Pagpalig-on sa mga Santos pinaagi sa mga Gasa sa Espiritu

Isip usa ka batan-on nga lalaki, si Brigham Young matinguhaong nangita og relihiyon diin ang tanang mga gasa sa ebanghelyo gipakita sumala sa narekord sa Bag-ong Tugon: Sa wala pa ang iyang bunyag nakadawat siya og gamhanang pagpamatuod sa Simbahan sa dihang ang Espiritu Santo midan-ag sa iyang salabutan (tan-awa sa DNW, 9 sa Peb. 1854, 4). Sa iyang unang pakigkita ni Joseph Smith sa Kirtland, si Brigham Young napanalanginan og gasa sa mga pinulongan (tan-awa sa MHBY-1, 4–5). Bisan og talagsaon ra kadtong higayon sa iyang kinabuhi, nalipay siya sa nagkalain-lain nga espirituhanong mga gasa nga gibu-bu kaniya ug sa mga Santos sa Ulahing mga Adlaw. “Kon kita nagbaton sa relihiyon sa Manluluwas kita adunay katungod sa mga panalangin sama gayud sa karaan. Dili ang tanan adunay mga panan-awon, dili ang tanan adunay mga damgo, dili ang tanan adunay gasa sa mga pinulongan o sa paghubad sa mga pinulongan, apan ang matag tawo makadawat sumala sa iyang kapasidad ug panalangin sa Tighatag”(DNW, 27 sa Peb. 1856, 3).

Mga Pagtulun-an ni Brigham Young

Ang Ginoo mohatag og mga gasa sa Espiritu aron sa pagpalig-on ug sa pagpanalangin kanato, sa atong mga pamilya, ug sa Simbahan.

Ang mga gasa sa Ebanghelyo gihatag aron sa pagpalig-on sa pagtuo sa tumutuo (DBY, 161).

Kami gipangutana kon ang mga timailhan anaa sa mga tumutuo sa atong panahon sama sa panahon sa karaan. Kami mitubag nga sila anaa. Ang buta nakakita, ang bakol nakalakaw, ang bungol nakadungog, ang gasa sa panagna gipakita, ang gasa sa pag-ayo usab, ang gasa sa pagpadayag, ang gasa sa mga pinulongan ug ang paghubad sa mga pinulongan. Si Jesus miingon nga kini nga mga timailhan anaa kanila nga motuo [tan-awa sa Marcos 16:17]. Ang Iyang Simbahan ug Gingharian sa kanunay adunay mga timailhan nga anaa sa tumutuo diha sa tanang panahon kon ang Simbahan anaa (DNSW, 19 sa Mayo, 1868, 1).

Nakasulti na ako nga si Kristo mibutang sa iyang Simbahan og mga Apostoles ug mga Propeta, gibutang usab niya sa iyang Simbahan ang mga ebanghelista, mga pastor ug mga magtutudlo; ang mga gasa usab sa Espiritu, sama sa nagkalain-laing mga pinulongan, pag-ayo sa masakiton, pag-ila sa mga espiritu, ug lain-laing ubang mga gasa. Karon, akong pangutanon ang tibuok kalibutan, kinsa ang nakadawat og pagpadayag nga ang Ginoo mipahunong niini nga mga katungdanan ug mga gasa sa iyang Simbahan? Wala ako makadawat. Nakadawat ako og pagpadayag nga kini kinahanglan nga anaa sa Simbahan, ug nga walay [tinuod] nga Simbahan kon wala kini (DBY, 136).

Pananglit nagsunod kamo sa mga ordinansa sa Ebanghelyo, ug wala magsulti og mga pinulongan karon, ayaw kanag panumbalinga. Pananglit kamo walay espiritu sa panagna, dili kana igsapayan. Pananglit dili kamo makadawat og bisan unsa nga gasa nga giubanan sa nagdahunog nga kusog nga hangin, sama sa Adlaw sa Pentecostes, walay linahi nga panginahanglan nga kamo kinahanglang modawat. Sa Adlaw sa Pentecostes dihay talagsaon nga panginahanglan alang niini, malisud kadto nga panahon. Ang talagsaon ug gamhanang pagpakita sa gahum sa Makagagahum gikinahanglan sa pagbuka sa mga mata sa mga katawhan ug sila masayud nga si Jesus nakabayad sa utang, ug sila gayud ang nagpalansang kaniya kinsa, tungod sa iyang kamatayon, nahimong Manluluwas sa kalibutan. Gikinahanglan kini niining higayon sa pagdani sa mga tawo (DBY, 161–62).

