Kapitulo 6
Jesukristo, Atong Manluluwas ug Manunubos
“Kita nagpahayag sa kabalaan ni Jesukristo. Kita motan-aw Kaniya isip ang bugtong tinubdan sa atong kaluwasan.
Gikan sa Kinabuhi ni Ezra Taft Benson
“Ako dili makahinumdom og panahon nga wala ako mituo ni Jesukristo,” miingon si Presidente Ezra Taft Benson. “Kini ingon og ang pagkatinuod sa Iyang kinabuhi, kamatayon, ug pagkabanhaw kanunay na nga kabahin kanako. Nagtubo ako sa usa ka panimalay sa matinud-anong mga ginikanan kinsa kinasingkasing nga mituo ug mipamatuod ni Kristo, nga ako labing mapasalamaton.”1
Kini nga pagpamatuod kabahin ni Jesukristo mao ang sukaranan sa kinabuhi ni Presidente Benson. Kini miimpluwensya sa iyang mga prayoridad, migiya sa iyang mga desisyon, ug mitabang kaniya diha sa mga pagsulay. Kini naghatag og panglantaw sa katuyoan sa mortalidad ug kompyansa sa mga saad ug mga panalangin sa kinabuhing dayon.
Sa panahon sa iyang apostolikanhon nga pangalagad isip usa ka talagsaon nga saksi ni Jesukristo, si Presidente Benson kanunay nga mopamatuod kabahin sa Manluluwas. Nag-angkon nga “ang pangutana nga usahay gipangutana, ‘Mga Kristiyanos ba ang mga Mormon?’” mipamatuod siya:
“Kita nagpahayag sa pagkabalaan ni Jesukristo. Kita motan-aw Kaniya isip bugtong tinubdan sa atong kaluwasan. Naningkamot kita sa pagsunod sa Iyang mga pagtulun-an, ug naglantaw kita nga Siya moanhi pag-usab sa yuta sa pagmando ug paghari isip ang Hari sa mga Hari ug Ginoo sa mga Ginoo. Sa mga pulong sa usa ka propeta sa Basahon ni Mormon, kami moingon … , ‘Walay lain nga ngalan nga gihatag ni lain nga mga agianan ni paagi diin ang kaluwasan modangat ngadto sa mga katawhan, lamang diha ug pinaagi sa ngalan ni Kristo, ang Ginoong Makagagahum’ (Mosiah 3:17).”2
Ang pamahayag ni Presidente Benson sa pagkabalaan ni Jesukristo kasagaran nga gidugtong ngadto sa Basahon ni Mormon.3 “Pinaagi sa Basahon ni Mormon ang Dios naghatag alang sa atong panahon og makita nga ebidensya nga si Jesus mao ang Kristo,” siya miingon.4 Gitudlo niya nga ang “labing dako nga misyon” sa Basahon ni Mormon mao ang pagkombinser sa mga tawo kabahin niini nga kamatuoran.5 “Labaw sa katunga sa tanang bersikulo diha sa Basahon ni Mormon nagpasabut ngadto sa atong Ginoo,” iyang gitiman-an. “Gihatagan siya og labaw sa usa ka gatus nga nagkalain-laing mga pangalan diha sa Basahon ni Mormon. Kadto nga mga pangalan adunay piho nga kahulugan sa paghulagway sa Iyang balaang kinaiya.”6
Ang pagpamatuod ni Presidente Benson kabahin sa Manluluwas nagpadayag sa personal nga pagkasuod nga iyang gibati ngadto Kaniya:
“Sa tibuok nakong kalag, gihigugma ko Siya.
“Mapainubsanon akong magpamatuod nga Siya mao gihapon ang mahigugmaon, maloloy-ong Ginoo karon sama sa Iyang paglakaw sa abugong dalan sa Palestina. Suod siya sa Iyang mga sulugoon dinhi sa yuta. Siya nag-amuma ug nahigugma kanatong tanan karon. Kabahin niana kamo makasiguro.
“Buhi Siya karon isip atong Ginoo, atong Magtutudlo, atong Manluluwas, atong Manunubos, ug atong Dios.
