Ang mga Panalangin sa mga Pagsulay, Pagpanton, ug Pagpanggukod

Si Presidente Brigham Young nakasabut sa mahangturong mga katuyoan sa Dios, ug iyang gigamit kini nga pagsabut ngadto sa mga kalisdanan nga iyang nadawat ug sa mga Santos. Si Presidente Young miingon: “Daghan ang akong nadunggan nga naghisgot kon unsay ilang giantus tungod og alang Kristo. Ako malipay nga moingon nga sukad wala akoy gikasulti nga ingon niana. Nakapahimulos na ako og ubay-ubay, apan kon mahitungod sa pag-antus gitandi ko kini sa daghang mga higayon, sa akong mga pagbati ug sa atubangan sa mga kongregasyon, ngadto sa usa ka tawo nga nagsul-ob og daan, nagamit na pag-ayo, gision ug hugaw nga kupo, ug adunay miabut ug mihatag kaniya og bag-o, walay gisi ug maanindot. Mao kini ang akong pagtandi kon ako maghunahuna unsay akong giantus tungod sa Ebanghelyo—akong gilabay ang daan nga kupo ug misul-ob sa bag-o” (DBY, 348).

Mga Pagtulun-an ni Brigham Young

Ang Ginoo mosulay kanato aron makapakita sa atong mga kaugalingon nga angay sa celestial nga himaya.

Ang mga katawhan sa Labing Halangdon nga Dios kinahanglang pagasulayan. Gikasulat nga sila kinahanglang pagasulayan sa tanang mga butang, bisan si Abraham gisulayan [tan-awa sa D&P 101:1–14]. Kon kita gitawag sa pag-adto sa bukid sa Moriah aron sa pagsakripisyo sa atong pipila ka Isaac, dili kini igsapayan, mahimo natong buhaton kini sama sa uban. Sa akong pagtuo adunay mahimo alang sa mga Santos nga makasinati sa tanang mga pagsulay nga ilang gihandom og gitinguha. Karon kon kamo adunay kahayag sa Balaan nga Espiritu, kamo makakita og tataw nga ang mga pagsulay sa unod gikinahanglan sa pagkatinuod (DBY, 346).

Kita karon ania sa adlaw sa pagsulay aron sa pagmatuod sa atong mga kaugalingon nga takus o dili takus sa kinabuhi nga moabut (DBY, 345).

Ang tanang may salabutan nga mga binuhat kinsa koronahan sa mga korona sa himaya, pagka-imortal, ug kinabuhing dayon kinahanglang moagi sa matag mapait nga kasinatian nga gitakda nga agian alang sa may salabutan nga mga binuhat, aron makaangkon sa ilang himaya ug kahimayaan. Ang matag kalamidad nga moabut sa matag mortal nga mga binuhat pagaantuson nga moabut sa pipila, aron sa pag-andam kanila nga makapahimulos sa presensya sa Ginoo. Kon kita makaangkon sa himaya nga naangkon ni Abraham, kinahanglang atong buhaton ang samang paagi nga iyang gihimo. Kon kita andam nga makig-uban sa katilingban ni Enoch, Noe, Melchizedek, Abraham, Isaac, ug Jacob, o sa ilang matinud-anong mga anak, ug sa matinud-anong mga Propeta ug mga Apostoles, kinahanglang moagi kita sa samang kasinatian, ug makaangkon sa kahibalo, salabutan, ug mga pagtuga nga makapaandam kanato sa pagsulod ngadto sa celestial nga gingharian sa atong Amahan ug Dios. … Ang matag pagsulay ug kasinatian nga inyong maagian gikinahanglan alang sa inyong kaluwasan (DBY, 345).

Kon ang atong mga kinabuhi lugwayan og liboan ka mga tuig, sa gihapon kita magpakabuhi ug magkat-on. Ang tanang nagkalain-laing butang nga atong maagian gikinahanglan alang sa kasinatian ug ehemplo, ug alang sa pagpangandam sa pag-angkon niana nga ganti nga alang sa mga matinudanon (DBY, 345).

