Organisasyon ug Pangagamhanan sa Simbahan

Sa iyang ika-77 nga tuig, si Presidente Brigham Young mi-organisar sa priesthood aron sa paghatag og mas tataw nga direksyon sa mga paghago niini, aron sa paghiusa sa mga Santos, ug sa pagpundok ug pag-atiman sa mga katawhan sa Israel. Ang epekto sa katapusang dako nga proyekto ni Presidente Young gidayeg sa iyang assistant counselor, nga si Elder George Q. Cannon. Miingon siya nga si Presidente Young “mipahimutang sa priesxthood nga han-ay nga wala pa mahitabo sukad sa pagka-organisar sa Simbahan dinhi sa yuta. Iyang gitino ang mga katungdanan sa mga Apostoles, … Seventy, … mga High Priest, … mga Elder, … mas ubos nga priesthood, uban sa kayano ug kalahi ug gahum––ang gahum sa Dios––diha sa paagi nga makita sa rekord sa dili gayud masaypan nga pinulongan nga walay usa nga masayop kinsa aduna sa Espiritu sa Dios nga nagauban kaniya” (CHC, 5:507).

Mga Pagtulun-an ni Brigham Young

Ang Dios mopadayag sa Iyang kabubut-on ngadto sa Simbahan pinaagi sa Presidente sa Simbahan.

Sa pagpahibalo sa mga butang kabahin sa doktrina nga adunay kalabutan sa pag-uswag ug pagpadayon sa pagtukod sa Gingharian sa Dios dinhi sa yuta, ug ang pagpadayag sa iyang hunahuna ug kabubut-on, aduna siya’y usa lamang ka ba-ba diin pinaagi niini ipahibalo ang iyang kabubut-on ngadto sa iyang katawhan. Kon ang Ginoo maghunahuna sa paghatag og pagpadayag ngadto sa iyang katawhan, kon siya naghunahuna sa pagpadayag og bag-ong mga butang kabahin sa doktrina ngadto kanila, o mopahigayon og pagpanton, iya kanang buhaton pinaagi sa tawo nga iyang gitudlo ngadto niana nga mga katungdanan ug calling. Ang uban pang mga katungdanan ug mga calling sa Simbahan mga tabang ug mga pangagamhanan alang sa paglig-on sa lawas ni Kristo ug sa paghingpit sa mga Santos, ubp., kada presidente, bishop, elder, priest, teacher, deacon ug miyembro nga nagbarug ubos diha sa iyang mando ug nagpahigayon sa iyang calling ug katungdanan sa Priesthood isip mga ministro sa mga pulong sa kinabuhi isip mga magbalantay sa panon sa pagbantay sa mga departamento ug sa mga seksyon sa panon sa Dios sa tibuok kalibutan, ug isip mga tabang sa pagpalig-on sa mga kamot sa Kapangulohan sa tibuok Simbahan (DBY, 137).

Ang pag-angkon ug pagpabilin sa espiritu sa Ebanghelyo, pagpundok sa Israel, pagtubos sa Zion, ug pagluwas sa kalibutan kinahanglang atimanon og una ug labaw sa tanan, ug kinahanglan mao ang nagpatigbabaw nga tinguha diha sa mga kasingkasing sa Unang Kapangulohan, sa mga Elder sa Israel, ug sa matag opisyal sa Simbahan ug Gingharian sa Dios (DBY, 137).

Sa paghukom sa tanang mga butang kabahin sa doktrina, aron mahimong balido ang usa ka desisyon, gikinahanglan ang pagbaton og usa ra ka tingog, hugot nga pagtuo ug desisyon. Diha sa kapasidad sa usa ka Korum, ang tulo ka Unang mga Presidente kinahanglan mahimong usa sa ilang tingog; ang Napulog Duha ka mga Apostoles kinahanglan mahimong usa sa ilang tingog, aron makabaton og usa ka matarung nga desisyon diha sa bisan unsa nga butang nga mahimong moabut atubangan kanila, sama sa inyong mabasa diha sa Doktrina ug mga Pakigsaad. Sa higayon nga inyong makit-an kini nga mga Korum nga usa ra sa ilang pamahayag, mahimo ninyo kining dawaton ingon nga tinuod [tan-awa sa D&P 107:27]. Papundoka ang mga Elder, nga matinud-anon ug matinuoron; ug kon magkauyon sila sa bisan unsa nga punto, mahimo ninyong masayran nga kini tinuod (DBY, 133).