Hugot nga Pagtuo. Kon kamo motuo sa mga baruganan sa Ebanghelyo ug makakab-ot pinaagi sa hugot nga pagtuo, nga mao ang gasa sa Dios, siya makadugang og hugot nga pagtuo, modugang sa hugot nga pagtuo ngadto sa hugot nga pagtuo. Iyang ihatag ang hugot nga pagtuo sa iyang mga nilalang isip usa ka gasa, apan ang iyang mga nilalang adunay kahigayunan sa pagtuo sa Ebanghelyo kon tinuod ba o dili (DBY, 154).

Ang Gasa sa Pagpang-ayo. Ania ako aron sa pagpamatuod ngadto sa gatusan ka mga higayon sa mga lalaki, mga babaye, ug mga bata nga naayo pinaagi sa gahum sa Dios, pinaagi sa pagpandong sa mga kamot, ug daghan akong nakita nga mibangon gikan sa ganghaan sa kamatayon, ug gibuhi pagbalik gikan sa kamatayon, ug kansang mga espiritu mibiya gayud sa ilang mga lawas, mibalik pag-usab. Ako mopamatuod nga ako nakakita nga ang masakiton naayo pinaagi sa pagpandong sa mga kamot, sumala sa saad sa Manluluwas (DBY, 162).

Kon ako mopandong sa mga kamot diha sa masakiton, ako nagpaabut nga ang gahum sa pag-ayo ug impluwensya sa Dios moagi kanako ngadto sa pasyente, ug ang sakit mawala. Wala ako moingon nga ako nakaayo sa tanan nga akong gipandungan; apan daghan ang naayo ubos sa akong pagpangalagad (DBY, 162).

Kon kita andam, kon kita balaan nga mga tawo sa atubangan sa Ginoo, ang bul-og sa gahum gikan sa Makagagahum moagi sa tabernakulo sa tigpangalagad ngadto sa kalawasan sa pasyente, ug ang masakiton maayo; ang labad sa ulo, hilanat o ang ubang sakit mawala (DBY, 162).

Kanunay akong gipadala, bisan og panagsa ra ako moadto, tungod kay pribilehiyo sa matag amahan kinsa usa ka Elder sa Israel, nga magbaton og hugot nga pagtuo sa pag-ayo sa iyang pamilya, sama nga akoa ang pribilehiyo sa pagbaton og hugot nga pagtuo sa pag-ayo sa akong pamilya, ug kon siya dili mohimo niini siya wala magtuman sa iyang pribilehiyo. Makatarunganon alang kaniya sa pagsugo kanako sa pagputol sa iyang kahoy ug sa pagamuma sa iyang pamilya, kay kon siya adunay hugot nga pagtuo sa iyang kaugalingon iya akong luwason gikan sa kasamok sa pagbiya sa ubang mga katungdanan aron sa paghimo sa iyang hangyo (DBY, 163).

Kon kita masakiton, ug mohangyo sa Ginoo sa pag-ayo kanato, ug sa pagbuhat sa tanan alang kanato nga kinahanglang buhaton, sumala sa akong pagsabut sa Ebanghelyo sa kaluwasan, maayo pang ako usab hangyoon ang Ginoo sa pagpatubo sa akong trigo ug mais, nga dili modaro sa yuta ug pagpugas sa liso. Kini nakita nga nahiuyon kanako ang paggamit sa tanang tabang nga maabut sa gidak-on sa akong kahibalo, ug sa pagpangayo sa akong Amahan sa Langit, diha sa pangalan ni Jesukristo, sa pagbalaan niana nga paggamit ngadto sa pag-ayo sa akong lawas (DBY, 163).

Apan pananglit naglakaw kita sa kabukiran, … Ug usa o duha nasakit, nga walay bisan unsa nga magamit nga makaayo nga tambal, unsay atong buhaton? Sumala sa akong hugot nga pagtuo, hangyoa ang Ginoo nga Makagagahum sa … pag-ayo sa masakiton. Ato kini nga pribilehiyo, nga kon nahimutang nga kita walay bisan unsa nga makuha sa pagtabang sa atong mga kaugalingon. Niana ang Ginoo ug ang iyang mga sulugoon makahimo sa tanan. Apan kini ang akong katungdanan, kon kini anaa sa akong gahum (DBY, 163).

