Kapitulo 5
Mga Baruganan sa Tinuod nga Paghinulsol
“Alang niadtong kinsa nagbayad sa bili nga gikinahanglan sa tinuod nga paghinulsol, ang saad siguradong matuman. Kamo malimpyo pag-usab. Ang pagkawalay paglaum mawala. Ang tam-is nga kalinaw sa pagpasaylo modagayday ngadto sa inyong mga kinabuhi.”
Gikan sa Kinabuhi ni Ezra Taft Benson
Sa iyang unang pakigpulong sa kinatibuk-ang komperensya isip Presidente sa Simbahan, si Presidente Ezra Taft Benson namulong: “Samtang ako nangayo og direksyon gikan sa Ginoo, naangkon nako pag-usab diha sa akong hunahuna ug kasingkasing ang pamahayag sa Ginoo nga ‘ayaw pagsulti og lain gawas sa paghinulsol ngadto niini nga kaliwatan.’ (D&P 6:9; 11:9.) Kini nahimo nga tema sa matag propeta sa ulahing mga adlaw.”1
Bisan sa wala pa ang iyang calling isip Presidente sa Simbahan, si Presidente Benson mihimo sa paghinulsol nga usa ka importanting tema sa iyang pangalagad. Gitambagan siya sa pagbuhat sa mao ni George Albert Smith, Presidente sa Korum sa Napulog Duha ka mga Apostoles nianang higayuna. Diha sa usa ka sulat dili pa dugay human sa tawag ni Presidente Benson sa pagka-apostol, si Presidente Smith miingon, “Ang imong misyon sukad karon mao ang pagpangita og mga paagi sa pagsangyaw sa kamatuoran ug sa pagpasidaan sa mga katawhan nga imong ikahimamat sa maayong paagi kutob sa mahimo nga ang paghinulsol mao lamang ang tambal alang sa mga sakit niini nga kalibutan.”2
Si Presidente Benson matinud-anon ngadto niini nga sugo samtang siya nagtudlo sa ebanghelyo sa tibuok kalibutan. Gitudlo niya nga “mas maayo ang pagpangandam ug paglikay kay sa pag-ayo ug paghinulsol.”3 Apan naka-obserbar usab siya nga “kitang tanan kinahanglang maghinulsol.”4 Mihatag siya og gibug-aton sa “dakong kausaban” sa kasingkasing nga kauban sa paghinulsol (tan-awa sa Alma 5:12–14) ug mipasabut sa tahas sa Manluluwas sa pagpahinabo sa mao nga kausaban:
“Ang Ginoo nag-usab sa mga tawo gikan sa sulod paingon sa gawas. Ang kalibutan nag-usab sa tawo gikan sa gawas paingon sa sulod. Ang kalibutan mohaw-as sa mga tawo gikan sa nagdasok nga mga pinuy-anan. Si Kristo nagkuha sa nagdasok nga ngil-ad nga mga pagbati sa mga tawo, ug unya sila mohaw-as sa ilang mga kaugalingon gikan niini nga pagdasok. Ang kalibutan moumol sa mga tawo pinaagi sa pag-usab sa ilang palibut. Si Kristo nag-usab sa mga tawo, kinsa dayon mousab sa ilang palibut. Ang kalibutan moumol sa tawhanong kinaiya, apan si Kristo makausab sa tawhanong kinaiyahan. …
“Oo, si Kristo nag-usab sa mga tawo, ug ang nausab nga mga tawo makausab sa kalibutan.”5
Ang Ginoo miingon, “Ang akong grasya igo sa tanan nga mga tawo nga magpaubos sa ilang mga kaugalingon sa akong atubangan”(Ether 12:27).
Mga Pagtulun-an ni Ezra Taft Benson
1
Aron tinud-anay nga makahinulsol, kita una sa tanan kinahanglan gayud makaamgo nga ang plano sa ebanghelyo mao ang plano sa kalipay.