Ang Ginoo nga Labawng Makagagahum nangulo niini nga Simbahan, ug dili gayud siya motugot nga mahisalaag kamo kon makit-an kamong nagbuhat sa inyong katungdanan. Mahimo kamong mopauli ug matulog sama ka hinanok sa usa ka masuso diha sa mga bukton sa iyang inahan, nga walay kahadlok kabahin sa bisan unsa nga peligro nga ang inyong mga lider mopahisalaag kaninyo, kay kon sila mosulay sa pagbuhat sa ingon ang Ginoo daling mosilhig kanila gikan sa yuta. Ang inyong mga lider naninguha sa pagsunod sa ilang relihiyon kutob sa ilang mahimo sa pagbuhat sa ingon (DBY, 137).

Ang Napulog Duha ka mga Apostoles naghupot sa mga yawe sa priesthood alang sa pagtukod sa gingharian sa Dios dinhi sa kalibutan.

Ang mga yawe sa mahangturong priesthood, nga sunod sa kapunongan sa Anak sa Dios, nahilakip sa katungdanan sa usa ka apostol. Ang tanang priesthood, tanang mga yawe, tanang mga gasa, tanang mga pagtuga ug tanan nga gipangandam sa pagsulod balik ngadto sa presensya sa Amahan ug sa Anak, nalakip, nalibut, o moingon ko nga nalangkob diha sa pagkaapostol (MS, 15:489).

Human kami mibalik gikan sa Missouri, ang akong igsoong lalaki nga si Joseph Young ug ako nanagkanta human sa pagsangyaw diha sa usa ka miting; ug sa dihang nahuman na ang miting, si Brother Joseph Smith miingon, “Dali, kuyog uban kanako ngadto sa akong balay.” Miadto kami ug nanganta ngadto kaniya og dugay, ug nakig-istorya kaniya. Iya dayong gibuksan ang hilisgutan kabahin sa Napulog Duha ug sa mga Seventy sa unang higayon nga ako kining nahunahunaan sukad. Miingon siya, “Mga kaigsoonan, motawag ako og Napulog Duha ka mga Apostoles. Sa hunahuna nako mapundok gayud kita, sa hinayhinay, ug makapili og Napulog Duha ka mga Apostoles, ug makapili og usa ka Korum sa mga Seventy gikan niadtong kinsa nakaadto sa Zion. … ” Sa pagka 1835 sa katapusan sa Enero o sa Pebrero, … among gipahigayon ang among mga miting kada adlaw, ug si Brother Joseph mitawag sa Napulog Duha ka mga Apostoles [niadtong 14 sa Pebrero] (DBY, 141–42).

Ang calling sa usa ka Apostol mao ang pagtukod sa Gingharian sa Dios sa tibuok kalibutan; ang Apostol mao ang naghupot sa mga yawe niini nga gahum, ug wala nay lain pa. Kon ang usa ka Apostol mopalambo sa iyang calling, siya ang pulong sa Ginoo ngadto sa iyang katawhan sa tanang higayon (DBY, 139).

Misulay ako sa pagpakita kaninyo, mga kaigsoonan, sa labing mubo kutob sa mahimo, sa kapunongan sa Priesthood. Kon ang usa ka tawo maordinahan nga usa ka Apostol, ang iyang Priesthood walay sinugdanan sa mga adlaw, o katapusan sa kinabuhi, sama sa Priesthood ni Melchizedek; kay mao kadto ang iyang Priesthood ang gihisgutan niini nga pinulongan ug dili sa tawo (DBY, 141).

Kini katungdanan ug pribilehiyo sa Napulog Duha ka mga Apostoles nga makabaton sa Espiritu Santo nga mao ang ilang kauban sa kanunay, ug magpuyo kanunay diha sa Espiritu sa Pagpadayag, nga masayud sa ilang katungdanan ug makasabut sa ilang calling; mao usab kini ang katungdanan ug pribilehiyo sa Unang Kapangulohan sa Simbahan (DBY, 139–40).

