Ang Kalibutan sa Espiritu

Samtang namulong sa haya ni Elder Thomas Williams, si Presidente Brigham Young naghisgot mahitungod sa hilisgutan sa kamatayon: “Kanunay nga moabut sa hunahuna sa mga tawo ang mga pangutana— ‘Ako buot makahibalo asa ako padulong! Masusi ba ninyo? Nan, kamo moadto ngadto sa kalibutan sa espiritu, diin karon atua si Brother Thomas. Siya karon misulod ngadto sa mas taas nga kahimtang, mao kana, ang naangkon sa iyang espiritu, kay sa diha kini sa iyang lawas. ‘Nganong dili ako makakita kaniya? Nganong dili nako maistorya ang iyang espiritu? Buot unta nako nga makita ang akong bana o ang akong amahan ug makigsulti kaniya!’ Dili makatarunganon nga kamo makigsulti, dili matarung nga kamo makigsulti; tingali inyong mataligam-an ang tinuod nga katuyoan sa kinabuhi kon kamo aduna niini nga pribilehiyo, ug adunay sama nga pagsulay sa hugot nga pagtuo nga inyong atubangon, dili kaayo malisud nga dalan sa kasakit nga inyong pagalaktan, dili kaayo dako nga gubat nga awayan, dili kaayo mahinungdanon nga kadaugan nga daugon, ug inyong mataligam-an ang tumong nga inyong gipaningkamutan. Matarung kini nga ingon niini, nga kini nga tabil isira; nga kita dili makakita sa Dios, nga kita dili makakita og mga anghel, nga kita dili makigsulti kanila gawas kon pinaagi sa higpit nga pagsunod sa iyang mga kinahanglanon, ug hugot nga pagtuo diha ni Jesukristo (DNSW, 28 sa Hulyo 1874, 1).

Mga Pagtulun-an ni Brigham Young

Ang espiritu sa mga patay moadto sa kalibutan sa espiritu.

Kon mamatay na kini nga lawas, asa kamo padulong? Ngadto sa espirituhanon nga kalibutan (DBY, 376).

Ang dautan nga mga espiritu nga mobiya dinhi ug moadto sa kalibutan sa espiritu, dautan ba sila didto? Oo (DNW, 27 sa Ago. 1856, 3).

Kon ang mga espiritu mobiya sa ilang mga lawas, … Sila andam nga makakita, makadungog ug makasabut sa espirituhanong mga butang. … Makakita ba kamo sa mga espiritu niini nga kwarto? Dili. Pananglit ang Ginoo mohikap sa inyong mga mata aron kamo makakita, makakita na ba kamo sa mga espiritu? Oo, sama sa inyong pagkakita karon sa mga lawas, sama sa sulugoon ni [Elisha] [tan-awa sa 2 Mga Hari 6:16–17]. Kon ang Ginoo motugot niini, ug iyang kabubut-on nga kini mahitabo, kamo makakita sa mga espiritu nga mibiya gikan niini nga kalibutan, sama sa inyong pagkakita sa mga lawas uban sa inyong natural nga mga mata (DBY, 376–77).

Si Jesus miabli sa pultahan sa kaluwasan ngadto niadtong atua sa kalibutan sa espiritu.

Si Jesus mao ang unang tawo nga misangyaw ngadto sa mga espiritu sa bilanggoan, naghupot sa mga yawe sa Ebanghelyo sa kaluwasan ngadto kanila. Kadto nga mga yawe gihatag ngadto kaniya sa adlaw ug takna nga siya miadto ngado sa kalibutan sa espiritu, ug uban kanila iyang giablihan ang pultahan sa kaluwasan ngadto sa mga espiritu diha sa bilanggoan (DBY, 378).

