Misyonaryo nga Buhat

Pipila ra ang mihatag sa kawsa sa misyonaryo nga buhat sama sa gibuhat ni Presidente Brigham Young. Ang paghulagway sa iyang pag-abut sa Kirtland, Ohio—human makaserbisyo og misyon sulod sa usa ka tuig—mao ang makalolooy nga istorya sa sakripisyo nga iyang gihimo alang niini nga buhat: “Sa dihang miabut kami sa Kirtland [niadtong Septyembre 1833], kon adunay tawo nga nakig-uban sa mga Santos nga mas pobre pa kay kanako—tungod kay wala siyay bisan unsa. … duna akoy duha ka mga anak nga atimanon—mao na kadto ang tanan. Usa ako ka biyudo. ‘Brother Brigham, aduna ka bay sapatos?’Wala, walay sapatos sa akong tiil, gawas sa hinulaman nga usa ka parisan sa botas. Ako walay sinina alang sa tingtugnaw, gawas sa hinimo nga kupo nga tulo o upat na ka tuig. ‘Mga karsones?’Wala. ‘Unsay imong gibuhat? Milakaw ba ikaw nga walay bisan unsa?’Wala; nanghulam ako og usa ka partisan nga ikasul-ob hangtud nga ako makakuha og laing parisan. Mibiyahe ako ug misangyaw ug mihatag sa matag dolyar sa akong kabtangan. Mas gamay ang akong kabtangan sa dihang nagsugod ako sa pagsangyaw. … Mibiyahe ko ug nagsangyaw hangtud nga wala nay nahibilin kanako; apan si Joseph miingon: ‘bangon’; ug ako mibangon kutob sa akong mahimo” (DNSW, 9 sa Mar. 1867, 2).

Mga Pagtulun-an ni Brigham Young

Ang ebanghelyo isangyaw ngadto sa tanang mga katawhan.

Ang Ginoo mitawag kanako niini nga buhat, ug akong gibati nga kini akong buhaton. Ipadala nato ang Ebanghelyo ngadto sa mga kanasuran; ug kon ang usa ka nasud mosalikway kanato moadto kita sa lain ug mopundok sa matinuoron og kasingkasing, ug ang nahibilin dili nato panumbalingon hangtud kita moadto sa Bukid sa Zion isip sama sa mga manluluwas, sa pagpahigayon sa mga ordinansa sa balay sa Dios alang kanila [tan-awa sa Obadias 1:21] (DBY, 319).

Ang ebanghelyo kinahanglang isangyaw ngadto sa kalibutan, aron ang dautan walay ikapamalibad (DBY, 319).

Gikinahanglan nga ang tanan adunay kahigayunan sa pagdawat o pagsalikway sa mahangturong kamatuoran, aron sila maandam nga maluwas, o maandam nga masilotan (DBY, 319).

Ang atong Amahan sa Langit, si Jesus, ang atong Magulang nga Igsoong lalaki ug ang Manluluwas sa kalibutan, ug ang tibuok kalangitan, nagtawag niini nga mga katawhan sa pag-andam sa pagluwas sa mga nasud sa yuta, usab ang minilyon nga namatay nga wala makadungog sa Ebanghelyo (DBY, 319).

Ang Ginoo mipahiuli sa Priesthood sa atong panahon alang sa kaluwasan sa Israel. Nagplano ba siya sa pagluwas og lain pa? Oo, iyang luwason ang Balay ni Esau, ug ako nanghinaut nga mabuhi pa hangtud ako makakita sa Bukid sa Zion nga matukod, ug ang mga manluluwas moabut aron sa pagluwas niadtong mga pobre, makalolooy nga mga binuhat kinsa kanunay nga nanggukod kanako ug—ang tanan nga wala makasala batok sa Espiritu Santo. Ang atong buluhaton mao ang pagluwas sa atong mga kaugalingon, ang pagluwas sa Balay ni Israel, ang pagluwas sa Balay ni Esau, ug ang tanan nga mga nasud sa Hentil—ang tanan nga maluwas (DBY, 319).