Ang usa ka Apostol ni Ginoong Jesukristo adunay mga yawe sa balaang Priesthood, ug ang gahum niini gisilyo diha sa iyang ulo, ug pinaagi niini siya gihatagan og katungod sa pagsangyaw sa kamatuoran ngadto sa mga tawo, ug kon sila modawat niini, maayo; kon dili, ang sala maanha sa ilang kaugalingong mga ulo (DBY, 136).

Ang Mas Ubos nga Priesthood, niana, inyong makita, naggikan sa sulod sa gilapdon [han-ay sa katungod] sa pagka-Apostol, tungod kay ang usa ka tawo nga naghupot niini adunay katungod sa pagbuhat o pagpahigayon isip usa ka High Priest, isip usa sa High Council, isip usa ka Patriarch, isip usa ka Bishop, Elder, Priest, Teacher, ug Deacon, ug diha sa matag katungdanan ug calling nga anaa sa Simbahan, gikan sa kinadak-an ngadto sa kinagamyan, sa higayon nga ang katungdanan mangayo niini (DBY, 140).

Inyong mabasa diha sa pagpadayag nga nagpasabut niana sa dihang ang Napulog Duha gitawag ug gi-ordinahan, ilang naangkon ang samang gahum ug katungod sa tulo ka Unang mga Presidente; ug sa pagbasa og dugang inyong makita nga kinahanglan gayud nga adunay mga sumpay ug mga panabang nga naggikan niini nga Priesthood [tan-awa sa D&P 107:22–26]. Ang mga Seventy nakaangkon sa samang gahum ug katungod; [nakadawat sila og gitugyan nga katungod pinaagi sa pagtudlo alang sa] pagpahimutang, pagtukod, paghan-ay, pag-ordinar ug pagpatunhay sa Gingharian sa Dios sa tanang mga kahingpitan niini dinhi sa yuta. Kita adunay Korum sa mga High Priest, ug adunay daghan kaayo niini. Sila usa ka lokal nga pundok––nagserbisyo lamang sila sa ilang dapit nga gipuy-an; apan ang mga Seventy mobiyahe ug magsangyaw; mao usab ang mga High Priest, kon sila pagatawagon. Nakaangkon sila sa sama gayud nga Priesthood nga naangkon sa mga Seventy ug naangkon sa Napulog Duha ug sa Unang Kapangulohan; apan na-ordinahan ba sila sa tanang katungod, gahum, ug mga yawe niini nga Priesthood? Wala, sila wala gayud. Sa gihapon sila mga High Priest sa Dios; ug kon sila mopalambo sa ilang mga [calling] sa Priesthood, makadawat sila sa umaabut nga panahon sa tanang katungod ug gahum nga mahimong madawat sa mga kalalakin-an (DBY, 140).

Ang katungdanan sa bishop nahilakip sa Aaronic Priesthood ug naghupot sa katungod sa pagpangalagad diha sa temporal ug espirituhanong mga butang.

Ang katungdanan sa [Tigdumalang] Bishop nahilakip sa mas ubos [Aaronic] nga Priesthood. Siya ang kinatas-ang opisyal diha sa Aaronic Priesthood, ug aduna … sa pagpangalagad sa mga anghel, kon siya adunay hugot nga pagtuo, ug magpakabuhi aron siya makadawat ug makatagamtam sa mga panalangin nga natagamtaman ni Aaron (DBY, 143).

Ang Bishop diha sa iyang calling ug katungdanan anaa sa Simbahan sa tanang higayon; dili siya tawagon sa pagbiyahe sa laing dapit aron magsangyaw, apan diha sa iyang dapit; dili siya moadto sa laing dapit sa kalibutan, apan kauban sa mga Santos (DBY, 144).

Ang mga Bishop kinahanglan mahimong hingpit nga ehemplo sa ilang mga Ward sa tanang mga butang (DBY, 144).