Buot kitang mosakripisyo pag-ayo aron sa pagbuhat sa kabubut-on sa Dios sa pagpangandam sa pagdala niadtong kinsa walay kahigayunan sa pagpaminaw sa Ebanghelyo samtang dinhi pa sa yuta, tungod sa yano nga katarungan nga, sa kalibutan sa espiritu, sila dili makapahigayon sa mga ordinansa sa balay sa Dios. Miagi sila sa mapait nga kaagi, ug lapas sa mahimo sa personal nga pagpahigayon alang sa kapasayloan sa ilang mga sala ug alang sa ilang kahimayaan, ang sangputanan sila anaa ubos sa panginahanglan sa pagsalig sa ilang mga higala, sa ilang mga anak ug sa mga anak sa ilang mga anak sa pagpahigayon alang kanila, aron sila madala ngadto sa celestial nga gingharian sa Dios (DBY, 406).

Itandi kadtong mga lumulupyo sa yuta kinsa nakadungog sa Ebanghelyo sa atong panahon, sa mga minilyon nga wala gayud makadungog niini, o nakabaton sa mga yawe sa kaluwasan nga gipahayag ngadto kanila, ug kamo makaingon dayon sama kanako, nga adunay dako kaayong trabaho nga ipahigayon sa kalibutan sa espiritu (DBY, 377).

Hunahunaa ang minilyon ka mga tawo nga nabuhi ug namatay nga wala makadungog sa Ebanghelyo dinhi sa yuta, nga wala ang mga yawe sa Gingharian. Dili sila andam alang sa celestial nga himaya, ug walay gahum nga makapaandam kanila kon wala ang mga yawe niini nga Priesthood (DBY, 378).

Si Papa Smith [Joseph Smith Sr.] ug si Carlos [Smith] ug si Brother [Edward Patridge], oo, ug ang tanang laing buotan nga Santos, sama ka bise didto a kalibutan sa espiritu sama kaninyo ug kanako dinhi. Sila makakita kanato, apan kita dili makakita kanila gawas kon ang atong mga mata mabuksan. Unsa ang ilang gibuhat dinhi? Sila nagsangyaw, nagsangyaw sa tanang higayon, ug nag-andam og dalan alang kanato aron sa pagpadali sa atong buhat sa pagtukod og mga templo dinhi ug bisan asa (DBY, 378).

Ang matag matinud-anon nga paghago sa tawo magpadayon kon ang paghago ni Jesus, hangtud ang tanang mga butang nga mahimong tubson matubos ug ipakita ngadto sa Amahan. Kita adunay dakong trabahoon (DBY, 378).

Ang mga espiritu nga nagpuyo niini nga mga tabernakulo dinhi niini nga yuta, kon sila mobiya niini moadto direkta ngadto sa kalibutan sa mga espiritu. Unsa! Usa ka katiguman sa mga lumulupyo didto nga mga espiritu, nag-uban sa usag usa, sama sa ilang gibuhat dinhi? Oo, mga kaigsoonan, sila atua didto tanan, ug kon sila makig-uban sa usag usa, ug magpundok, sa kabanayan, ug sa katilingban sama sa ilang gibuhat dinhi, ila kini nga pribilehiyo. Walay pagduha-duha, kapin kun kulang, nakakita, nakadungog, nagistoryahay sa usag usa, sa maayo ug sa dautan. Kon ang mga Elder sa Israel niining ulahing mga panahon moadto ug mosangyaw ngadto sa mga espiritu diha sa bilanggoan, sila makig-uban kanila, sama gayud sa atong mga Elder uban sa dautan dinhi sa yuta, kon sila mosangyaw ngadto kanila (DBY, 378).

Ang kalibutan sa espiritu usa ka aktibo nga dapit diin ang paglambo ug kauswagan posible.

