Pagsunod sa Ebanghelyo

Isip bantugang tigpahimutang og panimuyo, lider sa lungsuranon ug sa Simbahan, ug tigsangkap sa iyang pamilya, si Presidente Young naghulagway sa buhi, mapuslanon nga ebanghelyo. Iyang gipasabut diha sa iyang mga pagtulun-an ug diha sa iyang kinabuhi nga ang ebanghelyo ni Jesukristo mao ang paagi sa kaluwasan alang sa katawhan ug usab “usa ka mapuslanon nga relihiyon, ug naglakip sa matag adlaw nga katungdanan ug mga panghitabo niini nga kinabuhi” (DBY, 12).

Mga Pagtulun-an ni Brigham Young

Ang atong personal nga pagtubo diha sa ebanghelyo moabut sa hinay-hinay ug sa ginagmay samtang kita magpuyo sa mga baruganan nga atong nakat-unan.

Kita … magkat-on sa tanang mga balaod, mga lagda, mga ordinansa ug mga regulasyon nga anaa sa mga Kasulatan ug mogamit niini kutob sa mahimo, ug magpadayon sa pagkat-on ug pagpalambo hangtud nga kita makapuyo sa matag pulong nga nagagikan sa ba-ba sa Dios (DBY, 3).

Kita adunay Ebanghelyo sa kinabuhi ug kaluwasan, sa paghimo sa dautan nga tawo nga maayo ug maayong tawo nga mas maayo (DBY, 6).

Sa panag-istoryahanay dili pa lang dugay sa usa ka bisita kinsa mopauli ngadto sa Silangang mga Estado, miingon siya, “Kamo, isip mga katawhan naghunahuna ba nga kamo hingpit?” “Wala;” mitubag ako, ‘wala sa bisan unsang paagi. … Ang doktrina nga among gidawat hingpit, apan kon bahin sa mga tawo, kami adunay daghang mga kakulangan nga imong mahinganlan. Dili kami hingpit; apan ang Ebanghelyo nga among gisangyaw gitumong sa paghimo nga hingpit sa mga tawo aron nga sila makaangkon og mahimayaong pagkabanhaw ug makasulod ngadto sa presensya sa Amahan ug sa Anak” (DBY, 7).

Ang katawhan [dili makadawat sa mga balaod] diha sa ilang bug-os nga kahingpitan; apan makadawat sila og gamay dinhi ug gamay didto, gamay karon ug gamay ugma, gamay pa sunod semana, ug gamay sa pagkasunod tuig, kon siya mohimo og maalamon nga kalamboan sa gamay nga ilang nadawat; kon sila dili, sila magpabilin sa kangitngit, ug ang kahayag nga gipadayag sa Ginoo ingon og mangitngit ngadto kanila, ug ang gingharian sa langit magpadayon ug mobiya kanila nga magkarapkarap. Mao nga, kon kita gusto nga molihok sa kahingpitan sa kahibalo nga gilaraw nga ipadayag sa Ginoo, sa hinay-hinay, ngadto sa mga lumulupyo sa yuta, kita kinahanglang mopalambo og gamay sa gipadayag (DBY, 4).

Ako … mibati nga moaghat sa mga Santos sa Ulahing mga Adlaw sa panginahanglan sa mabinantayong paggamit sa mga baruganan sa Ebanghelyo diha sa atong mga kinabuhi, kinaiya ug mga pulong ug sa tanan natong gibuhat; ug nagkinahanglan kini sa tibuok tawo, ang tibuok kinabuhi nga ihalad ngadto sa kalamboan aron moabut sa kahibalo sa kamatuoran ingon nga kini anaa ni Jesukristo. Dinhi ania ang bug-os nga kahingpitan. Kini gihulagway sa kinaiya sa atong Manluluwas; bisan og gamay lang nga bahin niini ang gipakita ngadto sa mga katawhan, agig sangputanan sa ilang wala pagkadawat niini. Ang tanan nga andam nilang madawat iyang gihatag kanila. Ang tanan nga andam natong madawat ihatag sa Ginoo; ang tanan nga andam nga madawat sa yuta iyang ihatag ngadto kanila (DBY, 11–12).

