Pagbansay sa Pagkontrol sa Kaugalingon

Si Presidente Brigham Young nakakat-on pinaagi sa kasinatian nga ang pagdala og mga tawo nga lig-on ug kasagaran adunay kaugalingong kabubut-on ngadto sa Zion nagdala og mga panahon sa kadaugan ug mga panahon sa kasuko. Sa pagka 1848, ang nagsunod nga mga karomata nga adunay 2,000 ka mga Santos nga iyang gipangulohan nakasugat og pundok sa mga kabaw. Bisan og si Presidente Young mipili og mga tigpangayam nga mopatay lamang og igong gidaghanon nga kabaw aron pagsangkap og karne sa mga nagbiyahe, ang ubang kalalakihan mibiya sa ilang pundok aron paggukod sa mga hayop sa tibuok adlaw, pagpusil kanila og daghan ug pagbiya sa mga patay nga kabaw sa mga kalibunan nga nausik. Iyang gikasab-an ang mga katawhan sa butang nga ilang gihimo [tan-awa sa JTB]. Sa wala madugay siya miingon “Kat-uni ang pagdumala sa inyong mga kaugalingon” (DNW, 15 sa Ago. 1860, 1). “Panalangini ang inyong mga kaugalingon ug mga kahigalaan, pinaagi sa pagkontrol sa inyong mga kaugalingon, [kay] hangtud kamo makapugong sa [inyong] mga pagbati [ug] makahimo sa inyong tibuok galamhan nga mopaubos sa mga baruganan nga gipadayag sa Dios, dili gayud kamo moabut niana nga kahimtang sa kalipay, himaya, kamaya, kalinaw, ug walay katapusang kabulahanan nga maoy inyong gipangandoy” (DNW, 15 sa Ago. 1860, 1).

Mga Pagtulun-an ni Brigham Young

Makahimo kita sa pagkontrol sa atong mga kaugalingon ug motugyan ngadto sa kabubut-on sa Dios.

Aduna ba kitay kabubut-on? Oo, usa kana ka endowment usa ka kinaiyahan sa mga Dios, diin ang tanang salabutan gihatagan, sa langit ug sa yuta,—ang gahum sa pagdawat o sa dili pagdawat (DBY, 264).

Hunahunaa ang mga tawo sa matag sitwasyon sa ilang kinabuhi, ug ang ilang mga kabubut-on mao ang una ug labaw sa tanan. Makaangkon kamo ug makagiya sa mga pagbati sa mga tawo, apan dili ninyo sila mahimong hadlokon, ni bunalan sila, ni sunugon sila sa paghimo sa husto nga supak sa ilang mga kabubut-on. Ang tawhanong pamilya mamatay aron sa pagtagbaw sa ilang mga kabubut-on. Niana kat-uni ang pagdumala sa matarung nga paagi kana nga mga kabubut-on, ug kamo makadumala sa impluwensya ug gahum sa katawhan (DBY, 264).

Ang Dios mibutang kanato og kabubut-on, ug kinahanglan kita nga malipay nga kini gidumala sa kabubut-on sa Labawng Makagagahum. Himoa nga ang tawhanong kabubut-on dili matarug niana unsay makatarug. Nahimo na nga kinaiya sa mga ginikanan ang pagdumala sa kabubut-on hangtud nga kini mahuyang, ug ang dungganan, Diosnon nga gahum sa bata mous-us ngadto sa usa ka ikatandi nga kahimtang sa kaburong ug katalawan. Tuguti kana nga kabubut-on nga natawo gikan sa langit adunay kagawasan sa pagpili; ang pagkadala ug paglihok nga husto ug maalamon ang pagkadumala, kaysa mopadayon sa sukwahi nga dalan, ug kini mobuntog sa kawsa sa katarung. Ayaw luyaha ang espiritu ni bisan kinsa, apan giyahi kini nga mobati nga iya kining dakong kalipay ug dakong ambisyon nga pagadumalahon pinaagi sa mga pagpadayag ni Jesukristo, niana ang kabubut-on sa tawo mahimo nga sama sa Dios sa pagbuntog sa dautan nga gitanum diha sa unod, hangtud ang Dios mohari dinhi kanato sa pagtinguha og buhat sa maayo nga gusto niyang buhaton (DBY, 264).

