Kapitulo 23

“Lig-una ang Inyong mga Stake”

“Ang mga stake ug district sa Zion simbolo sa balaang mga dapit nga gipamulong sa Ginoo diin ang Iyang mga Santos magpundok sa katapusang mga adlaw isip dangpanan gikan sa unos.”

Gikan sa Kinabuhi ni Ezra Taft Benson

Niadtong Enero 13, 1935, gipaluyohan sa mga miyembro sa Boise Idaho Stake ang 35 anyos nga si Ezra Taft Benson isip unang magtatambag sa ilang kapangulohan sa stake. Ubos sa pagdumala ni Presidente Scott S. Brown, si Presidente Benson adunay daghang oportunidad nga makaserbisyo, mangulo ug motudlo. Sama pananglit, dako siya og natampo nga ang mga naghupot sa Melchizedek Priesthood mibalik og aktibo sa Simbahan,¹ ug siya nakatabang sa pagdumala og implementar sa programa sa welfare sa Simbahan.²

Niadtong 1938 ang stake mitubo og sobra sa 8,000 ka mga miyembro, mao nga ang Unang Kapangulohan misugo nga kini bahinon og tulo ka stake. Si Presidente Benson miingon nga siya “nakalitan” sa dihang, pagka-Nobyembre 27, 1938, siya gi-call sa pagdumala sa usa niadto nga mga stake. Ang iyang asawa, si Flora, miingon sa ilang mga anak nga usa ka panalangin nga ang ilang amahan gitawag niini nga calling.³

Ang pagserbisyo ni Presidente Benson isip presidente sa stake usa ka panalangin sa tibuok stake. Gipadayon niya ang pagtudlo sa mga baruganan sa welfare, ug gihatagan niya’g espesyal nga atensyon ang mga batan-on. Sa wala pa magsugod ang sesyon sa usa ka komperensya sa stake, nakamatikod siya nga adunay grupo sa batan-ong mga lalaki nga mangikyas na unta sa meetinghouse. “Hinay-hinay silang milipot padulong sa pultahan sa luyo, nagsige og tan-aw sa lobby aron pagsiguro nga walay makamatikod sa ilang paggawas. Diha dayon migawas [siya] sa iyang opisina, gihukman ang sitwasyon, ug gidupa ang iyang mga kamot aron dili makagawas ang mga batan-on. ‘Nalipay kaayo kong nakakita ninyo,’ miingon siya. ‘Magdungan ta og adto sa komperensya.’ Gigiyahan niya sila sa atubangang lingkuranan, ug sa wala madugay gitawag sila sa paghatag og pagpamatuod.”⁴

Wala kaabut og duha ka bulan sa dihang si Presidente Benson nagsugod sa pagserbisyo isip presidente sa stake, aduna na usab laing surprisa. Gitanyagan siya og trabaho isip executive secretary sa National Council of Farmer Cooperatives, nga kinahanglang magtrabaho siya sa Washington, D.C. Sa sinugdanan iyang gibalibaran ang tanyag, apan human mokonsulta ni Flora ug sa Unang Kapangulohan, midesisyon siya sa pagdawat niini.⁵ Sa dihang gi-release siya isip presidente sa stake niadtong Marso 26, 1939, misulat siya nga kadto ang “pinakasakit nga adlaw nga akong nasinati. … Sa akong pakigpulong [ngadto sa mga miyembro sa stake] napanalanginan ko og maayo sa Ginoo apan naglisod sa pagkontrolar sa akong mga pagbati. Walay mas maayong mga tawo sa tibuok kalibutan [ug] gihigugma nako ang tanan.”⁶