Kini nahisulat mahitungod sa Manluluwas diha sa Biblia nga Siya mipaubos sa tanang mga butang aron siya mopatigbabaw sa tanang mga butang. Dili ba usab kini mao sa matag tawo? Sa tinuod kini mao. Nan, angayan lamang nga kita magpaubos sa tanang mga butang ug mosaka sa hinayhinay, ug makat-on og gamay matag karon ug unya, modawat sa “sugo ibabaw sa sugo, lagda ibabaw sa lagda, dinhi diyutay ug didto diyutay” [tan-awa sa Isaias 28:9–10; D&P 98:12] (DBY, 60) hangtud nga moabut kita ngadto sa kahangturan ug modawat sa kahingpitan sa iyang himaya, kahalangdon ug gahum (DBY, 3).

Ang espirituhanon ug temporal nga mga bahin sa ebanghelyo usa ra.

Uban sa Dios, ug uban usab niadtong kinsa nakasabut sa mga baruganan sa kinabuhi ug kaluwasan, ang Priesthood, ang mga orakulo sa kamatuoran ug ang mga gasa ug ang mga pagtawag sa Dios ngadto sa mga katawhan, walay kalainan sa espirituhanon ug temporal nga mga paningkamot—ang tanan usa ra. Kon ako naghimo sa akong katungdanan, naghimo ako sa kabubut-on sa Dios, bisan og ako nagsangyaw; nag-ampo, nagtrabaho alang sa madungganong panginabuhian, bisan og ako anaa sa uma, sa talyer, o sa pagnegosyo, o bisan asa gitawag sa pagtrabaho, nagserbisyo ako sa Dios kutob sa mahimo diha sa usa ka lugar ingon man usab sa lain; ug ingon niini ang tanan, ang matag usa sa iyang lugar, turno ug panahon (DBY).

Diha sa hunahuna sa Dios wala kanang panagbulag sa espirituhanon gikan sa temporal, o temporal gikan sa espirituhanon; kay kini usa ra diha sa Ginoo [tan-awa sa D&P 29:34–35] (DBY, 13).

Ang bisan unsa nga may kalabutan sa pagtukod sa gingharian sa Ginoo dinhi sa yuta, pagsangyaw man kini sa Ebanghelyo o pagtukod sa mga templo ngadto sa iyang pangalan, kita gitudloan sa paghunahuna sa espirituhanong trabaho, bisan og kini tataw nga nagkinahanglan og kusog sa natural nga lawas sa pagbuhat niini (DBY, 13).

Dili gani kita makasulod sa templo kon kini gitukod na, ug mopahigayon niadtong mga ordinansa nga makahatag sa espirituhanong mga panalangin, nga wala maghimo sa temporal nga trabaho. Ang temporal nga mga ordinansa kinahanglang ipahigayon sa pagsiguro sa espirituhanong mga panalangin nga giandam sa labing Makagagahum alang sa iyang matinudanong mga anak. Ang matag lihok sa sinugdanan usa ka temporal nga lihok. Ang Apostol miingon, ang hugot nga pagtuo moabut [tan-awa sa Mga Taga-Roma 10:17]. Unsa ang kinahanglan nga madunggan aron makahatag og hugot nga pagtuo? Ang pagsangyaw sa Pulong. Tungod niana kita kinahanglan adunay usa ka magsasangyaw; ug siya dili usa ka espiritu nga dili makita, apan usa ka temporal, ordinaryo nga tawo sama sa atong mga kaugalingon, ug ubos sa samang regulasyon ug mga lagda sa kinabuhi. Ang pagsangyaw sa Ebanghelyo usa ka temporal nga trabaho, ug ang pagtuo diha kang Ginoong Jesukristo mao ang resulta sa temporal nga paningkamot. Ang pagbunyag usa ka temporal nga trabaho, ngadto sa tawo nga gipangalagaran ug sa tigpangalagad. Ako usa ka buhi nga saksi sa kamatuoran niini nga pamahayag, kay daghang mga higayon na nga misakit ang akong mga tiil, ug gikapoy ang akong kaugalingon tungod sa pagbiyahe ug pagsangyaw, nga pinaagi sa pagpaminaw sa Ebanghelyo ang mga tawo makabaton og hugot nga pagtuo. Ang mga panalangin nga atong gitinguha pag-ayo moabut kanato pinaagi sa paghimo sa gikinahanglan nga pagtrabaho, ug sa ingon nag-andam sa tanang mga butang nga gikinahanglan aron madawat ang dili makita nga mga panalangin ni Jehova alang sa iyang mga anak (DBY, 13–14).