Kon ang usa ka Bishop molihok sa unsa gayuy gipangayo sa iyang calling ug katungdanan, ug mopalambo niini, wala gayuy usa ka indibidwal diha sa iyang Ward nga dili maggamit sa labing maayo nga paagi. Iyang siguroon nga ang tanan magpuyo sa unsay kinahanglan nilang buhaton, mapainubsanong maglakaw uban sa ilang Dios. Wala gayuy usa ka tawo diha sa iyang Ward nga wala niya mailhi, ug mahimo siyang masinati sa ilang mga kahimtang, kinaiya, ug pagbati [tan-awa sa 1 Timoteo 3:1–4] (DBY, 145).

Ang mga Bishop kinahanglang motawag niadtong kinsa sila adunay pagsalig, kadtong kinsa nahibalo sila nga matinuoron, nga mahimong mga magbalantay diha sa tore, ug himoa nga sila masayud kinsa ang nanagantus (DBY, 145).

Himoa nga ang kada Bishop matinud-anong moatiman sa iyang Ward, ug mosiguro nga ang kada lalaki ug babaye maayo ra og kahimtang ug matinudanon ug maayo ang panginabuhi; nga ang mga masakiton ug ang mga tigulang giatiman sa hustong paagi nga walay usa nga nag-antus. Himoa ang kada Bishop nga usa ka malumo ug matinabangon nga amahan sa iyang Ward, mohatag og usa ka pulong sa kahupayan ug pag-awhag diri, usa ka pulong sa pahimangno ug tambag didto, ug usa ka pulong sa pagpanton sa laing dapit, diin gikinahanglan, nga walay pagdapig, maalamong mohukom tali sa usa ka tawo ug sa laing tawo, moatiman ug maninguha sa matinuorong paagi sa kaayohan sa tanan, magbantay sa panon sa Dios uban sa pagatiman sa usa ka tinuod nga magbalantay, nga ang dautang mga tawo dili makasulod diha sa panon aron sa paglaglag kanila (DBY, 144–45).

Moingon ako ngadto sa Bishop, … mao kini ang inyong trabaho ug calling. Ayaw tuguti nga adunay usa ka dapit, diha sa mga gipuy-an sa mga Santos sa inyong mga Ward, nga wala ninyo mahibaloi (DBY, 146).

Ang mga Bishop kinahanglan, pinaagi sa ilang mga magtutudlo, mosiguro nga ang kada pamilya diha sa ilang mga Ward, kinsa makahimo, kinahanglang mohatag sa unsay ilang naandang makonsumo sa adlaw sa puasa ngadto sa mga kabus (DBY, 145).

Ang pagdisiplina diha sa Simbahan makatabang sa mga tawo nga mobalik ngadto sa pagkamatarung.

Dili gayud kita magbaton sa mga yawe sa katungod nga gisalig ngari kanato nga mahimong mga magmamando hangtud nga kita magamando sama sa pagmando sa Dios kon ania pa siya dinhi mismo (DBY, 146).

Apan ang Gingharian sa langit, sa higayon nga matukod na dinhi sa yuta, aduna sa matag opisyal, balaod ug ordinansa nga gikinahanglan alang sa pagdumala niadtong kinsa badlungon, o kinsa molapas sa mga balaod niini, ug sa pagdumala niadtong kinsa nagtinguha sa pagbuhat og maayo, apan dili makahimo sa pagsunod sa mga balaod ug mga baruganan sa ebanghelyo; ug tanan niining mga gahum ug mga katungod anaa taliwala niini nga katawhan (DBY, 146).

