Ang Plano sa Kaluwasan

Isip usa ka propeta ug magtutudlo sa plano sa kaluwasan, si Presidente Brigham Young mitudlo nga ang “tumong ug tuyo [sa] Makagagahum nga Tigmando” (DBY, 49) mao ang paghimo nga posible alang sa Iyang mga anak nga makatagamtam og mahangturong kalipay. Sumala niining mahinungdanong “plano sa kalipay” [Alma 42:16], isip mga anak sa Dios kita nagpuyo sa Iyang presensya sa wala pa kita moanhi sa pagka-mortal, diin kita gihatagan og kahigayunan nga makaangkon og mga tabernakulo ug sa pagpili sa pagsunod sa mga kasugoan sa Dios. Sumala sa atong pagkamatinud-anon, si Jesukristo modala kanato ngadto sa usa ka gingharian sa himaya.

Mga Pagtulun-an ni Brigham Young

Buot ang Dios nga kita molambo sa kahayag, kamatuoran, ug kalipay.

Kini nga kinabuhi nga inyo ug akong naangkon maoy alang sa kahangturan. Palandonga ang ideya nga napanalanginan ang mga buhi sa tanang gahum ug mga salabutan nga atong naangkon, nahimong nahanaw, namatay, nawala, ug dayon sulayi sa pagpahiuyon kini sa atong mga pagbati ug sa mga kinabuhi karon. Walay intelehente nga tawo ang makabuhat niana. Apan pinaagi lamang sa Espiritu sa pagpadayag nga kita makasabut niining mga butanga [tan-awa sa 1 Mga Taga-Corinto 2:11]. Pinaagi sa mga pagpadayag ni Ginoong Jesus kita makasabut sa mga butang kon unsa kini kaniadto, nga gipahibalo ngari kanato; mga butang nga ania sa kinabuhi nga karon atong gitagamtam, ug mga butang sa umaabut [tan-awa sa D&P 93:24], dili sa kinahingpitan, apan ang tanan nga giplano sa Ginoo nga kinahanglan natong masabtan, nga aron kini makaayo ngari kanato, aron makahatag kanato og kasinatian nga gikinahanglan niini nga kinabuhi aron sa pag-andam kanato nga makatagamtam og kinabuhing dayon human dinhi (DBY, 47).

Kon kita makasabut sa tinuod nga pangatarungan sama sa pagsabut sa atong kaugalingong paglalang, ug alang sa unsa kini—unsa ang tumong ug tuyo sa Makagagahum nga Tigmando sa pag-organisar og butang lawasnon [matter] ug paghimo niini sa kahimtang nga akong nakita kaninyo karon, atong nasabtan nga ang butang lawasnon dili mawagtang—nga kini mahimong han-ayon ug bungkagon; ug makasabut nga ang butang lawasnon mahimong han-ayon ug makahimo og salabutan, ug makaangkon og dugang salabutan ug magpadayon nga madugangan kana nga salabutan; ug makakat-on niadtong mga baruganan nga mi-organisar sa butang lawasnon ngadto sa mga hayop, mga utanon ug ngadto sa maalamon nga mga binuhat; ug makaila sa Pagkabalaan nga nagbuhat, nagpalihok, ug nagpakaylap sa mga baruganan ngadto sa butang lawasnon aron makahimo og maalamon nga mga binuhat ug sa paghimaya kanila—ngadto sa unsa? Kalipay. Aduna bay mas ubos pa niana nga hingpit nga motagbaw sa mga espiritu nga ania kanato? Wala [tan-awa sa D&P 131:7] (DBY 49).

Kita mao ang mga anak nga espiritu sa Dios.

Walay tawo nga adunay gahum sa pag-organisar sa iyang kaugalingong kinabuhi. Busa adunay mas gamhanan pa kanato. Ato ba ang atong kaugalingong mga lawas? Ato ba ang atong kaugalingong mga espiritu? Dili kita ang tag-iya. Iya kita sa atong mga gigikanan—sa atong Amahan ug atong Dios [tan-awa sa Mga Buhat 17:29] (DBY, 50).

Ang mga butang unang gilalang sa espirituhanon nga paagi; ang Amahan sa tinud-anay maoy amahan sa mga espiritu [tan-awa sa D&P 76:24], ug sila gidala ug nagpuyo uban kaniya. Dayon misugod siya sa pagbuhat og yutanong mga tabernakulo, sama gayud sa iyang pagkalalang sa unod sa iyang kaugalingon, pinaagi sa paggamit sa yanong materyal nga na-organisar ug naglangkob niini nga yuta, … tungod niana ang mga tabernakulo sa iyang mga anak gi-organisar gikan sa yanong mga materyal niini nga yuta (DBY, 50).