Ang ebanghelyo usa ka giya alang sa inadlaw nga kinabuhi— usa ka mapuslanon nga relihiyon.

Ang relihiyon ni Jesukristo usa ka mapuslanon nga relihiyon, ug naglakip sa matag adlaw nga katungdanan ug mga panghitabo niini nga kinabuhi (DBY, 12).

Ang mga baruganan sa kahangturan ug mahangturong kahimayaan walay kapuslanan ngari kanato, gawas kon kini gipatakdo sa atong mga kapasidad aron kita makagamit niini sa atong mga kinabuhi (DBY, 14).

Akong gipahaum ang Ebanghelyo sa panahon karon, sa mga kahimtang ug sa kondisyon sa mga tawo (DBY, 8).

Kana nga sistema nga naghatag og seguridad ug kalinaw karon mao ang labing maayong paagi nga sundon, ug labing maayong paagi nga pakamatyan; kini ang labing maayong paagi sa pagnegosyo; kini ang labing maayong paagi sa pag-uma, sa pagtukod og mga siyudad ug mga templo, ug kana nga sistema mao ang balaod sa Dios. Apan kini nagkinahanglan og higpit nga pagkamasulundon. Ang balaod sa katarung, ug ang sumbanan nga gilatid sa Dios nga maoy sundon sa mga tawo makahatag og kalinaw, kahupayan, ug kalipay karon ug mahangturong himaya ug kahimayaan; apan ang dili pagsunod sa balaod sa Dios dili makahatag niini (DBY, 8).

Adunay higayon nga kon ako maghunahuna sa pagpamulong kaninyo, akong gibati nga ang higpit nga pagsermon sa mga hilisgutan kalabut sa dugay pa nga panahong moabut, o pagribyu sa milabay nga kasaysayan, sa walay pagduhaduha makapahimuot ug makapa-interesado pag-ayo sa usa ka bahin sa akong mga tigpaminaw; apan sa akong paghukom ug sa espiritu sa kaalam nga ania kanako nagtudlo nga, pinaagi sa pagbuhat sa ingon, ang mga tawo dili matudloan kalabut sa ilang matag adlaw nga mga katungdanan. Tungod niini nga katarungan, ako wala mobati sa pagtudlo kaninyo sa mga katungdanan nga himoon gatusan ka tuig gikan karon, apan sa paghatag hinoon sa mga panudlo kalabut sa karon, sa atong inadlaw ug matang sa kinabuhi, aron kita masayud unsaon nga mahatagan ang atong mga kaugalingon og kaayohan sa paglabay sa panahon, ug sa mga kahigayunan karon, ug makahimo sa pagpahimutang sa pundasyon alang sa umaabut nga kalipay (DBY, 12).