Mga Bishop, kamo ba adunay mga gipanghusay? Ang mga pagbati ba sa mga kaigsoonan diha sa inyong mga Ward naglinay-anay ba? “Oo.” Unsa may angay nilang buhaton sa maong mga sitwasyon? Kinahanglan silang mosunod sa mga lagda nga gibutang, ug makig-uli dayon ngadto sa ilang mga kaigsoonan. Sa akong hunahuna mahimo kining makita nga ang kadaghanan sa mga kalisdanan tali sa mga kaigsoonan nagagikan sa mga dili pagsinabtanay kaysa gikan sa malisya ug sa usa ka dautang kasingkasing, ug kaysa nga istoryahan ang maong butang sa usag usa diha sa espiritu sa pagkasantos, maglalis sila sa usag usa hangtud nga ang usa ka tinuod nga sayop mamugna, ug makahimo sila og sala diha sa ilang mga kaugalingon. Kon nakahimo kita og maayo sa nobentay nuebe ka mga higayon ug dayon nakabuhat og usa ka dautan, unsa kini ka ordinaryo, akong mga kaigsoonan, sa paghunahuna nianang usa ka dautan sa tibuok adlaw ug wala gayud maghunahuna sa maayo. Sa dili pa kita mohusga sa usag usa kinahanglan kitang motan-aw sa tinguha sa kasingkasing, ug kon kini dautan, nan pantuna kana nga indibidwal, ug paghimo og usa ka paagi sa pagdala kaniya balik pagusab ngadto sa pagkamatarung (DBY, 149–50).

Gusto akong makakita sa High Council ug sa mga Bishop ug sa tanang mga Maghuhukom nga puno sa gahum sa Espiritu Santo, nga kon ang usa ka tawo moadto sa ilang atubangan makahimo sila sa paghukom sa hustong paagi ug makasabut niana nga tawo, ug makahimo sa paghukom sa kaso sa dali ug sa makiangayon nga paagi. … Gusto nako nga ang mga Bishop ug ang uban pang mga opisyales nga makabaton og igong gahum ug kaalam gikan sa Dios aron sa paghimo kanila nga masayud sa hingpit sa tinuod nga kahimtang sa matag kaso nga mahimong moabut sa ilang atubangan (DBY, 133).

Mahimong kamo, sa mapasumbingayong paagi, modukduk sa ulo sa usa ka Elder ginamit ang usa ka bunal, ug wala siya makasabut apan sa iyang hunahuna gihatagan ninyo siya og usa ka straw nga gibutang diha sa latik aron suyopon. Adunay uban, kon inyo silang istoryahan, o kuhaon ang straw ug mopanton kanila, kansang mga kasingkasing mapainubsanon; sama sila kalumo diha sa ilang mga pagbati sa usa ka masuso, ug matunaw sama sa usa ka kandila atubangan sa siga. Kinahanglan nga dili ninyo sila pantunon sa hilabihan; kinahanglang mopanton kamo sumala sa espiritu nga anaa sa tawo. Ang uban mahimo ninyong istoryahan sa tibuok adlaw, ug wala sila makasabut kon unsay inyong giistorya. Adunay daghan kaayong paagi. Tagda ang mga tawo kon unsa sila (DBY, 150).

Kon kamo badlungon sa usag usa––kon ang mga kaigsoonan makigkita kaninyo ug moingon, “Mao kini ang imong sayop,” kinahanglan kamong modawat niini sa mabinationg paagi, ug ipadayag ang inyong pasalamat alang sa pagbadlong, ug ilha ang sayop sa dayag nga paagi, ug dawata nga makahimo kamo og sayop kanunay nga wala kamo masayud niini, ug moingon, “Buot ako nga inyong lamdagan ang akong hunahuna, sa pag-agak kanako, ug sa pagtudlo kanako ug paglig-on ug pagsuporta sa usag usa.” Unsa, diha sa inyong mga kahuyang? Oo. Nagpaabut ba kamo nga makakita og usa ka hingpit nga tawo? Dili samtang ania pa kamo dinhi sa yuta (DBY, 150).

Tuguti akong moingon ngadto sa mga kaigsoonan, kon kamo pantunon ni bisan kinsa sa inyong mga lider, ayaw gayud hunahunaa nga ang kaaway mao ang naghimo niini, apan dawata kini kanunay isip kaayohan gikan sa kamot sa usa ka higala ug dili ingon nga gikan sa usa ka kaaway. Kon ang inyong mga presidente inyo pang mga kaaway ila kamong pasagdang maginusara diha sa inyong mga kasaypanan. Kon kamo pinangga sa Ginoo kamo pagapantunon [tan-awa sa Mga Hebreohanon 12:6]; dawata kini uban sa hingpit nga kalipay (DBY, 133).

Mga Sugyot alang sa Pagtuon

Ang Dios mopadayag sa Iyang kabubut-on ngadto sa Simbahan pinaagi sa Presidente sa Simbahan.