“Panalanginan kitang tanan sa pagtuo Kaniya, sa pagdawat Kaniya, sa pagsimba Kaniya, sa hingpit nga pagsalig Kaniya, ug sa pagsunod Kaniya.”7
“Walay hitabo nga mas importante ngadto sa mga indibidwal o mga nasud kay sa pagkabanhaw sa Agalon.”
Mga Pagtulun-an ni Ezra Taft Benson
1
Tungod sa Iyang walay katapusang gugma kanato, gitubos kita ni Jesukristo gikan sa pisikal ug espiritwal nga kamatayon.
Walay laing impluwensya nga may dako kaayong epekto dinhi sa yuta kay sa kinabuhi ni Jesus ang Kristo. Dili nato mahunahuna ang atong mga kinabuhi nga wala ang Iyang mga pagtulun-an. Kon wala Siya kita malibug sa mga sayop nga pagtuo ug mga relihiyon nga nagagikan sa kahadlok ug kangitngit diin ang mahilayon ug kalibutanon nag-impluwensya. Wala nato matuman ang tumong nga Iyang gihatag kanato, apan kinahanglan gayud nga dili nato kalimtan kini, ni kalimtan nga ang atong panaw ngadto sa kahayag, ngadto sa kahingpitan, dili mahimo kon wala ang Iyang pagtulun-an, Iyang kinabuhi, Iyang kamatayon, ug Iyang pagkabanhaw.8
Ang pagbaton og bili sa pagdayeg ug pasalamat alang sa unsay nabuhat ni [Jesukristo] alang kanato, kinahanglan gayud nga atong hinumduman kining importanting mga kamatuoran:
Mianhi si Jesukristo sa yuta sa pagbuhat sa kabubut-on sa atong Amahan.
Mianhi siya nga may kahibalo nang daan nga Siya mopas-an sa gibug-aton sa mga sala natong tanan.
Nahibalo Siya nga ituboy siya sa krus.
Natawo Siya aron mahimo nga Manluluwas ug Manunubos sa tanang katawhan.
Siya nakahimo sa pagtuman sa Iyang misyon tungod kay Siya mao ang Anak sa Dios ug Siya nakabaton sa gahum sa Dios.
Siya andam sa pagtuman sa Iyang misyon tungod kay Siya nahigugma kanato.
Walay mortal nga tawo nga adunay gahum o kapasidad sa pagtubos sa tanang mga mortal gikan sa ilang kahimtang sa pagkahisalaag ug pagkapukan, ni bisan kinsa moboluntaryo sa paghatag sa iyang kinabuhi ug niana mopahinabo og usa ka malukpanong pagkabanhaw alang sa tanang mga mortal.
Si Jesukristo lamang ang makahimo ug andam sa pagtuman sa maong matubsanong buhat sa gugma.9
Si Jesukristo … mianhi niini nga yuta diha sa gitakda nang daang panahon pinaagi sa harianong katungod sa pagkatawo nga mipatunhay sa Iyang pagkadios. Gilangkob diha sa Iyang kinaiya mao ang tawhanong mga hiyas sa Iyang mortal nga inahan ug ang balaang mga hiyas ug mga gahum sa Iyang Mahangturong Amahan.
Ang iyang talagsaong kaliwatan mihimo Kaniya nga manununod sa halangdong tawag—Ang Bugtong Anak sa Dios diha sa unod. Isip ang Anak sa Dios, Iyang napanunod ang mga gahum ug kahibalo diin walay tawo nga nakaangkon kaniadto o sukad. Siya sa tinuod mao si Emmanuel, nga nagpasabut og “ang Dios uban kanato.” (Tan-awa sa Isa. 7:14; Mat. 1:23.)
Bisan tuod Siya mao ang Anak sa Dios nga gipadala dinhi sa yuta, ang balaang plano sa Amahan nagkinahanglan nga si Jesus mosagubang sa tanang mga kalisud ug mga kasakit sa mortalidad. Busa siya nahimong nagsagubang og mga “tintasyon, … kagutom, kauhaw, ug kakapoy.” (Mosiah 3:7.)
