa kinatibuk-ang komperensya nga gipahigayon human dayon sa iyang ika-90 nga adlawng natawhan, nangandam si Presidente Benson og pagkigpulong para “sa mga tigulang sa Simbahan ug sa ilang mga pamilya ug niadtong nangalagad sa ilang mga panginahanglan.” Sa pagsugod, iyang gipahayag ang iyang personal nga koneksyon sa hilisgutan: “Ako adunay espesyal nga pagbati sa mga tigulang—niining talagsaong grupo sa mga kalalakin-an ug kababayen-an. Sa pipila ka bahin mibati ko nga ako nakasabut nila, kay ako usa usab kanila.”⁴

President Ezra Taft Benson smiling. Photographed at the October 1982 general conference. — “Ako adunay espesyal nga pagbati sa mga tigulang na. … Sa pipila ka bahin mibati ko nga nakasabut nila, kay ako usa usab kanila.”

Mga Pagtulun-an ni Ezra Taft Benson

Ang Ginoo nakaila ug nahigugma sa mga tigulang ug naghatag kanila sa Iyang talagsaong mga responsibilidad.

Ang Ginoo nasayud ug nahigugma sa mga tigulang diha sa Iyang katawhan. Ingon na niini kaniadto pa ug hangtud karon, daghan sa Iyang talagsaong mga responsibilidad Iyang gihatag kanila. Sa lain-laing dispensasyon Iyang gigiyahan ang Iyang katawhan pinaagi sa propeta kinsa nagkatigulang na. Iyang gikinahanglan ang kaalam ug kasinatian sa kapanahonan, sa dinasig nga giya gikan niadtong nakapamatuod sa ilang pagkamatinud-anon sa Iyang ebanghelyo sa taas nga panahon.

Ang Ginoo mipanalangin ni Sara, sa iyang katigulangon, sa pagbaton og anak ni Abraham. Tingali ang pinakaimportante nga wali ni Haring Benjamin gipamulong dihang siya tigulang na ug hapit na mamatay. Siya sa tinuoray instrumento sa mga kamot sa Ginoo kay siya nakaggiya ug naka-establisar og kalinaw sa iyang katawhan.

Daghan pang mga lalaki ug babaye sa kapanahunan ang nakahimo og talagsaong mga butang samtang sila nagpadayon sa pagserbisyo sa Ginoo ug sa Iyang mga anak, bisan sa ilang katigulangon.

Sa atong dispensasyon, [niadtong] mga propeta nga gi-call sa Ginoo, daghan ang gi-call sa dihang sila anaa sa mga syetenta o otsyenta ang panuigon, o mas tigulang pa. Ang Ginoo nakaila ug nahigugma gayud sa Iyang mga anak kinsa nahimong eksperto tungod sa ilang mga tuig sa kasinatian!

Kami nahigugma kaninyo mga katigulangan sa Simbahan. Kamo ang pinakapaspas nga nagtubong grupo sa populasyon sa kalibutan karon, ingon man usab sa Simbahan.

Among tinguha nga ang inyong bulawanong katuigan mahimong nindot kaayo ug magantihon. Among pag-ampo nga inyong mabati ang kalipay sa kinabuhi nga maayong pagkagahin ug puno sa nindot nga mga panumduman ug gani mas dakong ekspektasyon diha sa pag-ula ni Kristo. Kami nanghinaut nga inyong mabati ang kalinaw nga gisaad sa Ginoo niadtong nagpadayon sa pagsunod sa Iyang kasugoan ug nagsunod sa Iyang ehemplo. Kami nanghinaut nga ang inyong mga adlaw mapuno sa mga butang nga pagabuhaton ug pamaagi diin kamo makaserbisyo sa uban kinsa dili sama ninyo kabulahan. Ang pagkatigulang kanunay nagpasabut nga mas maayo, nga ang inyong bahandi sa kaalam ug kasinatian magpadayon sa pagtubo samtang motabang mo sa uban.⁵

Atong mapahimudsan ang atong katuigan sa pagkatigulang.