Atong ipandong ang atong mga kamot ug magtinguha kanila nga mamaayo, ug mag-ampo sa Ginoo nga ayohon sila, apan kita dili makasulti kanunay nga siya mobuhat (DBY, 162).

Panagna, Pagpadayag, ug Kahibalo. Ang matag lalaki ug babaye mahimong usa ka tigpadayag, ug adunay pagpamatuod ni Jesus, nga mao ang espiritu sa panagna, ug makahibalo sa hunahuna ug kabubut-on sa Dios mahitungod kanila, nga makalikay sa dautan, ug mopili niana nga maayo (DBY, 131).

Ang akong kahibalo mao nga, kon kamo mosunod sa mga pagtulun-an ni Jesukristo ug sa iyang mga Apostoles, sumala sa girekord sa Bag-ong Tugon, ang matag lalaki ug babaye makabaton sa Espiritu Santo…. Masayud sila sa mga butang nga mao karon, sa umaabut, ug sa kaniadto. Makasabut sila sa mga butang sa langit, sa mga butang sa yuta, ug sa mga butang ilawom sa yuta, sa mga butang sa panahon, ug sa mga butang sa kahangturan, sumala sa ilang lain-laing mga tawag ug mga kapasidad [tan-awa sa D&P 88:78–79] (DBY, 161).

Pagkugi sa pagsiksik nga makahibalo sa kabubuton sa Dios. Unsaon ninyo sa pagkahibalo niini? Sa mga butang kalabut sa inyong mga kaugalingon isip mga indibidwal, maangkon kini ninyo direkta gikan sa Ginoo; apan sa mga butang kalabut sa pangpublikong mga kalihokan [sa Simbahan], ang iyang kabubut-on matino pinaagi sa tukma nga paagi, ug mahimong mahibaloan sa kinatibuk-ang konseho nga gihatag diha kaninyo gikan sa tukma nga tinubdan (DBY, 136).

Kon ang Ginoo nga Makagagahum mopadayag ngadto sa usa ka High Priest, o ngadto ni bisan kinsa gawas sa pangulo, sa mga butang nga tinuod, o sa kaniadto tinuod o sa umaabut, ug mopakita ngadto kaniya sa padulngan niini nga mga katawhan baynte ka tuig gikan karon, o sa usa ka bag-o nga doktrina nga sa lima, napulo, o baynte ka tuig sukad karon mahimong doktrina niini nga Simbahan ug sa Gingharian, apan wala mapadayag ngadto niini nga mga katawhan, ug gipadayag ngadto kaniya sa samang Espiritu, sa samang mensahero, sa sama nga tingog, sa sama nga gahum nga mihatag og mga pagpadayag ngadto ni Joseph sa dihang buhi pa siya, usa kini ka panalangin niana nga High Priest, o sa indibidwal; apan kinahanglan nga dili kini niya isulti ngadto sa laing tawo dinhi sa ibabaw sa yuta, hangtud nga ang Dios mopadayag niini pinaagi sa tukma nga tinubdan aron mahimong kabtangan sa tibuok katawhan. Busa kon kamo makadungog sa mga Elder nga moingon nga ang Dios dili mopadayag pinaagi sa Presidente sa Simbahan nga ilang nahibaloan, ug mosulti og katingalahang mga butang, kamo sa kinatibuk-an mahimong mohunahuna niini isip kamatuoran sa Dios nga ang pagpadayag nga ilang nadawat gikan sa Yawa, ug dili gikan sa Dios. Kon sila nakadawat gikan sa tukma nga tinubdan, ang sama nga gahum nga mipadayag ngadto kanila nagpakita unta kanila nga sila kinahanglan motipig sa mga butang nga gipadayag diha sa ilang kaugalingong mga kasingkasing, ug sila dili magbaton og tinguha sa pagsulti niini ngadto sa laing tawo (DBY, 338).