Kat-uni ang pagkontrol sa inyong mga kaugalingon; kat-uni nga anaa kamo diha sa mga kamot sa Dios sama sa lapok nga anaa sa mga kamot sa tighimo og kolon (DBY, 265).

Tuguti nga ang matag tawo matinguhaon, sa pangalan sa Ginoo nga si Jesukristo, sa pagbuntog sa tanang mga pagtintal—nga mahimo nga hari sa kaugalingon, nga ang Espiritu sa Dios nga gibutang diha sa inyong mga lawas mao ang magmando; dayon kamo makigsulti, makapuyo, makatrabaho, makaanhi dinhi o makaadto didto, makabuhat niini o niana, ug makigsulti ug makig-atubang sa inyong mga kaigsoonan sumala sa inyong gusto (DBY, 265–66).

Atong mapugngan ang atong mga kaugalingon hangtud atong madala ang tanang butang “ngadto ubos sa balaod ni Kristo.”

Mas dali ang indibidwal mosalikway sa mga tintasyon sa pagbuhat, pagsulti, o paghunahuna og sayop, samtang anaa pa kaniya ang kahayag sa pagtarung sa iyang paghukom, mas dali siyang makaangkon og kusog ug gahum sa pagbuntog sa matag tintasyon sa dautan (DBY, 266).

Ang liboan ug napulo ka liboan ka mga hitabo nga naghimo sa kinatibuk-an nga pagkatawo, sa maayo o sa dautan, nag-agad sa usa ka mubong panahon sa pagkamabinantayon ug pagka mainampingon (DBY, 267).

Dili ninyo mapanunod ang kinabuhing dayon, hangtud nga ang inyongmga kaibug maanaa ubos sa pagdumala sa espiritu nga nagpuyo diha kaninyo, kana nga espiritu nga gihatag kanato sa atong Amahan sa Langit. Buot nakong ipasabut ang Amahan sa inyong mga espiritu, niadtong mga espiritu nga iyang gibutang niini nga mga lawas. Ang mga lawas kinahanglang madala ubos sa hingpit nga pagdumala sa espiritu, o ang inyong mga lawas dili mobayaw sa pag-angkon og kinabuhing dayon. … Pagmakugihon sa pagsiksik, hangtud inyong madala ang tanan ngadto ubos sa balaod ni Kristo (DBY, 266).

Naningkamot akong maugmad ang akong kaugalingon. Kamo ba naningkamot sa paghimo sa ingon? Kon kita milampus niini, niana kita adunay pagkontrol sa atong mga pulong ug sa atong mga lihok, ug usab, hangtud diin ang atong impluwensya, ngadto sa atong mga kaubanan. Kon kita sa atong mga kaugalingon, kita mahimong maandam og gamay bahin sa pagdawat sa mga butang nga giandam sa atong Amahan ug Dios alang sa tanan nga nangandam sa ilang mga kaugalingon nga mahimong mga dumadawat sa iyang pinili nga mga gasa—alang sa lamdag, alang sa salabutan, alang sa himaya, alang sa gahum, ug alang sa tanang kinahanglanon nga gihunahuna niyang ihatag ngadto sa iyang mga anak dinhi sa yuta, aron sa pag-andam kanila nga makapuyo sa mga mansyon sa mahangturon nga kahayag (DBY, 266–67).

Kanunay nakong giingon nga ang labing mahinungdanon nga tuga nga sukad gihatag sa Dios ngadto sa tawo mao ang maayo, tin-aw, bug-os nga pagbati nga makahibalo kon unsaon sa pagdumala ang atong mga kaugalingon (DBY, 265).

