Ang Gingharian sa Dios ug ang Pagpundok sa Israel

Niadtong Hulyo 26, 1847, pipila ka mga adlaw lamang human ang unang mga pioneer misulod sa Salt Lake Valley, si Presidente Brigham Young ug gamay nga grupo sa mga lider sa priesthood misaka og bungtod sa aminahang bahin sa maong dapit nga sa kaulahian nahimong siyudad sa Salt Lake. Ilang ginganlan ang bungtod og Ensign Peak agig paghinumdom sa panagna ni Isaias: “Magpatindog siya og bandila ngadto sa mga nasud sa halayo … ug, tan-awa, sila manganhi sa madali gayud. Si Presidente Young sa kaulahian miila niini nga bungtod nga mao ang dapit nga iyang nakita sa panan-awon, usa ka dapit diin ang mga Santos molambo, diin ang gingharian sa Dios matukod ug ang ulahing adlaw nga Israel mapundok. Sa mga katuigan nga misunod, ang mga misyonaryo midala sa mensahe sa ebanghelyo sa tibuok kalibutan, ug liboan sa bag-ong nakabig nga mga santos miadto ngadto sa Salt Lake Valley. Karon ang pagtukod sa gingharian ug ang pagpundok sa Israel nagpadayon sa gatusan ka mga nasud. Si Presidente Young miingon, “Ang pagpundok sa Israel importante kaayo nga kabahin sa mahinungdanon nga buhat diin maoy atong giatubang nga kini kanunay naghupot sa gihunahuna, ug kita matinguhaon kaayo sa paghatag niini sa tanan nga angay nga kapanguhaan ug impluwensya” (BYL).

Mga Pagtulun-an ni Brigham Young

Ang mga katawhan sa Dios naningkamot sa pagtukod sa gingharian sa Dios.

Ang mga katawhan nga naglingkod sa akong atubangan, kauban sa daghang liboan nga anaa sa yuta, mao ang mga katawhan sa Dios. … Kon kita makahimo ingon ka kusog sa pagpaambit sa hustong paagi sa mga baruganan sa gahum, sa kahayag, sa kahibalo, sa kaalam, sa bahandi, sa langit, ug sa yuta, ingon usab ka kusog kini itugyan diha niini nga mga katawhan (DBY, 438).

Gikan niini nga Simbahan motubo ang Gingharian nga nakita ni Daniel. Mao kini ang katawhan nga nakita ni Daniel nga magpadayon sa pagtubo ug mokatap ug mouswag [tan-awa sa Daniel 2:44]; ug kon kita dili matinudanon, ang uban mopuli kanato sa atong mga dapit, kay kini mao ang Simbahan ug ang katawhan makaangkon sa Gingharian hangtud sa kahangturan (DBY, 438).

Ang atong buhat mao ang pagtukod sa Zion, ug himoon ang gingharian sa Dios sa iyang kahingpitan ug katahum dinhi sa yuta (DBY, 443).

Ang Gingharian nga atong gihisgutan, gisangyaw ug gipaningkamutan nga tukuron mao ang Gingharian sa Dios sa yuta, dili sa kalangitan nga puno sa kabitoonan, ni diha sa adlaw. Naningkamot kita sa pagpahimutang sa Gingharian sa Dios dinhi sa yuta diin sa tinuod ug sa tukma nga ang tanan may kalabutan ngadto sa mga katawhan—ang ilang mga pagbati, ang ilang hugot nga pagtuo, ang ilang mga kasuod, ang ilang mga tinguha, ug ang matag binuhatan sa ilang mga kinabuhi—aron sila magiyahan niini sa espirituhanon ug sa temporal nga paagi (DBY, 339).

Kon ang Gingharian sa Dios hingpit nga matukod ug mapahimutang sa ibabaw sa yuta, ug mabantog sa tanang mga kanasuran ug mga gingharian, kini manalipod sa mga katawhan sa pagtagamtam sa ilang tanang mga katungod, bisan unsa ang ilang gituohan, bisan unsa pa ang ilang gisangyaw, o bisan unsa ang ilang gisimba (DBY, 440).

