Yutan-ong Panggobyerno ug ang Gingharian sa Dios

Presidente Brigham Young—tigpahimutang og pamuy-anan, batid sa panggobyerno, ug ang unang gobernador sa Utah—mipasidungog ug miserbisyo sa iyang gobyerno. Niadtong Hulyo 1846, samtang ang mga Santos nangandam alang sa biyahe gikan sa Iowa ngadto sa Salt Lake Valley, nakadawat sila og hangyo gikan sa gobyerno sa Estados Unidos alang sa panabang sa gubat sa Mexico. Bisan og ang gobyerno wala mosuporta sa mga Santos atol sa ilang mga pagsulay sa Missouri ug sa Illinois, si Presidente Young mimando sa pagtawag sa Mormon Battalion aron sa pagtabang sa gubat ug misaad sa mga tawo nga sila dili kinahanglang makig-away kon sila magbinuotan. Kini nga saad natuman. Ang pagpalista sa Mormon Battalion nakahatag usab og kwarta aron sa pagtabang sa mga Santos nga makabalhin padulong sa kasadpan. Lima ka gatus ka mga tawo mibiya sa Kampo sa Israel alang sa malisud nga 2,000 ka milya nga martsa padulong sa California ug sa Dagat sa Pasipiko. Miingon si Presidente Young sa mga miboluntaryo, “Wala ako maghunahuna nianang gamay nga pundok sa kalalakin-an nga dili makahunahuna nga, ‘Panalangini sila Dios hangtud sa hangtud.’ Gibuhat nato kining tanan aron sa pagpakita sa Gobyerno nga kita maunungon” (DBY, 476). Kanunay nga giawhag ni Presidente Young ang mga Santos nga magmaunungon sa ilang gobyerno, sa pagsunod sa balaod niini, ug sa pagpili og tawo nga mahiyason ug maligdong ngadto sa buhatan sa publiko.

Mga Pagtulun-an ni Brigham Young

Ang yutan-ong mga panggobyerno kinahanglang ipasikad sa mga balaod sa Dios aron makalahutay.

Kon ang usa ka nasud molapas sa maayong mga balaod ug modaugdaog ni bisan kinsa sa iyang mga lungsuranon o laing nasud, hangtud mapuno ang kopa sa kadautan, pinaagi sa mga buhat nga hingpit nga ubos sa iyang kaugalingong pagmando, ang Dios motangtang kanila kinsa anaa sa awtoridad gikan sa ilang gahum, ug sila makalimtan; ug siya mokuha og laing mga katawhan, bisan og pobre ug tinamay, nagsagitsit ug gihuhungihong taliwala sa inila nga mga nasud, ug hatagan sila sa gahum ug kaalam; ug sila motubo ug mouswag, hangtud sila mahimong bantugang nasud sa yuta (DBY, 357).

Dagko ug gamhanan nga mga gingharian ang miabut ngadto sa kinatumyan sa tawhanong kabantog pinaagi kaniya, aron sa pagpahinabo sa iyang wala mahibaloi nga mga katuyoan, ug sa iyang pagbuot sila pagawagtangon gikan sa kalibutan ug mawala sa kahingpitan. Kining tanan nga dagkong mga kausaban nagtudlo ug nag-andam sa paagi sa pagtukod sa iyang Gingharian sa ulahing mga panahon, nga mobarug sa kahangturan ug motubo sa kabantog ug gahum hangtud ang balaan, mahangturon, nga relihiyoso ug politikanhong kalinaw mohimo sa mga kasingkasing sa mga pobre taliwala sa mga tawo mahimaya sa kalipay diha sa Usa nga Balaan sa Israel, ug nga ang iyang Gingharian bisan asa magmadaugon (DBY, 357).

Ang miila og Dios nga panggobyerno [mao] ang usa diin ang tanang mga balaod gimando ug gihimo diha sa pagkamatarung, ug kansang mga opisyal nakaangkon niana nga gahum gikan sa Makagagahum (DBY, 354).

Kon ang Gingharian sa Dios, o ang usa ka miila og Dios nga panggobyerno, gitukod dinhi sa yuta, daghang mga binuhatan nga karon nagdagsang pagawagtangon (DBY, 354).

Ang usa ka komunidad dili tugutan nga mopasundayag sa kaugalingon sa pagbatok sa lain sa pagpugos kanila sa pagsunod sa ilang sumbanan; usa ka denominasyon dili tugutan nga mogukod sa lain tungod kay sila nagkalahi og relihiyoso nga pagtuo ug paagi sa pagsimba. Ang matag usa hingpit nga mapanalipdan sa pagpahimulos sa tanang relihiyoso ug sosyal nga mga katungod, ug walay estado, walay panggobyerno, walay komunidad, walay tawo nga adunay pribilehiyo sa paglapas sa katungod sa lain, ang usa ka komunidad nga Kristiyano dili makigbatok ug mogukod sa lain (DBY, 354).