Walay tawo nga nakahimo, o makahimo sa pagdumala nga makiangayon niini nga kalibutan, uban sa dungog diha sa iyang kaugalingon ug himaya sa iyang Dios, gawas kon iya una nga kat-unan ang pagdumala ug ang pagkontrol sa iyang kaugalingon. Ang usa ka tawo kinahanglang makakat-on una sa pagdumala sa iyang kaugalingon sa matarung nga paagi sa dili pa niya hingpit nga magamit ang iyang kahibalo alang sa husto nga pagdumala sa usa ka pamilya, sa kasilinganan, o nasud, diin siya adunay katungdanan sa pagdumala (DBY, 265).

Hangtud atong mapugngan ang atong kaugalingon nga mga pagbati, ug dad-on ang matag tawhanon nga pagbati ug mga tinguha diha ubos sa kabubut-on sa Dios, dili gayud kita nakahimo nga mogiya ug motudlo sa uban sa hingpit nga pag-angkon sa kadaugan didto sa Gingharian sa Dios. Ang pagdaog ug ang pagbuntog, ug ang pagtudlo sa atong mga kaugalingon hangtud nga atong madala ang tanan nga ubos sa balaod ni Kristo, mao ang atong buluhaton (DBY, 267).

Naningkamot kita sa pagdumala sa atong mga kaugalingon, ug kon kita magpadayon sa pagpaningkamot ug dili maluya, kita makasiguro nga magmadaugon (DBY, 265).

Atong mapugngan ang atong mga mainitong tinguha ug mga pagbati.

Kamo gitudloan na sa sumbanan sa katarung. Karon buntuga ang inyong mga masupilon nga mga tinguha, isalikway ang tanan nga inyong nahibaloan og gihunahuna nga sayop, ug dawata ang unsay mas maayo (DBY, 265).

Niini nga pagpuyo sa yuta, adunay dautan nga atong pagabatukan, ug kinahanglan nato kining pagabuntogon sa atong mga kaugalingon, o dili gayud nato kini mabuntog bisan asa nga dapit (DBY, 265).

Ang usa ka matarung nga tawo dili gayud mawad-an sa paglaum, apan sa kanunay makigbatok sa dautan nga mga mainitong mga tinguha, ug batok sa dautan diha sa iyang pamilya ug sa kasilinganan (DBY, 267).

Daghang mga tawo ang moingon nga sila adunay mapintas nga taras, ug maninguha sa pagpangatarungan sa ilang mga kaugalingon sa mga binuhatan nga sila naulaw. Ako moingon, walay tawo niini nga balay kinsa adunay dili mapugngan ug dili matarung nga taras kay sa akong kaugalingon. Apan walay tawo dinhi sa kalibutan kinsa dili makabuntog sa iyang mainitong mga tinguha, kon siya maningkamot sa kinasingkasing sa pagbuhat sa mao. Kon kamo makamatngon nga ang mainitong mga tinguha nagsingabut diha kaninyo, lakaw sa usa ka dapit diin dili kamo madunggan; ayaw pabatia o pakit-a si bisan kinsa sa inyong pamilya, samtang kini anaa pa kaninyo, apan paningkamot hangtud kini mawala kaninyo; ug pag-ampo alang sa kalig-on nga mobuntog. Sumala sa ako nang giingon sa makadaghan diha sa mga Elders, pag-ampo uban sa inyong mga pamilya; ug kon, ang panahon sa pag-ampo moabut, ug ang espiritu sa pag-ampo wala diha kaninyo, ug ang inyong mga tuhod dili buot nga moluhod, ingna sila, “Mga tuhod, luhod diha”; pik-a kini, ug padayon diha hangtud inyong maangkon ang Espiritu sa Ginoo. Kon ang espiritu motugyan ngadto sa lawas, madunot kini; apan kon ang lawas motugyan ngadto sa espiritu mahimo kini nga putli ug balaan (DBY, 267).