Akong nahibaloan sa milabay nga mga katuigan nga ang Ginoo mobarug sa may timon nga mogiya sa barko sa Zion. … Gawas kon kita tukmang molihok sa unsay gimando sa Ginoo, ang atong mga buhat makawang. Mao kini ang akong kasinatian gikan pa sa sinugdanan. Sa matag direksyon ug dalan sa atong mga kinabuhi kinahanglang makakat-on kita sa pagsunod sa kamatuoran. Kinahanglang makahibalo kita unsay angay buhaton, ug dayon buhaton kini. Bisan og walay yutan-ong kalampusan sa pagbuhat niini, kita sa tinuod makasulay; ug kon kita maningkamot sa tibuok kusog, kana nga lihok sa labing kubos nagpakita og matinuoron ug hugot nga hunahuna, nga gidayandayanan og pailub ug paglahutay. Ug kon, sa atong tanan nga matinuoron nga mga paningkamot dili gihapon kita makatuman sa atong katuyoan, ang Ginoo molugway sa iyang mga kamot ug mohatag sa kadaugan (DBY, 441).

Kon kini nga mga katawhan mosunod sa mga baruganan nga ilang gidawat, sila makahimo sa pagtambag sa mga nasud; kay kita nagtukod og makiangayon nga pundasyon, ug ang atong mga baruganan mao ang kamatuoran, pagkamatarung, ug pagkabalaan. Mobarug kita niadtong mga baruganan hangtud nga kini modugmok sa sala, … ug kita mahimong mga magtutudlo sa kaalam ngadto sa mga nasud (DBY, 441).

Unsa ang katapusan nga resulta sa pagpahiuli sa Ebanghelyo, ug ang padulngan sa mga Santos sa Ulahing mga Adlaw? Kon sila matinud-anon ngadto sa Priesthood nga gihatag sa Dios kanato, ang Ebanghelyo mousab sa tibuok kalibutan sa mga katawhan; ang yuta pagabalaanon, ug ang Dios mohimaya niini, ug ang mga Santos mopuyo niini diha sa presensya sa Amahan ug sa Anak (DBY, 438).

Ang buhat sa gingharian sa Dios naglakip sa pagpundok sa balay sa Israel.

Kita adunay katuyoan, ug kana mao ang pag-angkon og impluwensya sa tanang mga lumulupyo sa yuta alang sa katuyoan sa pagpahimutang sa Gingharian sa Dios sa iyang pagkamatarung, gahum ug kahimayaan, ug sa paghimaya sa pangalan sa Dios, ug paghimo niana nga pangalan nga atong gipanglungtad nga tahuron bisan asa aron siya mapasidunggan, nga ang iyang mga buhat mapasidunggan, nga kita mapasidunggan sa atong mga kaugalingon, ug maghupot sa atong mga kaugalinon nga takus sa kinaiya sa iyang mga anak (DBY, 438–39).

Kita motukod … sa Zion, mopundok sa Balay ni Israel, ug motubos sa mga nasud sa yuta [tan-awa sa D&P 115:4–6]. Kini nga mga katawhan adunay buluhaton nga himoon, bisan og kita mabuhi sa pagtan-aw niini o dili. Kining tanan anaa sa atong mga kamot (DBY, 437).

Kini gikinahanglan ngari kanato ang pagsiguro nga gisangyaw ngadto sa Balay sa Israel ang Ebanghelyo (DBY, 437).

Kita karon [1863] nagpundok sa mga anak ni Abraham kinsa nagagikan sa mga kaliwat ni Joseph ug sa iyang mga anak nga lalaki, ilabi na pinaagi ni Ephraim, kansang mga anak nasagol sa tanang mga nasud sa yuta (DBY, 437).