Mosugyot mi og walo ka dapit diin atong mapahimudsan ang atong katuigan sa pagkatigulang:

1. Moserbisyo sa templo ug kanunay moadto. Kita nga mas tigulang kinahanglang mogamit sa atong kusog dili lang sa pagpanalangin sa atong kaliwatan, apan sa pagsiguro, kutob sa mahimo, nga ang atong katigulangan makadawat sa mga ordinansa sa kahimayaan diha sa templo. Pagserbisyo uban ang inyong mga pamilya; tambagi ug pag-ampo alang niadtong wala pay tinguha nga maandam ang ilang kaugalingon.

Among giawhag ang tanang makahimo sa kanunayng pag-adto sa templo ug dawaton ang calling sa pagserbisyo diha sa templo kon itugot sa kapiskay ug kalig-on ug sa gilay-on. Kami nagsalig sa inyong tabang nga mapahigayon ang mga serbisyo sa templo. Tungod sa nagkadaghang mga templo, nanginahanglan kita og mas daghang miyembro nga mangandam sa ilang kaugalingon para niining nindot nga pagserbisyo. Si Sister Benson ug ako mapasalamaton nga hapit kada semana kami dungang makaadto sa templo. Dako gyud kini nga panalangin sa among kinabuhi!

2. Mokolekta ug mosulat sa kasaysayan sa pamilya. Kami nanawagan ninyo nga kamo makugihong magpadayon sa pagpundok ug pagsulat sa personal ug pamilya nga kasaysayan. Kadaghanan, kamo mismo aduna nay kasaysayan, ang panumduman sa inyong mga minahal, ang mga petsa ug mga hitabo. Sa pipila ka sitwasyon kamo mao ang kasaysayan sa pamilya. Adunay pipila ka paagi diin ang inyong panulundon mas mapreserbar kaysa pagkolekta ug pagsulat sa inyong kasaysayan.

3. Moapil sa misyonaryo nga pagserbisyo. Kita nanginahanglan og mas daghang senior nga mga misyonaryo aron moserbisyo. Kon mahimo sa panglawas ug kapanguhaan, kami nanawagan og gatusan pa ka mga magtiayon sa pagtagana sa ilang kinabuhi ug buluhaton para mag-misyon. Gikinahanglan kaayo mo namo sa mission field! Kamo makabuhat og misyonaryo nga pagserbisyo nga dili mabuhat sa mga batan-ong misyonaryo.

Mapasalamaton ko nga duha sa akong nabalo nga igsoong mga babaye nagserbisyo isip managkompanyon nga misyonaryo sa England. Sila saysenta y otso ug syetenta y tres anyos sa dihang ilang nadawat ang calling, ug silang duha adunay nindot kaayong kasinatian.

Pagkaanindot nga ehemplo ug panalangin alang sa kaliwatan sa pamilya kon ang ilang mga apohan nakaserbisyo og misyon. Kadaghanan sa mga senior nga magtiayon nga mialagad nalig-on ug nabag-o tungod sa misyonaryo nga pagserbisyo. Tungod niining sagradong matang sa pagserbisyo, daghan ang nabalaan ug mibati og kalipay sa pagdala sa kahibalo sa kahingpitan sa ebanghelyo ni Jesukristo ngadto sa uban. …

4. Mangulo pinaagi sa pagtukod og kahiusahan sa pamilya. Awhagon namo ang tanang senior nga miyembro, kon mahimo, sa pagtawag nga hiusahon ang ilang pamilya. I-organisar sila isip nagkahiusang unit. Mangulo sa mga panagpundok sa pamilya. Maghimo og mga reunion sa pamilya diin ang panagdait ug panulundon sa pamilya mabati ug masayran. Pipila sa akong pinakanindot nga mga panumduman mao ang among mga reunion ug panagpundok sa pamilya. Magpalambo og nindot nga mga tradisyon sa pamilya nga mobugkos kaninyo sa kahangturan. Pinaagi niini, makamugna kita og lakbit sa langit dinhi sa yuta sa atong tagsa-tagsa nga pamilya. Sa lintunganay, ang kahangturan usa ka sumpay sa matarung nga kinabuhing pamilya.