Malipayon ako kon ako makahibalo nga … ang mga tawo sa matag isla ug sa dakong yuta, sa taas ug sa ubos, ang walay kahibalo ug ang may salabutan, makadawat sa mga pulong sa kinabuhing dayon, ug ihatag diha kanila ang gahum sa mahangturong Priesthood sa Anak sa Dios (DBY, 320).

Ang adlaw moabut nga ang Ebanghelyo itudlo ngadto sa mga hari ug mga rayna ug sa mga bantugan sa yuta; apan kini ipahayag sa lahi nga impluwensya kay sa pagpahayag ngadto sa pobre, apan kini sama ra nga Ebanghelyo. Dili kita motudlo og laing Ebanghelyo; managsama ra kini gikan sa walay katapusan hangtud sa walay katapusan (DBY, 320).

Ang mga Elder nakasangyaw usab sa lain-laing mga nasud sa Uropa kutob sa mihatag og patugot. Sa ubang mga nasud ang balaod dili motugot kanila; apan ang Ginoo mohimo og rebolusyon niadto nga mga nasud hangtud ang pultahan pagaablihan ug ang Ebanghelyo isangyaw ngadto sa tanan (DBY, 320).

Atong pundukon ang labing pobre sa mga katawhan, ang mga walay alamag, ug pipila ka mga makinaadmanon; apan sa kasagaran, atong pundukon kadtong mga pobre, kinsa buot nga matubos; kinsa mibati sa pangdaog-daog nga gipahamtang sa mapahitas-on ug sa mapagarbuhon; nanghinaut silang luwason, ug ang sangputanan ang ilang mga dunggan naabli aron modawat sa kamatuoran. Hunahunaa kadtong kinsa anaa sa pagpahimulos sa tanang kaharuhay niini nga kinabuhi, ug magdumili sa pagdawat sa ebanghelyo; dili sila mamati (DBY, 321).

Ug kon ikaw gitawag sa pagsangyaw sa Ebanghelyo sa langyaw nga mga misyon, pagplano sa pagluwas sa tanang tawo. Walay lalaki o babaye nga makahimo sa pagdawat sa makaluwas nga grasya nga dili bililhon nga luwason. Walay intelehente nga binuhat, gawas niadtong kinsa nakasala batok sa Espiritu Santo, nga dili bililhon, ako moingon, igo na kaayo ang tanang paningkamot sa usa ka Elder sa pagluwas kanila diha sa Gingharian sa Dios (DBY, 321).

Ang mga misyonaro kinahanglan nga mopatigbabaw diha sa ilang mga hunahuna ug mga kasingkasing diha sa ilang mga misyon ug motrabaho sa kinasingkasing aron makadala og mga kalag ngadto ni Kristo.

Walay lalaki o babaye niini nga Simbahan nga wala sa misyon. Kana nga misyon molungtad hangtud buhi pa sila, ug kini mao ang pagbuhat og maayo, sa pagpasiugda og pagkamatarung, sa pagtudlo og mga baruganan sa ebanghelyo, ug sa pag-awhag sa ilang mga kaugalingon ug sa tanan nga naglibut kanila sa pagsunod niadtong mga baruganan aron sila makaangkon og kinabuhing dayon (DBY, 322).

Sa dihang misulod ako niini nga Simbahan, nagsugod ako nga usa ka misyonaryo, ug nagdala og libro, ug nagsugod sa pagbiyahe kanunay. Ang kamatuoran mao ang akong libro, ang Ebanghelyo sa kaluwasan mao ang akong hilisgutan, ug ang kalibutan mao ang akong tudloan (DBY, 322).

Dili kita buot nga ang usa ka tawo magmisyon, gawas kon ang iyang kalag anaa diha niini nga buhat (DBY, 322).