Laing mga Gasa. Ang gasa sa pagkakita uban sa kinaiyanhong mga mata usa usab ka gasa ingon sa gasa sa mga pinulongan. Ang Ginoo mihatag niana nga gasa ug kita makahimo kutob sa atong gusto kabahin sa pagkakita; kita makagamit sa panan-aw sa mata ngadto sa himaya sa Dios, o sa atong kaugalingong kalaglagan.

Ang gasa sa pagpakigsulti sa usag usa mao ang gasa sa Dios, sama sa gasa sa panagna, sa pag-ila sa mga espiritu, sa mga pinulongan, sa pag-ayo, o sa bisan unsa nga laing gasa, panan-aw, pagtilaw, ug pagsulti, nga sa kasagaran gihatag nga kini wala isipa sama ka milagroso niadtong mga gasa nga gihisgutan sa Ebanghelyo.

Kita makagamit niini nga mga gasa, ug ang matag laing gasa nga gihatag sa Dios kanato, sa pagdayeg ug paghimaya sa Dios, sa pagserbisyo Kaniya, o kita makagamit niini sa dili pagtahud Kaniya ug sa Iyang kawsa…. Kini nga mga baruganan husto kabahin sa mga gasa nga atong madawat alang sa katuyoan sa paggamit niini, aron kita makalahutay ug mahimaya, ug nga ang organisasyon nga atong madawat dili matapos, apan molahutay sa kahangturan.

Pinaagi sa hustong paggamit sa mga gasa nga gitugyan ngari kanato, kita makasiguro sa atong mga kaugalingon sa pagkabanhaw niini nga mga lawas nga karon ania kanato, nga gipuy-an sa atong mga espiritu, ug kon kini mabanhaw sila mahimo nga putli ug balaan; niana sila molahutay hangtud sa kahangturan (DNW, 27 sa Ago. 1856, 2).

Ang mga milagro molig-on ug momatuod sa hugot nga pagtuo niadtong kinsa nahigugma ug nagserbisyo sa Dios.

Ang mga milagro, o kining dili ordinaryo nga mga pagpakita sa gahum sa Dios, dili alang sa dili tumutuo, kini mohupay sa mga Santos, ug molig-on ug mopamatuod sa hugot nga pagtuo niadtong kinsa nahigugma, nagtahud ug nagsebrisyo sa Dios, ug dili alang niadtong sakop sa mga katawhan sa Dios (DBY, 341).

Inyong nakuha ang ideya gikan kanako nga dili ang milagro nga gihimo atubangan sa mata sa mga tawo ang makadani kaniya nga kini gikan sa Dios, o sa Yawa; apan, kon ang Ginoo buot nga ang usa ka tawo moayo sa masakiton, ang indibidwal makahimo sa ingon; apan mao ba kana ang makadani sa dautan nga ang nag-ayo gipadala sa Dios? Dili, usa kini ka panalangin sa mga Santos, ug ang dautan walay labut niini, sila walay labut sa pagpaminaw niini; kana alang sa mga Santos, ilabi na alang sa ilang kaayohan, ug ilaha lamang (DBY, 340).

Ang plano sa Ebanghelyo gihimo, nga ang paghunahuna nga ang usa ka milagro gihimo aron motuo ang mga tawo kini mahimo lamang nga panghimaraut ngadto kanila. Kon inyong madunggan ang mga tawo nga mosulti unsa ang ilang nakita—nga sila nakakita og dako ug gamhanan nga mga milagro nga gihimo, ug sila walay mahimo gawas sa pagtuo, hinumdumi nga ang mga “yawa mituo ug nangurog,” tungod kay dili sila makapugong niini [tan-awa sa Santiago 2:19]. Kon ang tingog sa Maayong Magbalantay madungog, ang matinuoron sa kasingkasing motuo ug modawat niini. Maayo nga makasinati sa mga butang sa espiritu, nga makasabut sa espirituhanong mga butang, ug makapahimulos sa mga pagbati sa kanunayng buhi nga espiritu. Walay tawo, gawas kon siya usa ka mananapaw [tan-awa sa Mateo 12:39], usa ka makihilawason, dalom o tigsimbag diosdios, ang mangita og usa ka milagro; o sa laing pagkasulti, walay maayo, matinuoron nga tawo ang mangita og milagro (DBY, 340).