Aron makasarang isip Manunubos sa tanang anak sa atong Amahan, si Jesus gikinahanglan nga sa hingpit magmasulundon ngadto sa tanang mga balaod sa Dios. Tungod kay Siya mipaubos sa Iyang kaugalingon ngadto sa kabubut-on sa Amahan, Siya mitubo “sa grasya ug dugang pa nga grasya, hangtud nga siya nakadawat sa kahingpitan” sa gahum sa Amahan. Busa diha Niya ang “tanan nga gahum, diha sa langit ug diha sa yuta.” (D&P 93:13, 17.)10
Tungod kay si [Jesus] Dios—gani ang Anak sa Dios—madala Niya ang kabug-aton ug ang palas-anon sa mga sala sa ubang mga tawo diha sa Iyang Kaugalingon. Nanagna si Isaias [kabahin] sa pagkaandam sa atong Manluluwas sa pagbuhat niini sa ingon niini nga mga pulong: “Sa pagkatinuod gipas-an niya ang atong mga kasakitan, ug gipas-an niya ang atong mga kasub-anan: … siya ginasamaran tungod sa atong kalapasan, siya napangos tungod sa atong mga kasal-anan: ang silot sa atong pakigdait diha sa ibabaw niya; ug tungod sa iyang mga labod kita nangaayo.” (Isa. 53:4–5.)
Kadtong sagrado, walay kahakog nga buhat sa boluntaryong pagdala diha sa Iyang Kaugalingon sa mga sala sa tanang mga tawo mao ang Pag-ula. Kon giunsa sa Usa ang pag-antus sa sala alang sa tanan lapas sa pagsabut sa mortal nga tawo. Apan ako nahibalo niini: Giako Niya kini sa Iyang Kaugalingon ang mga sala sa tanan ug gibuhat ang mao gumikan sa Iyang walay katapusang gugma alang kanatong tanan. Nag-ingon Siya: “Kay tan-awa, Ako ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol; … kansang pag-antus nakapahimo sa akong kaugalingon, gani ang Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu—ug buot nga Ako unta dili moinom sa mapait nga kopa, ug mobiya.” (D&P 19:16, 18.)
Bisan pa nianang dili maantus nga kasakit, gikuha Niya ang kopa ug miinom. Giantus Niya ang mga sakit sa tanang tawo aron dili kita kinahanglan nga mag-antus. Gilahutay Niya ang pagpakaulaw ug mga insulto sa Iyang mga tiglutos nga walay pagmulo o pagsukol. Iyang giagwanta ang paglatus ug dayon ang kaulaw sa walay kalooy nga paglansang—diha sa krus.11
Sa Getsemani ug didto sa Kalbaryo, si [Jesus] mibuhat sa walay kinutuban ug walay katapusan nga pag-ula. Kini mao ang labing dako nga bugtong nga buhat sa gugma nga girekord sa kasaysayan. Dayon misunod ang Iyang pagkamatay ug pagkabanhaw.
Busa nahimo Siya nga atong Manunubos—nagtubos kanato gikan sa pisikal nga kamatayon, ug nagtubos kanato gikan sa espiritwal nga kamatayon kinsa mosunod sa mga balaod ug mga ordinansa sa ebanghelyo.12
Dili gayud nato masabtan ni matugkad dinhi sa mortalidad giunsa Niya pagtuman sa unsay Iyang gibuhat, apan kinahanglan gayud nga kita dili mapakyas sa pagsabut ngano nga Siya mibuhat sa unsay Iyang gibuhat.
Ang tanan nga Iyang gibuhat giaghat sa Iyang walay kahakog, walay katapusang gugma alang kanato.13
“Walay laing impluwensya nga may dako kaayong epekto dinhi sa yuta kay sa kinabuhi ni Jesus ang Kristo.”
2
Si Jesukristo mibangon gikan sa lubnganan, ug Siya buhi karon isip usa ka nabanhaw nga binuhat.
Ang labing dako nga mga hitabo sa kasaysayan mao kadtong nakaapekto sa labing daghan nga mga tawo sulod sa labing taas nga mga panahon. Pinaagi niini nga sumbanan, walay hitabo nga mas importante ngadto sa indibidwal o mga nasud kay sa pagkabanhaw sa Agalon.
Ang tinuod nga pagkabanhaw sa matag kalag kinsa nabuhi ug namatay dinhi sa yuta usa ka kasigurohan, ug sa pagkatinuod ang usa ka tawo kinahanglan nga maghimo og mabinantayong pag-andam alang niini nga hitabo. Usa ka mahimayaong pagkabanhaw kinahanglan mao ang tumong sa matag lalaki ug babaye, kay ang pagkabanhaw matinuod.