5. Modawat ug mobuhat sa mga calling sa Simbahan. Kami nagsalig nga ang tanang senior nga mga miyembro kinsa makahimo modawat og mga calling sa Simbahan ug buhaton kini nga may dignidad. Mapasalamaton ko nga ako mismo nakaila og mga kaigsoonan nga mga syetenta ug otsyenta ang panuigon nga nagserbisyo isip mga bishop ug presidente sa branch. Gikinahanglan kaayo namo ang inyong tambag ug impluwensya kinsa sinati na sa dalan sa kinabuhi! Kinahanglan namong madunggan ang inyong mga kalampusan ug giunsa ninyo pagbuntog ang kasubo, kasakit, o kasagmuyo, o nga nahimong mas lig-on tungod niini.

Adunay daghang oportunidad alang kaninyo nga makaserbisyo sa mga organisasyon sa Simbahan. Aduna moy panahon ug lig-ong pundasyon sa ebanghelyo nga nakapahimo ninyo sa paghimo og talagsaong buluhaton. Sa daghang pamaagi kamo ang responsable para sa matinud-anong pagserbisyo sa Simbahan. Kami nagpasalamat kaninyo sa tanan ninyong nabuhat ug nag-ampo nga ang Ginoo mas molig-on kaninyo.

6. Moplano sa inyong umaabut nga kahimtang sa pinansyal. Samtang padulong na kamo nga mo-retire ug sa mga dekadang mosunod, dapiton namo ang tanang senior nga mga miyembro nga magplano sa pagdaginot alang sa umaabut nga mga tuig human sa pangempleyo. Likayan nato ang wala kinahanglanang pagpangutang. Motambag usab mi nga magmabinantayon sa pagpirma og mga financial note, bisan gani sakop sa pamilya, kay magkaproblema unya ang gitagana nga retirement.

Gani mas magmabinantayon sa mga estratehiya nga “madatu” diha-diha dayon, pagprenda sa balay, o pagpamuhunan sa walay siguradong pamasin. Magmabinantayon kanunay aron ang plano sa kinabuhi dili madaut tungod sa usa o sunod-sunod nga dili maayong desisyon sa pinansyal. Planuha og sayo ang inyong pinansyal sa umaabut, dayon sunda kana nga plano.

7. Mohimo og Kristohanong Pagserbisyo. Makabayaw ang Kristohanong pagserbisyo. Nasayud niini, nanawagan mi sa tanang senior nga mga miyembro sa paghimo og makugihon nga pagserbisyo sa uban. Kini mahimong kabahin sa makapabalaang proseso. Ang Ginoo misaad nga kadtong gikalimtan ang ilang kaugalingon aron sa pagserbisyo sa uban makakaplag niini. Si Propeta Joseph Smith miingon nga kinahanglan kitang “mohalad sa atong kaugalingon” sa pagpahinabo sa mga katuyoan sa Ginoo (D&P 123:13).

Kalinaw ug kalipay ug mga panalangin ang madawat niadtong moserbisyo sa uban. Oo, nagrekomendar mi og Kristohanong serbisyo sa tanan, apan kini mas espesyal sa kinabuhi sa mga tigulang.

8. Magpabiling piskay, himsog, ug aktibo. Kami nalipay kaayo sa mga paningkamot nga gihimo sa daghang mga tigulang aron sa pagsiguro sa kapiskay sa ilang panglawas sa umaabut nga mga katuigan. …

Ganahan kaayo ming makakita sa atong mga tigulang nga magpabiling lagsik ug aktibo! Pinaagi sa pagpabiling aktibo, ang hunahuna ug lawas mas moabtik.⁶

A Brazilian man reading the scriptures. He is sitting on a bus. — “Unta kining bulawanong katuigan mao ang inyong pinakanindot nga katuigan samtang hingpit kamo sa inyong pagpakabuhi ug paghigugma ug pagserbisyo.”