Ang mga kaigsoonan nga gitawag sa langyaw nga mga misyon gilauman namong motubag sa ilang tawag uban sa kamaya (DBY, 322).

Lakaw ug isangyaw ang Ebanghelyo, sinatia, pagkat-on og kaalam, ug lakaw nga mapainubsanon sa atubangan sa inyong Dios, aron kamo makadawat sa Espiritu Santo sa paggiya ug sa pagdumala kaninyo, ug sa pagtudlo kaninyo sa tanang mga butang nga nangagi, karon, ug sa umaabut (DBY, 322).

Salig sa Dios, ug padayon sa pagsalig kaniya, ug siya moabli sa inyong agianan ug mopilopilo sa ingong mga panalangin nganha kaninyo, ug ang inyong kalag matagbaw sa iyang mga kaayo. Dili ako makasaad kaninyo og bisan unsa nga maayo diha sa paghimo og dili matarung nga agianan; ang inyong mga kinabuhi kinahanglang mahimong ehemplo sa maayong mga buhat (DBY, 322).

Buot nakong isilsil sa mga hunahuna sa kaigsoonan, nga siya kinsa molakaw pinaagi sa pangalan sa Ginoo, mosalig kaniya diha sa iyang tibuok kasingkasing, dili gayud makulangan og kaalam sa pagtubag sa bisan unsa nga pangutana nga gipangutana kaniya, o sa paghatag og bisan unsa nga tambag nga gikinahanglan sa paggiya sa mga katawhan sa paagi sa kinabuhi ug sa kaluwasan, ug siya dili gayud mabuntog hangtud sa kahangturan. Lakaw pinaagi sa pangalan sa Ginoo, salig sa pangalan sa Ginoo, salig sa Ginoo, ug tawag sa Ginoo sa mainitong paagi ug walay paghunong ug pagampo nga dili magtagad sa kalibutan. Kamo makakita og daghan sa kalibutan—anaa kini kaninyo sa tanang panahon—apan kon kamo magpuyo nga matarung aron makaangkon sa Espiritu Santo kamo makasabut og dugang pinaagi niini usa ka adlaw niana kay sa dose ka adlaw nga wala kini, ug kamo makakita dayon sa kalainan tali sa kaalam sa mga tawo ug sa kaalam sa Dios, ug kamo makahukom sa mga butang ug makabana-bana sa ilang tinuod nga bili (DBY, 323).

Kon ang mga Elder dili makaadto uban sa limpyo ug putli nga mga kasingkasing, mas maayo pa nga magpabilin sila dinhi. Ayaw pag-adto nga maghunahuna, nga kon kamo moabut sa Suba sa Missouri, sa Mississippi, sa Ohio, o sa Atlantic, nga inyong hugasan ang inyong mga kaugalingon; apan sugod dinhi uban sa limpyo nga mga kamot ug putli nga mga kasingkasing, ug pagmaputli gikan sa alimpulo sa ulo ngadto sa tikod sa inyong mga tiil; niana pagtarung sa pagpuyo matag oras [tan-awa sa Salmo 24:4]. Lakaw nianang paagiha, ug nianang paagiha trabaho, ug balik pag-usab sama sa limpyo nga usa ka piraso sa papel nga puti. Mao kini ang paagi nga buhaton; ug kon kamo dili mobuhat niana, ang inyong mga kasingkasing magmasulub-on (DBY, 323).

Ang mga biyahe ug mga trabaho sa mga Elder mahitungod sa pagmisyon mobutang kanila sa kahimtang diin maoy makaaghat nila sa pagpangita sa Ginoo. Kinahanglan silang mopuyo sa ilang relihiyon, sa pag-adto uban sa putli nga mga kasingkasing ug limpyo nga mga kamot, ug dayon mosangyaw sa Ebanghelyo pinaagi sa gahum sa Dios nga gipadala gikan sa langit. Kinahanglang dili sila mohikap ug motilaw sa sala, ug kon sila mobalik kinahanglan nga sila mobalik nga sa putli ug limpyo, andam sa pakighimamat sa mga Santos sa dayag nga panagway (DBY, 325).