Ang pamilyang Benson mibalhin sa Bethesda, Maryland, duol sa Washington, D.C. Sobra lang og gamay sa usa ka tuig ang milabay, si Presidente Rudger Clawson, Presidente sa Korum sa Napulog Duha ka mga Apostoles, ug si Elder Albert E. Bowen, sa Korum sa Napulog Duha, mibisita sa dapit aron pag-organisar sa bag-ong stake. Nakigkita si Presidente Clawson kang Ezra Taft Benson ug miingon, “Brother Benson, buot sa Ginoo nga ikaw ang mahimong presidente niining stake. Unsay imong ikasulti kabahin niana?” Nasurprisa na usab si Presidente Benson. Siya mikomentaryo, “Wala ko kaila sa mga tawo dinhi. Sobra lang og gamay sa usa ka tuig nagpuyo ko dinhi.”⁷ Apan mapainubsanon niyang gidawat ang calling ug midumala sa sobra sa mga 2,000 ka miyembro sa lapad kaayong stake. Si Flora mikomentaryo sa iyang pagserbisyo isip presidente sa stake: “Ganahan kaayo siya niini. Dili titulo ang importante kaniya apan ang kalipay nga makatabang kutob sa mahimo aron makaplagan ang kamatuoran sa ebanghelyo.”⁸

Sa wala madugay, isip Apostol, si Presidente Benson mibisita sa mga stake sa tibuok kalibutan. Siya mikomentaryo: “Usahay mosulti ko sa akong asawa, sa akong pag-uli gikan sa pagbisita sa mga stake, nga wala ko masayud unsay hitsura sa langit, apan wala na koy laing pangayoon didto gawas sa kahigayunan ug kalipay nga makig-uban sa mga matang sa tawo nga akong nahimamat diha sa pagpangulo sa mga stake ug ward sa Zion ug sa misyon sa yuta. Sa tinuoray buhong ang atong panalangin.”⁹

Ward council members being taught using the Worldwide Leadership Training video. — Usa sa katuyoan sa stake mao ang “paghiusa ug paghingpit sa mga miyembro … pinaagi sa pagpangalagad nganha kanila sa mga programa sa Simbahan, mga ordinansa, ug instruksyon sa ebanghelyo.

Mga Pagtulun-an ni Ezra Taft Benson

Isip mga miyembro sa Simbahan, kita magpundok diha sa mga stake sa Zion.

Usahay ang mga dili miyembro mangutana, “Unsa ang stake?” Ang mga miyembro usab mangutana, “Nganong importante ang stake? Unsay kahulugan niini isip mga miyembro?”

Para sa mga dili miyembro, ang stake susama sa dyosesis sa ubang simbahan. Ang stake usa ka hiyograpikanhon nga dapit nga naglangkob og mga ward (lokal nga mga kongregasyon) ug gidumala sa usa ka kapangulohan.

Para sa mga miyembro, ang termino nga stake usa ka simbolo. Ilarawan diha sa inyong hunahuna ang dakong tolda nga gihigtan og mga pisi nga ang pisi gihigot padulong sa mga istaka [stake] nga lig-ong giugbok sa yuta. Ang mga propeta misusama sa Zion sa ulahing adlaw ngadto sa dako nga tolda nga naglukop sa kalibutan [tan-awa sa Isaias 54:2; 3 Nephi 22:2]. Ang tolda gilig-on sa mga pisi nga gihigot ngadto sa mga stake. Kadtong mga stake, siyempre, mao ang lain-laing hiyograpikanhong mga organisasyon nga nagkatap sa tibuok kalibutan. Karon ang Israel gipundok ngadto sa laing-laing mga stake sa Zion.¹⁰

Ang stake adunay dili moubos upat ka katuyoan:

1. Ang kada stake, gipangulohan og tulo ka high priest, ug gisuportahan sa napulog duha ka tawo nga nailhang high council, gamayng pundok nga nagrepresentar sa simbahan ngadto sa mga Santos sa piho nga hiyograpikanhong dapit. Ang tuyo mao ang paghiusa ug paghingpit sa mga miyembro kinsa nagpuyo niana nga utlanan pinaagi sa pagpangalagad kanila sa mga programa sa Simbahan, mga ordinansa, ug instruksyon sa ebanghelyo.