Ayaw og kasuko pag-ayo nga dili kamo makahimo sa pag-ampo; ayaw tuguti ang inyong kaugalingon nga masuko pag-ayo nga dili na kamo makapakaon sa kaaway—bisan ang inyong higpit nga kaaway, kon ang kahigayunan mohatag niini. Adunay dinautan nga kasuko, ug adunay minatarung nga kasuko. Ang Ginoo dili motugot nga ang dinautan nga kasuko mopuyo sa iyang kasingkasing; apan adunay kasuko sa iyang dughan, ug siya adunay pakiglalis sa mga nasud, ug moalig-ig kanila, ug walay gahum nga makapugong sa iyang mga kamot (DBY, 269).

Kon ang akong mga pagbati moulbo ngadto sa kasuko tungod sa ngil-ad nga mga binuhatan sa uban, pugngan ko kini sama sa akong pagkontrol sa usa ka idlas nga kabayo, ug maangkon ko ang kadaugan. Ang uban maghunahuna ug moingon nga mas moarang-arang ang ilang bation kon sila masuko, sumala sa ilang tawag niini sa pagpahayag sa ilang kabuang sa inabuso ug sa dili angay nga mga pinulongan. Kini, bisan pa, usa ka sayop. Kay sa kini makapaarang-arang sa inyong pagbati, naghimo kini sa ngil-ad ngadto sa mas ngil-ad. Kon kamo nagtuo ug moingon nga naghimo kini kaninyo nga mas maayo gihatagan ninyo og pasidungog ang usa ka kasaypanan. Kon ang kaligutgot ug kapungot sa tawhanon nga kasingkasing mahulma ngadto sa mga pulong ug gilabay uban ang kapintas ngadto sa usag-sa, sa walay pagkontrol o pagbabag, ang kapungot sa dili madugay moulbo ug sa iyang kaugalingon moulbo na usab kini bisan sa gamay nga binuhatan hangtud ang ligid sa kinaiyahan giduslitan og kalayo (DBY, 266).

Karon pahimatngunan ko kamo pag-usab, ug pahimatngunan ko ang akong kaugalingon sa dili pagkasuko. Ayaw gayud itugot nga ang kasuko moulbo diha sa inyong mga kasingkasing. Ayaw, Brigham, ayaw gayud itugot nga ang kasuko moulbo diha sa imong kasingkasing, ayaw gayud, ayaw gayud! Bisan og kamo tawagon sa pagbadlong ug sa pagpamulong ngadto sa mga katawhan sa hait nga pamaagi, ayaw itugot nga ang kasuko moulbo diha kaninyo, dili, ayaw gayud! (DBY, 265).

Hunonga ang inyong kasuko, ug ang kangil-ad sa taras, ug alagari ang Ginoo uban sa kamaya, ug uban sa usa ka katuyoan sa kasingkasing. Kamo dili magpaabut og kaluwasan, gawas kon kamo nakapangalagad sa sama nga kaluwasan ngadto sa uban, pinaagi sa pagtulun-an ug sa ehemplo. Kon kamo naglaum og kalooy gikan kanako, ipangalagad ang ingon ngari kanako. Kon kamo nangandoy sa maayo nga mga pulong ug sa maayo nga pagtagad gikan kanako, ihatag kanako ang sama nga panalangin nga inyong gitinguha sa inyong kaugalingon; ug mao kana ang paagi nga kamo maluwas (DBY, 268–69).

Kon hatagan ninyo og higayon ang suko nga mga pagbati, nagduslit kini og kalayo sa ligid sa kinaiyahan, … ug kamo lagmit mosugnod og kasuko niadtong nakiglalis kaninyo. Kon inyong bation nga daw kamo mobuto, ingna ang inyong kaugalingon nga sige buto, ug kataw-i lamang ang mga pagtintal sa pagsulti og dautan. Kon padayon ninyo kini nga buhaton, sa dili madugay mahimo kamo nga mga batid kaayo sa inyong mga kaugalingon nga makahimo, kon dili sa pagpitol, sa pagkontrol sa inyong mga dila—nga makasulti kon gikinahanglan, ug sa pagpakahilum kon gikinahanglan (DBY, 269).