Ang pagserbisyo sa uban makahupay niadtong namatyan og minahal o kahadlok nga mag-inusara.

Niadtong namatyan sa ilang kapikas, ipahayag usab namo ang among gugma. Usahay adunay pipila kaninyo nga mibati nga walay pulos ug nag-inusara nga ingon og dili na makaya. Kasagaran, dili unta kini angayang mahitabo. Dugang sa walo ka sugyot nga bag-o lang gihisgutan, aniay panig-ingnang mga kalihokan nga napamatud-ang makatabang sa uban.

Ang uban nga nag-inusara na busy sa paggansilyo og mga habol para sa apo nga magminyo o para sa bag-ong natawo nga bata sa pamilya. Ang uban magsuwat og sulat sa adlawng natawhan o motambong sa eskwelahan ug mga kalihokan sa sport sa ilang mga apo kon ilang mahimo. Ang pipila magtigom og mga album sa mga litrato sa kada apo nga ihatag sa adlawng natawhan. …

Kita makakita nga daghan sa atong mga biyuda nga miboluntaryo … diha sa mga ospital o uban pang matang sa pagserbisyo sa komunidad. Daghan ang nakakaplag og katumanan sa pagtabang niining paagiha.

Ang paagi sa pagbuntog sa kamingaw ug sa pagbati nga walay pulos sa usa ka tawo nga maayo pa og panglawas mao ang paghunahuna sa uban pinaagi sa pagtabang niadtong nanginahanglan gayud. Kami mosaad nga kadtong mobuhat niining matang sa pagserbisyo, sa pipila ka bahin, kamo mahupay ra sa pagkawala sa mga minahal o sa kabalaka nga mag-inusara. Ang paagi nga mahupay ang inyong sitwasyon mao ang pagtabang sa uban nga mapalambo ang ilang mga kahimtang.⁷

Panahon sa sakit ug kasubo, kita magpabiling lig-on sa kinaiya ug sa espiritu.

Kadtong may sakit ug nag-antus sa kasakit ug sa dili matag-an nga mga kausaban niining kinabuhi, among ipaabut ang among gugma ug kabalaka. Anaa kaninyo ang among gugma ug mga pag-ampo. Hinumdumi ang gisulti ni amahang Lehi sa pagpanalangin sa iyang anak nga si Jacob, kinsa nag-antus sa mga kamot sa iyang mga maguwang nga si Laman ug Lemuel. Siya miingon, “Ikaw nasayud sa pagkagamhanan sa Dios; ug siya nagpahinungod sa imong mga kasakit alang sa imong kaayohan” (2 Nephi 2:2). Ug mao usab siya diha kaninyo.

Kami nag-ampo nga kamo padayon nga magpabiling lig-on sa kinaiya ug espiritu. Kami nasayud nga kini dili kanunay sayon. Kami nag-ampo nga kadtong nagbuhat sa mga buluhaton alang kaninyo nga dili na ninyo mahimo mobuhat niini uban sa gugma, kamabination, ug diwa sa pag-amuma.

Kami naglaum nga kamo padayong maghunahuna og maayong mga butang ug mga pagbati diha sa inyong kasingkasing ug hunahuna ug daling mosalikway niadtong makadaut kaninyo. Kami mosalig nga kamo mag-ampo kada adlaw ug gani matag oras, kon gikinahanglan. Sama sa gitudlo diha sa Basahon ni Mormon, “Mopuyo sa pagkamapasalamaton matag adlaw, alang sa daghan nga mga kalooy ug mga panalangin diin [ang Dios] mitugyan nganha kaninyo” (Alma 34:38).

Inyong makaplagan nga ang pagbasa kada adlaw sa Basahon ni Mormon makapabayaw sa inyong espiritu, makapaduol ninyo sa Manluluwas, ug makatabang ninyo nga mahimong estudyante sa ebanghelyo kinsa mopakigbahin sa uban niining talagsaong kamatuoran.⁸

Importante nga tagdon sa pamilya ang ilang mga tigulang ug mga apohan uban sa gugma, pag-amuma, ug pagtahud nga angay kanila.

