Kapitulo 15
Ang Sagradong mga Calling sa mga Amahan ug mga Inahan
“Hinaut nga kita magmatinud-anon ngadto niining importante nga obligasyon sa pagkaginikanan, kining sagrado nga obligasyon.”
Gikan sa Kinabuhi ni Ezra Taft Benson
Pinaagi sa pulong ug sa ehemplo, sa panimalay ug sa tibuok kalibutan, sa Simbahan ug sa gobyerno nga mga sitwasyon, gitudlo ni Presidente Ezra Taft Benson ang importansya sa pagkamaayong mga ginikanan. “Amumaha ang inyong mga anak uban sa gugma ug sa mga pahimangno sa Ginoo,” miingon siya.1 “Ang Dios mohimo sa mga ginikanan nga responsable sa ilang pagkatinugyanan sa pag-atiman sa ilang pamilya. Kini usa ka labing sagrado nga responsibilidad.”2
Si Presidente Benson ug ang iyang asawa, si Flora, nagtambayayong sa pagtuman sa ilang sagrado nga mga responsibilidad isip mga ginikanan. Ilang “gituman ang buluhaton sa pag-amuma sa ilang unit sa pamilya uban ang kaabtik ug kadasig.”3 Kanunay silang magtinambagay mahitungod sa ilang mga anak ug sa ubang mga butang. “Akong nakita nga ako adunay babaye nga masinabtanon sa espirituhanong paagi sa akong kiliran,” miingon si Presidente Benson.4
Nagtinabangay sila sa paghimo og usa ka panimalay diin ang ilang mga anak makatubo ug makakat-on—ug diin ang ilang mga anak gusto nga maanaa diha. “Mas maayo pa nga anaa ako sa panimalay kay sa bisan asa,” miingon ang ilang anak nga lalaki nga si Mark. “Kini usa ka dangpanan gikan sa unos. Si Mama mao ang naghatag og panalipod, ug si Papa anaa uban sa iyang kalig-on.”5
Si Presidente ug Sister Benson nagtuman sa ilang mga responsibilidad isip mga ginikanan pinaagi sa pag-ampo. Si Mark miingon: “Si Mama adunay mas dakong hugot nga pagtuo kay ni bisan kinsa nga babaye nga akong sukad nailhan. … Wala ako makakita og mas daghang pag-ampo sukad sa akong kinabuhi. Dali kaayo siyang makaluhod, mag-ampo alang sa iyang mga anak, mahitungod ba sa eksamen o away diha sa eskwelahan, kini walay pagsapayan. Siya ug si Papa aduna nianang yano nga hugot nga pagtuo.”6
Si Presidente Benson kanunay nga layo sa panimalay tungod sa iyang trabaho ug mga katungdanan sa Simbahan, busa si Flora ang mibarug kasagaran sa responsibilidad sa pagmatuto ug sa pagtudlo sa ilang unom ka mga anak. Nalingaw siya sa iyang tahas sa pagka-inahan. “Ang panimalay mao ang sentro sa atong tawhanong mga pagbati,” siya miingon.7 Nahinumdom si Mark, “Hingpit nga gihigugma ni Mama ang panimalay. Ug gihigugma niya kami—dili tungod kay iya kadtong katungdanan, apan tungod kay kana mao ang iyang kinabuhi.”8 Nagpahayag sa iyang mga pagbati mahitungod sa importansya sa pagka-inahan, misulat si Flora: “Kon kamo gustong makakaplag og katungdanan, ayaw tan-awa ang gingharian, tan-awa ang duyan. Adunay gamhanang gahum diha sa usa ka inahan. Siya ang nag-umol sa mga kasingkasing, mga kinabuhi, ug naghulma sa kinaiya.”9