Ang mga tawo kinsa nagpatuo nga nakakita og daghan, nakahibalo ug nakasabut og daghan, niini nga Simbahan, ug kinsa nagpamatuod sa atubangan sa dagko nga mga kongregasyon, sa pangalan sa Dios sa Israel, nga sila nakakita ni Jesus, uban pa, mao gayud ang mga tawo nga mibiya niini nga Gingharian, una pa sa uban kinsa nagpuyo pinaagi sa hugot nga pagtuo [tan-awa sa Alma 32:21] (DBY, 342).

Ang mga panalangin sa Dios milagro ngadto sa tanang tawhanong pamilya hangtud nga sila makasabut niini. Walay mga milagro, alang niadtong mga walay alamag. Ang usa ka milagro mao ang resulta nga walay kapasikaran, apan dili kana mao. Adunay kapasikaran sa matag resulta nga atong makita, ug kon kita makakita og resulta nga wala makasabut sa kapasikaran gitawag nato kini nga usa ka milagro (DBY, 339).

Kini ordinaryo alang kanako nga motuo nga, kon ako modaro sa yuta ug motanum og trigo, sa tukma nga panahon ako moani og trigo, kini ang sagad nga resulta. Mao gayud kana usab sa mga milagro nga gihimo ni Jesus dinhi sa yuta. Sa kasal sa Cana sa Galilea [tan-awa sa Juan 2:1–11], sa dihang nahurot na ang bino, miadto sila sa Manluluwas ug nangutana kaniya unsay ilang buhaton. Iyang gisugo sila sa pagbutang og tubig sa ilang mga banga, ug human nila kini mabuhat mikuha sila niana nga tubig ug nakakita nga kini nahimong bino. Ako nagtuo nga kadto usa ka tinuod nga bino; ako dili motuo nga kadto nahimo sa prinsipyo sama sa mga butang nga gihimo niining mga adlawa sa dautan nga mga tawo, kinsa, pinaagi sa unsay ilang gitawag nga psychology, electrobiology, mesmerism, uban pa, moimpluwensya sa mga tawo ug makapatuo kanila nga ang tubig usa ka bino, ug sa ubang mga butang sa susama nga kinaiya. Ang Manluluwas miusab sa tubig ngadto sa bino. Nasayud Siya unsaon sa pagtawag sa gikinahanglan nga mga elemento aron mabutangan ang tubig og mga butang aron mahimong bino. Ang mga elemento ania sa atong palibut; sa atong gikaon, sa giinom ug giginhawa, ug si Jesus, nakasabut sa proseso sa pagtawag niini, walay gihimo nga milagro gawas niadtong kinsa walay kahibalo niana nga proseso. Sama ra kini sa babaye kinsa naayo pinaagi sa paghikap sa sidsid sa iyang sinina [tan-awa sa Mateo 9:20–22]; siya naayo pinaagi sa hugot nga pagtuo, apan kini dili milagro ngadto ni Jesus. Nakasabut siya sa proseso, ug bisan og siya giduot sa pundok sa mga tawo, sa luyo ug sa atubangan, ug sa matag kilid, mao nga naglisud siya sa iyang agianan, sa dihang nahikapan siya sa babaye iyang gibati nga ang hiyas migawas gikan kaniya ug nangutana kon kinsa ang mihikap kaniya. Dili kini milagro ngadto kaniya. Siya adunay mga gahum sa kinabuhi ug ang kamatayon anaa sa iyang gahum, siya adunay gahum sa paghalad sa iyang kinabuhi ug gahum sa pagbawi niini [tan-awa sa Juan 10:17–18]. Mao kini ang iyang gisulti, ug kinahanglang motuo kita niini kon kita motuo sa kasaysayan sa Manluluwas ug sa mga panultihon sa mga Apostoles nga narekord diha sa Bag-ong Tugon. Si Jesus aduna niini nga gahum ug sa iyang kaugalingon, ang Amahan mitugyan niini ngadto kaniya, mao kini ang iyang kabilin, ug siya adunay gahum sa paghalad sa iyang kinabuhi ug pagbawi niini pag-usab. Siya adunay kusog ug gahum sa kinabuhi diha kaniya ug kon siya moingon “Pagpakabuhi” ngadto sa mga indibidwal, sila mabuhi (DBY, 340–41).