Kinsa ang Israel? Sila kadtong kinsa gitawag nga kaliwat ni Abraham, kinsa nakadawat sa saad pinaagi sa ilang mga katigulangan [tan-awa sa Genesis 22:17–18]; ug ang tanang nahibilin sa mga katawhan, kinsa nakadawat sa kamatuoran, mga Israel usab. Ang akong kasingkasing kanunay nga mibati kanila, kon ako moadto sa trono sa grasya (DBY, 437).

Ang Israel nagkatibulaag sa tanang mga nasud sa yuta; ang dugo ni Ephraim nasagol sa dugo sa tibuok yuta. Ang kaliwat ni Abraham nasagol sa masinupakon nga kaliwat sa tibuok kalibutan sa mga katawhan (DBY, 437).

Kadtong mga taga-isla [sa Pasipiko] ug ang mga lumad sa [Amerika] gikan sa Balay ni Israel—gikan sa kaliwat ni Abraham, ug ngadto kanila nga may kalabutan sa saad; ug sa ilang matag kalag, sa madugay ug sa madali, maluwas ngadto sa Gingharian sa Dios, o malaglag sa hingpit (DBY, 437).

Sa pag-angkon ug pagpabilin sa espiritu sa Ebanghelyo, pagpundok sa Israel, pagtubos sa Zion, ug pagluwas sa kalibutan kinahanglang atimanon og una ug labaw sa tanan, ug kinahanglan mao ang magpatigbabaw nga tinguha diha sa mga kasingkasing sa Unang Kapangulohan, sa mga Elder sa Israel, ug sa matag opisyal sa Simbahan ug Gingharian sa Dios. (DBY, 137).

Ang gingharian sa Dios dili mahimong laglagon.

Ang Dios misugod sa pagtukod sa iyang gingharian sa yuta, ug ang tibuok impyerno ug mga yawa nakigbatok niini. Ang impyerno nangabli sa iyang pultahan ug mipadala sa iyang mga yawa ug sa ilang mga dautan. Alang sa unsa? Sa paglaglag sa gingharian sa Dios gikan sa yuta. Apan dili sila makahimo niini (DBY, 442).

Kon adunay mga kasingkasing o mga espiritu niini nga siyudad, o bisan asa, mahadlokon nga naghunahuna kon malaglag ba kita o dili, o kini ba nga Simbahan molahutay ug mahimong gamhanan kaayo dinhi sa yuta, sumala sa mga panagna sa mga sulugoon sa Dios, ako moingon sa tanan nga mahadlokon nga mga kalag, kamo dili angay nga maghunahuna sa maong kahadok. Adunay usa lamang nga angay ninyong kahadlokan, ug kana mao ang kabahin sa inyong mga kaugalingon, basin og kamo mobiya sa kahayag nga gihatag sa Ginoo kaninyo ug maglatagaw ngadto sa kangitngit, mobalik ngadto sa pagkadautan sa kalibutan, magtinguha pag-usab sa mga butang sa kalibutan sa ilang makasasala nga kahimtang (DBY, 442).

Kon ang dautan adunay gahum sa pagpahunong sa pagsidlak sa adlaw, nga kini dili na mohayag; kon sila adunay gahum sa pagpahunong sa pagpalakat sa mga elemento, mopahunong sa tibuok sistema sa kinaiyahan, ug himoong tumbanan ang trono sa Makagagahum, dayon sila maghunahuna sa pagsusi sa “Mormonismo” sa pamaagi niini, ug pagsanta sa dili mausab nga mga katuyoan sa langit [tan-awa sa D&P 121:33]. Ang mga tawo mahimong mogukod sa mga tawo nga nagtuo sa mga doktrina niini, moreport ug momantala og bakak aron mopahamtang og kalisdanan diha kanila, ang yuta ug impyerno mahimong magkahiusa sa pagpakigbatok niini, ug mogamit sa ilang dautang gahum sa hilabihan, apan kini mobarug nga lig-on ug dili matarug taliwala sa tanan isip mga haligi sa kahangturan. Ang mga tawo mahimong mogukod sa Propeta, ug niadtong motuo ug mopaluyo kaniya, mahimong abugon nila ang mga Santos ug patyon sila, apan kini dili makaapekto sa mga kamatuoran sa “Mormonismo” bisan sa labing gamay, kay kini magpadayon sa panahon nga ang mga elemento matunaw uban sa hilabihan nga kainit, ug ang yuta kinahanglan usahon pagputos ingon sa usa ka papel-linukot, ug ang kalangitan ug ang yuta mahanaw [tan-awa sa Isaias 34:4; D&P 88:95] (DBY, 442–43).