Kon si Presidente Benson layo sa panimalay, kanunay siyang mangita og paagi sa pagbantay ug paglig-on sa iyang pamilya. Aduna siyay regular nga kontak kanila pinaagi sa mga tawag sa telepono ug mga sulat. Kon anaa siya sa panimalay, migahin siya og daghang oras uban kanila kon mahimo. Kasagaran niyang itudlo ang istorya sa “usa ka nagkapuliki nga amahan kinsa mipasabut nganong migahin siya og mga oras sa pakigdula og bola sa iyang anak nga lalaki pinaagi sa pag-ingon, ‘Maayo pang magsakit ang akong buko-buko karon kay sa magsakit ang akong dughan sa kaulahian.’”10
Si Ezra Taft Benson uban sa iyang anak nga mga lalaki, sila si Reed ug Mark
Migahin usab siya og sobra nga oras sa tagsa-tagsa niya ka mga anak. Nahinumdom si Mark nga gidala siya sa iyang amahan ngadto sa Siyudad sa Salt Lake, Utah, aron magpahiling sa usa ka medikal nga espesyalista: “Unsa ka makalingaw nga makig-uban ni Papa, siya lamang ug ako! Nag-istoryahay kami mahitungod sa bisan unsa nga akong gusto nga iistorya. Gani bisan bata pa, ako nahibalo nga gihigugma ako ni Papa, tungod kay uban siya kanako ug nagtabang nga mamaayo ako.”11
Kon siya makahimo, dad-on ni Presidente Benson ang iyang mga anak uban kaniya sa panahon sa iyang mga biyahe. Niadtong Marso 1948 gidala niya ang iyang anak nga si Bonnie, kinsa siete anyos niana nga panahon, ngadto sa usa ka miting sa agrikultura didto sa Nebraska. “Ang prensa [press] nahibulong kaayo sa kalmang pamarog sa batang gamay, ug sa talagsaong ehemplo sa usa ka amahan nga nagdala sa ingon ka gamay nga bata sa usa ka taas nga biyahe aron sa pagtambong og ingon kaimportanting kalihokan, nga ang larawan ni Bonnie gibutang sa atubangang pahina [sa pamantalaan] sa pagkabuntag. Apan ngadto ni Elder Benson ang hitabo dili talagsaon. Kanunay niyang gidala ang iyang mga anak uban kaniya sa mga biyahe sa gawas sa ilang dapit, isip usa ka paagi sa paglig-on og maayong relasyon ug sa pag-edukar kanila.”12
Mga Pagtulun-an ni Ezra Taft Benson
1
Ang calling sa pagka-amahan mahangturon.
Mga amahan, inyo ang mahangturong calling nga kamo dili gayud ma-release. Ang mga calling sa Simbahan, ingon sa kaimportante niini, sa ilang kinaiyahan kutob lamang sa pipila ka panahon, ug unya ang husto nga pag-release mahitabo. Apan ang calling sa pagka-amahan mahangturon, ug ang kaimportante niini walay utlanan sa panahon. Kini usa ka calling alang sa karon ug sa kahangturan.13
Ang atong sundanan, o modelo, alang sa pagka-amahan mao ang atong Langitnong Amahan. Giunsa Niya pagdala ang Iyang mga anak? Hinoon, aron mahibaloan kana, dayag lamang, [ang mga amahan] gikinahanglan nga mahibalo mahitungod sa ebanghelyo, sa mahinungdanong plano sa Ginoo.14
Alang sa usa ka lalaki, walay calling ingon ka taas sama nianang usa ka matarung nga patriarch, naminyo diha sa balay sa Ginoo, nagdumala sa Iyang mga anak. Bisan ang mao nga Elohim gusto nga kita motawag Kaniya isip “Amahan namo nga anaa sa langit” (Mateo 6:9; 3 Nephi 13:9).15
2
Ang mga amahan gikinahanglan nga mohatag og espirituhanong pagpangulo sa ilang mga pamilya.