Ang akong misyon ngadto sa mga katawhan mao ang pagtudlo kanila mahitungod sa ilang inadlaw-adlaw nga mga kinabuhi. Ako nagtuo nga adunay daghan dinhi nga nakadungog kanako nga miingon, sa milabay nga mga katuigan, nga dili kaayo ako interesado kon unsay mahitabo human sa Milenyum. Ang mga Elder mahimong mosangyaw og taas nga mga diskurso mahitungod sa unsay nahitabo sa panahon ni Adan, unsay nahitabo sa wala pa ang paglalang, ug unsay mahitabo liboan ka tuig gikan karon, naghisgot sa mga butang nga nahitabo na o mahitabo pa, diin sila walay kahibalo, naghatag sa mga tawo og walay hinungdan; apan dili kana mao ang akong pamaagi sa pagtudlo. Ang akong tinguha mao ang pagtudlo sa katawhan unsay ilang kinahanglang buhaton karon, ug pasagdan ang Milenyum sa iyang kaugalingon. Ang pagtudlo kanila sa pagserbisyo sa Dios ug sa pagtukod sa Iyang Gingharian mao ang akong misyon. Mitudlo ako og hugot nga pagtuo, paghinulsol, bunyag alang sa kapasayloan sa mga sala, ug sa pagpandong sa mga kamot alang sa gasa sa Espiritu Santo. Kinahanglan tudloan kita mahitungod sa atong inadlaw-adlaw nga kinabuhi sa temporal nga punto sa pagsabut (DBY, 8–9).

Dili kita motugot sa atong mga kaugalingon nga moadto sa kaumahan aron sa pagdaro nga dili nato dad-on ang atong relihiyon uban kanato, dili kita moadto sa opisina, diha sa luyo sa counter aron mamaligya, ngadto sa naghupot sa mga libro sa panalapi, o bisan asa nga motambong o monegosyo og bisan unsa nga dili nato dad-on ang atong relihiyon uban kanato. Kon kita nagsakay og tren o nagbiyahe sa paglingaw-lingaw ang atong Dios ug ang atong relihiyon kinahanglang mag-uban kanato (DBY, 8).

Gusto nato nga madugangan ang kamaayo sa mga Santos, hangtud ang atong mekaniko, pananglit, matinuoron kaayo ug masaligan nga kining Railroad Company moingon, “Hatagi kami og ‘Mormon’ Elder nga enhinyero, niana walay angay kahadlokan nga mosakay, kay kon siya nasayud nga adunay kakuyaw iyang buhaton ang tanan sa pag-amping sa mga kinabuhi niadtong gisalig kaniya.” Gusto nakong makita ang atong mga Elder nga puno kaayo sa kaligdong nga sila pilion niini nga Kompaniya alang sa paghimo sa ilang makina, mga tigbantay, mga enhinyero, mga klerk, ug mga manedyer sa negosyo. Kon kita magsunod sa atong relihiyon ug takus sa pangalan nga mga Santos sa Ulahing mga Adlaw, kita gayud mao ang mga tawo nga kasaligan sa maong mga patigayon nga may hingpit nga kasiguroan; kon kini dili mao kini nagpakita nga kita wala magsunod sa atong relihiyon (DBY, 232–33).

Ang atong relihiyon naglangkob sa matag buhat ug pulong sa tawo. Walay tawo nga magnegosyo gawas kon buhaton niya kini diha sa Dios; walay tawo nga mag-uma o bisan unsang negosyo gawas kon gibuhat niya kini diha sa Ginoo. Walay tawo nga molingkod diha sa konseho nga mohukom sa mga tawo gawas kon siya mohukom pinaagi sa Ginoo, nga siya sa katarung ug sa walay pagdapig makasabut tali sa husto ug sayop, kamatuoran ug kasaypanan, kahayag ug kangitngit, hustisya ug walay hustisya (DBY, 9).