Kon kamo atua na sa kalibutan sa espiritu, ang tanan didto makita nga tinuod sama sa mga butang karon dinhi. Ang mga espiritu makasinati sa mga espiritu didto sa kalibutan sa espiritu—mag-istoryahanay, makakita, ug makagamit sa tanang matang sa komunikasyon ngadto sa usag usa sama ka sinati ug ka tinuod samtang dinhi pa sa yuta. Didto, sama dinhi, ang tanang mga butang ordinaryo, ug kamo makasabut niini sama sa inyong pagkasabut sa ordinaryo nga mga butang. Kamo didto makakita nga kadtong mga espiritu nga atong gihisgutan buhi; dili sila matulog. Ug kamo makahibalo nga sila naningkamot sa ilang tibuok gahum—nagtrabaho ug naghago sa makugihon sama ni bisan kinsa nga indibidwal sa pagtuman og buhat niini nga kalibutan (DBY, 380).

Ang mga espiritu nakasinati sa mga espiritu sama nga ang lawas nakasinati sa lawas, bisan og ang mga espiritu gihimo sa butang nga hilabihan nga pino kaayo nga dili gani makita niining yano nga organisasyon. Sila molakaw, mosulti, ug magmiting; ug ang mga espiritu sa buotan nga mga tawo sama kang Joseph ug sa mga Elder, kinsa mibiya niini nga Simbahan dinhi sa yuta sulod sa usa ka panahon aron maglihok sa laing kalibutan, migamit sa ilang tanang gahum ug moadto sa lain-laing lugar aron sa pagsangyaw sa Ebanghelyo, ug si Joseph naggiya kanila, nag-ingon, lakaw, akong mga kaigsoonan, ug kon sila mobabag sa inyong dalan, lakaw ug mandoi sila sa pagpapahawa. Anaa kaninyo ang Priesthood ug kamo makapapahawa kanila, apan kon si bisan kinsa kanila ang gustong maminaw sa Ebanghelyo, sangyaw ngadto kanila (DBY, 379).

Ako makasulti kabahin sa pagbiya sa atong mga higala, ug sa atong pagbiya, nga ako hapit na gayud makasabut sa kahangturan mao nga ako kinahanglan nga mopakita og hilabihan ka hugot nga pagtuo nga motinguha nga mabuhi kay sa akong nahimo sukad sa akong tibuok kinabuhi nga magpakabuhi. Ang kahayag ug himaya sa sunod nga pinuy-anan dili ikahulagway. Kini walay babag aron kon kita matigulang na og magkapandolpandol ug magmabinantayon basin unya og kita matumba. Atong makita ang kabantan-onan, gani, kanunay nagkapandolpandol ug natumba. Apan didto, pagkalahi! Sayon ang ilang paglihok ug sama sa kilat. Kon kita gustong mobisita sa Jerusalem, o kini, kana, o sa ubang dapit—ug sa akong pagtuo kita tugutan kon kita magtinguha—atua kita, nagtan-aw sa mga kadalanan niini. Kon kita gusto nga motan-aw sa Jerusalem sama sa mga adlaw sa Manluluwas, o kon kita atua nga makakita sa Tanaman sa Eden sama sa dihang kini gilalang, kita makakita, ug kini atong makita ingon nga kini diha sa espirituhanong paagi, kay kini gilalang pag-una sa espirituhanong paagi ug dayon sa temporal, ug sa espirituhanon kini nagpabilin. Ug kon atua na didto atong makita ang yuta sa sinugdanan sa pagkalalang, o kita makabisita og bisan unsa nga siyudad nga atong gusto nga ania sa ibabaw niini. Kon kita buot nga makasabut kon giunsa nila sa pagpakabuhi dinhi niining kasapdang mga isla, o sa China, kita kita atua, sa pagkatinuod, kita sama sa kahayag sa kabuntagon. … Ang Dios mipadayag og diyutay nga mga butang, kalabut sa iyang paglihok ug gahum, ug ang palakaw ug kalihokan sa kilat nakahatag og maanindot nga paghulagway sa abilidad sa Makagagahum (DBY, 380).