Kon kamo magmisyon aron sa pagsangyaw sa Ebanghelyo nga walay tumong diha sa inyong kasingkasing, mangita niini ug niana, ug nga, aron mahibalo kon unsay anaa sa kalibutan, ug wala magpunting sa inyong hunahuna—oo, ako moingon wala magpunting—sa krus ni Kristo, kamo moadto ug mobalik nga kawang. Lakaw nga ligdong, nga nagdala sa bililhon nga butang, puno sa gahum sa Dios, ug puno sa pagtuo sa pag-ayo sa masakiton pinaagi sa paghikap sa inyong kamot, pagbadlong ug pagsalikway sa dautan nga mga espiritu, ug pagpaningkamot nga magmalipayon ang mga kabus, ug kamo mobalik nga nagdala sa inyong naani uban kaninyo [tan-awa sa Salmo 126:5–6]. Ipatigbabaw ang inyong mga hunahuna sa inyong mga misyon ug sa pagtrabaho sa kinaugalingon aron makadala og mga kalag ngadto ni Kristo (DBY, 325).

Ipahinungod sila [ang inyong mga minahal] ngadto sa Ginoong Dios sa Israel, ug ibilin sila sa panimalay; ug kon kamo atua na sa England, o sa laing mga nasud, bisan og asa, kon kamo mag-ampo alang sa inyong mga pamilya, pag-ampo alang kanila … ug ayaw sila ipaduol kaninyo, ingon og sila anaa sa inyong maleta. Pag-ampo alang kanila bisan hain sila. Kinahanglang inyong bation—kon sila mabuhi, maayo; kon sila mamatay, maayo; kon ako mamatay maayo; kon ako mabuhi, maayo; kay iya kita sa Ginoo, ug kita sa dili madugay magkita pag-usab (DBY, 324).

Kon ang mga lalaki makaangkon sa espiritu sa ilang misyon ug makaamgo sa ilang calling ug mobarug sa atubangan sa Ginoo ug sa mga katawhan, kini naglangkob sa labing malipayon nga bahin sa ilang mga kinabuhi (DBY, 328).

Ang Espiritu, dili ang pangatarungan o pakiglantugi, ang makakabig sa mga tawo ngadto sa ebanghelyo ni Jesukristo.

Nakabiyahi lamang ako og mubo nga higayon aron sa pagpamatuod ngadto sa mga tawo, sa wala pa ako makakat-on niini nga kamatuoran, nga mahimo kamong motino og doktrina gikan sa Biblia hangtud sa paghukom, ug kini igo lamang sa pagpatuo sa mga tawo, apan dili makakabig kanila. Mahimo kamong mobasa sa Biblia gikan sa Genesis hangtud sa Pinadayag, ug motino sa matag gamay nga doktrina nga anaa, ug ang mao lamang nga butang dili makahimo og makakabig nga impluwensya diha sa mga tawo. Walay makapuli sa pagpamatuod pinaagi sa gahum sa Espiritu Santo ang makahatag og kahayag ug kahibalo ngadto kanila—modala kanila sa ilang mga kasingkasing ngadto sa paghinulsol. Walay lain niana ang makahimo. Kanunay kamong nakadungog kanako nga mas buot akong makadungog sa mahimo kamong motino og doktrina gikan sa Biblia hangtud sa paghukom, ngadto sa mga tawo, sa wala pa ako makakat-on niini nga kamatuoran, nga usa ka Elder, dinhi o atua sa layo, nga mosulti og lima ka pulong inubanan sa gahum sa Dios, ug sila daghan og mahimong kaayohan kay sa maminaw og taas nga mga sermon nga walay Espiritu. Tinuod kana, ug kita nasayud niini (DBY, 330).