Sa mabinantayong pagbasa sa Daan ug Bag-ong Tugon atong madiskobrehan nga ang kadaghanan sa mga pagpadayag nga gihatag sa tawo sa karaan mao ang mahitungod sa ilang mga katungdanan; kita nagsunod sa samang dalan. Ang mga pagpadayag nga anaa sa Biblia ug sa Basahon ni Mormon mga ehemplo alang kanato, ug ang basahon nga Doktrina ug mga Pakigsaad naglakip og yano nga pagpadayag ngadto niini nga Simbahan; giya kini alang kanato, ug kita dili gusto nga ibaliwala kini, dili kita gusto nga mosalikway kanila; dili kita gusto nga mohimo niini nga dili na magamit ug mobaliwala niini. Gusto kitang magpadayon sa mga pagpadayag ni Ginoong Jesukristo kada adlaw, ug sa pagbaton sa iyang Espiritu uban kanato kanunay. Kon makahimo kita niini, dili na kita maglakaw sa kangitngit apan kita maglakaw diha sa kahayag sa kinabuhi (DBY, 12).

Kon kita buot nga magpahimulos sa Diwa sa Zion, kinahanglang magsunod kita niini. Ang atong relihiyon dili pulos lamang teyoriya; kini usa ka mapuslanon nga relihiyon; sa pagdala sa kalipay karon ngadto sa matag kasingkasing (DBY, 12).

Ang buhat sa pagtukod sa Zion sa matag kahimtang usa ka mapuslanon nga buhat; dili lamang kini usa ka teyorya. Ang teyoritikal nga relihiyon mosangpot sa gamay ra kaayo og kaayohan o bintaha ngadto ni bisan kinsa nga tawo. Ang pag-angkon og kabilin sa Zion o sa Jerusalem sa teyorya lamang—sa imahinasyon lamang—sama ra og walay kabilin. Gikinahanglan nga makaangkon og katungod sa kabilin, aron ang kabilin mahimong mapuslanon, lig-on ug makahatag og kaayohan. Busa dili kita magpabilin nga kontento sa teyoritikal lamang nga relihiyon, apan himoa kini nga mapuslanon, makalimpyo sa kaugalingon ug makatabang sa kaugalingon, maghupot sa gugma sa Dios diha kanato, maglakaw sa matag lagda, sa matag balaod, ug sa matag pulong nga gihatag aron sa paggiya kanato (DBY, 12).

Ug kon ako karon mobuhat sa unsay gitugyan ngari kanako nga himoon, ug dayon mobuhat nianang unsay nakita inig ka ugma, ug uban pa, kon ang kahangturan moabut ako maandam nga mosulod ngadto sa mga butang sa kahangturan. Apan ako dili maandam alang niana nga hut-ong sa paglihok, gawas kon ako makadumala sa mga butang nga karon anaa kanako. Kinahanglang makakat-on kamo sa pagbuhat niini (DBY), 11).

Ang tumong gayud sa atong pagpakatawo dinhi mao ang pagdumala sa temporal nga mga elemento niini nga kalibutan ug momando sa yuta, mopadaghan niadtong mga buhing butang sa mga tanum ug mga kahayupan nga gihimo sa Dios nga mopuyo niini (DBY, 15).

Ang kinabuhi mao ang unsay alang kanato, ug kini mao ang unsay alang kanato nga dawaton karon, ug dili maghulat sa Milenyum. Mohimo kita og paagi karon nga maluwas, ug, kon moabut ang kagabhion, ribyuha ang mga binuhatan nianang adlawa, maghinulsol sa atong mga sala, kon kita adunay angay nga hinulsulan, ug mohimo sa atong mga pag-ampo; dayon kita makahigda ug makatulog diha sa kalinaw hangtud sa kabuntagon, mobangon uban sa pasalamat ngadto sa Dios, magsugod sa mga buluhaton sa laing adlaw, ug maningkamot sa pagpuyo sa tibuok adlaw ngadto sa Dios ug wala nay lain (DBY, 16).

Ang responsibilidad sa pag-atiman sa atong mga kaugalingon ug sa atong mga pamilya usa ka importante nga mapuslanong paggamit sa ebanghelyo.