Sa kasagarang pagsabut sa pulong, ang pagka-miyembro sa Simbahan nagpasabut nga ang usa ka tawo opisyal nga magparekord sa iyang pangalan diha sa mga rekord sa pagka-miyembro sa Simbahan. …
Apan gipasabut sa Ginoo ang usa ka miyembro sa Iyang gingharian sa lahi nga paagi. Niadtong1828, pinaagi ni Propeta Joseph Smith, Siya miingon, “Tan-awa, mao kini ang akong doktrina—kinsa kadto nga maghinulsol ug moduol ngari kanako, ang ingon mao ang akong simbahan.” (D&P 10:67; mga italic gidugang.) Ngadto Kaniya kang kinsang Simbahan mao kini, ang pagka-miyembro naglangkob og labaw pa kay sa yano nga pagka-miyembro sa rekord.
Busa ako buot nga mopatin-aw og importanting mga konsepto nga kinahanglan gayud nga atong sabton ug gamiton kon kita tinud-anay nga mohinulsol ug moduol ngadto sa Ginoo.
Usa sa labing kasagarang panglingla nga gigamit ni Satanas mao ang hunahuna nga ang mga sugo sa Dios alang sa pagpugong sa kagawasan ug paghatag og limitasyon sa kalipay. Ilabi na ang mga kabatan-onan usahay mobati nga ang mga sumbanan sa Ginoo sama sa mga koral ug mga kadena, nag-ali kanila gikan niadtong mga kalihokan nga ingon og labing makalingaw sa kinabuhi. Apan sa tinuod ang bali mao ang husto. Ang plano sa ebanghelyo mao ang plano pinaagi diin ang mga katawhan dad-on ngadto sa kahingpitan sa kalipay. Mao kini ang unang konsepto nga akong gusto nga ipasabut. Ang mga baruganan sa ebanghelyo mao ang mga lakang ug mga giya nga motabang kanato sa pagkaplag sa tinuod nga kalipay ug sa hingpit nga kalipay.
Ang pagsabut niini nga konsepto nakahimo sa Salmista sa pagtuaw, “O, hilabihan ang paghigugma ko sa imong kasugoan! … Ang imong mga sugo nakapahimo kanako nga labi pang manggialamon kay sa akong mga kaaway. … Ang imong mga pulong maoy lamparahan sa akong mga tiil, ug kahayag sa akong alagianan. … Ingon nga panulundon gidawat ko ang imong pagpamatuod sa walay katapusan: kay sila mao ang kalipay sa akong kasingkasing.” (Sal. 119:97–98, 105, 111.)
Kon kita gusto gayud nga tinud-anay nga maghinulsol ug moduol ngadto Kaniya aron kita matawag nga mga miyembro sa Iyang Simbahan, kita kinahanglan gayud nga una ug labaw sa tanan makaamgo niining mahangturong baruganan—ang plano sa ebanghelyo mao ang plano sa kalipay. Ang pagkadautan wala gayud kaniadto, wala gayud karon, wala gayud sa umaabut makadala kanato og kalipay [tan-awa sa Alma 41:10]. Ang paglapas sa mga balaod sa Dios nagdala lamang og kaalautan, pagkaulipon, ug kangitngit.6
2
Ang hugot nga pagtuo diha ni Jesukristo nag-una sa tinuod nga paghinulsol.
Ang ikaduhang konsepto nga importante sa atong pagsabut mao ang relasyon sa paghinulsol ngadto sa baruganan sa hugot nga pagtuo. Ang paghinulsol mao ang ikaduhang importanting baruganan sa ebanghelyo. Ang una mao nga kita kinahanglan gayud nga adunay hugot nga pagtuo diha ni Ginoong Jesukristo. Nganong ingon man niini? Nganong gikinahanglan gayud nga ang hugot nga pagtuo diha sa Ginoo mag-una sa tinuod nga paghinulsol?
Aron sa pagtubag niini nga pangutana, kinahanglan gayud nga atong masabtan ang usa ka butang mahitungod sa maulaong sakripisyo sa Agalon. Gitudlo ni Lehi nga “walay tawo … nga makapuyo nga buhi atubangan sa Dios, gawas pinaagi sa mga maayo nga buhat, kalooy, ug grasya sa Balaang Mesiyas.” (2 Ne. 2:8.) Bisan ang labing makiangayon ug matarung nga tawo dili makaluwas sa iyang kaugalingon pinaagi lamang sa iyang kaugalingon nga mga maayong buhat, kay, sama sa gisulti ni Apostol Pablo kanato, “ang tanan nakasala man, ug nakabsan sa himaya sa Dios” (Rom. 3:23.)