Walay mas hingpit pa ka malukpanon kay sa pagkabanhaw. Ang tanang buhi nga binuhat mabanhaw. “Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi.” (1 Cor. 15:22.)
Ang mga rekord sa kasulatan nag-asoy kanato nga sa ikatulo nga adlaw human gilansang si Jesus sa krus, dihay dakong linog. Ang bato giligid gikan sa pultahan sa lubnganan. Ang pipila sa mga babaye, ang labing mahalaron sa Iyang mga sumusunod, mianha sa dapit nga may mga pahumot “ug walay nakaplagan nga lawas ni Ginoong Jesus.”
Mga anghel mitungha ug yanong miingon, “Ngano nga ang buhi anha man ninyo pangitaa diha sa mga patay? Wala Siya dinhi, kondili nabanhaw.” (Lucas 24:3–6.) Wala bisan unsa sa kasaysayan ang makasama nianang mahinuklugong pahibalo: “Wala siya dinhi, kondili nabanhaw.”
Ang kamatuoran kalabut sa pagkabanhaw sa atong Ginoo gipasikad diha sa mga pagpamatuod sa daghangtakus katuohan nga mga saksi. Ang nabanhaw nga Ginoo mipakita ngadto sa daghang mga babaye, ngadto sa duha ka mga disipulo nga naglakaw padulong sa Emaus, ngadto ni Pedro, ngadto sa mga Apostoles; ug “human niana,” sumala sa gitaho ni Pablo, “nagpakita siya ngadto sa kapin sa lima ka gatus ka mga igsoon. … Ug sa katapusan sa tanan nagpakita siya ni [Pablo] usab.” (1 Cor. 15:6, 8.) …
Isip usa sa Iyang mga saksi sa ulahing mga adlaw, magpamatuod ako nga Siya buhi karon. Siya usa ka nabanhaw nga Binuhat. Siya ang atong Manluluwas, atong Ginoo, ang Anak gayud sa Dios. Ako magpamatuod nga Siya moanhi pag-usab isip usa ka nahimaya, nabanhaw nga Ginoo. Kana nga adlaw dili layo. Ngadto sa tanan kinsa nagdawat Kaniya isip ang Manluluwas ug Ginoo, ang Iyang tinuod nga pagkabanhaw nagpasabut nga ang kinabuhi dili matapos diha sa kamatayon, tungod kay Siya misaad: “Tungod kay Ako buhi, kamo usab mabuhi.” (Juan 14:19.)14
Siya lamang ang may gahum sa pagkabanhaw. Ug busa sa ikatulong adlaw human sa Iyang paglubong, mibangon Siya gikan sa iyang lubnganan ug mipakita sa Iyang Kaugalingon ngadto sa daghan. … Isip usa sa [Iyang] talagsaon nga mga saksi ingon nga gi-call karong panahona, magpamatuod ako nganha kaninyo nga Siya buhi. Siya buhi nga may nabanhaw nga lawas. Walay kamatuoran ni tinuod nga hitabo nga ako mas labaw pa nga nakasiguro o mas labaw ka masaligon kay sa kamatuoran sa tinuod nga pagkabanhaw sa atong Ginoo.15
3
Kinahanglan gayud nga kita walay kahadlok sa atong pagpamatuod ni Jesukristo.
Ang usa ka bililhon kaayo nga panalangin nga anaa sa tanang miyembro sa Simbahan mao ang pagpamatuod sa pagkabalaan ni Jesukristo ug sa Iyang simbahan. Ang pagpamatuod maoy usa sa pipila ka mga kabtangan nga mahimong dad-on nato kon kita mobiya niini nga kinabuhi.
Ang pagbaton og pagpamatuod kabahin ni Jesus mao ang pag-angkon og kahibalo pinaagi sa Espiritu Santo kalabut sa balaan nga misyon ni Jesukristo.
Ang pagpamatuod kabahin ni Jesus mao ang pagpakahibalo sa balaang kinaiya sa pagkatawo sa atong Ginoo—nga Siya gayud ang Bugtong Anak nga gipakatawo.