Karon sulod sa pipila ka minuto mamulong ko sa kapamilya sa mga tigulang. Atong sublion ang kasulatan gikan sa Salmo: “Ayaw ako pag-isalikway sa panahon sa pagkatigulang; ayaw ako pagbiyai sa diha nga ang akong kusog maluya na” (Salmo 71:9).

Among giawhag ang mga kapamilya sa pagtratar sa ilang mga tigulang ug mga apohan uban sa gugma, pag-amuma, ug pagtahud nga angay kanila. Atong hinumduman ang sugo sa kasulatan nga kinahanglan natong amumahon kanang anaa sa atong balay aron dili kita mahimong “labi pa nga dautan kay sa dili magtutuo” (1 Timoteo 5:8). Mapasalamaton ko sa akong pinalanggang pamilya mismo ug sa mahigugmaong pag-amuma nga ilang gihatag sa ilang mga ginikanan sulod sa daghang katuigan.

Hinumdumi nga ang mga ginikanan ug mga apohan atong mga responsibilidad, ug ato silang amumahan sa atong pinakamaayong abilidad. Kon ang mga tigulang walay pamilya nga muamuma kanila, ang mga lider sa priesthood ug Relief Scoiety kinahanglang maningkamot sa pagtubag sa ilang panginahanglan sa mahigugmaong paagi. Kami may pipila ka sugyot ngadto sa kapamilya sa mga tigulang.

Sukad pa kaniadto ang Ginoo mikulit sa Napulo ka Sugo ngadto sa mga bato nga papan, ang Iyang mga pulong gikan sa Sinai milanog hangtud sa daghang mga siglo nga “tahuron mo ang imong amahan ug ang imong inahan” (Exodo 20:12).

Sa pagtahud sa atong mga ginikanan nagpasabut nga taas ang atong pagtan-aw kanila. Kita mohigugma ug modayeg kanila ug maghunahuna kabahin sa ilang kalipay ug kaayohan. Ato silang tagdon sa maayong kabubut-on ug manggihunahunaong konsiderasyon. Atong sabton ang ilang panglantaw. Sa tinuod ang pagtuman sa mga tinguha ug mga panghinaut sa mga ginikanan usa ka bahin sa pagtahud.

Dugang pa, ang atong mga ginikanan angayan sa atong pagtahud tungod sa paghatag kanato mismo og kinabuhi. Labaw pa niini dili gyud maihap ang ilang pagsakripisyo samtang ila kitang giatiman ug giamuma sa atong pagkamasuso ug pagkabata, nagsangkap kanato sa mga kinahanglanon sa kinabuhi, ug nagtambal kanato sa pisikal nga mga sakit ug naghupay sa kaugtas sa emosyon sa pagdako. Kasagaran, sila naghatag kanato og oportunidad nga makaangkon og edukasyon, ug, sa dakong paagi, ila kitang giedukar. Daghan sa atong nasayran ug nakamahuan atong nakat-unan gikan sa ilang ehemplo. Unta kita magmapasalamaton kanila ug ipakita kana nga pasalamat.

Magkat-on usab kita sa pagpasaylo sa atong mga ginikanan, kinsa, tingali nakahimo og mga sayop samtang nagpadako kanato, hapit kanunay ilang gibuhat ang ilang nasayran nga pinakamaayo. Unta kita mopasaylo kanila sama nga kita gustong mapasaylo sa atong mga anak mismo kon kita nasayop.

Bisan kon ang mga ginikanan natigulang na, kinahanglan nato silang tahuron pinaagi sa paghatag nila og kagawasan sa pagpili ug oportunidad nga dili magsalig kutob sa mahimo. Dili nato ihikaw kanila ang mga pagpili nga ila pang mahimo. Pipila sa mga ginikanan makahimo pa nga mabuhi ug moamuma sa ilang kaugalingon sa ilang katigulangon ug mas gusto nila kining buhaton. Kon ila pang mahimo, tuguti sila.