Kon dili pa sa hingpit, walay sala nga kinabuhi sa Manluluwas, nga andam Niyang gihatag alang kanato, walay mahitabo nga kapasayloan sa mga sala.
Busa, ang paghinulsol nagpasabut og labaw pa kay sa pag-usab lamang sa kinaiya. Daghang kalalakin-an ug kababayen-an sa kalibutan ang nagpakita og dakong gahum sa kabubut-on ug disiplina sa kaugalingon sa pagbuntog sa ngil-ad nga mga batasan ug mga kahuyang sa unod. Apan sa samang higayon wala sila maghunahuna sa Agalon, usahay sa dayag nagsalikway Kaniya. Ang ingon nga mga kausaban sa kinaiya, bisan anaa sa positibo nga direksyon, wala magdala og tinuod nga paghinulsol.
Ang hugot nga pagtuo diha ni Ginoong Jesukristo mao ang pundasyon diin ang sinsero ug makahuluganong paghinulsol kinahanglan gayud nga itukod. Kon kita tinud-anay nga maningkamot sa pagsalikway sa sala, kinahanglan gayud nga kita motan-aw og una Kaniya kinsa mao ang Tigpasiugda sa atong kaluwasan.7
3
Ang paghinulsol naglakip og dakong kausaban sa kasingkasing.
Ang ikatulong importante nga baruganan nga atong sabton kon kita buot nga mahimong tinuod nga mga miyembro sa Simbahan mao nga ang paghinulsol naglakip dili lamang sa usa ka kausaban sa mga lihok, apan kausaban sa kasingkasing.
Sa dihang si Haring Benjamin natapos sa iyang makapahinuklog nga pakigpulong diha sa yuta sa Zarahemla, ang tanang mga tawo misinggit og dungan nga sila mituo sa iyang mga pulong. Sila nahibalo sa kasigurohan nga ang iyang mga saad sa katubsanan tinuod, tungod kay, miingon sila, “Ang Espiritu sa Ginoong Makagagahum … nakahimo og dakong kausaban dinhi kanamo, o dinhi sa among mga kasingkasing, [ug timan-i kini] nga kami walay nay hilig sa pagbuhat og dautan, apan sa pagbuhat og maayo sa kanunay.” (Mosiah 5:2.)8
Mausab ba ang tawhanong mga kasingkasing? Ngano, dayag lamang! Kini mahitabo kada adlaw diha sa dakong misyonaryo nga buhat sa Simbahan. Kini mao ang usa sa labing dako nga modernong mga milagro ni Jesukristo. Kon kini wala pa mahitabo nganha kaninyo—kini kinahanglang mahitabo.
Ang atong Ginoo misulti ni Nicodemo nga “gawas kon ang tawo igaanak pag-usab, dili siya makakita sa gingharian sa Dios.” (Juan 3:3.) …
Si Alma namulong: “Ug ang Ginoo miingon ngari kanako: “Ayaw pagkahibulong nga ang tanan nga katawhan, oo, nga mga lalaki ug mga babaye, tanan nga mga kanasuran, mga kaliwatan, mga pinulongan ug mga katawhan, kinahanglan matawo pag-usab; oo, matawo sa Dios, mausab gikan sa ilang kalibutanon ug napukan nga kahimtang, ngadto sa usa ka kahimtang sa pagkamatarung, ingon nga natubos sa Dios, nahimo nga iyang anak nga mga lalaki ug anak nga mga babaye;
“Ug sa ingon sila nahimo nga bag-o nga mga linalang; ug hangtud sila dili mobuhat niini, sila dili gayud makapanunod sa gingharian sa Dios.” (Mosiah 27:25–26.) …
Ang ikaupat nga kapitulo sa Alma naghulagway og panahon sa kasaysayan sa Nephite sa dihang “ang simbahan misugod sa pagkapakyas sa iyang pag-uswag.” (Alma 4:10.) Gitubag kini nga hagit ni Alma pinaagi sa pagbiya sa iyang pwesto isip ang labaw nga maghuhukom sa panggobyerno “ug mihalad sa iyang tibuok kaugalingon ngadto sa halangdon nga pagkapari” ang responsibilidad nga iya. (Alma 4:20.)