Ang pagpamatuod kabahin ni Jesus mao ang mahibalo nga Siya mao ang gisaad nga Mesiyas ug nga samtang Siya mipuyo taliwala sa mga tawo nakahimo Siya og daghang gamhanan nga mga milagro.
Ang pagpamatuod kabahin ni Jesus mao ang mahibalo nga ang mga balaod nga Iyang gihatag isip Iyang doktrina tinuod ug dayon ang pagsunod niini nga mga balaod ug mga ordinansa.
Ang pag-angkon og pagpamatuod kabahin ni Jesus mao ang mahibalo nga Siya boluntaryong midala diha sa Iyang Kaugalingon sa mga sala sa tanang katawhan didto sa Tanaman sa Getsemani, nga mihimo Kaniya sa pag-antus sa lawas ug sa espiritu ug sa pag-agas sa dugo sa matag lungag sa panit. Ang tanan niini Iyang gihimo aron kita unta dili mag-antus kon kita maghinulsol. (Tan-awa sa D&P 19:16, 18.)
Ang pag-angkon og pagpamatuod kabahin ni Jesus mao ang mahibalo nga Siya mibangon nga madaugon gikan sa lubnganan nga may pisikal, nabanhaw nga lawas. Ug tungod kay Siya buhi, mao usab ang tanang katawhan.
Ang pag-angkon og pagpamatuod kabahin ni Jesus mao ang mahibalo nga ang Dios nga Amahan ug si Jesukristo sa tinuod mipakita ngadto ni Propeta Joseph Smith aron sa pagtukod sa bag-ong dispensasyon sa Iyang ebanghelyo aron ang kaluwasan mahimong isangyaw ngadto sa tanang kanasuran sa dili pa Siya moanhi.
Ang pag-angkon og pagpamatuod kabahin ni Jesus mao ang mahibalo nga ang Simbahan, nga Iyang gitukod sa tunga-tunga sa kapanahonan ug gipahiuli sa karon nga mga panahon, ingon nga gipahayag sa Ginoo, “mao lamang ang tinuod ug buhi nga simbahan diha ibabaw sa tibuok yuta.” (D&P 1:30.)
Ang pagbaton sa ingon nga pagpamatuod importante. Apan ang mas importante pa gani mao ang pagkawalay kahadlok sa atong pagpamatuod.
Ang pagpamatuod kabahin ni Jesus nagpasabut nga kita midawat sa balaang misyon ni Jesukristo, mihangup sa Iyang ebanghelyo, ug mibuhat sa Iyang mga buhat. Kini nagpasabut usab nga kita midawat sa propetikanhong misyon ni Joseph Smith ug sa iyang mga sumusunod ug mosunod sa ilang tambag. Ingon nga gisulti ni Jesus, “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.” (D&P 1:38.)
Nagsulti kabahin niadtong kinsa sa kadugayan modawat sa mga panalangin sa celestial nga gingharian, ang Ginoo misulti ngadto ni Joseph Smith:
“Sila mao sila kinsa nakadawat sa pagpamatuod ni Jesus, ug mituo sa iyang ngalan ug gibunyagan subay sa paagi sa iyang paglubong, gilubong diha sa tubig sa iyang ngalan, ug kini sumala sa sugo diin siya mihatag.” (D&P 76:51.)
Kini sila mao kinsa walay kahadlok sa ilang pagpamatuod kabahin ni Jesus, kinsa, ingon nga gipahayag sa Ginoo, “nakabuntog pinaagi sa hugot nga pagtuo, ug gibugkos pinaagi sa Balaang Espiritu sa saad, diin ang Amahan mipadala diha sa tanan niadto kinsa mga makiangayon ug matarung. (D&P 76:53.)16
4
Ang hugot nga pagtuo diha ni Jesukristo naglangkob sa hingpit nga pagsalig diha Kaniya ug sa pagsunod sa Iyang mga pagtulun-an.
Ang sukaranang baruganan sa atong relihiyon mao ang hugot nga pagtuo diha ni Ginoong Jesukristo. Ngano nga kinahanglan atong i-sentro ang atong kompyansa, atong paglaum, ug atong pagsalig diha sa usa ka nag-inusarang tawo? Ngano nga ang hugot nga pagtuo diha Kaniya kinahanglan kaayo sa kalinaw sa hunahuna niini nga kinabuhi ug paglaum sa kalibutan nga umaabut?