Kon dili na kaayo sila makahimo, nan ang mga kapanguhaan sa pamilya, Simbahan, ug komunidad gikinahanglan sa pagtabang nila. Kon ang tigulang dili na makaatiman sa ilang kaugalingon, bisan pa sa tabang, ang pag-amuma mahimong himoon sa balay sa sakop sa pamilya kon posible. Ang mga kapanguhaan sa Simbahan ug sa komunidad mahimong gikinahanglan usab niining sitwasyona.

Ang tahas sa care-giver importante. Adunay dakong panginahanglan sa suporta ug tabang alang niini nga tawo. Kini sa kasagaran mao ang tigulang na nga kapikas o hamtong nga anak nga babaye nga adunay mga anak nga amumahon ingon man usab sa tigulang.⁹

Kadtong napanalanginan og kasuod sa ilang mga apohan ug ubang katigulangan makasinati og nindot kaayong panag-uban ug pakigrelasyon.

Kami naglaum usab nga inyong iapil ang mga tigulang sa mga kalihokan sa pamilya kon posible. Dakong kalipay alang kanamo nga makita ang aktibo, mapinanggaong mga apo nga kauban sa ilang mahigugmaong mga apohan. Ganahan kaayo ang mga bata niining mga okasyona. Ganahan kaayo sila nga ang ilang mga apohan mobisita nila ug makigdungan og panihapon nila, maanaa sa mga family home evening, ug sa ubang espesyal nga mga kalihokan. Mga oportunidad kini sa pagtudlo og pamaagi sa pagpasidungog, paghigugma, pagtahud, ug pag-amuma sa mga katigulangan.

Ang mga apohan adunay dakong impluwensya sa ilang mga apo. Sila adunay daghang oras ug dili sama ka busy sa ginikanan, busa may panahon sa pag-abli og libro ug magbasa, magsaysay og mga istorya, ug magtudlo unsaon paggamit sa mga baruganan sa ebanghelyo. Ang mga bata makabaton og panglantaw sa kinabuhi nga dili lang magantihon apan makahatag kanila og kasiguradoan, kalinaw, ug kalig-on. Posible ra ang pagpadala og mga sulat, [mga rekording], ug mga litrato, ilabi na niadtong lagyo kaayo ug dili kanunay magkita sa usag usa. Kadtong napanalanginan og kasuod sa ilang mga apohan ug ubang tigulang na makasinati og nindot kaayong panag-uban ug pakigrelasyon. Adunay mga higayon nga sila makatambong og gradwasyon, mga kasal, mga pagbiyahe ngadto sa templo, … ug ubang espesyal nga mga hitabo kauban sa mga sakop sa pamilya.

Kami nalingaw nga magtan-aw sa among mga anak ug apo nga nagtubo ug nagmalampuson sa espesyal nga paagi samtang among gisaw-an ang daghan nilang kalipay ug kadaugan. Ang kalipay nagpanalangin sa among kinabuhi samtang ang among mga anak naningkamot ug nagmalampuson sa ilang kinabuhi. Sa 3 Juan 1:4 atong mabasa, “Wala na akoy kalipay nga molabaw pa niini nga mao ang pagkadungog nga ang akong mga anak nanagsubay sa kamatuoran.” Ug ang pagkasayud niini makapagbag-o sa gugma ug kaisug nga magpadayon sa ila mismong mga kalisud.¹⁰

A young woman visting with an elderly woman in a wheelchair. — “Ang mga apohan adunay dakong impluwensya sa ilang mga apo.”

Ang mga lider sa Simbahan kinahanglang mainampuong magtinguha sa Espiritu aron matabangan ang mga miyembro nga masangkap ang mga panginahanglan sa mga tigulang na.

Among … giawhag ang mga lider sa priesthood sa mga tigulang nga magma-sensitibo sa Espiritu sa atong Amahan sa Langit sa pagtimbang-timbang ug pagsangkap sa mga pisikal, emosyonal, ug pinansyal nga mga panginahanglan sa mga tigulang. Kami misalig nga inyong gamiton ang inyong mga magtatambag, mga lider sa korum sa Melchizedek Priesthood, ug mga lider sa Relief Society, mga home teacher, ug mga visiting teacher niining dakong responsibilidad, kay kinahanglan ni natong buhaton sa walay pagpanuko.

