Pasiuna

Ang Unang Kapangulohan ug ang Korum sa Napulog Duha ka mga Apostoles mihan-ay sa sunod-sunod nga Mga Pagtulun-an sa mga Presidente sa Simbahan aron sa pagtabang ninyo nga maduol sa inyong Langitnong Amahan ug pagpalawom sa inyong pagsabut sa gipahiuli nga ebanghelyo ni Jesukristo. Samtang ang Simbahan magdugang og mga basahon dinhi niini nga han-ay, makakolekta mo og mga basahon sa pakisayran sa ebanghelyo diha sa inyong balay. Ang mga basahon niini nga han-ay gihimo aron gamiton alang sa personal nga pagtuon ug alang sa Dominggo nga pagpanudlo. Kini makatabang usab kaninyo sa pagpangandam og uban nga mga leksyon o mga pakigpulong ug sa pagtubag sa mga pangutana mahitungod sa doktrina sa Simbahan.

Kining libroha naghisgot sa mga pagtulun-an ni Presidente Ezra Taft Benson, kinsa nagserbisyo isip Presidente sa Simbahan ni Jesukristo sa mga Santos sa Ulahing mga Adlaw gikan sa Nobyembre 10, 1985, hangtud Mayo 30, 1994.

Personal nga Pagtuon

Samtang kamo magtuon sa mga pagtulun-an ni Presidente Ezra Taft Benson, tinguhaa ang inspirasyon sa Espiritu Santo. Ang mga pangutana nga naa sa katapusan sa kada kapitulo makatabang ninyo sa pagpamalandong, pagsabut, ug pag-apply sa mga pagtulun-an ni Presidente Benson. Ang mosunod nga mga ideya makatabang usab kaninyo:

Pagsulat og mga ideya ug pagbati nga inyong madawat gikan sa Espiritu Santo samtang magtuon mo.
Paglinya og mga pagtulun-an nga gusto ninyong mahinumduman. Ikonsiderar ang pagmemorya niining mga pagtulun-an o isulat kini sa kasulatan tupad sa may kalabutang mga bersikulo.
Pagbasa og kapitulo o pagtulun-an sobra sa kausa aron inyong mas masabtan kini.
Pangutan-a ang inyong kaugalingon sama sa mosunod: Sa unsang paagi ang pagtulun-an ni Presidente Benson makapalambo sa akong pagsabut sa mga baruganan sa ebanghelyo? Unsay gusto sa Ginoo nga akong makat-unan gikan niining mga pagtulun-an?
Pagpakigbahin sa inyong nakat-unan sa mga sakop sa pamilya ug mga higala.
Pangutan-a ang inyong kaugalingon kon sa unsang paagi ang mga pagtulun-an niining basahon makatabang sa inyong personal nga mga hagit o problema.

Pagtudlo gikan Niini nga Basahon

Kini nga basahon gidesinyo nga gamiton sa panimalay ug sa simbahan. Ang mosunod nga mga sumbanan makatabang kaninyo unsaon pagtudlo niini nga basahon.

Pangandam sa Pagtudlo

Tinguhaa ang giya sa Espiritu Santo samtang nangandam kamo sa pagtudlo. Tun-i sa mainampoong paagi ang gi-assign nga kapitulo aron mahimong masaligon diha sa inyong pagsabut sa mga pagtulun-an ni Presidente Benson. Makatudlo mo uban sa sinseridad ug gahum kon ang iyang mga pulong nakaimpluwensya ninyo mismo (tan-awa sa D&P 11:21).

Kon kamo nagtudlo sa leksyon sa Melchizedek Priesthood o Relief Society, ayaw ipadaplin kining basahon o pag-andam og mga leksyon gikan sa uban nga mga materyal. Pilia sa mainampoong paagi kadtong mga pagtulun-an gikan niini nga kapitulo nga inyong gibati nga labing makatabang sa inyong gitudloan. Ang pipila ka mga kapitulo naglangkob og mas daghan nga materyal kay sa inyong mahisgutan atol sa oras sa klase.

Awhaga ang mga partisipante sa pagtuon sa kapitulo sa dili pa ang leksyon ug sa pagdala sa libro. Kon sila mohimo niini, sila mas andam sa pag-apil sa mga diskusyon ug makalig-on sa usag usa.

Sa inyong pagpangandam sa pagtudlo, hatagi og espesyal nga pagtagad ang “Mga Sugyot alang sa Pagtuon ug Pagtudlo” sa katapusan sa kada kapitulo. Sa ubos niini nga ulohan, anaa ang mga pangutana, may kalabutan nga mga kasulatan, ug tabang sa pagtuon o tabang sa pagtudlo. Ang mga pangutana ug may kalabutan nga mga kasulatan pihong gihan-ay sa kapitulo kon asa kini makita. Ang tabang sa pagtuon ug tabang sa pagtudlo makagiya sa inyong mga paningkamot aron makat-on ug magpakabuhi sa ebanghelyo ug motabang sa uban sa pagbuhat usab niini.

Pagpaila sa Kapitulo

Samtang kamo nagpaila sa kapitulo, ug sa tibuok nga leksyon, paningkamot sa pagmugna og usa ka kahimtang diin ang Espiritu makatandog sa mga kasingkasing ug mga hunahuna niadtong imong gitudloan. Sa pagsugod sa leksyon, tabangi kadtong inyong gitudloan nga mo-focus diha sa mga pagtulun-an sa kapitulo. Mahimo ninyong gamiton ang usa o sobra pa nga mosunod nga mga ideya:

Basaha ug hisguti ang seksyon nga giulohan og “Gikan sa Kinabuhi ni Ezra Taft Benson” sa sinugdanan sa kapitulo.
Hisguti ang usa ka litrato o kasulatan gikan sa kapitulo.
Manganta og dungan sa usa ka himno nga may kalabutan sa hilisgutan.
Ipakigbahin sa daklit ang usa ka personal nga kasinatian mahitungod sa hilisgutan.