Bisan kinsa ang mabuhi nga makakita sa Gingharian sa Dios nga hingpit nga matukod dinhi sa yuta makakita og usa ka panggobyerno nga manalipod sa matag tawo sa iyang mga katungod. Kon kana nga panggobyerno naghari … inyong makita ang Roman Catholic, ang Greek Catholic, ang Episcopalian, ang Presbyterian, ang Methodist, ang Baptist, ang Quaker, ang Shaker, ang [Hindi], ang [Muslim], ug ang matag matang sa mga tigsimba nga mapanalipdan pag-ayo sa ilang tanang mga katungod ug mga pribilehiyo sa pagsimba kon kinsa, unsa, ug kon unsay ilang gusto, dili magyatak sa katungod sa uban. Si bisan kinsa ba nga tawo nga nagtinarung sa iyang paghukom magtinguha og mas dako nga kalingkawasan? (DBY, 355).

Sa unsa nga paagi nga ang panggobyerno sa nga gawasnong gipili makabarug? Adunay usa lamang ka paagi nga kini makabarug. Kini makalahutay, apan unsaon? Kini makalahutay, sama sa panggobyerno sa langit nga makalahutay, diha sa mahangturong bato sa kamatuoran ug hiyas; ug nga mao lamang kini ang kapasikaran diin ang bisan unsa nga panggobyerno makalahutay (DBY, 355).

Kadtong kinsa modumala kinahanglang adunay kaalam ug kaligdong.

Ako buot og maayong panggobyerno, ug niana ako buot nga kini maalamon ug makiangayon nga ipangalagad. Ang panggobyerno sa langit, kon gipangalagad sa dinautan, mahimong usa sa labing ngil-ad nga panggobyerno sa ibabaw sa yuta. Bisan unsa pa ka maayo ang panggobyerno, gawas kon kini gipangalagad sa matarung nga mga tawo, usa ka dautan nga panggobyerno ang mahimo gikan niini (DNW, 3 sa Hunyo 1863, 2).

Walay tawo nga angay momando, modumala, ug modiktar, hangtud nga siya … mosunod sa balaod, ug mopakita sa iyang kaugalingon nga takus, pinaagi sa pagsunod sa balaod nga ibabaw kaniya, nga mahimong magtutudlo niana nga balaod (DBY, 357).

[Ang maayong panggobyerno nagkinahanglan og usa ka lider kinsa] makahimo sa pagpakigsulti nga masabtan sa mga katawhan, sumala sa ilang kapasidad, impormasyon sa tanang mga punto kalabut sa makiangayon nga pagpangalagad sa Panggobyerno. Siya kinahanglang makasabut unsa nga administratiba nga palakat ang labing makaayo sa nasud. Siya kinahanglan usa nga adunay kahibalo ug gawi nga maalamong mobansay sa gahum sa pagpili, kutob nga kini pinasubay sa batakang balaod nga anaa sa iyang pagmando ug mopili lamang og maayo ug takus nga mga tawo alang sa buhatan. Dili lamang siya motuman sa legal ug makiangayon nga mga tinguha sa iyang mga sumusunod, apan kinahanglan nga siya makahatag og kahayag sa ilang pagsabut ug motarung sa ilang pagsabut. Ug ang tanan nga maayong mga opisyal sa tinuod nga gawasnong mopili nga administrasyon kanunay nga maningkamot sa seguridad sa mga katungod sa tanan, bisan unsa ang sekta o pundok (DBY, 363).

Ang mga tawo kinahanglang mohugop sa ilang mga pagbati, sa ilang impluwensya, ug sa ilang hugot nga pagtuo sa pagpili sa labing maayong tawo nga ilang makita nga mahimo nilang Presidente, kon wala na siyay laing kaunon kay sa mga patatas ug asin—ang usa ka tawo nga dili mangandoy nga mahimong bantugan kay sa mga tawo kinsa nagtudlo kaniya, apan malipayon sa pagpuyo sama sa ilang pagpuyo, sa pagsinina sama sa ilang pagsinina, ug sa matag maayong butang makighiusa kanila (DBY, 363).

Buot kita og mga tawo nga modumala sa nasud kinsa mas moatiman ug mahigugma sa kaayohan sa nasud kay sa bulawan ug pilak, dungog, o pagkabantugan (DBY, 364).

Ang mga miyembro sa Simbahan adunay katungdanan nga mahimong responsable nga mga lungsuranon.

Ang indibidwal nga pagdumala sa kaugalingon mao ang kapasikaran sa tanang tinuod ug epektibo nga pagdumala sa langit o sa yuta. … Ang panggobyerno ubos sa mga kamot sa dautan nga mga tawo matapos sa kaalautan ngadto niana nga mga katawhan, apan sa mga kamot sa matarung kini mahangturon, samtang ang gahum niini moabut ngadto sa langit (DBY, 355).