Kon kita adunay hugot nga pagtuo nga ang mga gahum sa kinabuhi ug kamatayon anaa sa atong gahum, makasulti kita sa sakit, “Pahawa sa pangalan ni Jesus, ug himoa nga ang kinabuhi ug kahimsug mosulod sa kalawasan niini nga indibidwal gikan sa Dios, sa pagbabag niini nga sakit”; ug ang atong hugot nga pagtuo modala niini pinaagi sa pagpandong sa mga kamot pinaagi sa pagpangalagad sa ordinansa sa balaan nga Ebanghelyo (DBY, 342).

Ang Espiritu Santo moabli sa mga misteryo sa gingharian ngadto niadtong mangita sa labing maayong mga gasa ug maghupot sa mga kasugoan.

Unsa ang usa ka misteryo? Wala kita makahibalo, dili nato kini masabtan. Kon kita maghisgot mahitungod sa misteryo, maghisgot kita mahitungod sa mahangturon nga kangitngit; kana nga gipahibalo, dili na usa ka misteryo; ug ang tanan nga nahibaloan, kita makahibalo samtang kita mouswag sa angang sa atong salabutan. Ang mga butang sa kahangturan nga lisud abton sa atong panabut sa tibuok natong salabutan mao ang misteryo (DBY, 338–39).

Kon kita mosusi sa hilisgutan pag-ayo, kinahanglang makakat-on kita nga gamay kaayo nga bahin sa mga butang sa Gingharian ang gipadayag, bisan ngadto sa mga tinun-an. Kon kita mag-andam sa pagtan-aw sa mga misteryo sa Gingharian, sama nga kita andam sa pagtan-aw sa Dios, kita kinahanglan nga masayud nga gamay ra kaayo nga bahin niini ang ania dinhi ug didto. Ang Dios, pinaagi sa iyang Espiritu, mipadayag og daghang mga butang ngadto sa iyang mga katawhan, apan, hapit sa tanang higayon, iyang gisirad-an ang panan-awon sa hunahuna. Iyang tugutan ang iyang mga sulugoon sa pagtan-aw sa mahangturong mga butang sa makadiyot, apan diha-diha sirad-an niya ang panan-awon ug sila mibalik sama sa sinugdan, aron makakat-on sa paglihok pinaagi sa pagtuo, o sama sa mga Apostoles nga anaa niini, wala maglakaw pinaagi sa panan-aw, apan pinaagi sa hugot nga pagtuo [tan-awa sa 2 Mga Taga-Corinto 5:7] (DBY, 339).

Sama ka dali nga kamo momatuod sa atubangan sa inyong Dios nga kamo takus nga modawat sa mga misteryo, kon mao kini ang buot ninyong itawag niini, sa Gingharian sa langit—nga kamo puno sa pagsalig sa Dios— nga kamo dili gayud moluib sa butang nga gisulti sa Dios nganha kaninyo—nga kamo dili mosulti sa inyong silingan nianang dili angay isulti, sama kadali sa inyong pagkaandam nga masaligan sa mga butang sa Dios, walay kinutuban ang pagkat-on niining tanan nga gitugyan nganha kaninyo [tan-awa sa Alma 26:22] (DBY, 93).

Karon, mga kaigsoonan, isangyaw ang mga butang nga tinud-anay natong gituohan, ug kon kita moabut sa mga punto sa doktrina nga wala nato mahibaloi, bisan og kita adunay maayong katarungan sa pagtuo niini, [bisan] kon ang atong pilosopiya nagtudlo kanato nga kini tinuod, biyai kini ug itudlo lamang ngadto sa mga katawhan kanang atong nahibaloan (DBY, 338).

Kon sila nagpakatakus lamang unta, diha nay daghang mga miyembro nga natudloan kinsa nagpakabuhi dinhi sulod sa mga katuigan sa pagandam kanila sa pagsulod sa pig-ot nga ganghaan ug ngadto sa Bag-ong Jerusalem, ug andam sa pagpahimulos sa katilingban sa balaan nga mga anghel (DBY, 339).

Mao kini ang mga misteryo sa Gingharian sa Dios dinhi sa yuta, nga makahibalo unsaon sa paglimpyo ug pagbalaan sa atong mga pagbati, sa yuta nga atong gibarugan, sa hangin nga atong giginhawa, sa tubig nga atong giinom, sa mga balay nga atong gipuy-an ug sa mga siyudad nga atong gitukod, aron kon ang mga langyaw moabut sa atong nasud mobati sa impluwensya sa pagkabalaan ug moila sa gahum ngadto diin sila mga langyaw (DBY, 339).