Ang atong mga tubag niini nga mga pangutana magtino kon atubangon ba nato ang kaugmaon nga adunay kaisug, paglaum, ug pagkapositibo o nga adunay pagduha-duha, kakulba, ug pagkanegatibo.
Ang akong mensahe ug pagpamatuod mao kini: Si Jesukristo lamang ang talagsaong makahimo sa paghatag niana nga paglaum, niana nga kompyansa, ug niana nga kalig-on nga atong gikinahanglan sa pagbuntog sa kalibutan ug mopatigbabaw sa atong tawhanong mga kahuyang. Ang pagbuhat sa mao, kinahanglan gayud nga atong ibutang ang atong hugot nga pagtuo diha Kaniya ug mosunod sa Iyang mga balaod ug mga pagtulun-an. …
Ang hugot nga pagtuo diha Kaniya labaw pa kay sa pag-ila lamang nga Siya buhi. Kini labaw pa kay sa pagsulti nga kita mituo.
Ang hugot nga pagtuo diha ni Jesukristo naglangkob sa hingpit nga pagsalig diha Kaniya. Isip Dios, Siya adunay walay katapusan nga gahum, salabutan, ug gugma. Walay tawhanong problema nga lapas pa sa Iyang kapasidad sa pagsulbad. Tungod kay Siya mikunsad ubos sa tanang mga butang (tan-awa sa D&P 122:8), Siya nahibalo unsaon pagtabang kanato sa pagbarug labaw sa atong inadlaw nga mga kalisud.
Ang hugot nga pagtuo diha Kaniya nagpasabut og pagtuo nga bisan tuod og kita wala makasabut sa tanang mga butang, Siya nakasabut. Busa, kita, maghunahuna Kaniya “sa matag hunahuna, ayaw pagduha-duha, ayaw kahadlok.” (D&P 6:36.)
Ang hugot nga pagtuo diha Kaniya nagpasabut nga Siya aduna sa tanang gahum ibabaw sa tanang katawhan ug sa tanang kanasuran. Walay dautan nga dili Niya mahunong. Ang tanang mga butang anaa sa Iyang mga kamot. Kini nga yuta mao ang Iyang tinuod nga gingharian. Apan Siya mitugot sa dautan aron nga kita makahimo og mga pagpili tali sa maayo ug sa dautan.
Ang Iyang ebanghelyo mao ang hingpit nga tambal alang sa tanang tawhanong mga problema ug mga sakit sa katilingban.
Apan ang Iyang ebanghelyo epektibo lamang kon kini gigamit sa atong mga kinabuhi. Busa, kita kinahanglan gayud nga “magbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.” (2 Ne. 32:3.)
Gawas kon atong buhaton ang Iyang mga pagtulun-an, kita wala magpakita og hugot nga pagtuo diha Kaniya.
Hunahunaa unsa ka lahi ang kalibutan kon ang tanang katawhan mobuhat sigun sa Iyang gisulti. “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan. … Higugmaa ang imong silingan sama sa imong kaugalingon.” (Mat. 22:37, 39.)
Nan unsa ang tubag ngadto sa pangutana “Unsa ang angay nga buhaton kalabut sa mga problema ug mga kalibug nga giatubang sa mga indibidwal, mga komunidad, ug mga nasud karon?” Ania ang Iyang yano nga pahimangno:
“Tuo sa Dios; tuo nga siya mao, ug nga siya ang milalang sa tanan nga mga butang, lakip sa langit ug sa yuta; tuo nga siya aduna sa tanan nga kaalam, ug sa tanan nga gahum, sa langit ug sa yuta; tuo nga ang tawo dili makasabut sa tanan nga mga butang diin ang Ginoo mahimo nga makasabut. …
“Tuo nga kamo kinahanglan gayud maghinulsol sa inyong mga sala ug mobiya kanila, ug magpaubos sa inyong mga kaugalingon sa atubangan sa Dios; ug mangutana sa kinasingkasing nga siya mopasaylo kaninyo; ug karon, kon kamo motuo sa tanan niini nga mga butang tan-awa nga kamo mobuhat kanila.” (Mosiah 4:9–10; mga italic gidugang.)17
“Sumunod kamo kanako” (Marcos 1:17).