Kon si Adan wala pa makasala, ug kon ang iyang kaliwat nagpadayon dinhi sa yuta, sila dili makaila og sala, o sa mapait gikan sa matam-is, ni sila makahibalo sa pagkamatarung, kay ang yano ug ordinaryo nga katarungan nga ang matag epekto mapakita lamang sa hingpit pinaagi sa kaatbang niini. Kon ang mga Santos makaamgo sa mga butang nga kini mao kon sila tawagon sa paglahutay og mga pagsulay, ug sa pag-antus unsay ilang gitawag nga sakripisyo, sila moila niini nga labing dako nga mga panalangin nga ikahatag nganha kanila. Apan ibutang sila sa kahimtang sa tinuod nga mga baruganan ug tinuod nga mga kamaya, nga walay kaatbang, ug sila dili makaila sa kamaya, sila dili makaamgo og kalipay. Sila dili makaila sa kahayag gikan sa kangitngit, tungod kay sila walay kahibalo sa kangitngit ug ang sangputanan dili sila makaila sa kahayag. Kon dili sila makatilaw og kapait, unsaon nila pagkahibalo og katam-is? Dili sila makahibalo [tan-awa sa D&P 29:39] (DBY, 345–36).

Mas labi kitang malipayon nga mga tawo kon kita adunay mga pagsulay, kay ang Espiritu sa Dios mas ihatag diha sa matinud-anon [tan-awa sa 1 Pedro 3:14] (DBY, 347).

Ako moingon sa mga Santos sa Ulahing mga Adlaw, ang tanan natong buhaton mao ang pagkat-on mahitungod sa Dios. Pasagdi nga mamakak ang mga bakakon, pasagdi nga manumpa ang mga tigpanumpa, ug sila moadto sa perdisyon. Ang tanan natong buhaton mao ang pagpadayon ug pagpataas, ug sa pagsunod sa mga kasugoan sa atong Amahan ug Dios; ug siya molibug sa atong mga kaaway (DBY, 347).

Kita nakaagi og daghang mga kasinatian, kita moingon, kalisdanan, bisan og ako buot nga ang akong tanang mga kaigsoonan makasabut nga wala kanako kining pulonga, kay ang tanan nakong naagian alang kanako kalipay; apan ingon og kita nagsakripisyo og dako, ug miagi sa daghang mga kasinatian sa pagsulay ug mga tintasyon, walay pagduhaduha kabahin niini. Nakasinati kita og mga tintasyon, kapin kun kulang, ug malipayon natong gidawat ang pagpangawat sa atong mga kabtangan. Sa akong kaugalingon ako adunay mga butang kalimaon ang gidaghanon sa wala pa ako moanhi niini nga walog, mibiya sa tanan nga gipanalangin sa Ginoo kanako kabahin sa kalibutanon nga mga butang, nga, sa nasud nga akong gipuy-an dili ra gamay (DBY, 347–48).

Kabahin sa mga pagsulay, nganong libugon ninyo ang inyong mga kasingkasing, ang lalaki o babaye nga nakapahimulos sa espiritu sa atong relihiyon walay mga pagsulay, apan ang lalaki ug babaye kinsa naningkamot sa pagsunod sumala sa Ebanghelyo sa Anak sa Dios, ug sa samang higayon mogunit sa espiritu sa kalibutan, adunay mga pagsulay ug mga kasubo nga mahait ug masakit, ug kana, sa kanunay (DBY, 348).

Isalikway ang yugo sa kaaway, ug ibutang ang yugo ni Kristo, ug kamo makaingon nga masayon ang iyang yugo ug magaan ang iyang luwan. Kini akong nahibaloan pinaagi sa kasinatian (DBY, 347–48).

Ang Ginoo mitabang sa masinupakon nga mahimong mapainubsanon pinaagi sa pagpanton kanila ug pagtugot nga sila gukuron.

Kon kita motan-aw sa mga Santos sa Ulahing mga Adlaw, kita mangutana, kinahanglan ba silang gukuron? Oo, kon sila masinupakon. Kinahanglan bang pantunon ang usa ka anak nga lalaki o usa ka babaye? Oo, kon sila masinupakon [tan-awa sa D&P 105:6]. Apan pananglit sila hingpit nga masulundon ngadto sa matag gikinahanglan sa ilang mga ginikanan, aduna bay panginahanglan nga pantunon sila? Kon aduna, wala ako makasabut sa baruganan niini. Wala nako makita ang panginahanglan sa pagpanton sa usa ka masulundon nga anak, ni ako nakakita sa panginahanglan sa pagpanton gikan sa Ginoo diha sa mga katawhan kinsa hingpit nga masulundon. Napanton ba kini nga mga katawhan? Oo, napanton sila (DBY, 350).