Mihatag siya og “lunsay nga pagpamatuod” batok sa mga katawhan (Alma 4:19), ug diha sa ikalimang kapitulo sa Alma nangutana siya og labaw sa kwarenta ka importanting mga pangutana. Walay lipud-lipod nga nagsulti ngadto sa mga miyembro sa Simbahan, mipahayag siya, “Ako mangutana kaninyo, akong mga kaigsoonan sa simbahan, kamo sa espirituhanon nga paagi natawo ba sa Dios? Kamo nakadawat ba sa iyang hitsura diha sa inyong mga panagway? Kamo nakasinati ba niining dakong kausaban diha sa inyong mga kasingkasing?” (Alma 5:14.)
Mipadayon siya, “Kon kamo nakasinati og usa ka kausaban sa kasingkasing, ug kon kamo mibati sa pag-awit sa awit sa matubsanon nga gugma, ako mangutana, kamo mibati ba karon sa mao?” (Alma 5:26.)
Dili ba ang pag-uswag sa Simbahan molambo pag-ayo karon uban sa nagtubong gidaghanon niadtong kinsa natawo pag-usab sa espirituhanong paagi? Makahunahuna ba kamo unsa ang mahitabo sa atong mga panimalay? Makahunahuna ba kamo unsa ang mahitabo uban sa nagtubong gidaghanon sa mga kopya sa Basahon ni Mormon diha sa mga kamot sa nagtubong gidaghanon sa mga misyonaryo kinsa nakahibalo unsaon sa paggamit niini ug kinsa natawo sa Dios? Kon kini mahitabo, atong makuha ang daghang ani sa mga kalag nga gisaad sa Ginoo. Kini mao ang “natawo sa Dios” nga Alma kinsa isip usa ka misyonaryo nakahatag sa pulong nga daghang natawo usab diha sa Dios. (Tan-awa sa Alma 36:23–26.)9
Pinaagi sa paghinulsol, si Alma ang Batan-on nakasinati og milagrusong kausaban sa kasingkasing.
Kon kita nakaagi niining dakong kausaban, nga mahitabo lamang pinaagi sa hugot nga pagtuo diha ni Jesukristo ug pinaagi sa pagtabang sa Espiritu kanato, kini ingon og kita nahimong bag-o nga tawo. Sa ingon, ang kausaban gipakisama ngadto sa bag-ong pagkatawo. Liboan kaninyo ang nakasinati niini nga kausaban. Gibiyaan ninyo ang mga kinabuhi sa pagpakasala, usahay grabe ug makalagot nga sala, ug pinaagi sa paggamit sa dugo ni Kristo diha sa inyong mga kinabuhi, nahimo kamong limpyo. Kamo wala nay hilig nga mobalik ngadto sa inyong karaang mga paagi. Kamo sa pagkatinuod usa ka bag-ong tawo. Kini mao ang unsay gipasabut nga kausaban sa kasingkasing.10
4
Ang diosnong kasubo naggiya ngadto sa paghinulsol.
Ang ikaupat nga konsepto nga akong gusto nga hatagan og gibug-aton mao ang unsay gitawag sa mga kasulatan og “diosnong kasubo” alang sa atong mga sala. Kasagaran nga makakita kita og mga lalaki ug mga babaye sa kalibutan kinsa mobati og kasubo alang sa mga sayop nga ilang gibuhat. Usahay kini tungod kay ang ilang mga lihok naghatag kanila o sa ilang mga minahal og hilabihan nga kasubo ug kaalaut. Usahay ang ilang kasubo nahimo tungod kay nasakpan sila ug nasilutan alang sa ilang mga lihok. Ang ingon niana nga kalibutanong kasubo wala magdala og “diosnon nga kasubo.”
… Sa katapusang mga adlaw sa Nephite nga nasud, si Mormon miingon kabahin sa iyang mga katawhan: “ang ilang kasubo dili ngadto sa paghinulsol, tungod sa kaayo sa Dios; apan kini tungod sa kasubo sa gipanghimaraut, tungod kay ang Ginoo dili sa kanunay motugot kanila nga maglipay diha sa sala.