Nianang walay mahimo nga masuso diha sa dughan sa inahan atong makita ang usa ka tawo, usa ka Apostol, usa ka Santos—oo, henerasyon sa mga tawo sa mga gingharian, mga trono, ug mga ginsakupan. Busa ang kinabuhi nianang gamay nga huyang nga mortal mapuno sa dako ug gamhanan nga mga resulta, ug ang bili niini dili mabanabana. Kon tinuod kini sa usa ka masuso, unsa ang atong mapaabut gikan niining nagsugod pa nga Gingharian? Magpaabut kita sa tanan nga maapil sa kabantog ug kaayo, sa kusog ug gahum, sa ginsakupan ug himaya. Niana kinahanglang magbinatayon kita sa mga katungod niining nagsugod pa nga gingharian? Kinahanglang magmadasigon ug nmagmakanunayon kita sa pagpadayon sa mga tinguha niini ug sa pagsuporta sa mga balaod ug sagrado nga mga institusyon! (DBY, 439).

Ang akong kasingkasing nahupay. Akong nakita ang katawhan sa Dios, nga sila gigukod, gisalikway, giabug gikan sa yuta. Ang mga gahum sa yuta ug impyerno naningkamot sa paglaglag niini nga Gingharian gikan sa yuta. Ang mga dautan nagmalampuson sa pagbuhat sa ingon sa miaging mga panahon; apan kini nga Gingharian dili sila makalaglag (DBY, 442).

“Ang Gingharian sa Dios o Wala.”

Ang Gingharian sa Dios mao ang tanan nga adunay tinuod nga bili [tanawa sa Mateo 6:33]. Ang laing mga butang dili angay nga angkunon, dinhi o sa umaabut. Kon wala kini, ang tanan sama sa uga nga kahoy nga andam nga sunugon—maugdaw ug ang mga abo mapalid sa upat ka mga hangin(DBY, 444).

Ngari kanako ang Gingharian sa Dios o wala bisan unsa dinhi sa yuta. Kon wala kini dili ako mohatag bisan gamay alang sa bahandi, himaya, kabantog ug gahum sa tibuok kalibutan; kay sama sa yamog sa sagbot, mawala kini ug makalimtan, ug sama sa bulak sa tanum kini malaya, ug wala na. Ang kamatayon mopatupong sa labing gamhanang hari uban sa labing pobre nga makililimos; ug ang duha kinahanglang mobarug sa atubangan sa hukmanan ni Kristo aron motubag sa mga binuhatan nga gihimo sa lawas [tan-awa sa Pinadayag 20:12] (DBY, 444–45).

Alang kanako, kini mao ang Gingharian sa Dios, o wala bisan unsa, ug kita mopadayon niini, o mamatay sa pagpaningkamot—bisan tuod dili kita mamatay sa pagpaningkamot. Makapahupay sa kadaghanan nga makasiguro nga kita dili mamatay sa pagpaningkamot, apan mabuhi sa pagpaningkamot. Atong ipadayon ang Gingharian sa Dios, ipalungtad, ug kon kita dili mopadayon niini, kita makit-an nga himatyon dili lamang sa temporal, apan usab sa mahangturong kamatayon. Busa lihok aron mabuhi (DBY, 445).