Giunsa sa Ginoo paggamit sa Presidente sa Simbahan ug sa Konseho sa Unang Kapangulohan ug sa Korum sa Napulog Duha ka mga Apostoles sa pagdumala sa Simbahan? Giunsa sa mga lider nga naghupot sa ubang mga katungdanan diha sa Simbahan sa pagtabang kanila? (Tan-awa usab sa D&P 107:21–38; 132:7.)
Nganong makahatag kita og puno sa hugot nga pagtuo ug pagsalig diha sa nagdumalang mga korum sa Simbahan? (Tan-awa usab sa D&P 107:27.)
Nganong dili tugutan sa Ginoo ang propeta nga mopahisalaag sa Simbahan? Unsa man ang saad nga gihimo ni Presidente Young ngadto niadtong kinsa mobuhat sa ilang katungdanan? (Tan-awa usab sa D&P OD 1.)

Ang Napulog Duha ka mga Apostoles naghupot sa mga yawe sa priesthood alang sa pagtukod sa gingharian sa Dios dinhi sa kalibutan.

Unsa man ang mga yawe sa priesthood sa pagka-apostol?
Unsa ang mga katungdanan sa mga Apostoles? (Tan-awa usab sa D&P 107:23–24, 33, 58.)
Hisguti ang relasyon tali sa calling sa usa ka Apostol ug uban pang mga katungdanan diha sa Melchizedek ug Aaronic Priesthood. (Tan-awa usab sa D&P 107:58.)
Unsa ang mga katungdanan sa Seventy karon samtang naglihok sila ubos sa direksyon sa Unang Kapangulohan ug sa Korum sa Napulog Duha? (Tan-awa usab sa D&P 107:34.)

Ang katungdanan sa bishop nahilakip sa Aaronic Priesthood ug naghupot sa katungod sa pagpangalagad diha sa temporal ug espirituhanong mga butang.

Unsa nga mga yawe, mga gahum, ug mga katungod ang gihuptan sa usa ka bishop? (Tan-awa usab sa D&P 84:26–27; 107:13–17.) Unsa ang mga responsibilidad sa bishop isip presidente sa Aaronic Priesthood? isip ang tigdumalang high priest sa usa ka ward?
Sumala ni Brigham Young, unsa ang buhaton sa usa ka bishop kinsa “matinud-anong moatiman sa iyang Ward”? (Tan-awa usab sa 1 Timoteo 3:1–7.)
Unsaon nato isip mga home teacher o mga visiting teacher nga mahimong mas makatabang sa pagbantay sa Simbahan?

Ang pagdisiplina diha sa Simbahan makatabang sa mga tawo nga mobalik ngadto sa pagkamatarung.

Giunsa paghulagway ni Presidente Young kadtong kinsa nakalapas?
Si Presidente Young miingon nga ang “kadaghanan sa mga kalisdanan tali sa mga [tawo] nagagikan sa mga dili pagsinabtanay kaysa gikan sa malisya ug sa usa ka dautang kasingkasing.” Unsa ang iyang tambag alang sa pagdala sa mga dili pagsinabtanay?
Unsa ang gustong makita ni Presidente Young diha sa mga konseho sa pagdisiplina? (Tan-awa usab sa D&P 107:71–84; 134:10.) Sa unsa nga paagi nga ang “gahum ug kaalam gikan sa Dios” makatabang niadtong maghatag og paghukom diha sa usa ka konseho sa pagdisiplina? (Tan-awa usab sa D&P 121:41–42.)
Sa unsa nga paagi nga kadtong kinsa mopahigayon og mga konseho sa pagdisiplina diha sa Simbahan mohimo sa “paghukom sa hustong paagi ug makasabut” niadtong gidisiplina?
Unsa ang gisulti ni Presidente Young kabahin sa “pagpanton sumala sa espiritu nga anaa sa tawo”? (Tan-awa usab sa 3 Nephi 18:28–32.)
Giunsa pagsulti ni Presidente Young nga kinahanglan natong itubag kon kita gipanton sa atong mga lider? (Tan-awa usab sa D&P 95:1.)