Naningkamot ako kanunay sa pag-awhag niining mga katawhan sa paghimo og paagi nga makapahimo kanila nga makabarug sa kaugalingon, makaatiman sa ilang kabus, sa bakol, sa kimpang ug sa buta, makasapwang sa walay kahibalo diin sila walay kahigayunan sa pagsunod sa mga pamaagi sa kalibutan, ug sa pagsabut sa kasagaran nga kahibalo nga gipanag-iya sa mga katawhan, magdala kanila og dungan gikan sa upat ka mga suok sa kalibutan, ug maghimo kanila nga may salabutan, daginutan ug makabarug sa kaugalingon nga mga katawhan (DBY, 16).

Ang akong pakigbugno mao, ug mao kini sulod na sa daghang mga katuigan, ang pagpasabut sa mga katawhan nga kon sila dili moatiman sa ilang mga kaugalingon sila dili atimanon; nga kon kita dili mopahimutang sa sukaranan sa pagpakaon ug sa pagsinina ug sa pagbuhat og kapuy-an sa atong mga kaugalingon mamatay kita sa kagutom ug katugnaw; mahimong mag-antus usab kita panahon sa ting-init gikan sa mga bidlisiw sa adlaw nga moigo sa atong hubo ug walay proteksyon nga mga lawas (DBY, 16–17).

Kinsa ang angayan sa pagdayeg? Ang mga tawo kinsa miatiman sa ilang mga kaugalingon o kadtong kinsa sa kanunay misalig sa dakong mga kalooy sa Ginoo sa pag-atiman kanila? Dili kita makapaabut sa Ginoo sa paghatag kanato og prutas kon wala kita mananom og mga kahoy; o nga kon kita dili modaro ug mopugas ug moani, kinahanglang mangayo kita sa Ginoo sa pagluwas kanato sa atong panginahanglan, sama sa pagluwas kanato gikan sa sangputanan sa atong kaugalingong kabuang, pagkamasinupakon ug pag-usik-usik (DBY, 293).

Kay sa mangita kon unsay mabuhat sa Ginoo alang kanato, mangutana kita unsay atong mabuhat alang sa atong mga kaugalingon (DBY, 293).

Samtang kita adunay tambok nga yuta niini nga walog, ug liso nga ikatanum, dili kinahanglan nga mohangyo kita sa Ginoo sa pagpakaon kanato, ni sa pagsunod-sunod kanato dala ang piraso sa pan nga naghangyo kanato nga kan-on kini. Siya dili mohimo niini, ni ako, kon ako pa ang Ginoo. Atong mapakaon ang atong mga kaugalingon dinhi, ug kon kita mabutang sa kahimtang diin kita dili makahimo, kini panahon na alang sa Ginoo sa paghimo og milagro aron kita mabuhi (DBY, 294).

Kon dili kamo makasangkap sa inyong kaugalingon nga mga kinabuhi, unsaon man ninyo sa pagpaabut nga makabaton og kaalam aron makaangkon og kinabuhing dayon? Ang Dios mihatag sa inyong kinabuhi—sa inyong lawas ug espiritu, ug mipanalangin kaninyo sa abilidad, ug sa ingon mipahimutang sa sukaranan sa tanang kahibalo, kaalam, ug pagsabut, ug sa tanang himaya ug mahangturong mga kinabuhi. Kon kamo wala makaangkon og abilidad sa pagsangkap alang sa inyong natural nga mga panginahanglan, ug alang sa usa ka asawa ug pipila mga anak, unsa may buhaton ninyo sa langitnong mga butang? (DBY, 13).

Tan-awa ang inyong mga kaugalingon isip mga Relief Society niini nga siyudad ug sa tibuok kabukiran. Tan-awa ang inyong kahimtang. Hunahunaa kini alang sa inyong mga kaugalingon, ug hukmi kon kamo moadto ba ug magkat-on sa impluwensya nga inyong gipanag-iya, ug dayon gamiton kana nga impluwensya sa pagbuhat og maayo ug sa paghupay sa kabus taliwala sa mga katawhan (DNW, 17 sa Ago. 1869, 3).