“Ug sila wala moduol ngadto ni Jesus uban sa masulub-on nga mga kasingkasing ug mahinulsulon nga mga espiritu, apan sila mitunglo sa Dios, ug nangandoy nga mamatay.” (Morm. 2:13–14.)
Sa Sidlakang Katunga sa Kalibutan, si Apostol Pablo naghago taliwala sa mga katawhan sa Corinto. Human miabut ang taho bahin sa seryusong mga problema taliwala sa mga Santos, lakip ang imoralidad (tan-awa sa 1 Cor. 5:1), misulat si Pablo og usa ka sakit nga sulat nga pangasaba. Ang mga tawo mitubag diha sa tukma nga diwa, ug tataw nga ang mga problema naayo, kay sa iyang ikaduhang sulat ngadto kanila, misulat si Pablo: “Karon ako malipayon, dili tungod kay kamo nangaguol, kondili tungod kay kamo nangaguol uban sa kaguol nga nakapahinulsol kaninyo: kay kamo mibati man sa diosnon nga kasubo. …
“Kay ang diosnon nga kasubo mosangpot sa paghinulsol nga magaagak ngadto sa kaluwasan ug dili magahambin sa pagbasol: apan ang kasubo nga kalibutanon mosangpot sa kamatayon.” (2 Cor. 7:9–10.)
Sa duha niini ka mga kasulatan, ang diosnong kasubo gipasabut isip kasubo nga naggiya kanato ngadto sa paghinulsol.
Ang diosnong kasubo usa ka gasa sa Espiritu. Usa kini ka halawom nga pagkaamgo nga ang atong mga gipangbuhat nakapasakit sa atong Amahan ug sa atong Dios. Ang sakit ug maayo kaayo nga pag-ila nga ang atong mga pamatasan ang mihimo sa Manluluwas, Siya kinsa walay sala, gani ang labing gamhanan sa tanan, sa paglahutay sa panghingutas ug sa pag-antus. Ang atong mga sala mihimo sa pag-agas sa dugo sa matag lungag sa Iyang panit. Kining tinuod gayud nga pag-antus sa hunahuna ug sa espirituhanon mao ang gipasabut sa mga kasulatan nga makabaton og “masulub-on nga kasingkasing ug mahinulsulon nga espiritu.” (Tan-awa sa 3 Ne. 9:20; Moro. 6:2; D&P 20:37; 59:8; Sal. 34:18; 51:17; Isa. 57:15.) Ang mao nga espiritu mao ang hingpit nga kinahanglanon alang sa tinuod nga paghinulsol.11
5
Ang Langitnong Amahan ug si Jesukristo matinguhaong makakita kanato nga mausab ang atong mga kinabuhi, ug Sila motabang kanato.
Ang sunod nga baruganan nga akong gustong hisgutan mao kini: Walay usa nga mas matinguhaong makakita kanato nga mausab ang atong mga kinabuhi kay sa Amahan ug ang Manluluwas. Diha sa basahon sa Pinadayag mao ang usa ka gamhanan ug mainiton nga pagdapit gikan sa Manluluwas. Siya nag-ingon, “Nagatindog ako sa pultahan ug nagatuktok: kon may magapatalinghug sa akong tingog ug moabli sa pultahan, kaniya mosulod ako.” (Pin. 3:20.) Timan-i nga Siya wala mag-ingon, “Nagtindog ako sa pultahan ug naghulat kaninyo nga motuktok.” Nagtawag Siya, nagkamay, naghangyo nga ablihan lamang nato ang atong mga kasingkasing ug pasudlon Siya.
Sa gamhanang wali ni Moroni kalabut sa hugot nga pagtuo, ang baruganan mas klaro pa ganing gitudlo. Gisultihan siya sa Ginoo, “Kon ang mga tawo moduol ngari kanako Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo.” Dili igsapayan unsa ang atong kulang o atong kahuyang o atong kakulangan. Ang iyang mga gasa ug mga gahum igo nga ikabuntog niining tanan.
Si Moroni mipadayon sa mga pulong sa Ginoo, “Ang akong grasya igo alang sa tanan nga mga tawo nga magpaubos sa ilang mga kaugalingon diha sa akong atubangan; kay kon sila magpaubos sa ilang mga kaugalingon diha sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.” (Ether 12:27; mga italic gidugang.)