Pasangyawa ang usa ka tawo kinsa maayo kaayong motino sa pangatarungan nga paagi sa iyang tanang isulti sa daghang mga kinutlo gikan sa mga pinadayag, ug pakuyuga ang usa ka tawo uban kaniya kinsa mosulti, pinaagi sa gahum sa Espiritu Santo, Sa ingon miingon ang Ginoo, ug sultihi unsa ang angay nga tuohan sa mga katawhan—unsay ilang kinahanglang buhaton—sa unsa nga paagi sila magpuyo, ug tudloi sila sa pagsunod sa mga baruganan sa kaluwasan—bisan og siya dili makahimo sa paghatag og usa ka pagpangatarungan, bisan og siya mokurog ubos sa pagbati sa iyang kahuyang, magsalig sa Ginoo alang sa kalig-on, nga ang kasagaran nga buhaton sa mga tawo, inyong makaplagan nga ang tawo nga mopamatuod pinaagi sa Espiritu Santo makadani ug makapundok og daghan pa nga matinuoron ug matarung kay sa pangatarungan lamang (DBY, 330).

Ang pakiglantugi ug argumento wala nianang makaluwas nga epekto nga anaa sa pagpamatuod sa kamatuoran sama sa gipadayag sa Ginoo ngadto sa Elder pinaagi sa Espiritu. Tingali mouyon kamo kanako niini; bisan sa gamay, kini mao ang akong kasinatian. Dili buot sabton nga ako naglabay og babag diha sa pamaagi sa mga Elder sa pagtigum diha sa ilang mga hunahuna sa tanang mga argumento nga ilang makuha sa pagpanalipod sa ilang relihiyon, ni ako gusto nga mobabag kanila bisan gamay sa pagkat-on kutob sa ilang mahimo mahitungod sa mga relihiyon ug panggobyerno. Mas daghang kahibalo ang mga Elder mas maayo (DBY, 330).

Ang espiritu sa kamatuoran makahimo og daghan sa pagdala sa mga tawo ngadto sa kahayag ug kahibalo, kay sa daghan og istorya (DBY, 333).

Ang tigsangyaw nagkinahanglan sa gahum sa Espiritu Santo nga makahatag ngadto sa matag kasingkasing sa mensahe sa hustong panahon, ug ang mga tigpaminaw nagkinahanglan sa Espiritu Santo sa pagdala og mga bunga sa gisangyaw nga pulong sa Dios ngadto sa iyang himaya [tan-awa sa D&P 50:17–22] (DBY, 333).

Walay tawo nga sukad misangyaw og sermon sa Ebanghelyo, gawas pinaagi sa gasa ug gahum sa Espiritu Santo gikan sa langit. Kon wala kini nga gahum, walay kahayag sa pagsangyaw. (DBY, 333).

Kon ang usa ka Elder nagsangyaw sa Ebanghelyo, wala mobati nga siya adunay gahum sa pagsangyaw sa kinabuhi ug sa kaluwasan, ug adunay pagtugot nga mangalagad sa mga ordianansa, ug kana, usab, pinaagi sa gahum sa Dios, dili siya makatuman sa iyang misyon nga maghatag og kaugalingong niyang dungog, ni ngadto sa kaayohan sa mga katawhan, ug sa paguswag ug kadungganan sa Gingharian sa Dios. Gikan sa tanan nga akong mabasa, gikan sa tanan nga akong makat-unan, gikan sa mga pagpadayag gikan sa Dios ngadto sa tawo, ug gikan sa mga pagpadayag sa Espiritu ngari kanako, walay tawo nga malampusong mosangyaw sa Ebanghelyo ug angkunon sa Dios nga iyang tawo, panalanginan, ug ilhon sa kalangitan, gawas kon siya mosangyaw pinaagi sa gahum sa Dios pinaagi sa direkta nga pagpadayag (DBY, 336).

Padayon sa pagtrabaho sa matinud-anong paagi ug hupti ang espiritu sa pagsangyaw ug ang ebanghelyo.