5
Kita labing mapanalanginan ug hingpit nga magmalipayon kon kita maningkamot nga mahisama ni Jesukristo.
Usa sa mga katuyoan niini nga kinabuhi mao nga kita pagasulayan aron sa pagsuta kon kita “mobuhat ba sa tanan nga mga butang bisan unsa ang isugo sa Ginoo” nga atong Dios ngari kanato. (Abr. 3:25.) Sa ato pa, kita gikinahanglan nga magkat-on sa kabubut-on sa Ginoo ug buhaton kini. Kita gikinahanglan nga magsunod sa ehemplo ni Jesukristo ug magpakasama Kaniya.
Ang mahinungdanong pangutana sa kinabuhi kinahanglan nga sama sa gipangutana ni Pablo: “Ginoo, unsa ang imong gusto nga pagabuhaton ko?” (Mga Buhat 9:6.) ….
Nagkinahanglan kita og dugang pa nga kalalakin-an ug kababayen-an ni Kristo kinsa sa kanunay mahinumdom Kaniya, kinsa mosunod sa Iyang mga sugo nga Iyang gihatag ngadto kanila. Ang labing dako nga sukdanan sa kalampusan mao ang makita kon unsa kita kaduol nga makasunod sa Iyang mga ehemplo sa matag higayon.18
Ang uban … andam nga magpakamatay alang sa ilang tinuohan, apan dili sila andam sa pagsunod niini sa hingpit. Si Kristo nabuhi ug namatay alang kanato. Pinaagi sa Iyang pag-ula ug pinaagi sa pagsunod sa Iyang mga ehemplo, makaangkon kita sa labing dako nga gasa sa tanan—ang kinabuhing dayon, nga mao kanang matang sa kinabuhi sa gamhanang Mahangturong Binuhat—ang atong Amahan sa Langit.
Nangutana si Kristo, “Unsa nga matang sa mga tawo [kita] angay nga mahisama?” Dayon mitubag siya pinaagi sa pag-ingon nga kita angay mahisama gani sama nga Siya mao. (3 Ne. 27:27.)
Kana nga [tawo] ang labing halangdon ug labing bulahan ug hingpit ang kalipay kansang kinabuhi nagkaduol sa sumbanan ni Kristo. Kini walay kalabutan sa yutan-ong katigayunan, gahum, o dungog. Ang bugtong sukdanan sa kahalangdon, kabulahan, ug kahingpit sa kalipay mao ang unsa ka duol ang kinabuhi nga mahisama sa Magtutudlo, nga si Jesukristo. Siya mao ang matarung nga dalan, ang hingpit nga kamatuoran, ug ang buhong nga kinabuhi.
Ang kanunay ug labing nagbalik-balik nga pangutana sa atong mga alimpatakan, nga makaapekto sa atong hunahuna ug binuhatan sa atong mga kinabuhi, kinahanglan nga, “Ginoo, unsa ang imong gusto nga pagabuhaton ko?” (Mga Buhat 9:6.) Ang tubag niana nga pangutana moabut lamang pinaagi sa Kahayag ni Kristo ug sa Espiritu Santo. Bulahan kadtong kinsa nagkinabuhi sa paagi nga ang ilang pagkatawo aduna niining duha. …
Naghunahuna sa tanan nga gihimo ug ginahimo ni [Jesukristo] alang kanato, adunay usa ka butang nga ato untang ihatag Kaniya agi og balos.
Ang labing importanting gasa nga gihatag ni Kristo kanato mao ang Iyang kinabuhi ug sakripisyo. Nan dili ba kinahanglan nga kana mao usab ang atong gamay nga gasa ngadto Kaniya —ang atong mga kinabuhi ug mga sakripisyo, dili lamang sa karon apan sa umaabut?19
[Kadto kinsa] gipangulohan ni Kristo mahimong kabahin ni Kristo. … Ang ilang kabubut-on anaa ubos sa Iyang kabubut-on. (Tan-awa sa Juan 5:30.) Sila kanunay nga nagbuhat niadtong mga butang nga nagpahimuot sa Ginoo. (Tan-awa sa Juan 8:29.) Dili lamang kay sila magpakamatay alang sa Ginoo, apan mas importante pa, buot silang magpakabuhi alang Kaniya.