2. Ang mga miyembro sa stake mao ang mga modelo o mga sumbanan sa pagkamatarung.

3. Ang mga stake mao ang panagang. Mahimo kini sa mga miyembro kon sila nagkahiusa ubos sa pagdumala sa ilang lokal nga mga lider sa priesthood ug ipahinungod ang ilang kaugalingon sa ilang buluhaton ug motuman sa ilang mga pakigsaad. Kadtong mga pakigsaad, kon tumanon, mahimong proteksyon gikan sa sayop, dautan, o kalamidad.

Magtukod lang kita og templo sa mga dapit nga adunay mga stake. Ang mga panalangin ug ordinansa sa templo nag-andam sa tawo para sa kahimayaan. Siyempre, sa karon dili posible nga ang matag stake adunay templo, apan may diyutay na kitang nasaksihan nga talagsaon, oo, milagrusong kalamboan, sa pagtukod og mga templo sa lain-laing bahin sa kalibutan. Kini nga programa nagtugot sa mga miyembro sa Simbahan sa pagdawat sa hingpit nga mga panalangin sa Ginoo.

4. Ang mga stake mao ang dangpanan gikan sa unos nga moabut sa tibuok kalibutan.¹¹

Ang mga stake giorganisar aron pagtabang sa mga ginikanan sa pagtudlo sa ebanghelyo ug paggiya sa ilang mga anak ngadto sa mga ordinansa sa kaluwasan.

Sa Doktrina ug mga Pakigsaad atong mabasa:

“Tungod kay ang mga ginikanan adunay mga anak diha sa Zion, o diha sa bisan diin sa iyang mga istaka nga natukod, nga wala magtudlo kanila sa pagsabut sa doktrina sa paghinulsol, hugot nga pagtuo diha ni Kristo ang Anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot, kon walo ka tuig ang panuigon, ang sala anaa sa mga ulo sa mga ginikanan. Kay kini mao ang balaod ngadto sa mga lumulupyo sa Zion, o diha sa bisan diin sa iyang mga istaka nga natukod.” (68:25–26; mga italic gidugang.)

Dinhi inyong nakita ang usa sa dakong katuyoan sa stake. Kini organisar aron pagtabang sa mga ginikanan nga “adunay mga anak diha sa Zion” sa pagtudlo kanila sa ebanghelyo ni Jesukristo ug sa pag-administrar sa mga ordinansa sa kaluwasan. Ang mga stake gi-organisar aron paghingpit sa mga Santos, ug ang paglambo nagsugod diha sa panimalay uban sa epektibong instruksyon sa ebanghelyo.¹²

Samtang ang mga miyembro sa stake namalandong sa sumbanan sa Ginoo sa pagkabalaan, ang stake mahimong talagsaong simbolo nga makita sa kalibutan.

Ang Ginoo namulong: “Kay ang Zion kinahanglan motubo sa katahum, ug diha sa pagkabalaan; ang iyang mga utlanan kinahanglan padak-an; ang iyang mga istaka kinahanglan lig-unon; oo, sa pagkatinuod Ako moingon nganha kaninyo, ang Zion kinahanglan gayud mobangon ug mosul-ob sa iyang matahum nga mga saput.” Doktrina ug mga Pakigsaad 82:14.

Dinhi ang Ginoo mipahayag og laing dakong katuyoan sa stake: mahimong talagsaong simbolo nga makita sa kalibutan. Ang hugpong sa mga pulong nga “mosul-ob sa iyang matahum nga mga saput” nagpasabut, siyempre, sa kalimpyo sa pagkatawo nga kinahanglang kab-uton sa kada miyembro nga gitawag og Santos. Ang Zion mao “ang putli og kasingkasing.” Doktrina ug mga Pakigsaad 97:21.

Ang mga stake sa Zion malig-on ug ang mga utlanan sa Zion mapadak-an samtang ang mga miyembro mamalandong sa sumbanan sa pagkabalaan nga gipaabut sa Ginoo sa Iyang pinili nga katawhan.¹³

Ang kada stake magsilbi nga panalipod ug dangpanan gikan sa makita ug dili makita nga mga kaaway.