Ang amahan kinahanglan gayud nga hidlawon ug uhawon ug mangandoy sa pagpanalangin sa iyang pamilya, moduol sa Ginoo, mamalandong sa mga pulong sa Ginoo, ug mopuyo pinaagi sa Espiritu aron mahibalo sa hunahuna ug kabubut-on sa Ginoo ug unsa ang kinahanglan gayud niyang buhaton sa paggiya sa iyang pamilya.16
[Mga amahan,] kamo adunay sagradong responsibilidad sa paghatag og espirituhanong pagpangulo sa inyong pamilya.
Sa usa ka pamphlet nga gimantala daghang tuig na ang milabay sa Konseho sa Napulog Duha, misulti kami sa mosunod: “Ang pagka-amahan usa ka pagpangulo, ang labing importanting matang sa pagpangulo. Kini kanunay na nga ingon niana; kini kanunay nga mahimong ingon niana. Amahan, uban sa panabang ug tambag ug pag-awhag sa imong mahangturong kauban, ikaw ang modumala sa panimalay” (Father, Consider Your Ways [pamphlet, 1973], 4–5). …
Uban sa gugma nga ania sa akong kasingkasing alang sa mga amahan sa Israel, mahimo bang mosugyot ako og 10 ka piho nga mga paagi nga ang mga amahan makahatag og espirituhanon nga pagpangulo sa ilang mga anak:
1. Paghatag og panalangin sa amahan ngadto sa inyong mga anak. Bunyagi ug kumpirmahi ang inyong mga anak. I-orden ang inyong anak nga mga lalaki ngadto sa priesthood. Kini mahimong labing nindot nga espirituhanong hitabo diha sa mga kinabuhi sa inyong mga anak.
2. Personal nga giyahi ang mga pag-ampo sa pamilya, inadlaw nga pagbasa sa kasulatan, ug sinemana nga mga family home evening. Ang inyong personal nga pag-apil mopakita sa inyong mga anak unsa gayud kaimportante kini nga mga kalihokan.
3. Kon mahimo, kuyog og tambong sa mga miting sa Simbahan isip pamilya. Ang pag-ampo ubos sa inyong pagpangulo importante ngadto sa espirituhanong kaayohan sa inyong mga anak.
4. Himoa ang papa-anak nga babaye nga pakigkuyog ug amahan-ug-anak nga mga lalaki nga lulinghayaw uban sa inyong mga anak. …
5. Paghimo og mga tradisyon sa mga pagbakasyon ug mga pagbiyahe ug paglulinghayaw sa pamilya. Kini nga mga panumduman dili gayud makalimtan sa inyong mga anak.
6. Paghimo kanunay og tagsa-tagsa ka pakig-istorya sa inyong mga anak. Pasultiha sila mahitungod sa unsay ilang gusto nga isulti. Tudlo-i sila og mga baruganan sa ebanghelyo. Tudlo-i sila og tinuod nga mga hiyas. Sultihi sila nga kamo nahigugma kanila. Ang personal nga panahon uban sa inyong mga anak nagsulti kanila unsa ang prayoridad ni Papa.
7. Tudlo-i ang inyong mga anak sa pagtrabaho, ug ipakita kanila ang bili sa pagtrabaho alang sa takus nga katuyoan. …
8. I-awhag ang maayong musika sining ug literatura diha sa inyong mga panimalay. Ang mga panimalay nga adunay pagbati sa kahapsay ug kanindot mopanalangin sa mga kinabuhi sa inyong mga anak sa hangtud.
9. Kon itugot sa gilay-on, tambong kanunay sa templo uban sa inyong asawa. Ang inyong mga anak mas makasabut sa importansya sa kaminyoon diha sa templo ug sa mga panaad diha sa templo ug sa mahangturong unit sa pamilya.
10. Ipakita sa inyong mga anak ang hingpit nga kalipay ug katagbawan sa pagserbisyo diha sa Simbahan. Kini mahimong makatakod ngadto kanila, busa sila, usab, buot nga moserbisyo diha sa Simbahan ug mahigugma sa gingharian.