Nakadungog ako nga ang inila nga si Mr. [Henry Ward] Beecher, sa Brooklyn, sa makausa miingon nga ang labing alaot nga mahitabo sa tawo mao ang pagpakatawo; apan ako moingon nga ang labing maayong nahitabo sukad o mahitabo sa mga tawo mao ang pagpakatawo dinhi niini nga yuta, kay ang kinabuhi ug kaluwasan andam nganha kanila; dayon sila adunay kahigayunan sa pagbuntog sa kamatayon, ug sa pagbuntog sa sala ug kadautan, sa paggamit diha sa ilang inadlaw nga mga kinabuhi sa matag baruganan sa kinabuhi ug kaluwasan ug sa pagpuyo sa kahangturan uban sa mga Dios (DBY, 51).

Ang mga espiritu nga nagpuyo niini nga mga tabernakulo sama ka putli sa kalangitan, sa dihang kini misulod kanila. Misulod sila sa tabernakulo nga nahugawan, kalabut sa unod, tungod sa pagkapukan sa tawo. Ang Salmista miingon, “Ania karon, ako natawo sa kasal-anan; ug sa sala gipanamkon ako sa akong inahan” [Salmo 51:5]. Kini nga Kasulatan nagbutang diha sa mga hunahuna sa pipila sa doktrina sa hingpit nga kangil-ad—nga kini imposible alang kanila nga makabaton og maayong hunahuna, nga silang tanan makasasala, nga walay maayo, walay katarung, ug walay espirituhanong kahimsug diha kanila. Dili kini husto, apan adunay panagbugno sulod sa atong mga kaugalingon. Kinahanglang makigbatok kita sa dautan nga mga pagbati, o sa binhi sa kadautan nga anaa sa unod tungod sa pagkapukan. Ang putli nga mga espiritu nga ania niining mga tabernakulo giimpluwensyahan, ug kini katungod sa nagpadala kanila ngadto niini nga mga tabernakulo nga magpabiling mahinungdanon, ug sa kanunay mohatag sa Espiritu sa kamatuoran sa pag-impluwensya sa mga espiritu sa mga tawo, aron kini magmadaugon ug maoy labing dakong impluwensya sa atong mga tabernakulo, ang Dios ug ang Ginoo sa matag lihok niini (DBY, 51–52).

Gawasnon kita sa pagpili og maayo ibabaw sa dautan, kahimayaan ibabaw sa kaalautan.

[Ang Amahan nangutana,] “Kinsa ang motubos sa yuta, kinsa ang moadto ug mohimo sa sakripisyo alang sa yuta ug sa tanang mga butang nga anaa niini?” Ang Kinamagulangan nga Anak nga Lalaki miingon: “Ania ako”; ug dayon midugang siya, “Ipadala ako.” Apan ang ikaduha, nga si “Lucifer, ang Anak sa Kabuntagon,” miingon, “Ginoo, ania ako, ipadala ako, ug ako motubos sa tanan nga mga anak ni Adan ug Eva nga nagpuyo sa yuta, o nga mopuyo pa sa yuta.” “Apan,” ang Amahan miingon, “kana walay kapuslanan. Ako mihatag sa matag usa ug matag indibidwal sa iyang kabubut-on; ang tanan kinahanglang mogamit niana aron makaangkon og kahimayaan sa akong gingharian; tungod kay sila adunay gahum sa pagpili kinahanglan ilang gamiton kana nga gahum. Sila akong mga anak; ang mga hiyas nga inyong nakita nga ania kanako anaa sa akong mga anak ug kinahanglan ilang gamiton ang ilang kabubut-on. Kon inyong tinguhaon ang pagluwas sa tanan, inyong maluwas sila diha sa kahimtang sa pagkadili matarung ug sa pagkadautan” [tan-awa sa Abraham 3:23–28; Moises 4:1–4] (DBY, 53–54).

Sa dihang adunay gubat sa langit, ang hingpit nga paghukom gihimo nga latid ug ang pagkamatarung mao ang pamato, ug ang mga dautan gisalikway (DBY, 54).

Ang Ginoo nga Makagagahum miantus niini nga panagbangi sa langit aron makita kon unsa ang buhaton sa iyang mga tawo sa pagpangandam sa ilang pag-anhi sa yuta (DBY, 54).