Pagkatalagsaon nga saad gikan sa Ginoo! Ang tinubdan gayud sa atong mga kasamok mausab, maumol, ug maporma ngadto sa kalig-on ug tinubdan sa gahum. Kini nga saad gibalik-balik sa usa ka porma o sa lain diha sa uban nga mga kasulatan. Si Isaias miingon, “Siya nagahatag og gahum niadtong maluya; ug kaniya nga walay kabaskug nagadugang siya og kusog.” (Isa. 40:29.) Si Pablo gisultihan sa Ginoo, “Ang akong grasya igo alang kanimo; kay ang akong gahum ginahingpit diha sa kahuyang.” (2 Cor. 12:9.) Sa Doktrina ug mga Pakigsaad atong mabasa, “Siya nga nangurog ubos sa akong gahum mahimo nga malig-on, ug magdala og mga bunga sa pagdayeg ug kaalam.” (D&P 52:17; tan-awa usab sa 1 Ne. 17:3; 2 Ne. 3:13; D&P 1:28; 133:58–59.)12
Usa sa labing epektibo nga mga paagi ni Satanas ngadto niadtong kinsa iyang nadani sa sala mao ang paghagawhaw diha sa ilang mga dunggan nga sila dili takus sa pag-ampo. Mosulti siya kaninyo nga ang Langitnong Amahan wala gayud mahimuot kaninyo nga siya dili gayud mamati sa inyong mga pag-ampo. Kini bakak, ug nagsulti siya niini aron sa paglingla kanato. Ang gahum sa sala dako kaayo. Kon kita mopagawas sa atong mga kaugalingon gikan niini, ilabi na sa seryusong sala, kinahanglan gayud nga kita adunay gahum nga mas dako kay sa atong mga kaugalingon.
Walay usa nga mas matinguhaon sa pagtabang kaninyo sa pagpalayo gikan sa sala kay sa inyong Langitnong Amahan. Duol ngadto Kaniya. Angkona ang inyong mga sala, ikumpisal ang inyong kaulaw ug ang inyong sala, ug dayon pangaliyupo ngadto Kaniya alang sa panabang. Siya adunay gahum sa pagtabang sa inyong kadaugan.13
Mga kaigsoonan, kinahanglan gayud nga atong dad-on ang atong mga sala ngadto sa Ginoo diha sa pagpaubos ug masulub-ong paghinulsol. Kinahanglan gayud nga kita mangaliyupo ngadto Kaniya alang sa gahum sa pagbuntog niini. Ang mga saad siguradong matuman. Siya moduol sa pagtabang kanato. Atong makaplagan ang gahum nga makausab sa atong mga kinabuhi.14
6
Kita kinahanglan gayud nga dili kawad-an og paglaum samtang kita naningkamot nga mahisama ni Kristo.
Ang ikaunom ug katapusan nga punto nga ako buot mohimo mahitungod sa proseso sa paghinulsol mao nga kita kinahanglan gayud nga magbantay, samtang kita naningkamot nga mahimong mas labaw pa ka diosnon, nga kita dili mawad-an og kadasig ug mawad-an og paglaum. Ang mahimong sama ni Kristo usa ka tibuok kinabuhi nga paninguha ug sa kasagaran gayud naglakip og pagtubo ug kausaban nga hinay, hapit dili mailhan. Ang mga kasulatan nagrekord og importanting mga asoy sa mga tawo kansang kinabuhi mahinuklugong nausab, diha-diha dayon, sama ni: Alma ang Batan-on, Pablo diha sa dalan paingon sa Damasco, Enos nga nag-ampo hangtud sa lawom nga kagabhion, Haring Lamoni. Ang mao nga makapahinganghang mga ehemplo sa gahum nga makausab bisan kadtong nahumol sa sala naghatag og kompyansa nga ang Pag-ula makaabut bisan ngadto sa labing nawad-an og paglaum.