Kami naglaum nga ang mga lider sa priesthood ug auxiliary magpadayon sa paghatag og mga calling sa mga tigulang diin ilang magamit ang ilang daghang mga kaalam ug tambag. Kami nanghinaut, kon mahimo, silang tanan mahimong home teacher o visiting teacher. Bisan kadtong maingon ta nga naglisud sa pagbangon ug dili makagawas sa balay usahay makatabang sa pag-amuma pinaagi sa pagtawag gamit ang telepono, pagsulat, o ubang espesyal nga mga buluhaton.

Daghang mabuhat ang lider sa priesthood sa pagtabang ug pag-awhag sa mga indivibidwal ug magtiayon samtang mag-andam sila nga mag-misyon. Ang temple extraction [karon gitawag og family history indexing] ug mga programa sa welfare napanalanginan og maayo niadtong anaa sa ilang katigulangon ug adunay mga oportunidad nga makaserbisyo niining dapita.

Kami nanghinaut nga ang tanang indibidwal ug magtiayon nga tigulang adunay masinabtanon ug maamumahon nga mga home teacher ug visiting teacher nga gi-assign kanila. Dakong paghupay ug kalinaw ang mabati niadtong nasayud nga adunay tawo nga ilang masaligan panahon sa emerhensya o panginahanglan. Importante nga makita ang pag-amping sa sinultihan, pagtahud, ug sinseridad sa pagtimbang-timbang ug pagtabang niining mga panginahanglan.

Kami nanghinaut nga inyong paapilon ang makahimo pa nga mga tigulang sa mga buluhaton sa mahigugmaong pagserbisyo [compassionate service assignments]. Ipaapil sila sa sosyal nga mga kalihokan sa stake ug ward, ilabi na niadtong mga single nga miyembro ug niadtong may nagsalig [dependent] nga mga kapikas. Kasagaran makalimtan sila. Ilabi na sa panahon nga mamatay ang kapikas, ikahatag kanila ang mapinanggaong pag-amuma. Alang sa kadaghanan kini ang pinakasensitibo nga panahon.

Usahay ang temporaryong paghupay gikinahanglan kaayo ug mapasalamatan sa mga sakop sa pamilya kinsa naghatag og kanunayng pag-amuma sa pisikal ug emosyon niadtong may espesyal nga panginahanglan. Importante nga tabangan ang pamilya nga makalihok isip pamilya uban sa panagsang pagpagaan sa dagkong mga responsibilidad nga mahitabo sa taas og tagal nga panahon ug makamatay nga sakit. Ang tanan nagkinahanglan og mahigugmaong suporta ug kahupayan gikan sa bug-at nga mga buluhaton sa grabing mga sakit o problema.

Ang transportasyon dakong problema sa mga tigulang. Kita makatabang pinaagi sa pagpasakay nila aron sila makatambong sa mga miting sa Dominggo, makabisita sa mga minahal, makapamalit, ug moadto sa doktor o klinika.

Usab, kinahanglan nga kita mainampuong magtinguha og inspirasyon ug direksyon sa pag-amuma sa mga tigulang. Kanunay may dakong kalainan ang mga indibidwal ug mga panginahanglan sa indibidwal.¹¹

Ang atong mga katuigan sa pagkatigulang mamahimo nga atong pinakanindot nga katuigan.

Ang Dios nagpanalangin sa mga tigulang sa Simbahan. Gihigugma ko kamo sa akong tibuok kasingkasing. Usa usab ako kaninyo.

Daghan pa kamong angay nga pakabuhian. Unta kining bulawanong katuigan mao ang inyong pinakanindot nga katuigan samtang hingpit kamo sa inyong pagpakabuhi ug paghigugma ug pagserbisyo. Ug ang Dios mopanalangin niadtong nangalagad sa inyong mga panginahanglan—inyong pamilya, mga higala ug mga kaubanang miyembro ug mga lider sa Simbahan.