Apan sila [ang masinupakon nga mga espiritu] kinahanglang mobiya gikan sa langit, dili sila makapuyo didto, kinahanglan silang ipadala nganhi sa yuta aron sa pagtintal sa mga katawhan, ug sa paghimo sa ilang buluhaton sa paghatag og kaatbang sa tanang mga butang, aron ang mga lumulupyo sa yuta adunay kahigayunan sa pagpalambo sa salabutan nga gihatag nganha kanila, ang kahigayunan sa pagbuntog sa dautan, ug sa pagkat-on sa mga baruganan nga nagdumala sa kahangturan, nga sila mahimong mahimaya diha niana (DBY, 54).

Dili ikaw makahatag ni bisan kinsa nga mga tawo sa ilang kahimayaan gawas kon sila makahibalo kon unsa ang dautan, unsa ang sala, kasubo, ug kaalautan, kay walay bisan kinsa nga mga tawo nga makasabut, makapasalamat ug makatagamtam og kahimayaan sa bisan unsa nga laing baruganan (DBY, 55).

Nagtuo ba kamo nga ang Ginoo nagtan-aw sa daghan kaayong mga tawo? … Wala ako magtuo nga adunay si bisan kinsa karon sa yuta, nga nag-una kanato, o mosunod kanato, nga wala niya mailhi. Nakaila siya kon si kinsa ang iyang dinihogan; nagtan-aw siya kanila sa tanang higayon, sama sa iyang gibuhat kang Moises, Paraon, Abraham, Melchizedek, ug Noe, kinsa pinili nga tawo sa pagbuhat sa arka ug miluwas sa mga tawo gikan sa lunop (DBY, 55).

Usa ka sayop nga ideya nga ang Dios nagmando sa bisan unsay nahinabo sa tanang mga butang, kay ang pagpili sa matag tawo gawasnon sama sa ka gawasnon sa hangin. Mangutana kamo kon nagtuo ba kita sa pagka-orden nang daan; nagtuo kita, ingon ka hugot ni bisan kinsa nga tawo sa kalibutan. Kita nagtuo nga si Jesus gi-orden nang daan sa wala pa matukod ang mga pundasyon sa kalibutan, ug ang iyang misyon gihatag na kaniya didto sa kahangturan nga mahimong Manluluwas sa kalibutan, apan sa dihang mianhi siya sa unod gipasagdan siya sa pagpili o pagdumili sa pagsunod sa iyang Amahan. Kon nagdumili pa siya sa pagsunod sa iyang Amahan, nahimo unta siyang anak sa kapildihan. Gawasnon usab kita sa pagpili o pagdumili sa mga baruganan sa kinabuhing dayon. Ang Dios mimando ug mi-orden nang daan sa daghang mga butang nga milabay, ug siya magpadayon sa pagbuhat sa ingon; apan kon mohatag siya og dakong mga panalangin diha sa usa ka nasud o diha sa indibidwal kini ihatag sa piho nga mga kondisyon. Kon siya momando og dagkong mga katalagman ug mangilngig nga mga kadaot diha sa mga nasud o sa mga katawhan, kadto nga mga mando mahitabo tungod kay kadto nga mga nasud ug mga katawhan dili mobiya sa ilang pagkadautan ug mobalik ngadto sa Ginoo. Gikatakda nga ang Nineve pagalaglagon sa kwarenta ka adlaw, apan ang mando wala madayon tungod sa paghinulsol sa mga lumulupyo sa Nineve. Ang Dios nagmando ug naghari, ug naghimo sa iyang tanang mga anak nga gawasnon sama sa iyang kaugalingon, sa pagpili sa husto o sa sayop, ug dayon kita pagahukman sumala sa atong mga binuhatan (DBY, 55).

Sumala sa atong pagkamatinud-anon, si Jesukirsto modala kanato ngadto sa usa ka gingharian sa himaya.

Mao kini ang plano sa kaluwasan. Si Jesus dili gayud mohunong sa iyang buhat hangtud ang tanan makaangkon og usa ka gingharian diha sa mga mansyon sa iyang Amahan, diin adunay daghang mga gingharian ug daghang mga himaya, sa pagpahaum sa mga buhat ug sa pagkamatinud-anon sa tanang mga tawo nga nagpuyo sa yuta. Ang uban mosunod sa celestial nga balaod ug makadawat sa iyang himaya, ang uban mosunod sa terrestrial ug ang uban walay madawat nga himaya (DBY, 56).

Minilyon ka [mga tawo] ang nangamatay, diha sa Kristiyano ug hentil nga mga kalibutan, sama kamatinuoron, mahiyason ug matarung ni bisan kinsa nga karon buhi pa. Ang Kristiyanong kalibutan miingon nga sila nahisalaag; apan ang Ginoo moluwas kanila, o sa tanan kinsa modawat sa Ebanghelyo. Ang plano sa kaluwasan nga gipadayag ni Jesus, ug atong gisangyaw, moabut ngadto sa labing ubos ug labing alaot sa nawala nga kaliwatan ni Adan (DBY, 60–61).