Gusto nato nga ang espiritu, kahibalo, gahum ug baruganan nga anaa kanato modumala ug mopugong sa atong mga taras; walay kuyaw sa pagkaanaay labihan nga [kasuko] kon ato lamang nga pugngan [kini] pinaagi sa Espiritu sa Labawng Makagagahum. Ang matag intelehente nga binuhat dinhi sa kalibutan gipahiangay alang sa kahimayaan, katahum, kahalangdon ug kahibalo dinhi, ug alang sa pagkaimortal ug mga kinabuhi nga dayon diha sa mga kalibutan nga moabut. Apan ang matag binuhat nga makaangkon niini kinahanglan gayud nga mabalaan atubangan sa Dios ug hingpit nga anaa ubos sa pagkontrol sa iyang Espiritu. Kon ako sa ingon gipugngan pinaagi sa Espiritu sa Labawng Makagagahum, usa ako ka hari. Ako ang gamhanan kon ang hisgutan mao ang pagkontrol sa kaugalingon (DBY, 264–65).

Atong mapugngan ang atong pulong.

Kon unahon ninyo sa pag-angkon ang gahum sa pagkontrol sa inyong mga pulong, makaangkon usab kamo og gahum sa pagkontrol sa inyong mga paghukom, ug sa kadugayan sa tinud-anay maangkon ang gahum sa pagkontrol sa inyong mga hunahuna ug mga pamalandong (DBY, 267–68).

Kinahanglan kamong molampus sa pagkontrol sa inyong mga dila ngadto sa, ingon nga dili gayud kini tugutan nga molitok og dautan, aron kini hingpit nga mosunod sa inyong mga paghukom ug sa pagbuot nga gihatag sa Dios kaninyo, aron sa hingpit magmasulundon sa kabubut-on sa balaan nga Ebanghelyo (DBY, 268).

Kasagaran natong madungog ang mga tawo nga mangatarungan sa ilangngil-ad nga mga kinaiya ug sakit nga pinulongan, pinaagi sa pag-ingon “Dili ako magpakaaron-ingnon,’ sa ingon naghatag sa ilang mga kaugalingon og dungog niana nga sa pagkatinuod wala makahatag og dungog ngadto kanila. Kon ang pagkadautan motubo diri kanako, tagoon ko kini, buntugon kini, kay sa nga buhaton kini diha sa sayop nga pagtuo nga ako matinud-anon ug dili tigpakaaron ingnon. Ayaw tuguti nga molitok ang inyong dila sa dautan nga anaa sa inyong kasingkasing, apan mando-i ang inyong dila sa paghilum hangtud ang maayo mopatigbabaw batok sa dautan, hangtud ang inyong kaligutgot mawala ug ang maayong Espiritu mopalihok sa inyong dila ngadtosa mga panalangin ug mga pulong sa pagkamabination (DBY, 266).

Kon aduna si bisan kinsa ang may kinaiya sa paggamit sa pangalan sa Dios sa pagpasipala, hunonga ang pagbuhat sa mao karon, ugma ug hangtud sa sunod semana, ug ipadayon, ug sa dili madugay makaangkon kamo og kalig-on sa hingpit nga pagbuntog niana nga kinaiya; makaangkon kamo og gahum sa inyong mga pulong (DBY, 268).