Laing pagpadayag gikan sa Ginoo nagpasabut sa katuyoan sa mga stake: “Sa pagkatinuod Ako moingon nganha kaninyong tanan: Tindog ug pakita, aron ang inyong kahayag mao ang usa ka sukaranan alang sa tanan nga mga nasud; ug nga ang panagpundok sa yuta sa Zion, ug diha sa iyang mga istaka, alang sa usa ka panalipod, ug alang sa usa ka dangpanan gikan sa unos, ug gikan sa kaligutgut sa diha nga kini ibu-bu nga walay pagkuto diha sa tibuok yuta.” (Doktrina ug mga Pakigsaad 115:5–6.)

Adunay sugo niining pagpadayag nga ipakita ang atong kahayag aron kini mahimong sumbanan sa mga kanasuran. Ang sumbanan usa ka paagi sa pagsukod aron matino ang pagkatukma o pagkahingpit. Ang mga Santos mao ang sumbanan sa pagkabalaan nga tan-awon sa kalibutan. Kana ang kaanyag sa Zion.

Dayon gipadayag sa Ginoo nga ang mga stake sa Zion mao ang “panalipod, ug alang sa usa ka dangpanan gikan sa unos, ug gikan sa kaligutgut sa diha nga kini ibu-bu nga walay pagkuto diha sa tibuok yuta.” Ang mga stake magsilbi nga panalipod ug dangpanan gikan sa makita ug dili makita nga mga kaaway. Ang panalipod mao ang giya nga gihatag sa mga lider sa priesthood nga naglig-on sa pagpamatuod ug nagpasiugda og panaghiusa sa pamilya ug indibidwal nga pagkamatarung.

Sa Iyang pasiuna sa Iyang mga pinadayag diha sa Doktrina ug mga Pakigsaad, ang Ginoo mipasidaan: “Ang adlaw moabut sa labing madali, ang takna wala pa moabut, apan duol na, nga ang kalinaw pagakuhaon gikan sa yuta, ug ang yawa makabaton og gahum ibabaw sa iyang kaugalingong gingharian” [Doktrina ug mga Pakigsaad 1:35].

Karon … atong makita ang katumanan niining panagna diin si Satanas, sa walay hunong nga kalagot, nagpakita og gahum ibabaw “sa iyang kaugalingong gingharian”—ang kalibutan. Wala pa sukad maingon niini kagrabe ang iyang impluwensya, ug kadtong nagsunod sa Espiritu Santo isip ilang giya—ug misunod sa tambag sa mga lider sa priesthood—maluwas sa kadaut sa iyang dautang impluwensya.

Ang Ginoo namulong usab diha sa pasiuna nga pagpadayag nga Siya adunay gahum ibabaw sa Iyang mga Santos, “ug maghari diha sa ilang taliwala” [Doktrina ug mga Pakigsaad 1:36]. Iya kining buhaton samtang Siya nakig-alayon sa Iyang pinili nga mga sulugoon ug sa mga lider sa stake ug ward.¹⁴

An African congregation gathered in sacrament meeting. — Sa panagpundok uban sa mga Santos, atong makita nga ang stake mahimong “usa ka panalipod, ug alang sa usa dangpanan gikan sa unos” (D&P 115:6).

Samtang naglambo ang Simbahan, importante kaayo nga kita lig-on ug maayo, ug ang atong umaabut nga mga stake aduna sa nag-una nga mga kinahanglanon aron molampus ug ang anaa na nga stake magkugi nga molihok alang sa stake para sa espirituhanong kalamboan. Kini nga mga stake mao ang mga dapit sa panagpundok sa Zion karon, ug kini kinahanglang mahimo nga espirituhanong dangpanan ug makabarug sa kaugalingon kutob sa mahimo.¹⁵