Mga Sugyot alang sa Pagtuon

Buot ang Dios nga kita molambo sa kahayag, kamatuoran, ug kalipay.

Unsaon nato sa pagkahibalo nga ang “kinabuhi nga inyo ug akong naangkon maoy alang sa kahangturan”? Unsa ang ikahatag nga kalainan nganha kaninyo nga makahibalo nga ang kinabuhi mahangturon?
Unsa ang “tumong ug tuyo” sa Dios sa pag-organisar sa kalibutan?
Si Presidente Young mitudlo nga ang pinakamahinungdanon nga katuyoan sa kinabuhi mao “ang pag-angkon og dugang salabutan ug magpadayon nga madugangan kana nga salabutan.” Unsa ang relasyon tali sa pagdugang og salabutan, o kahayag ug kamatuoran (tan-awa sa D&P 93:36; 130:19), ug pag-agkon og mahangturong kalipay? Sa unsang paagiha nga kini tinuod diha sa inyong kaugalingong kinabuhi?

Kita mga anak nga espiritu sa Dios.

Unsay inyong gibati nga nakahibalo nga kamo tinuod nga anak nga espiritu sa atong Langitnong Amahan? Unsa nga kalainan ang nahatag niini sa inyong kinabuhi?
Ngano nga ang “pagpakatawo dinhi niini nga yuta” ang labing maayong nahitabo nga … mahitabo sa mga tawo”? Basaha ug palandonga ang Doktrina ug mga Pakigsaad 93:33. Unsa nga mga panalangin ang may kalabutan sa inyong espiritu ug lawas nga dili mabulag?
Sumala ni Presidente Young, unsa ang sangputanan sa Pagkapukan sa tawo? Unsay sayop nga paghukom sa ubang mga tawo mahitungod sa Pagkapukan? Unsa ang tahas sa Espiritu sa Kamatuoran sa “panagbugno sulod sa atong mga kaugalingon” tali sa maayo ug dautan? Unsaon nato sa paghimo sa Espiritu sa Kamatuoran nga gamhanang pwersa sa atong mga kinabuhi?

Gawasnon kita sa pagpili og maayo ibabaw sa dautan, kahimayaan ibabaw sa kaalautan.

Sumala ni Presidente Young, unsa ang tahas sa atong kabubut-on sa pagangkon og kahimayaan? Ngano nga ang Dios Amahan misalikway sa sugyot ni Lucifer alang sa matag usa kanato? (Tan-awa usab sa 2 Nephi 2:15–16.)
Ngano nga ang Ginoo mitugot sa “panagbangi didto sa langit”? Unsa ang “buluhaton” niadtong kinsa gisalikway gikan sa atubangan sa Amahan? Ngano nga kinahanglang adunay “kaatbang sa tanang mga butang”? Nganong kinahanglang makasabut kita kon “unsa ang dautan” ug kon “unsa ang sala, kasubo, ug kaalautan” aron makaangkon og kahimayaan? (Tan-awa usab sa 2 Nephi 2:11.)
Unsa ang inyong mahimo sa pagtuman sa kabubut-on sa Ginoo ug motubo ngadto sa gitas-on sa inyong kapasidad?
Sa unsa nga paagi nga ang Dios momando o mo-orden nang daan og piho nga mga hitabo ug sa gihapon pasagdan kita sa atong kagawasan sa pagpili?

Sumala sa atong pagkamatinud-anon, si Jesukirsto modala kanato ngadto sa gingharian sa himaya.

Kanus-a si Jesukristo mahuman sa trabaho sa pagluwas?
Pinaagi sa Pag-ula ni Kristo, ang tanan gawas sa mga anak sa kapildihan “dad-on ngadto sa kalipay sa usa ka gingharian diha sa mga mansyon sa iyang Amahan.” Si Presidente Young mipahayag usab nga adunay “daghang mga gingharian ug daghang mga himaya.” Nganong adunay daghang mga gingharian? Kinsa ang mohukom kon unsa nga gingharian ang adtoan sa usa ka tawo?
Sa unsa nga paagi nga ang Pag-ula sa Manluluwas “moabut ngadto sa labing ubos ug labing alaot” ingon man usab sa “matinuoron, mahiyason ug matarung?

Jesus teaching — Si Jesus dili gayud mohunong sa iyang buhat hangtud ang tanan makaangkon og usa ka gingharian diha sa mga mansyon sa iyang Amahan (*DBY*, 56).