Ibilin ko kaninyo ang akong pagpamatuod bahin sa kalipay sa pagpakabuhi—ang hingpit nga kalipay sa pagsunod sa ebanghelyo ug mosinati sa kalayo sa Magtutunaw [Refiner’s fire] ug sa kabalaan nga mahitabo. Sama sa maayong pagkasulti ni Apostol Pablo, “Kita nasayud nga diha sa matag usa ka butang ang Dios nagabuhat og maayo uban kanila nga mga nahigugma Kaniya” (Mga Taga-Roma 8:28).

Mopanalangin ko ninyo. Ang Manluluwas buhi. Kini Iyang Simbahan. Ang buhat tinuod, ug sa mga pulong sa atong Ginoo ug Manluluwas, “Tan-aw ngari kanako, ug lahutay hangtud sa katapusan, ug ikaw mabuhi; kay ngadto kaniya nga molahutay hangtud sa katapusan Ako mohatag og kinabuhing dayon” (3 Nephi 15:9).¹²

Mga Sugyot alang sa Pagtuon ug Pagtudlo

Mga Pangutana

Sa unsang paagi nakabenepisyo mo sa “kaalam ug kasinatian” sa mga tawo nga mas magulang pa ninyo? (Tan-awa sa seksyon 1.)
Sa seksyon 2, si Presidente Benson naglista og walo ka butang nga mahimo sa mga tigulang aron “mapahimudsan ang [ilang] katuigan sa pagkatigulang.” Ikonsiderar ang tanang sugyot. Sa unsang paagi kining mga sugyot makapalambo sa atong kinabuhi bisan unsa pay atong pangidaron?
Sa inyong hunahuna ngano nga ang pagserbisyo mao ang “yawe sa pagbuntog sa kamingaw ug sa pagbati nga walay pulos”? (Tan-awa sa seksyon 3.) Kanus-a ninyo nakita nga kini tinuod?
Pamalandungi ang tambag ni Presidente Benson alang kanato kon kita magkasakit ug mobati sa sakit (tan-awa sa seksyon 4). Sa unsang paagi kining tambag makatabang nato nga “magpabiling lig-on sa kinaiya ug espiritu”?
Ikonsiderar ang mga pagtulun-an ni Presidente Benson sa seksyon 5. Sa unsang paagi ang mga anak ug apo mopasidungog sa ilang tigulang na nga mga ginikanan ug apohan?
Kanus-a kamo nakakita nga ang mga batan-on ug mga tigulang nalingaw nga nagkuyog sa usag-usa? (Tan-awa sa seksyon 6.) Unsay atong mabuhat diha sa atong mga pamilya ug sa Simbahan aron makaugmad og ingon niini nga matang sa relasyon?
Sa unsang paagi nga ang mga lider sa Simbahan ug ang mga miyembro sa ward o branch makatabang sa pagtubag sa mga panginahanglan sa mga tigulang? (Para sa pipila ka ehemplo, tan-awa ang seksyon 7.)
Unsay inyong pagsabut sa pagsinati sa “hingpit nga kalipay sa pagsunod sa ebanghelyo”? (Tan-awa sa seksyon 8.) Unsay mga ehemplo ang inyong nakita sa mga tawo nga matinud-anong nakalahutay sa katapusan?

May Kalabutan nga mga Kasulatan

Mga Proverbio 20:29; Isaias 46:3–4; Lucas 2:36–38; Mga Taga-Efeso 6:1–3; Tito 2:1–5; Santiago 1:27; D&P 121:7–8

Tabang sa Pagtuon

“Ang pagbuhat sa unsay imong nakat-unan mohatag og dugang ug malungtaron nga pagsabut (tan-awa sa Juan 7:17)” (Isangyaw ang Akong Ebanghelyo [2004], 21). Ikonsiderar ang pagpamalandong kon unsaon ninyo paggamit ang mga pagtulun-an sa ebanghelyo diha sa panimalay, sa trabahoan, ug sa inyong mga responsibilidad sa Simbahan.