O, mga bana ug mga amahan sa Israel, makahimo kamo og daghan alang sa kaluwasan ug kahimayaan sa inyong mga pamilya! Ang inyong mga responsibilidad importante kaayo.17
“Paghimo kanunay og tagsa-tagsa nga pakig-istorya sa inyong mga anak.”
Usahay kita makadungog og mga istorya sa mga lalaki, bisan diha sa Simbahan, kinsa nagtuo nga ang pagkapangulo sa panimalay ingon og nagbutang kanila og hawud nga tahas ug nagtugot kanila sa pagdiktar ug paghimo og mga pagpamugos diha sa ilang pamilya.
Si Apostol Pablo nagpasabut nga “ang bana mao ang ulo sa asawa, maingon usab nga si Kristo ang ulo sa simbahan” (Mga Taga-Efeso 5:23; mga italic gidugang). Kana mao ang modelo nga kinahanglan nga atong sundon sa atong tahas sa pagdumala diha sa panimalay. Wala nato makita nga ang Manluluwas naggiya sa Simbahan sa isug o manakit nga kamot. Wala nato makita nga ang Manluluwas nagtagad sa Iyang Simbahan nga walay pagrespeto o pagpasagad. Wala nato makita ang Manluluwas nga naggamit og pwersa o pagpamugos sa pagtuman sa Iyang mga katuyoan. Bisan asa dili nato makita ang Manluluwas nga naghimo og bisan unsa apan kana nga naglig-on, nagbayaw, naghupay, ug naghimaya sa Simbahan. Mga kaigsoonan, moingon ako kaninyo uban sa kaligdong, Siya mao ang modelo nga kinahanglan gayud nga atong sundon samtang kita nangako sa espirituhanong paggiya sa atong mga pamilya.18
Isip patriarch sa inyong panimalay, kamo adunay bug-at nga responsibilidad sa pagdawat sa pagpangulo diha sa paggiya sa inyong mga anak. Kamo kinahanglan nga mohimo og panimalay diin ang Espiritu sa Ginoo mopuyo. …
Ang inyong mga panimalay kinahanglan nga mahimong mga dangpanan ug kalinaw ug hingpit nga kalipay alang sa inyong pamilya. Sa tinuod walay bata nga kinahanglang mahadlok sa iyang kaugalingong amahan—ilabi na sa usa ka priesthood nga amahan. Ang katungdanan sa amahan mao ang paghimo sa iyang panimalay nga usa ka dapit sa kamaya ug hingpit nga kalipay. … Ang gamhanang epekto sa matarung nga mga amahan nga naghatag og ehemplo, nagdisiplina ug nagbansay, nagmatuto ug naghigugma importante kaayo sa espirituhanong kaayohan sa [ilang ] mga anak.19
3
Ang tahas sa usa ka inahan gi-orden sa Dios.
Ang [mga inahan] mao, o kinahanglang mao gayud ang kasingkasing ug kalag sa pamilya. Wala nay laing sagradong pulong nga anaa sa kalibutanon o balaang kasulatan kay sa inahan. Wala nay laing halangdon nga trabaho kay sa nianang usa ka maayo ug mahinadlokon sa Dios nga inahan.
Sa mahangturong pamilya, gihimo sa Dios nga ang mga amahan mao ang modumala sa panimalay. Ang mga amahan kinahanglan nga mobuhi, mohigugma, motudlo ug mogiya. Ang tahas sa inahan gi-orden usab sa Dios. Ang mga inahan mao ang manganak, moantus, moamuma, mohigugma, ug mobansay. Mao kini ang gipahayag sa mga pagpadayag.20
Atong nasabtan nga pipila sa mga kababayen-an, dili sa ilang kaugalingong sayop, dili makahimo sa pagpanganak. Ngadto niining matahum nga mga sister, ang tanang mga propeta sa Dios nagsaad nga sila pagapanalanginan og mga anak didto sa kahangturan ug kana nga kaliwatan dili ihikaw kanila.