Kadtong kinsa mitalikod gikan sa balaan nga mga kasugoan makasugat og mga pagsulay nga tinuod nga mga pagsulay. Sila mobati sa kasuko sa Makagagahum diha kanila. Kadtong kinsa malinawon ug buotan nga mga anak makadawat sa daghang mga panalangin sa ilang Amahan ug Dios. Pagmalinawon, ug ibutang ang inyong pagsalig sa Ginoong Makakagahum [tan-awa sa D&P 101:16] (DBY, 351).

Kita sa walay katapusan mas mapanalanginan tungod sa mga pagpanggukod ug sa pagkawaly hustisya nga atong giantus, kay sa nagpabilin pa kita sa atong gipuy-an diin kita giabug—kay sa kita mitugot sa pagpabilin sa atong mga uma, mga tanaman, mga tindahan, mga galingan, makinarya ug sa tanan nga kanhi atoa (DBY, 346).

Ang matarung pagagukuron sa dautan, apan ang Dios mogiya sa Iyang mga katawhan, ug ang Iyang buhat magpadayon.

Ayaw pagbaton og kahadlok, kay kon ang pulong sa Ginoo tinuod, kamo pagasulayan sa tanang mga butang; o pagmaya ug pag-ampo sa walay hunong, ug sa tanan pasalamat, bisan pa og kawaton ang inyong mga butang, kay ang kamot sa Ginoo naggiya kanato, ug magpadayon sa pagbuhat sa ingon. Himoa nga ang lalaki ug babaye mobalaan sa ilang mga kaugalingon sa atubangan sa Ginoo, ug sa kalooy sa Makagagahum mabalaan alang sa ilang kaayohan (DBY, 347).

Ang [Dios] migiya niini nga mga katawhan sa lain-laing mga bahin sa Estados Unidos, ug ang tudlo sa pagtamay gipunting nganha kanila. … Ang Ginoo adunay iyang katuyoan niini. Mahimo kamong mangutana kon unsa ang iyang katuyoan. Nasayud kamong tanan nga ang mga Santos kinahanglang himoong putli, sa pagsulod ngadto sa celestial nga gingharian. Gi-rekord nga si Jesus nahimong hingpit pinaagi sa pag-antus [tan-awa sa Mga Hebreohanon 5:8–9]. Ngano nga kinahanglan kitang maghunahuna nga sulod sa usa ka higayon kita makaandam sa pagsulod ngadto sa gingharian sa kapahulayan uban kaniya ug sa Amahan, nga dili moagi sa susamang pagsulay? (DBY, 346).

Si Joseph dili unta mahingpit, bisan og siya nagpuyo og liboan ka mga tuig, kon wala pa siya makadawat og pagpanggukod. Kon nabuhi pa siya og liboan ka tuig, ug migiya niini nga katawhan, ug misangyaw sa Ebanghelyo nga walay pagpanggukod, dili unta siya mahingpit ingon man usab sa edad nga [trayntay otso] anyos. Mahimo ninyong ingnon, kon kini nga mga katawhan tawgon sa pagsagubang og mga kasinatian sa kasakit ug pag-antus, giabug gikan sa ilang mga panimalay, ug gibato, ug gitamay, ug gihinloan, ang Makagagahum mopadayon sa iyang buhat sa hilabihan nga kakusog (DBY, 351).

Sa matag higayon nga inyong patiran ang “Mormonismo” gipatiran ninyo kini padulong sa kalamboan, wala kamo niini magpatid nga mahimong mas ngil-ad. Ang Ginoo nga Makagagahum maoy nagbuot niini (DBY, 351).

Kon kita dili moantus sa grabing pagpanggukod, ang mga baruganan nga atong gituohan, nga makapadani sa pagtagad sa maayo ug dautan dinhi sa yuta ug maoy gihisgutan sa daghang mga katawhan ug nga gilakip sa ilang pilosopiya, dawaton sa liboan kinsa karon walay pagtagad niini. (DBY, 351).

Sa matag higayon nga sila mogukod ug mosulay sa pagdaot niining mga katawhan, sila mipataas kanato, mipahuyang sa ilang kaugalingong mga kamot, ug milig-on sa mga kamot ug mga bukton sa mga Santos sa Ulahing mga Adlaw. Ug sa matag higayon nga sila maningkamot sa pagpagamay kanato, ila kining gipadaghan. Ug sa ilang pagpaningkamot sa pagdaot sa hugot nga pagtuo ug hiyas niini nga mga katawhan, ang Ginoo mipalig-on sa huyang nga mga tuhod, ug milig-on sa nagkaluya nga pagtuo ug gahum sa Dios, pinaagi sa kahayag, ug salabutan. Ang pagkamatarung ug gahum nga gidugang sa Dios niini nga mga katawhan tugbang sa pagpaningkamot sa Yawa sa paglaglag niini (DBY, 351).