Kon magpuyo kita sa atong relihiyon, motahud sa atong Dios ug sa iyang Priesthood, niana kita motahud sa tanang maayong panggobyerno ug balaod dinhi sa yuta. … Sa nagkalain-laing mga nasud, mga gingharian ug mga panggobyerno sa kalibutan makita ang mga balaod, mga ordinansa ug mga kasugoan nga maayo alang sa mortal nga tawo (DBY, 358).

Politiko ba kita nga mga tawo? Oo, politiko sa pagkatinuod. Apan unsa nga pundok kamo nahisakop o inyong botaran? Ako mosulti kaninyo kinsa ang atong botaran: atong botaran ang tawo nga mopaluyo sa mga baruganan sa sibil ug relihiyoso nga kalingkawasan, ang tawo kinsa nakahibalo sa labing daghan ug kinsa adunay labing nindot og kasingkasing ug pangutok sa usa ka tawo nga batid sa panggobyerno; ug dili kita magsapayan kon unsa ka gamay bisan og siya usa ka whig, usa ka democrat, … usa ka a republican, … o bisan unsa. Kini ang atong politika (DBY, 358).

Kita, sama sa tanang uban nga maayong mga lungsuranon, kinahanglang maningkamot sa pagbutang niadto nga mga tawo diha sa gahum, kinsa mobati sa katungdanan ug mga responsibilidad nga anaa kanila ngadto sa daghan kaayong mga katawhan; kinsa mobati ug makaamgo sa importante nga mga pagsalig nga gitugyan diha kanila pinaagi sa tingog sa mga katawhan kinsa mitawag kanila sa pagpangalagad sa balaod (DBY, 362).

Kinsa ang atong gusto nga molingkod sa atong publiko nga mga buhatan? Gusto kita sa labing maayo nga mga tawo nga atong makita alang sa pagka-gobernador ug magbabalaod, ug alang sa matag buhatan sa pagsalig ug responsibilidad; ug kon kita makaangkon na kanila, iampo nato sila ug mohatag sa atong pagsalig ug impluwensya sa pagbuhat sa kabubuton sa Dios ug sa pagpatunhay sa ilang mga kaugalingon ug sa mga katawhan diha sa kamatuoran ug pagkamatarung (DBY, 358).

Mga Sugyot alang sa Pagtuon

Ang yutan-ong mga panggobyerno kinahanglang ipasikad sa mga balaod sa Dios aron makalahutay.

Ngano nga kinahanglan gayud nga ang mga panggobyerno ipasikad sa mga balaod sa Dios aron magmalampuson? Unsay mahitabo sa katapusan sa bisan unsa nga panggobyerno nga wala ipasikad sa matarung nga mga baruganan? (Alang sa mga ehemplo niini nga resulta, hunahunaa ang kabantog ug pagkapukan sa gingharian sa Nephite ug sa Lamanite sa nagkalain-lain nga mga panahon sa tibuok Basahon ni Mormon.)
Sumala ni Presidente Young, unsa ang katuyoan sa yutan-ong mga panggobyerno? (Tan-awa usab sa D&P 134:1.)
Sa unsa nga paagi nga ang katilingban lahi kon ang panggobyerno nga teyokrasya matukod dinhi sa yuta? Unsa ang gihunahuna ni Presidente Young nga labing dakong kagawasan nga ikahatag sa panggobyerno nga teyokrasya? (Tan-awa usab sa D&P 134:4, 7, 9.)

Kadtong kinsa modumala kinahanglang adunay kaalam ug kaligdong.

Unsa nga mga hiyas ang kinahanglang anaa sa lider sa panggobyerno? Kon ang mga lider sa panggobyerno may salabutan, maalamon, ug kugihan, ngano nga importante nga sila usab adunay mga hiyas sama sa pagkamatinuoron ug maayong gawi?
Ngano nga kinahanglan gayud nga ang may purohan nga mahimong lider may kasinatian nga gidumala sa dili pa siya angayan nga modumala? Ngano nga mahinungdanon alang sa mga lider nga magpakita nga sila masulundon sa balaod?

Ang mga miyembro sa Simbahan adunay katungdanan nga mahimong responsable nga mga lungsuranon.

Ngano nga ang “indibidwal nga pagdumala sa kaugalingon” importante kaayo ngadto sa kalampusan sa yutan-ong pagdumala? Sa unsa nga paagi nga ang pagkamatarung sa mga katawhan nga gidumala makaapekto sa kalampusan sa panggobyerno?
Ngano nga importante nga mobotar kon kamo hatagan og kahigayunan? Unsaon ninyo sa paghukom kon kinsa ang botaran?
Unsaon ninyo sa pagtuman sa inyong katungdanan nga mahimong responsable nga mga lungsuranon? (Tan-awa usab sa D&P 134:5–6.)