Pinaagi sa lunsay nga hugot nga pagtuo, pakilooy nga mga pag-ampo, pagpuasa, ug espesyal nga mga panalangin, daghan niining sama nga matahum nga mga sister, uban sa ilang halangdon nga mga kapikas diha sa ilang mga kiliran, namilagrohan sa ilang mga kinabuhi ug napanalanginan og mga anak. Ang uban mainampoong nagsagop og mga bata. Kami nagdayeg niining maayo nga mga magtiayon alang sa ilang mga sakripisyo ug gugma nga inyong gihatag niadtong mga bata nga inyong gipili nga tawgon og inyong kaugalingon.21
Ang Dios mopanalangin sa atong maayo nga mga inahan. Nag-ampo kami alang kaninyo. Nagpaluyo kami kaninyo. Nagpasidungog kami kaninyo samtang kamo nag-antus, nag-amuma, nagbansay, nagtudlo, ug naghigugma alang sa kahangturan. Isaad nako kaninyo ang mga panalangin nga gikan sa langit ug ang “tanan nga iya [sa] Amahan” (tan-awa sa D&P 84:38) samtang kamo nagpalambo sa labing halangdon sa tanan nga calling—usa ka inahan sa Zion.22
4
Ang mga inahan kinahanglan nga mohigugma, motudlo, ug mogahin og epektibo nga panahon sa ilang mga anak.
Mga inahan sa Zion, ang inyong hinatag sa Dios nga mga tahas mahinungdanon kaayo sa kaugalingon ninyong kahimayaan ug sa kaluwasan ug kahimayaan sa inyong pamilya. Ang anak nagkinahanglan og inahan labaw pa sa tanang butang nga mapalit sa kwarta. Ang paggahin og panahon uban sa inyong mga anak mao ang labing mahinungdanon sa tanang mga gasa.23
Uban sa gugma sa akong kasingkasing alang sa mga inahan sa Zion, ako karon buot nga mosugyot og 10 ka piho nga mga paagi nga ang atong mga inahan mahimong mogahin og epektibong panahon uban sa ilang mga anak.
[Una,] kon mahimo, anaa kamo sa mga panahon nga ang inyong mga anak moabut o molakaw—kon sila mobiya ug mopauli gikan sa eskwelahan, kon sila mobiya o mopauli gikan sa mga date, kon sila magdala og mga higala diha sa panimalay. Anaa kamo sa mga panahon nga ang inyong mga anak 6 o 16. …
Ikaduha, mga inahan, paggahin og panahon nga mahimong tinuod nga higala sa inyong mga anak. Paminawa ang inyong mga anak, paminawa og tinuod. Pakigsulti kanila, katawa ug pakigkomedya uban kanila, kanta uban kanila, pakigdula uban kanila, duyog og hilak kanila, gaksa sila, dayga sila sa tinuod. Oo, kanunay nga paggahin og panahon sa tagsa-tagsa ka anak. Pagpakatinuod nga higala ngadto sa inyong mga anak.
Ikatulo, paggahin og panahon sa pagbasa ngadto sa inyong mga anak. Sugod gikan sa duyan, basahi ang inyong anak nga mga lalaki ug mga babaye. … Magtanom kamo og gugma alang sa maayong literatura ug tinuod nga gugma alang sa mga kasulatan kon inyong basahan kanunay ang inyong mga anak.
Ikaupat, paggahin og panahon sa pag-ampo uban sa inyong mga anak. Ang mga pag-ampo sa pamilya, ubos sa paggiya sa amahan, kinahanglan nga himoon sa buntag ug gabii. Ipabati sa inyong mga anak ang inyong hugot nga pagtuo samtang kamo mangayo sa mga panalangin sa langit alang kanila. … Paapila ang inyong mga anak sa pamilya ug personal nga mga pag-ampo, ug paglipay sa ilang matahum nga mga pulong ngadto sa ilang Amahan sa Langit.