Kon kamo mohatag og bisan unsa alang sa pagtukod sa Gingharian sa Dios, ihatag ang inyong labing maayo. Unsa ang labing maayo nga inyong ikahalad ngadto sa Gingharian sa Dios? Mao kini ang mga talento nga gihatag sa Dios kaninyo. Pila man? Ang tanan. Pagkanindot nga mga talento! Pagkanindot nga gasa! … Atong ihalad ang tanang abilidad nga ania kanato sa pagtukod sa Gingharian sa Dios, ug kamo makatuman sa tanan niini (DBY, 445).

Mga Sugyot alang sa Pagtuon

Ang mga katawhan sa Dios naningkamot sa pagtukod sa gingharian sa Dios.

Unsay inyong bation, nga nakahibalo nga isip miyembro sa Simbahan kamo kabahin sa paningkamot sa pagtukod sa gingharian sa Dios dinhi sa yuta? Unsa nga mga responsibilidad ang anaa niini? Unsa nga mga panalangin ang moabut kon ang gingharian sa Dios hingpit na nga mapahimutang dinhi sa yuta?
Unsaon nato sa pagsiguro nga ang atong mga lihok “tukma sa unsay gimando” sa Ginoo? Unsay mahitabo kon kita mobuhat niini?
Sa unsa nga paagi nga ang mga miyembro sa Simbahan mahimong “mga magtutudlo sa kaalam ngadto sa mga nasud” sa indibidwal o sa tanan?
Unsa ang “padulngan sa mga Santos sa Ulahing mga Adlaw” kon kita magmatinud-anon?

Ang buhat sa gingharian sa Dios naglakip sa pagpundok sa balay sa Israel.

Unsaon nato sa “paghupot sa atong mga kaugalingon nga takus” sa atong pagkabutang isip mga anak sa Dios? Sa unsa nga paagi nga ang atong mga lihok makahatag og dungog ug balaan nga pagtahud ngadto sa Ginoo ug sa Iyang mga buhat?
Kinsa ang sakop sa balay sa Israel? Unsaon ninyo pag-apil sa pagpundok sa balay sa Israel?

Ang gingharian sa Dios dili mahimong laglagon.

Unsa nga ebidensya ang inyong makita nga si Satanas ug ang iyang mga sumusunod naningkamot gayud sa paglaglag sa gingharian sa Dios karon? Unsaon nato sa pagpalig-on ang atong mga pamilya sa pagpakigbatok sa ilang mga buhat? Sa unsa nga paagi nga ang kahibalo nga ang gingharian sa Dios dili mahimong laglagon makahatag kanato og kaligon sa pagpakigbatok sa mga tintasyon ug makalahutay sa mga pagsulay?
Sumala ni Presidente Young, unsa nga kahadlok ang angay natong kabalak-an sa atong mga kaugalingon isip mga miyembro sa Simbahan? Unsa ang atong mabuhat sa pagsiguro nga kini nga kahadlok dili moabut? Sa unsa nga paagi nga ang inyong hugot nga pagtuo sa Dios ug sa inyong pagtuon sa ebanghelyo makatabang kaninyo nga mawala ang inyong ubang mga kahadlok.

“Kini ang Gingharian sa Dios o Wala.”

Ngano sa inyong hunahuna si Presidente Young miingon nga ang gingharian sa Dios mao ang bugtong butang nga angay nga angkunon? Unsa ang gipasabut nganha kaninyo sa “Gingharian sa Dios o wala bisan unsa”?
Unsa nga mga talento o mga gasa nga andam ninyong ihalad sa pagtukod sa gingharian sa Dios?

Salt Lake Temple in 1892 — Litrato sa Templo sa Salt Lake niadtong 1892. Kini nga templo nagbarug isip monumento sa hugot nga pagtuo ug pasalig sa unang mga Santos.