Kon kita moadto sa kalibutan sa espiritu atong maangkon ang bahin sa iyang gahum. Dinhi, kita sa kanunay gisamok sa mga sakit ug kasakit sa nagkalain-lain nga mga matang. Sa kalibutan sa espiritu dili na kita magantus niining tanan, ug makapahimulos sa kinabuhi, himaya, ug kaalam; ug kita adunay Amahan nga makigsulti kanato, si Jesus makigsulti kanato, ug ang mga anghel makigsulti kanato, ug kita makapahimulos sa katilingban sa makiangayon ug sa putli kinsa atua sa kalibutan sa espiritu hangtud sa pagkabanhaw (DBY, 380–81).

Pananglit, niana, nga ang usa ka tawo dautan sa iyang kasingkasing— dautan gayud kaayo, ug niana nga kahimtang namatay, ang iyang espiritu mosulod ngadto sa kalibutan sa espiritu nga magbuhat gihapon og dautan. Sa laing bahin, kon kita naningkamot ginamit ang tanang mga gahum ug mga galamhan nga gihatag sa Dios kanato sa pagpalambo sa atong mga talento, sa pag-andam sa atong mga kaugalingon nga mopuyo sa kinabuhing dayon, ug ang lubnganan modawat sa atong mga lawas samtang kita sa ingon naningkamot, sa unsang kinaiya ang atong mga espiritu mosulod sa ilang sunod nga kahimtang? Sila maningkamot gihapon sa pagbuhat sa mga butang sa Dios, lamang sa mas daghan nga matang—magkat-on, magkadugang, magtubo sa grasya ug sa kahibalo sa kamatuoran (DBY, 379).

Kon kita matinud-anon sa atong relihiyon, kon kita moadto na sa kalibutan sa espiritu, ang napukan nga mga espiritu—si Lucifer ug ang ikatulo nga bahin sa mga panon sa langit nga miuban kaniya, ug ang mga espiritu sa dautan nga mga tawo kinsa nagpuyo niini nga yuta, silang tanan tipunon walay gahum sa pag-impluwensya sa atong mga espiritu. Dili ba kana bintaha? Oo. Ang ubang tanang mga anak sa mga tawo kapin kun kulang ulipon ngadto kanila, ug sila ulipon ngadto kanila sama nga sila ania pa sa unod (DBY, 379).

Dinhi [ang matinud-anon] maglibog ug iyang gukuron, apan kon kita moadto na sa kalibutan sa espiritu didto kita na ang magmando sa gahum ni satanas, ug siya dili na makapasakit kanato pa, ug kini igo na alang kanako nga masayud (DNW, 1 sa Okt. 1856, 3).

Kon ang usa ka tawo bunyagan alang sa kapasayloan sa mga sala, ug mamatay sa wala madugay human niini, siya dili andam dihadiha sa pagpahimulos sa kahingpitan sa himaya nga gisaad ngadto sa matinud-anon sa Ebanghelyo, kay kinahanglan nga siya tudloan samtang anaa sa espiritu, sa laing mga bahin sa balay sa Dios, moagi gikan sa kamatuoran ngadto sa kamatuoran, gikan sa salabutan ngadto sa salabutan, hangtud nga siya andam sa pagdawat pag-usab sa iyang lawas ug mosulod ngadto sa presensya sa Amahan ug sa Anak. Dili kita makasulod ngadto sa celestial nga himaya sa ato karon nga kahimtang sa pagkawalay kahibalo ug sa kangitngit sa panghunahuna (DBY, 378–79).

Kita adunay daghang mga higala sa pikas tabil kay sa dinhi, ug sila motimbaya kanato nga mas malipayon kay sa pag-abiabi kaninyo sa inyong mga ginikanan ug mga kahigalaan niini nga kalibutan, ug kamo mas malipayon kon kamo makakita kanila kay sa inyong pagkakita og higala niini nga kinabuhi, ug dayon kita magpadayon gikan sa usa ka lakang ngadto sa laing lakang, gikan sa pagmaya ngadto sa pagmaya, ug gikan sa usa ka salabutan ug gahum ngadto sa lain, ang atong kalipay mahimong mas maanindot ug mas mabuot samtang kita magpadayon sa pulong ug sa mga gahum sa kinabuhi (DBY, 379–80).