Sudla ang ilang mga panimalay, ug ang mga hulagway diha sa ilang mga bongbong, ang mga basahon diha sa ilang mga estante, ang musika nga gitugtog, ang ilang mga pulong ug mga lihok nagpadayag kanila isip mga Kristiyano. Nagbarug sila nga mga saksi sa Dios sa tanang panahon, ug sa tanang mga butang, ug sa tanang mga dapit. (Tan-awa sa Mosiah 18:9.) Anaa sa ilang mga hunahuna si Kristo, samtang nagtan-aw sila ngadto Kaniya sa matag hunahuna. (Tan-awa sa D&P 6:36.) Anaa si Kristo sa ilang mga kasingkasing ingon nga ang ilang mga pagbati gibutang diha Kaniya sa hangtud. (Tan-awa sa Alma 37:36.)
Hapit matag semana sila nag-ambit sa sakrament ug nagsaksi pag-usab ngadto sa ilang Mahangturong Amahan nga sila andam sa pagdala diha kanila sa ngalan sa Iyang Anak, sa kanunay naghinumdom Kaniya, ug naghupot sa Iyang mga sugo. (Tan-awa sa Moro. 4:3.)
Sa pinulongan sa Basahon ni Mormon, sila “nagbusog sa pulong ni Kristo” (2 Ne. 32:3), “naghisgot kang Kristo” (2 Ne. 25:26), “nalipay diha kang Kristo” (2 Ne. 25:26), “nabuhi diha kang Kristo” (2 Ne. 25:25), ug “mihimaya sa [ilang] Jesus” (tan-awa sa 2 Ne. 33:6). Sa ato pa, giwagtang nila ang ilang mga kaugalingon diha sa Ginoo ug nakakaplag sa kinabuhing dayon. (Tan-awa sa Lucas 17:33.)20
Mga Sugyot alang sa Pagtuon ug Pagtudlo
Mga Pangutana
-
Gitudlo ni Presidente Benson nga samtang kita dili hingpit nga makasabut kon giunsa sa Manluluwas pagpahinabo sa Pag-ula, kita makasabut ngano nga Siya mibuhat niini (tan-awa sa seksyon 1). Sa unsa nga mga paagi kini nga pagsabut nag-impluwensya sa inyong kinabuhi?
-
Samtang kamo nagtuon sa seksyon 2, paghunahuna sa epekto sa Pagkabanhaw sa Manluluwas. Sa unsang paagi nga ang Iyang Pagkabanhaw nakaimpluwensya sa inyong kinabuhi?
-
Ngano sa inyong hunahuna ang pagpamatuod kabahin ni Jesukristo “usa ka bililhon kaayo nga panalangin”? (Tan-awa sa Seksyon 3.) Unsa ang kahulugan niini nganha kaninyo nga dili mahadlok sa inyong pagpamatuod kabahin sa Manluluwas?
-
Pamalandunga ang mga pulong ni Presidente Benson mahitungod sa hugot nga pagtuo diha ni Jesukristo (tan-awa sa seksyon 4). Sa unsa nga mga paagi kini nga paghulagway sa hugot nga pagtuo diha ni Kristo labaw sa “pag-ila lamang nga Siya buhi”?
-
Miingon si Presidente Benson nga ang mga tawo kinsa “gipangulohan ni Kristo” andam nga “magpakamatay alang sa Ginoo, apan, mas importante pa, buot silang magpakabuhi alang Kaniya” (seksyon 5). Unsa ang kahulugan niini nganha kaninyo nga magpakabuhi alang sa Manluluwas?
May Kalabutan nga mga Kasulatan
Juan 10:17–18; 2 Nephi 9:20–24; 31:20–21; Mosiah 16:6–11; 3 Nephi 27:20–22; Moroni 7:33; D&P 19:1–3, 16–19; 76:22–24; Mga Artikulo sa Hugot nga Pagtuo 1:3
Tabang sa Pagtuon
“Samtang imong mabati ang kalipay nga nagagikan sa pagsabot sa ebanghelyo, gusto ka nga mogamit sa unsay imong nakat-onan. Paningkamot sa pagpuyo nga nahisubay sa imong nasabtan. Ang pagbuhat sa ingon molig-on sa imong pagtuo, kahibalo, ug pagpamatuod” (Isangyaw ang Akong Ebanghelyo [2004], 21).