Ikalima, paggahin og panahon nga adunay makahuluganong sinemana nga home evening. Himoa nga ang inyong mga anak aktibo nga moapil. Pagtudlo kanila og husto nga mga baruganan. Himoa kini nga usa sa inyong mga tradisyon sa pamilya. …
Ikaunom, paggahin og panahon nga mag-uban sa tingkaon kutob sa mahimo. Kini usa ka hagit samtang ang mga anak mas nagkadako ug ang kinabuhi mas nagkapuliki. Apan ang malipayong panagsultihanay, pakigbahin sa mga plano ug mga kalihokan sa adlaw, ug espesyal nga mga panahon sa pagtudlo mahitabo sa tingkaon tungod kay ang mga ginikanan ug mga anak naningkamot niini.
Ikapito, paggahin og panahon sa pagbasa og dungan sa mga kasulatan isip pamilya. … Ang pagbasa og dungan sa Basahon ni Mormon isip pamilya modala og dugang nga pagka-espirituhanon nganha sa inyong panimalay ug mohatag sa mga ginikanan ug sa mga anak og gahum sa pagsagubang sa mga tintasyon ug sa pagbaton sa Espiritu Santo isip ilang kanunay nga kauban. Isaad nako kaninyo nga ang Basahon ni Mormon mousab sa mga kinabuhi sa inyong pamilya.
Ikawalo, paggahin og panahon sa paghimo og mga butang isip pamilya. Himoa nga ang pamilya nga mga paglingaw-lingaw ug mga piknik, ug mga pagsaulog sa adlaw nga natawhan ug mga pagbiyahe nga espesyal nga mga panahon ug mohatag kanila og nindot nga mga panumduman. Kon mahimo, tambong, isip pamilya, og mga hitabo diin ang usa sa mga sakop sa pamilya naapil, sama sa drama sa eskwelahan, ball game, pakigpulong, recital. Pagkuyog og tambong sa mga miting sa Simbahan, ug pagtupad og lingkod isip pamilya kon makahimo kamo. Ang mga inahan kinsa nagtabang sa mga pamilya nga mag-uban sa pag-ampo ug pagdula [motabang kanila] sa pagpabiling mag-uban ug mopanalangin sa mga kinabuhi sa mga anak sa hangtud.
Ikasiyam, mga inahan, paggahin og panahon sa pagtudlo sa inyong mga anak. Gamita ang mga higayon sa pagtudlo sa panahon sa tingkaon, sa dili pormal nga mga sitwasyon, o sa talagsaong pagtupad og lingkod diha sa tiilan sa katre sa gabii, o panahon sa sayo sa buntag nga magkuyog og lakaw. …
Ang gugma ug mainampoong pagpakabana sa usa ka inahan alang sa iyang mga anak mao ang labing importanting mga butang sa pagtudlo sa iyang kaugalingong mga anak. Tudlo-i ang mga anak og mga baruganan sa ebanghelyo. Tudlo-i sila nga maayo ang magbinuotan. Tudlo-i sila nga peligro ang pagpakasala. Tudlo-i sila og gugma alang sa ebanghelyo ni Jesukristo ug ang pagpamatuod sa kabalaan niini.
Tudlo-i ang inyong anak nga mga lalaki ug mga babaye og kaligdong, ug tudlo-i sila sa pagrespito sa pagkalalaki ug pakababaye, Tudlo-i ang inyong mga anak og sekswal nga kaputli, hustong mga sumbanan sa pakig-date, kaminyoon diha sa templo, magmisyon, ug ang importansya sa pagdawat ug pagpalambo sa mga calling sa Simbahan.