Kon kita moagi niini nga kahimtang sa pagkatawo, ngadto sa sunod nga kwarto, nga maoy akong tawag niini, dili kita mohunong diha. Magpadayon gihapon kita, magbuhat sa tanang maayo kutob sa mahimo, mangalagad ug mopahigayon alang sa tanan kinsa kita gitugutan sa pagpangalagad ug pagpahigayon, ug dayon mopadayon ngadto sa sunod, ug ngadto sa sunod, hangtud ang Ginoo mokorona sa tanan nga matinud-anon niini nga yuta, ug ang buhat kalabut sa yuta mahuman, ug ang Manluluwas, nga atong gitabangan, nakatuman sa iyang buluhaton, ug ang yuta, uban sa tanang mga butang kalabut niini, ipakita ngadto sa Amahan. Dayon kining mga matinudanon makadawat sa ilang mga panalangin ug mga korona, ug ang ilang mga kabilin ihan-ay alang kanila ug ihatag ngadto kanila, ug dayon sila magpadayon, maghimo og kalibutan og laing kalibutan, magdugang hangtud sa kahangturan (DBY, 376).

Mga Sugyot alang sa Pagtuon

Ang mga espiritu sa mga patay moadto sa kalibutan sa espiritu.

Kon ang lawas mamatay, asa paingon ang espiritu? (Tan-awa usab sa Alma 40:11–14.) Nganong dili kita makakita ug makaistorya niadtong atua sa kalibutan sa espiritu?

Si Jesus miabli sa pultahan sa kaluwasan niadtong atua sa kalibutan sa espiritu.

Unsay gipasabut nga si Jesus “miabli sa pultahan sa kaluwasan sa mga espiritu sa bilanggoan”? (Tan-awa usab sa D&P 138; 1 Pedro 3:18–19.)
Human maablihi ni Kristo ang mga pultahan sa kaluwasan didto sa kalibutan sa espiritu, sa unsa nga paagi gisangyaw ang ebanghelyo didto? (Tan-awa usab sa D&P 138:30.)
Kon sa mga ordinansa nga kalabut sa tawo ang gipangalagad didto sa kalibutan sa espiritu, ngano nga ang ebanghelyo gisangyaw ngadto sa mga espiritu didto? (Tan-awa usab sa D&P 138:58–59.) Unsay atong mahimo alang niadtong atua sa kalibutan sa espiritu kinsa wala makadawat sa mga ordinansa sa kaluwasan? Sa unsa nga paagi kita aktibong makaapil sa katubsanan sa mga patay, bisan og walay templo sa duol?
Sa unsa nga paagi nga ang inyong kinabuhi sa pagka-mortal nakaimpluwensya sa inyong kinabuhi sa kalibutan sa espiritu?

Ang kalibutan sa espiritu usa ka buhi nga dapit diin ang paglambo ug kauswagan mahimo.

Unsa ang gitudlo ni Presidente Young mahitungod sa kinabuhi didto sa kalibutan sa espiritu? Sa unsa nga paagi nga ang kianbuhi sa kalibutan sa espiritu sama sa kinabuhi sa yuta? Sa unsa nga paagi kini lahi? Unsa nga mga aspeto sa kinabuhi sa kalibutan sa espiritu nga inyong gipaabut?
Unsa nga impluwensya ug gahum ang anaa ni Satanas didto sa kalibutan sa espiritu?
Ngano nga ang usa ka tawo nga bag-o lamang nga nabunyagan dili andam diha-diha dayon sa pagdawat sa kahingpitan sa himaya? Unsa ang angay buhaton niana nga tawo aron makaandam alang niini nga panalangin? Asa kini mahimo?

Christ preaching in Spirit World — Tali sa Iyang kamatayon ug pagkabanhaw, ang Manluluwas miadto ngadto sa kalibutan sa espiritu aron pagsugod sa buhat sa kaluwasan diha sa mga patay.