Apan kita kinahanglan gayud nga magmatngon samtang kita maghisgot niining talagsaong mga ehemplo. Bisan tuod kini tinuod ug gamhanan, kini dili kasagaran mahitabo. Kay sa matag Pablo, matag Enos, ug sa matag Haring Lamoni, adunay gatusan ug liboan ka mga tawo kinsa makakita sa proseso sa paghinulsol nga mas hinay pa, mas dili pa mailhan. Matag adlaw sila nagkaduol ngadto sa Ginoo, wala kaayo makaamgo nga sila naghimo og diosnong kinabuhi. Nagpuyo sila og hilom nga mga kinabuhi sa kaayo, serbisyo, ug pasalig. Sama sila sa mga Lamanite, kinsa miingon ang Ginoo “gibunyagan uban sa kalayo ug uban sa Espiritu Santo ug sila wala masayud niini.” (3 Ne. 9:20; mga italic gidugang.)
Kinahanglan gayud nga kita dili kawad-an og paglaum. Ang paglaum maoy angkla sa mga kalag sa mga tawo. Gusto ni Satanas nga isalikway nato kana nga angkla. Niini nga paagi siya makadala og pagkanawad-an og kadasig ug dili na mopadayon. Apan kinahanglan gayud nga kita dili kawad-an og paglaum. Ang Ginoo mahimuot sa matag paninguha, bisan sa gamay kaayo, kada adlaw diin kita naningkamot nga mas mahisama Kaniya. Bisan tuod atong makita nga layo pa kaayo ang atong padulngan diha sa dalan sa kahingpitan, kinahanglan gayud nga kita dili kawad-an og paglaum.15
Alang niadtong kinsa nagbayad sa bili nga gikinahanglan sa tinuod nga paghinulsol, ang saad siguradong matuman. Kamo mahimong malimpyo pag-usab. Ang pagkawalay paglaum mawala. Ang tam-is nga kalinaw sa pagpasaylo modagayday ngadto sa inyong mga kinabuhi.
Ang mga pulong sa Ginoo pinaagi ni Isaias tinuod: “Umari kamo karon, ug usahan ta paghusay, miingon ang Ginoo: bisan pa ang inyong mga sala mapula, sila pagapution ingon sa nieve, bisan pa sila lubos mapula, sila mahimong sama sa maputing balhibo sa karnero” (Isa. 1:18).
Ug niini nga dispensasyon namulong ang Ginoo nga may samang katin-aw sa dihang Siya miingon: “Tan-awa siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila” (D&P 58:42).16
Ang tinuod nga paghinulsol gipasikad ug nagagikan gikan sa hugot nga pagtuo diha ni Ginoong Jesukristo. Walay laing paagi.
Ako nanghinaut nga kita dili mopuyo sa kagahapon. Ang mga tawo kinsa nagpuyo sa kagahapon wala kaayoy dakong kaugmaon. Adunay dakong posibilidad alang kanato nga magbangutan mahitungod sa atong mga nawala, mahitungod sa mga desisyon nga atong nahimo nga atong gihunahuna og usab tingali sayop nga mga desisyon. Adunay dako kaayo nga posibilidad alang kanato nga mobati og kangil-ad mahitungod sa mga kahimtang nga naglibut kanato, nagtuo nga kini tingali unta mas maayo kon kita naghimo pa og lahi nga mga desisyon. Kita makapahimulos pinaagi sa nangaging kasinatian. Apan dili kita mogahin og panahon sa pagkaguol mahitungod sa mga desisyon nga nahimo na, mga sayop nga nahimo. Magpuyo kita sa karon ug sa umaabut.17
Akong hinigugmang mga kaigsoonan, samtang kita naningkamot nga mahimong sarang nga miyembro sa Simbahan ni Kristo—mga miyembro nga sa kahulugang Iyang gigamit ang pulong, mga miyembro kinsa naghinulsol ug niduol ngadto Kaniya—atong hinumduman kining unom ka mga baruganan. Una, ang ebanghelyo mao ang plano sa kalipay sa Ginoo, ug ang paghinulsol gihimo aron sa pagdala kanato og kalipay. Ikaduha, ang tinuod nga paghinulsol gipasikad ug nagagikan gikan sa hugot nga pagtuo diha ni Ginoong Jesukristo. Walay laing paagi. Ikatulo, ang tinuod nga paghinulsol naglakip og kausaban sa kasingkasing ug dili lamang kausaban sa kinaiya. Ikaupat, kabahin niining dakong kausaban sa kasingkasing mao ang pagbati og diosnong kasubo alang sa atong mga sala. Kini mao ang unsay gipasabut sa masulub-ong kasingkasing ug mahinulsulong espiritu. Ikalima, ang mga gasa sa Dios igo sa pagtabang kanato sa pagbuntog sa matag sala ug kahuyang kon kita lamang moduol ngadto Kaniya alang sa panabang. Sa katapusan, kinahanglan gayud nga atong hinumduman nga labing kasagaran sa paghinulsol dili maglakip og mahinuklugong pagkausab, apan hinoon usa ka sunod-sunod nga paagi, dili mausab, ug makanunayon nga paglihok paingon sa pagka-diosnon.