Buot akong mohimo niini nga hangyo nga ang Elder nga mopauli gikan sa mga misyon mohunahuna sa ilang mga kaugalingon sama nga sila nagmisyon dinhi sa England o sa bisan asang dapit sa kalibutan (DBY, 328).

Kita motawag kanunay sa mga kaigsoonan nga momisyon aron sa pagsangyaw sa Ebanghelyo, ug sila moadto ug motrabaho sa matinud-anon nga paagi sama sa mahimo sa mga lalaki, mainiton sa espiritu, sa pagampo, sa pagpandong sa mga kamot, sa pagsangyaw ug sa pagtudlo sa mga tawo unsaon sa pagluwas. Sa pipila ka tuig ang molabay sila mamauli, ug nag-itsa sa ilang mga kupo ug mga kalo, sila moingon, “Relihiyon, ipadaplin na kana, motrabaho na ako karon alang sa akong kaugalingon ug sa akong pamilya.” Hilabihan kini nga kabuang. Kon ang usa ka tawo mopauli gikan sa usa ka misyon diin siya nagsangyaw sa Ebanghelyo kinahanglan andam gihapon nga moduol niini nga pulpito aron sa pagsangyaw sama sa iyang pagsangyaw didto sa England, France, Germany, o sa mga isla sa dagat. Ug kon siya nakauli na og usa ka semana, usa ka bulan, usa ka tuig, o napulo ka tuig, ang espiritu sa pagsangyaw ug ang espipritu sa Ebanghelyo kinahanglan anaa kaniya sama sa suba nga nagdagayday ngadto sa mga tawo sa maayong mga pulong, mga pagtulun-an, mga lagda, ug mga ehemplo. Kon kini dili man gani ingon niini wala niya matuman ang iyang misyon (DBY, 328–29).

Pauli uban sa pagsalig. Ipadayon nga limpyo ang inyong mga kaugalingon, gikan sa alimpulo sa inyong mga ulo hangtud sa mga tikod sa inyong mga tiil, pagmaputli sa kasingkasing—kondili kamo mobalik nga luya ang espiritu ug subo ang panagway, ug mobati ingon og kamo dili na gayud makabangon pag-usab (DBY, 328).

Kadtong matinud-anong mga Elder kinsa nakapamatuod niini nga buhat ngadto sa liboan ka mga tawo sa mga kayutaan ug sa mga isla sa kadagatan makakita sa mga bunga sa ilang mga paningkamot, bisan og nakasulti sila og lima ka mga pulong o liboan. Sila dili makakita niining mga bunga dihadiha, ug tingali, sa daghang mga hitabo, dili hangtud sa Milenyum; apan ang katam-is sa ilang pagpamatuod ipadayon gikan sa amahan ngadto sa anak (DBY, 329).

Mga Sugyot alang sa Pagtuon

Ang ebanghelyo isangyaw ngadto sa tanang mga katawhan.

Si Presidente Young miingon nga kon ang ebanghelyo isangyaw ngadto sa mga hari ug mga rayna kini, “ipahayag sa lahi nga impluwensya kaysa pagpahayag ngadto sa mga pobre.” Ngano nga ang lain-laing mga katawhan motubag ngadto sa lain-laing mga pamaagi sa pagtudlo? Unsaon nato sa pagpahaum ang atong mga pamaagi sa pagtudlo sa pagtudlo og lain-laing mga tawo nga dili isakripisyo ang mga kamatuoran sa ebanghelyo?
Si Presidente Young mipahayag nga ang Ginoo “mousab niadto nga mga nasud” kansang mga balaod dili motugot nga itudlo ang ebanghelyo. Sa unsa nga paagi nga kini nga panagna natuman?
Sumala ni Presidente Young, kinsa ang “bililhon nga luwason”? (Tan-awa usab sa D&P 18:10–16.)