Ang mga stake ug district sa Zion simbolo sa balaang mga dapit nga gipamulong sa Ginoo diin ang Iyang mga Santos magpundok sa katapusang mga adlaw isip dangpanan gikan sa unos. Kamo ug ang inyong mga anak mapundok dinhi aron sa pagsimba, pagpahigayon sa sagradong mga ordinansa, sa pagpakigsandurot sa uban, sa pagkat-on, sa pagpasundayag sa musika, sayaw, drama, sport, ug sa kinatibuk-an pagpalambo sa inyong kaugalingon ug sa usag usa. Mahinungdanon gyud nga ang atong chapel adunay steeple [tore], nga may mga spires nga nagpunting sa kalangitan nga nagpasabut nga ang atong kinabuhi kinahanglang padulong sa Dios.¹⁶

Ang propeta sa Basahon ni Mormon nga si Nephi nakakita sa panahon diin ang mga Santos nagkatap sa tibuok kalibutan. Iyang nakita ang panahon diin ang Ginoo miprotektar kanila sa dihang sila nakasinati og daghang unos sa kinabuhi nga naghulga kanila. Si Nephi nanagna: “Ug nahinabo nga ako, si Nephi, nakakita sa gahum sa Kordero sa Dios, nga kini mikunsad diha sa mga santos sa simbahan sa Kordero, ug diha sa mga katawhan sa pakigsaad sa Ginoo, kinsa nagkatibulaag diha sa ibabaw sa tibuok yuta; ug sila gisangkapan sa katarung ug uban sa gahum sa Dios sa dako nga himaya.” (Basahon ni Mormon, 1 Nephi 14:14.)

Pinaagi sa pagpadayag kita nasayud nga adunay mga katalagman, kalamidad, ug pagpanggukod sa katapusang mga adlaw, apan pinaagi sa pagkamatarung ang mga Santos makalingkawas. Ang saad sa Ginoo diha sa Basahon ni Mormon sigurado: “Siya mopanalipod sa mga matarung pinaagi sa iyang gahum.” (1 Nephi 22:17.)¹⁷

Mga Sugyot alang sa Pagtuon ug Pagtudlo

Mga Pangutana

Human og basa sa seksyon 1, unsaon ninyo pagtubag ang usa ka tawo nga mangutana nganong ang mga miyembro sa Simbahan giorganisar pinaagi sa stake?
Si Presidente Benson mipahinumdom kanato nga ang stake makatabang sa mga ginikanan sa pagtudlo sa ebanghelyo sa ilang mga anak ug aron sila makadawat sa mga ordinansa sa priesthood (tan-awa sa seksyon 2). Sa unsang paagi ang inyong stake nakalig-on sa inyong mga paningkamot sa panimalay?
Kanus-a kamo nakakita nga ang mga miyembro sa inyong stake nagkahiusa aron mahimong ehemplo nga “makita sa kalibutan”? (Tan-awa sa seksyon 3.) Sa unsang paagi kamo nakabenepisyo niining mga kalihokan?
Sa unsang paagi ang stake makahatag og proteksyon “sa makita ug dili makita nga mga kaaway”? (Tan-awa sa seksyon 4.) Unsay mga oportunidad para kanato aron makatampo sa atong stake? Unsa nga mga panalangin ang atong madawat kon ato kining buhaton?

May Kalabutan nga mga Kasulatan

Isaias 25:3–5; Mateo 5:14–16; Moroni 10:31–33; D&P 101:17–21; 133:7–9

Tabang sa Pagtudlo

“Ang hanas nga magtutudlo dili maghunahuna, ‘Unsay akong buhaton sa akong klase karon?’ apan mangutana, ‘Unsay buhaton sa akong mga estudyante karon?’; dili, ‘Unsay akong itudlo karon?’ apan, ‘Unsaon nako pagtabang sa akong mga estudyante nga ilang madiskobrehan ang angay nilang makat-unan?’” (Virginia H. Pearce, “The Ordinary Classroom—a Powerful Place for Steady and Continued Growth,” Ensign, Nob. 1996, 12; nagkutlo sa Teaching the Gospel: A Handbook for CES Teachers and Leaders [1994], 13).