Ang uban naanad sa paghisgot kabahin sa ilang mga silingan, sa paghimo og mga sugilanon nga wala silay kasayuran kon unsa kini, lamang nga si Iya Maria miingon nga si Agaw Goria misulti ni Tiya Rosa nga ang tigulang nga si Tiya Perta nanabi og ingon niini o uban pa, o adunay usa nga nagdamgo; ug sa higayon nga ang istorya o damgo moabut diha kaninyo, maingon og kini adunay pagkatinuod, ug kamo binuang kaayo nga migahin sa inyong panahon sa paghisgot og mga butang nga walay kapuslanan, o mga butang nga kamo walay labot. Magsugod ang sugilanon nga kanang tawhana nakahimo og sayop, ug, sa higayon nga mokatap na kini, mausab na ang sugilanon pinaagi sa mga libakira ug mga tabian—nga nahimo nga puno sa ilang espiritu. Ang usa ug ang lain pa madala niini ug moingon, “Tinuod kana—ang imong tuyo makiangayon, husto ka gayud, ug ang usa siguradong sayop,” diin sila walay kasayuran niining mga butanga, sa ingon nagmugna og hingpit nga walay basihan sa dautan nga mga pagbati batok sa usag usa. Sa dili pa kita mohukom, kinahanglan kitang maghulat hangtud nga ang kalangitan tin-aw nga mopakita sa sayop sa usa ka amahan, igsoon nga lalaki ug igsoon nga babaye, asawa, bana, o silingan. Ug kon ang langit mopadayag og usa ka sayop, paghulat hangtud ang Espiritu Santo mopakita kaninyo nga kana usa ka sayop. Tuguti nga ang Amahan mopadayag diha kaninyo nga ang tawo nga inyong gihunahuna o gipanaghisgutan tinuod nga sayop. Ayaw paghimo og sayop nga mga pasangil ni bisan kinsa. Kon kamo nasayud unsay husto, ug makahimo sa pagtarung sa usa ka tawo nga nasayop, kana mao ang igo nga panahon kaninyo sa paghukom (DBY, 268).

Walay babaye o lalaki sa yuta nga naanad sa pagpangawat, apan unsa ang makapahunong sa maong binuhatan … kon sila may tinguha. Maingon usab sa mga bakakon, makahunong siya sa pagpamakak, ug dili na gayud mamakak, ug mosulti na sa tinuod. [Nagkinahanglan] lamang [siya] og tinguha sa paghimo niini, ug [kini ] makahimo sa usa ka bakakon nga mahimong matinud-anon, sa kawatan nga magmatinuoron, ug sa tigpamalikas nga mahunong sa ilang dautan nga mga pinulongan (DBY, 264).

Samtang kita adunay kahigayunan sa pag-istoryahanay sa usag usa, atong litukon ang mga pulong nga makahupay ug makalipay. Kon kamo anaa sa impluwensya sa Espiritu sa kabalaan ug kaputli, ipadan-ag ang inyong kahayag; apan kon kamo gisulayan ug gitintal ug anaa sa paghampak ni Satanas, itago kana nga hunahuna diha sa inyong kaugalingon—takuma ang inyong ba-ba; kay ang pagsulti makaani og bunga, sa maayo o dautan nga kinaiya (DBY, 166)

Adunay usa ka karaan nga panultihon, ug sa daghang mga higayon usa ka labing maayo. Mao kini, “Hunahunaa sa makaduha sa dili pa ninyo isulti, ug sa makatulo nga higayon sa dili pa ninyo buhaton.” Kon mabansay nato ang atong mga kaugalingon sa paghunahuna kon unsa ang atong pagabuhaton, sa dili pa nato kini buhaton, ug adunay panabot nga masayud, ug gahum sa paghimo sa maayo, kita sa ingon niana makalikay sa … dautan (DBY, 268).

Usa usab kini ka bililhon nga gasa, nga ang ubang tawo ingon og nakaangkon niini, nga adunay kahibalo igo sa dili pagsulti hangtud aduna silay masulti nga makaayo ug makatabang sa ilang kaugalingon, o sa uban, o nianang duha (DBY, 268).

Mga Sugyot alang sa Pagtuon

Makahimo kita sa pagkontrol sa atong mga kaugalingon ug motugyan ngadto sa kabubut-on sa Dios.