Mga Sugyot alang sa Pagtuon

Ang atong personal nga pagtubo diha sa ebanghelyo moabut sa hinay-hinay ug sa ginagmay samtang kita magpuyo sa mga baruganan nga atong nakat-unan.

Ngano nga ang Ginoo nagtudlo kanato sa mga kamatuoran sa ebanghelyo og “gamay karon ug gamay ugma”? (Tan-awa usab sa Isaias 28:9–10; 2 Nephi 28:30; D&P 98:12.) Unsay kinahanglan natong buhaton aron makadawat og mas dakong bahin sa mga kamatuoran sa ebanghelyo? (Tan-awa usab sa Alma 12:9–11.) Unsa kahay mahitabo kon kita hatagan og dugang kamatuoran kay sa andam natong dawaton?
Ngano nga ang pagsunod sa usa ka baruganan sa ebanghelyo usahay importante sa pagkat-on niana nga baruganan? (Tan-awa usab sa Juan 7:17; D&P 93:28.)
Sa unsa nga paagi nato gilimitahan ang unsay ikatudlo sa Dios kanato?

Ang espirituhanon ug temporal nga mga bahin sa ebanghelyo usa ra.

Si Presidente Young miingon nga “wala kanang panagbulag sa espirituhanon gikan sa temporal.” Sa unsa nga paagi nga ang pagsabut niana nga pamahayag makaapekto sa atong paghimo sa atong inadlaw nga mga buluhaton?

Ang ebanghelyo usa ka giya alang sa inadlaw nga kinabuhi— usa ka mapuslanon nga relihiyon.

Si Presidente Young mitudlo sa mga Santos sa paggamit sa mga baruganan sa ebanghelyo sa mapuslanon nga paagi sa ilang inadlaw nga mga kinabuhi. Sa unsa nga paagi nga ang ebanghelyo moimpluwensya sa atong mga desisyon mahitungod sa atong pamilya, panarbaho, ug sa ubang mga responsibilidad?
Unsa sa inyong hunahuna ang gipasabut ni Presidente Young sa dihang siya miingon nga kinahanglan nga dili kita moadto “bisan asa nga motambong o monegosyo og bisan unsa nga dili nato dad-on ang atong relihiyon uban kanato”? Sa unsa nga paagi nga atong madala ang atong relihiyon uban kanato bisan asa kita moadto ug sa gihapon sensitibo sa mga pagtuo sa uban? Unsaon nato nga kita mas makasalig sa Espiritu aron sa pagtabang kanato sa pagdala sa atong relihiyon uban kanato bisan asa kita moadto?
Dugang ngadto sa misyonaryo nga buhat ug sa pagserbisyo sa Simbahan, unsa ang atong responsibilidad sa komunidad?

Ang responsibilidad sa pag-atiman sa atong mga kaugalingon ug sa atong mga pamilya usa ka importante nga mapuslanong paggamit sa ebanghelyo.

Unsa ang gitudlo ni Presidente Young mahitungod sa atong responsibilidad sa pag-atiman sa atong mga kaugalingon? Sa unsa nga paagi kita mahimong maningkamot sa kaugalingon sa espirituhanon, edukasyon, pisikal, emosyonal, ug ekonomikanhong mga paagi? Unsaon nato pagtabang ang uban sa pagbuhat sa ingon?
Ngano nga ang pagpaningkamot sa kaugalinon usa ka importanting bahin sa ebanghelyo?
Si Presidente Young namulong kabahin sa hiyas ug sa panginahanglan sa pagsangkap alang sa atong mga kaugalingon. Unsa nga mga panalangin ang moabut sa atong mga kinabuhi samtang buhaton nato kini? Ubos sa unsa nga mga kahimtang nga gisulti ni Presidente Young nga ang Ginoo “mohimo og milagro aron sa pagtabang kanato”?