I-awhag ang Diskusyon kabahin sa mga Pagtulun-an ni Presidente Benson

Samtang magtudlo mo gikan niini nga libro, dapita ang uban sa pagpakigbahin sa ilang mga hunahuna, sa pagpangutana, ug sa pagtudlo sa usag usa. Kon aktibo silang moapil, mas andam silang makat-on ug modawat og personal nga pagpadayag. Tuguti nga magpadayon ang mga panaghisgot kay sa humanon ang tanang mga leksyon. Sa pag-awhag og panaghisgot, gamita ang mga pangutana diha sa katapusan sa kada kapitulo. Makahimo usab mo og inyong kaugalingon nga mga pangutana alang gayud niadtong inyong gitudloan.

Ang mosunod nga mga opsyon mahimong makahatag kaninyo og dugang nga mga ideya:

Hangyoa ang mga partisipante sa pagpakigbahin sa unsay ilang nakat-unan gikan sa ilang personal nga pagtuon sa kapitulo. Makatabang tingali ang pagkontak og pipila ka mga partisipante nianang semanaha ug sa paghangyo kanila sa pag-anha sa klase nga andam nga mopakigbahin sa unsay ilang nakat-unan.
Sanguni ang mga partisipante sa pagbasa og pinili nga mga pangutana gikan sa katapusan sa kapitulo (mahimong indibidwal o sa ginagmay nga mga grupo). Hangyoa sila sa pagpangita sa mga pagtulun-an diha sa kapitulo nga may kalabutan sa mga pangutana. Dayon dapita sila sa pagpakigbahin sa ilang mga hunahuna ug mga panglantaw.
Pabasaha og dungan ang mga partisipante sa pipila ka mga pagtulun-an ni Presidente Benson niining kapitulo. Hangyoa ang mga partisipante sa pagpakigbahin sa pipila ka mga ehemplo gikan sa kasulatan ug sa ilang kasinatian aron sa paghulagway niana nga pagtulun-an.
Hangyoa ang mga partisipante sa pagpili og usa ka seksyon ug hilom kining basahon. Dapita sila sa paggrupo nga magtinagurha o magtinagutlo nga mipili sa sama nga seksyon ug hisgutan unsay ilang nakat-unan.

I-awhag ang Pagpakigbahin ug Paggamit

Ang mga pagtulun-an ni Presidente Benson mas makahuluganon sa mga partisipante kinsa mopakigbahin niini sa uban ug mo-apply niini sa ilang kinabuhi. Mahimo ninyong gamiton ang usa o sobra pa nga mosunod nga mga ideya:

Pangutan-a ang mga partisipante kon sa unsang paagi nila magamit ang mga pagtulun-an ni Presidente Benson sa ilang mga responsibilidad sa panimalay ug sa Simbahan. Sama pananglit, matabangan ninyo sila sa pagpamalandong ug paghisgut kon sa unsang paagi ilang magamit ang iyang mga pagtulun-an isip bana, asawa, ginikanan, anak nga lalaki, anak nga babaye, mga home teacher, o mga visiting teacher.
Awhaga ang mga partisipante sa pagpakigbahin sa pipila ka mga pagtulun-an ni Presidente Benson uban sa mga sakop sa pamilya ug mga higala.
Dapita ang mga partisipante sa paggamit unsa ang ilang nakat-unan ug pagpakigbahin sa ilang mga kasinatian sa pagsugod sa sunod nga klase.

Tapusa ang Diskusyon

I-summarize og daklit ang leksyon o hangyoa ang usa o duha ka partisipante sa paghimo niini. Pagpamatuod sa mga pagtulun-an nga inyong gihisgutan. Mahimo usab nga inyong dapiton ang uban sa pagpakigbahin sa ilang mga pagpamatuod.

Impormasyon mahitungod sa mga Tinubdan nga Gikutloan Niini nga Libro

Ang mga pagtulun-an niini nga libro direkta nga gikutlo gikan sa mga wali, mga artikulo, libro, ug mga journal ni Presidente Ezra Taft Benson. Ang mga kinutlo gikan niini nga tinubdan mibilin sa punctuation, spelling, capitalization, ug paragraphing sa orihinal nga mga tinubdan gawas kon ang editoryal o tipograpikal nga mga kausaban gikinahanglan aron sayon basahon. Tungod niini nga rason, makamatikod mo og ginagmay nga kausaban diha sa teksto. Sama pananglit, ang mga pronoun nga nagpasabut sa Dios wala ikapital sa pipila ka kinutlo ug gikapital sa uban.

Si Presidente Benson usab kasagaran mogamit og mga termino sama sa mga tawo, tawo, o katawhan nga nagpasabut ngadto sa tanang mga tawo, lalaki ug babaye. Kanunay siya nga mogamit sa mga pronoun nga siya, iya, ug kaniya nga nagpasabut sa lalaki ug babaye. Komon kini sa pinulongan sa iyang panahon. Bisan pa sa kalainan tali niining maong pinulongan ug sa bag-o nga paggamit, ang mga pagtulun-an ni Presidente Benson magamit sa mga babaye ug mga lalaki.