Pasagdi kami, ug among ipadala ang mga Elder ngadto sa kinatumyang bahin sa yuta, ug pundukon ang Israel bisan hain sila, ug kon kamo mogukod kanamo, mas dali namo kining mahuman tungod kay kami motapul kon pasagdan, ug ganahang matulog og kadiyut, matagpilaw og gamay, ug mopahulay og gamay. Kon pasagdan ninyo, maglingawlingaw kami og gamay, apan kon kamo mogukod kanamo, kami labaw nga magmakugihon sa pagsangyaw sa Ebanghelyo (DBY, 351).

Mga Sugyot alang sa Pagtuon

Ang Ginoo mosulay kanato aron makapakita sa atong mga kaugalingon nga angay sa celestial nga himaya.

Ngano sa inyong pagtuo nga gitawag ni Presidente Young kini nga kinabuhi nga “usa ka adlaw sa pagsulay”? (Tan-awa usab sa Abraham 3:22–26.) Sa unsa nga paagi nga ang mga pagsulay makaandam kanato sa pagsulod sa celestial nga gingharian?
Ngano nga gikinahanglan nga makasinati sa nagkaatbang nga mga gahum sa maayo ug sa dautan? (Tan-awa usab sa 2 Nephi 2:11–14.)
Ngano sa inyong pagtuo nga si Presidente Young mapasalamaton kaayo sa mga pagsulay nga iyang nadawat ug sa ubang mga Santos? Sa unsa nga paagi nga ang mga pagsulay makatabang kaninyo nga mahimong mas maayo nga Santos sa Ulahing mga Adlaw?
Unsay gipasabut sa “pagbutang sa yugo ni Kristo”? (Tan-awa usab sa Mateo 11:28–30.) Sa unsa nga paagi nga ang pagbutang sa yugo ni Kristo makatabang kanato nga magmalipayon kon mag-atubang og mga pagsulay? (Tan-awa usab sa Mosiah 24:13–15.)

Ang Ginoo mitabang sa masinupakon nga mahimong mapainubsanon pinaagi sa pagpanton kanila ug pagtugot nga sila gukuron.

Ngano nga usahay ang Ginoo mopanton kanato? (Tan-awa usab sa D&P 101:2–8.) Unsa ang mahinungdanon sa atong tubag ngadto niana nga pagpanton? Sa unsa nga paagi nga ang pagkat-on niini nga baruganan sa husto nga paagi makatabang sa mga ginikanan ug mga anak nga makahimo og mas maayo nga mga pamilya?
Si Presidente Young miingon nga ang mga Santos “sa walay katapusan mas mapanalanginan tungod sa mga pagpanggukod ug sa pagkawalay hustisya nga [ilang] giantus … kay sa [sila] mitugot sa pagpabilin … [sa tanan sa ilang] kanhi nga mga kabtangan.” Ngano nga mas dako nga panalangin nga masilotan tungod sa pagkamasinupakon kay sa tugutan nga magpabilin nga haruhay diha sa makasasala nga kahimtang?

Ang matarung pagagukuron sa dautan, apan ang Dios mogiya sa Iyang mga katawhan, ug ang Iyang buhat magpadayon.

Si Presidente Young miingon nga ang masinupakon pagagukuron, apan naghisgot usab siya mahitungod sa masulundon nga mga katawhan— sama ni Jesukristo, Joseph Smith, ug sa mga misyonaryo—kinsa gigukod. Sumala ni Presidente Young, ngano nga ang Dios mitugot sa dautan nga mogukod sa matarung?
Si Presidente Young miingon nga ang pagpanggukod batok sa Simbahan makapadayon hinoon sa buhat sa Ginoo “uban sa hilabihan nga kakusog.” Unsa ang gisulti niini kanato mahitungod kon unsaon sa pagtubag sa mga pang-ataki batok sa kamatuoran? Unsa ang atong mabuhat sa pagtudlo sa atong mga anak sa pagbuntog sa pagpanggukod?

Saints being driven out — Sumala sa gipakita niini nga litrato, ang mga Santos giabug sa mga manggugubot gikan sa ilang mga panimalay sa Kirtland, Ohio; Lalawigan sa Jackson, Missouri; ug Nauvoo, Illinois.

hostile militias — Sa gipakita niini nga litrato, ang lokal nga mga sundalo usahay masuk-anon ug madumtanon sa unang mga Santos.