Ang mga misyonaro kinahanglan nga mopatigbabaw sa ilang mga hunahuna ug mga kasingkasing diha sa ilang mga misyon ug motrabaho sa kinasingkasing aron makadala og mga kalag ngadto ni Kristo.

Sumala ni Presidente Young, ang matag lalaki o babaye niini nga Simbahan anaa sa misyon. Unsa ang atong mga responsibilidad? Unsa gayud ang inyong gihimo nga nakahatag kaninyo o sa uban og kalampusan sa inyong misyonaryo nga mga paningkamot? Unsay inyong nakat-unan gikan sa inyong misyonaryo nga mga paningkamot nga makatabang kaninyo nga mahimong mas epektibo sa pagdapit sa mga tawo sa pagduol ngadto ni Kristo? (Tan-awa usab sa Moroni 10:32.)
Si Presidente Young mitudlo nga ang mga misyonaryo kinahanglan nga mobutang sa ilang mga kalag diha niini nga buhat. Pinasikad sa unsay inyong gibasa niini nga hugna, unsay gipasabut niana?
Unsa ang gisaad ni Presidente Young niadtong kinsa mosangyaw sa ebanghelyo ug mosalig sa Dios? Ngano nga kita magtinguha sa pakiguban sa Espiritu Santo samtang kita mopakigbahin sa ebanghelyo?
Ngano nga importante nga ang mga misyonaryo limpyo sa dili pa sila magsugod sa ilang full-time nga pagserbisyo? Unsa ang tambag ni Presidente Young mahitungod sa misyonaryo nga takus samtang sila nagserbisyo ug kon sila mopauli na?
Ngano nga kinahanglan nga ang mga misyonaryo “mopunting” sa ilang mga hunahuna diha sa atong Manluluwas, nga si Jesukristo? Unsa ang tambag ni Presidente Young ngadto sa full-time nga mga misyonaryo kinsa nakigbisog sa kamingaw?

Ang Espiritu, dili ang pangatarungan o pakiglantugi, ang makakabig sa mga tawo ngadto sa ebanghelyo ni Jesukristo.

Ngano nga ang mga misyonaryo kinsa nagpamatuod sa ebanghelyo pinaagi sa gahum sa Espiritu Santo mas epektibo kay sa niadtong kinsa motudlo lamang pinaagi sa pangatarungan ug katarungan? Ngano nga ang pakiglantugi dili epektibo nga paagi sa pagpakigbahin sa ebanghelyo?
Ngano nga walay kahayag sa pagsangyaw niadtong kinsa walay Espiritu Santo uban kanila?
Unsa ang gisaad ni Presidente Young niadtong kinsa mosangyaw “pinaagi sa gahum sa Dios pinaagi sa direkta nga pagpadayag” ug pagsalig Kaniya?

Padayon sa pagtrabaho sa matinud-anong paagi ug hupti ang espiritu sa pagsangyaw ug sa ebanghelyo.

Ngano nga “hilabihan kini nga kabuang” alang sa mga misyonaryo sa pagbaliwala sa ilang relihiyon kon mopauli na sila?
Kon kita ma-release gikan sa usa ka calling, unsaon nato sa paghupot sa “espiritu sa pagsangyaw ug sa espiritu sa Ebanghelyo … sama sa suba nga nagdagayday ngadto sa mga katawhan sa maayong mga pulong, mga pagtulun-an, mga lagda, ug mga ehemplo”?
Unsa ang gisaad ni Presidente Young sa matinud-anong mga misyonaryo kinsa nagpamatuod sa buhat sa Ginoo?

Litrato ni Elder Thomas C. Griggs, usa ka misyonaryo sa British Isles, niadtong 1880.

church missionaries — Ang mga misyonaryo sa Simbahan sa Echo Canyon, Utah, 1867. Ang unang mga misyonaryo mitudlo sa ebanghelyo didto sa England, Europe, ug sa mga isla sa Dagat sa Pasipiko.