Tudlo-i sila og gugma alang sa trabaho ug ang bili sa maayong edukasyon.
Tudlo-i sila sa importansya sa hustong matang sa kalingawan, lakip ang angay nga mga salida sa sine, mga video, mga musika, mga basahon, ug mga magasin. Hisguti ang mga kadautan sa pornograpiya ug mga druga, ug tudlo-i sila sa bili sa pagpuyo og limpyo nga kinabuhi.
Oo, mga inahan, tudlo-i ang inyong mga anak sa ebanghelyo diha sa inyong kaugalingon nga panimalay, diha sa inyong tapukanan. Kini mao ang pinaka-epektibong pagtudlo nga madawat sa inyong mga anak. …
Ikanapulo ug sa katapusan, mga inahan, paggahin og panahon sa paghigugma og tinuod sa inyong gagmay nga mga anak. Ang walay kinutubang gugma sa usa ka inahan nagsunod sa ehemplo sa Kristohanong gugma.
Ang inyong tin-edyer nga mga anak nagkinahanglan usab nianang sama nga gugma ug atensyon. Kini ingon og mas sayon alang sa daghang mga inahan ug mga amahan sa pagpahayag sa ilang gugma ngadto sa ilang mga anak kon sila gagmay pa, apan mas lisud kon sila mas dagko na. Paninguhaa kini sa mainampoong paagi. Kinahanglan nga walay kal-ang sa lain-laing henerasyon. Ug ang yawe mao ang gugma. Ang atong mga kabatan-onan nagkinahanglan sa gugma ug atensyon, ug dili ang pagpatagbaw. Nagkinahanglan sila og pagbati ug pagsabut, dili pagkawalay pagpakabana gikan sa mga inahan ug mga amahan. Nagkinahanglan sila sa panahon sa mga ginikanan. Ang mabinationg pagtudlo sa inahan ug ang iyang gugma ug ang pagsalig diha sa usa ka tin-edyer nga anak nga lalaki o babaye sa tinuod makaluwas kanila gikan sa usa ka dautang kalibutan.24
“Paggahin og panahon sa pagbasa ngadto sa inyong mga anak.”
Nakahibalo ba kamo og usa ka rason nganong ang matarung nga mga inahan nahigugma sa ilang mga anak og maayo? Tungod kay sila nagsakripisyo og maayo alang kanila. Atong gihigugma unsay atong gisakripisyohan ug kita nagsakripisyo alang sa unsay atong gihigugma.25
5
Ang mga ginikanan kinahanglan nga mag-uban og trabaho diha sa panaghiusa ug gugma sa pagpatubo sa ilang mga anak.
Mga bana ug mga asawa, isip magkauban nga tiglalang, kinahanglan nga matinguhaon ug mainampoon nga modapit og mga anak ngadto sa ilang mga panimalay. … Bulahan ang bana ug asawa kinsa adunay mga anak diha sa pamilya. Ang labing lawom nga hingpit nga kalipay ug mga panalangin sa kinabuhi may kalabutan sa pamilya, pagkaginikanan, ug sakripisyo. Ang pagbaton niadtong matahum nga mga espiritu pag-anha sa atong panimalay takus sa bisan unsa nga sakripisyo.26
Kon ang mga ginikanan, diha sa pakig-uban, gugma, ug panaghiusa, nagtuman sa ilang langitnong gipahamtang nga responsibilidad ug ang mga anak motubag uban sa gugma ug pagkamasulundon, dako kaayong kalipay ang resulta.27