Kon kita maningkamot sa paglakip niini nga mga baruganan diha sa atong mga kinabuhi ug mobuhat niini matag adlaw, kita mahimong sarang nga labaw pa kay sa miyembro lamang sa rekord sa Simbahan ni Jesukristo. Isip tinuod nga mga miyembro, kita makaangkon sa Iyang saad. “Kinsa kadto nga sakop sa akong simbahan, ug makalahutay sa akong simbahan ngadto sa katapusan, Ako mopahimutang kaniya diha sa akong lig-on nga sukaranan, ug ang mga ganghaan sa impyerno dili makabuntog batok kaniya.” (D&P 10:69.)
Ang akong pag-ampo mao nga unta kitang tanan makaangkon niana nga saad alang sa atong mga kaugalingon.18
Mga Sugyot alang sa Pagtuon ug Pagtudlo
Mga Pangutana
-
Si Presidente Benson miingon nga sa tinud-anay nga paghinulsol, kita kinahanglan gayud makaamgo og una nga “ang plano sa ebanghelyo mao ang plano sa kalipay” ug nga ang pagkadautan “dili gayud makadala kanato og kalipay” (seksyon 1). Ngano sa inyong hunahuna nga kini nga pagsabut importante diha sa proseso sa paghinulsol?
-
Sa atong paningkamot sa paghinulsol, ngano nga ang kausaban sa kinaiya dili igo? (Tan-awa sa seksyon 2.) Ngano sa inyong hunahuna kita kinahanglang motan-aw ngadto ni Jesukristo aron tinud-anay nga maghinulsol?
-
Sa unsa nga mga paagi kamo nakasinati og “dakong kausaban sa kasingkasing,” ingon nga gipasabut diha sa seksyon 3? Unsa ang atong mabuhat sa pagtabang sa uban nga makasinati niini nga kausaban?
-
Sa unsa nga mga paagi nga ang “diosnong kasubo” lahi sa pagmahay nga gibati sa ubang mga tawo kon sila nakahimo og usa ka sayop nga butang? (Tan-awa sa seksyon 4.) Unsaon kaha sa usa ka ginikanan o sa bishop paggamit sa mga pagtulun-an diha sa seksyon 4 aron sa pagtabang sa usa ka tawo kinsa kinahanglan nga maghinulsol?
-
Samtang kamo magribyu sa seksyon 5, unsa nga mga pagtulun-an ang inyong nakita nga pihong makahupay? Nganong kini nga mga pagtulun-an makahupay alang kaninyo?
-
Nagpamatuod sa gahum sa Pag-ula sa Manluluwas, si Presidente Benson miingon, “Kinahanglan gayud nga kita dili kawad-an og paglaum” (seksyon 6). Samtang kamo nagribyu sa seksyon 6, unsa nga mga kamatuoran mahitungod sa Pag-ula ang inyong nakita nga nagtanyag kaninyo og paglaum?
May Kalabutan nga mga Kasulatan
Lucas 15:11–32; Mosiah 4:10–12; 26:30–31; Alma 34:17–18; 3 Nephi 27:19–20; D&P 18:10–16; 19:15–19
Tabang sa Pagtudlo
“Ang imong importanting buluhaton mao ang pagtabang sa uban nga makat-on sa ebanghelyo, dili ang pagpakita og nindot nga mga presentasyon. Naglakip kini sa paghatag og mga kahigayunan sa mga estudyante sa pagtudlo sa usag usa” (Pagtudlo Walay Labaw Ka Mahinungdanon nga Tawag [1999], 64).