Kon kamo moingon nga kamo buot og mga misteryo, mga sugo, ug mga pagpadayag, ako motubag nga panagsa ra molabay ang Igpapahulay nga walay moabut nga pagpadayag kaninyo, kamo nga moanhi dinhi, nga walay pagpadayag ni Jesukristo nga gibu-bu nganha kaninyo sama sa tubig sa yuta (DBY, 343).

Mga Sugyot alang sa Pagtuon

Ang Ginoo mohatag og mga gasa sa Espiritu aron sa pagpalig-on ug sa pagpanalangin kanato, sa atong mga pamilya, ug sa Simbahan.

Unsa ang mga gasa sa Espiritu? Ngano nga importante nga kini anaa sa gipahiuli nga Simbahan ni Jesukristo? (Tan-awa usab sa 1 Mga TagaCorinto 12:4–11; D&P 46:10–26.)
Sa unsa nga paagi kita makahibalo nga ang mga gasa sa Espiritu mapakita diha sa atong mga kinabuhi? Unsaon nato sa paggamit niini sa pagpanalangin sa uban?
Kinsa ang may katungdanan alang sa pag-ila sa espirituhanong mga gasa ug sa paggamit niini diha sa Simbahan? (Tan-awa usab sa D&P 46:27; 107:18.) Sa unsa nga paagi nga ang paggamit sa espirituhanong mga gasa diha sa calling sa Simbahan lahi gikan sa paggamit niadtong mga gasa sa kinaugalingon o sa pamilya nga kahimtang?

Ang mga milagro molig-on ug momatuod sa hugot nga pagtuo niadtong kinsa nahigugma ug nagserbisyo sa Dios.

Unsa ang mga milagro? Unsa ang katuyoan niini?
Unsa ang gipasabut sa pagpaminaw “sa tingog sa Maayong Magbalantay” ug sa “makapahimulos sa mga pagbati sa kanunay’ng buhi nga espiritu”? Sa unsa nga paagi nga ang milagro momatuod sa atong hugot nga pagtuo ug mga pagpamatuod? Ngano nga ang mga hunghong sa Espiritu mas makadani kay sa dayag nga pasundayag sa gahum? Unsaon nato nga mas magmabinantayon kita sa tanang mga milagro sa atong mga kinabuhi? (Tan-awa usab sa 2 Nephi 27:23 Ether 12:12.)

Ang Espiritu Santo moabli sa mga misteryo sa gingharian ngadto niadtong mangita sa labing maayong mga gasa ug maghupot sa mga kasugoan.

Sumala ni Presidente Young, ngano nga ang Dios mopadayag og “gamay kaayo nga bahin sa mga butang sa Gingharian”? (Tan-awa usab sa D&P 78:17–18.)
Unsaon nato sa pagpamatuod sa atong mga kaugalingon nga “takus nga modawat sa mga misteryo”? (Tan-awa usab sa D&P 76:5–10.)
Sumala ni Presidente Young, unsa ang mga misteryo sa gingharian sa Dios? (Tan-awa usab sa D&P 84:19–22.) Sa unsa nga paagi nga ang usa ka misteryo ngadto sa usa ka tawo mahimong ordinaryo, yano nga kamatuoran ngadto sa lain? Ngano nga usahay makapatintal ang pagpangagpas nianang wala nato mahibaloi?
Si Presidente Young miingon, “Panagsa ra molabay ang Igpapahulay … nga walay moabut nga pagpadayag kaninyo, kamo nga moanhi dinhi, nga walay pagpadayag ni Jesukristo nga gibu-bu nganha kaninyo sama sa tubig sa yuta.” Unsaon nato pag-andam ang atong mga kaugalingon sa pagdawat niadtong mga pagpadayag samtang modawat kita sa sakramento ug mobalaan sa Igpapahulay nga adlaw?

pioneers camping — Mga kampo sa kabus nga mga tawo natukod tabok sa Suba sa Mississippi gikan sa Nauvoo niadtong 1847 sama sa gipakita niini nga litrato. Ang pobre naluwas sa dihang ang Ginoo mihimo nga ang mga buntog nahulog gikan sa langit aron sila makakaon.