Si Presidente Young nagtudlo nga ang kabubut-on “usa ka kinaiyahan sa mga Dios.” Miingon usab siya nga ang kabubut-on usa ka tuga, o gasa, gikan sa Dios. Sa unsa nga proseso nga ang kabubut-on sa tawo mahimong sama sa Dios? (Tan-awa usab sa Mosiah 3:19.) Unsaon man sa mga ginikanan ug sa mga lider sa “pagdumala sa matarung nga paagi” sa kabubut-on sa mga anak ug sa uban nga “walay pagluya sa espiritu ni bisan kinsa”? Giunsa sa inyong mga ginikanan o mga lider pagmalampuson sa pagdala sa inyong kabubut-on sa matarung nga paagi?
Unsay buot ipasabut sa “anaa sa mga kamot sa Dios sama sa lapok nga anaa sa mga kamot sa tighimo og kolon”? Unsaon nga hingpit ang atong pagtugyan ngadto sa kabubut-on sa Ginoo ug sa gihapon mapadayon ang atong pagkalahi sa usag usa?

Atong mapugngan ang atong mga kaugalingon hangtud atong madala ang tanang butang “ubos sa balaod ni Kristo.”

Sa unsang paagi nga ang pagsalikway sa usa ka tintasyon makadugang sa atong abilidad sa pagsalikway sa tanang mga tintasyon? Si Presidente Young mitudlo nga ang pagdala sa atong mga kaibug “ubos sa pagdumala sa espiritu” gikinahanglan nga “makat-unan aron makaangkon og kinabuhing dayon.” Sa unsang paagi nga ang pagsunod sa atong espirituhanon nga mga kahilig kaysa atong pisikal nga mga kaibug makaandam kanato alang sa kahimayaan?
Unsang “pinili nga mga gasa” ang naghimo sa kaugalingon nga andam sa pagdawat niini gikan sa Dios?
Nganong kinahanglan nga kita adunay pagkontrol sa kaugalingon sa dili pa kita makadumala sa uban?
Sa imong hunahuna unsay gipasabut ni Presidente Young sa pagtudloniya nga “ang labing mahinungdanon nga tuga nga sukad gihatag sa Dios ngadto sa tawo mao ang maayo, tin-aw, bug-os nga pagbati nga makahibalo kon unsaon sa pagdumala ang atong kaugalingon”? Unsaon nato sa pagdumala ang atong kaugalingon ug sa samang higayon motugyan nga mobuhat lamang sa kabubut-on sa Amahan?

Atong mapugngan ang atong mga mainitong tinguha ug mga pagbati.

Unsa ang pipila ka mga “masupilon nga mga tinguha”nga kinahanglan natong pugngan? Unsaon nato sa malampusong paagi pagbuntog sa mainitong mga tinguha ug mga buhat?
Unsaon nato sa pag-ila tali sa “minatarung nga kasuko,” sama sa gipakita sa Manluluwas sa pipila ka mga higayon, ug sa dinautan nga kasuko”? (Tan-awa usab sa 2 Nephi 1:26.)
Unsa ang mga sangputanan sa pagtugyan ngadto sa atong mga pagbati sa kasuko? (Tan-awa usab sa Santiago 3:5–6.) Unsa ang tambag ni Presidente Young mahitungod sa pagkontrol sa kasuko? Sa unsang paagi nga ang pagtugyan ngadto sa Espiritu makatabang kanato nga mapugngan sa atong kasuko?

Atong mapugngan ang atong pulong.

Unsaon nato sa “pag-angkon og gahum sa pagkontrol sa [atong] mga hunahuna ug mga pamalandong”?
Giunsa sa pagtambag ni Presidente Young kadtong moingon nga sila mogamit og pulong nga sakit aron malikayan ang pagpakaaron ingnon?
Unsaon kaha nato sa pagkontrol ang atong mga dila kon kita matintal sa (1) paggamit sa pangalan sa Dios sa pagpasipala, (2) pagpanglibak sa atong mga silingan, (3) pagpangita og sayop o sa dungog sa uban (tanawa usab sa D&P 136:23–24), o (4) pagpakaulaw o pagdaot sa usa kasakop sa pamilya o usa ka higala? (Tan-awa usab sa D&P 52:16.)
Unsay angay natong buhaton kon kita makahunahuna og dili maayo sa uban?

President Brigham Young — Si Presidente Young mitudlo sa mga Santos sa pagbansay og pagkontrol sa kaugalingon sa tanang aspeto sa ilang kinabuhi.