Ang Dios nagtabang kanato sa pagsuporta sa usag usa. Hinaut nga magsugod kini diha sa panimalay samtang nagsuporta kita sa atong mga pamilya. Hinaut nga adunay diwa sa pag-inunongay, panaghiusa, gugma, ug pagrenispetohay. Hinaut nga ang mga bana mounong ngadto sa ilang mga asawa, matinuoron ngadto kanila, maghigugma kanila, maningkamot sa pagpagaan sa ilang mga palas-anon, ug makigbahin sa responsibilidad alang sa pag-amuma, pagbansay, ug pagmatuto sa mga anak. Hinaut nga ang mga inahan ug mga asawa magpakita og diwa sa pagkamatinabangon ngadto sa ilang mga bana, motuboy ug mopaluyo kanila sa ilang mga katungdanan sa priesthood, ug magmaunungon ug matinuoron sa mga calling nga moabut diha kanila gikan sa priesthood sa Dios.28
Hinaut nga kita magmatinud-anon ngadto niining importante nga obligasyon sa pagkaginikanan, kining sagrado nga obligasyon, nga unta atong matukod nga lig-on ang atong mga panimalay diha sa mahangturong mga baruganan, nga unta kita walay mga pagmahay. Hinaut nga kita dili gayud magmaluibon [mabudhion] sa dako kaayong pagsalig nga gipahamtang ngari kanato. Hinaut nga kanunay natong hinumduman nga kini nga mga espiritu nga misulod sa atong mga panimalay mga pinili nga mga espiritu.29
Mga Sugyot alang sa Pagtuon ug Pagtudlo
Mga Pangutana
-
Miingon si Presidente Benson, “Ang atong sundanan, o modelo, alang sa pagka-amahan, mao ang atong Langitnong Amahan” (seksyon 1). Sa unsang mga paagi nga kitang yutan-on nga mga amahan makasunod sa sundanan nga gipahimutang sa Langitnong Amahan?
-
Hunahunaa ang lista ni Presidente Benson sa “10 ka piho nga mga paagi nga ang mga amahan makahatag og espirituhanon nga pagpangulo sa ilang mga anak” (seksyon 2). Sa inyong hunahuna unsaon kaha sa matag usa niini nga mga rekomendasyon pag-impluwensya sa mga anak?
-
Mipahayag si Presidente Benson, “Wala nay laing halangdon nga trabaho kay sa nianang usa ka maayo ug mahinadlokon sa Dios nga inahan” (seksyon 3). Unsa nga mga ehemplo ang inyong nakita kabahin sa halangdong pagka-inahan? Samtang ang kalibutanong mga kinaiya mahitungod sa pagka-inahan nausab, unsay atong mabuhat sa pagtuboy sa halangdon ug sagradong mga responsibilidad sa mga inahan?
-
Unsa ang pipila ka mga kaayohan nga moabut kon ang mga ginikanan ug mga anak mogahin og panahon nga mag-uban? (Alang sa pipila ka mga ehemplo, tan-awa sa seksyon 4.)
-
Unsa ang pipila ka mga panalangin nga moabut ngadto sa panimalay kon ang mga ginikanan magkahiusa sa ilang mga responsibilidad? (Tan-awa sa seksyon 5.) Unsay buhaton sa mga amahan ug mga inahan nga mahimong mas magkahiusa? Sa unsa nga mga paagi nga ang nag-inusara nga ginikanan [single parent] makadawat sa kalig-on nga ilang gikinahanglan sa pagtuman niini nga mga responsibilidad?
May Kalabutan nga mga Kasulatan
Mga Proverbio 22:6; Mga Taga-Efeso 6:4; Mosiah 4:14–15; Alma 56:45–48; 3 Nephi 22:13; tan-awa usab sa: “Ang Pamilya: Usa ka Pamahayag ngadto sa Kalibutan,” Ensign, Nob. 2010, 129
Tabang sa Pagtudlo
“Samtang inyong andamon ang inyong kaugalingon sa espirituhanong paagi ug iapil ang Ginoo sa inyong pagtudlo, mahimo kamo nga instrumento sa Iyang mga kamot. Ang Espiritu Santo mohatag og gahum sa imong mga pulong” (Pagtudlo, Walay Labaw Ka Mahinungdanon Nga Tawag [1999], 41).