Pag-ila ug Pagtahud sa Dios nga Kapangulohan

Ang Dios Amahan ug ang Iyang Anak, nga si Jesukristo, ug ang Espiritu Santo naglangkob sa Dios nga Kapangulohan. Si Presidente Brigham Young mitudlo sa mga Santos sa Ulahing mga Adlaw sa pagsimba sa Dios nga Amahan ug mag-ampo ngadto Kaniya pinaagi sa pangalan ni Jesukristo. Mitudlo siya og dugang nga ang Dios nga Amahan usa ka tawo kaniadto sa laing planeta kinsa “miagi sa kasinatian nga karon atong giagian; nakadawat siya og kasinatian, nag-antus ug nalipay, ug nakahibalo sa tanan nga atong nahibaloan mahitungod sa mga kabudlay, mga pagantus, sa kinabuhi ug kamatayon niini nga mortalidad” (DBY, 22.).

Mga Pagtulun-an ni Brigham Young

Ang Dios nga Amahan mibuhat ug midumala sa dili maihap nga mga kalibutan, milalang sa katawhan, ug usa ka personahe nga mahimong mailhan ug simbahon.

Nagtuo kita sa usa ka Dios, usa ka Tigpataliwala ug usa ka Espiritu Santo [tan-awa sa Mga Artikulo sa Hugot nga Pagtuo 1:1]. Dili kita makatuo sa makadiyot nga ang Dios walay lawas, mga parte sa lawas, mga pagbati, o mga hiyas. Ang mga hiyas makita lamang pinaagi sa nahan-ay nga personahe. Ang tanang mga hiyas naglakip ug mao ang mga resulta sa nahan-ay nga kinabuhi (DBY, 23).

Ang uban gusto nga kita motuo nga ang Dios anaa bisan asa. Dili kana mao. Wala siya sa tanang lugar isip tawo ingon nga ang Amahan ug Anak dili usa ra diha sa usa ka tawo (DBY, 23–24).

Ang Dios giisip nga anaa bisan asa sa samang higayon; ug ang Salmista miingon, “Kon asa ba ako mokalagiw gikan sa imong presensya?” [Salmo 139:7]. Anaa siya sa iyang tanan nga mga nilalang pinaagi sa iyang impluwensya, pinaagi sa iyang panggobyerno, espiritu ug gahum, apan siya mismo usa ka personahe sa tabernakulo, ug kita gilalang sama sa iyang hitsura (DBY, 24).

Ang uban nagtuo o naghunahuna sa ideya nga ang pagkaila sa Dios makapakunhod sa atong pagtuo kaniya; apan ako makaingon nga alang kanako ang pagsabut sa bisan unsa nga baruganan o pagkatawo, dinhi sa yuta o sa langit, kini dili makapakunhod sa tinuod nga bili ngari kanako, apan hinonoa, makapadugang kini; ug kon mas labaw ang akong kahibalo kabahin sa Dios, mas mahal ug bililhon siya ngari kanako, ug mas mahimaya ang akong mga pagbati ngadto kaniya (DBY, 18).

Himoa nga ang matag tawo mahimong higala sa Dios [tan-awa sa Santiago 2:23] (DBY, 18).

Ang bantugang arkitekto, manedyer ug superintendente, tagdumala sa kagastuhan ug hingpit nga gamhanan kinsa mogiya niini nga buhat dili makita sa atong kinaiyanhon nga mga mata. Nagpuyo siya sa laing kalibutan; anaa siya sa laing kahimtang sa pagpuyo; miagi siya sa kasinatian nga karon atong giagian; nakadawat siya og kasinatian, nag-antus ug nalipay, ug nakahibalo sa tanan nga atong nahibaloan mahitungod sa mga kabudlay, mga pag-antus, kinabuhi ug kamatayon niini nga mortalidad, kay iyang naagian ang tanan niini, ug nakadawat sa iyang korona ug kahimayaan ug naghupot sa mga yawe ug mga gahum niini nga Gingharian; siya nagmando, ug mipatuman sa iyang kabubut-on sa mga katawhan, taliwala sa mga Santos ug sa mga makasasala, ug mopahinabo og mga resulta aron sa pagpahaum sa iyang katuyoan taliwala sa mga gingharian ug sa mga nasud ug sa mga kagamhanan, nga aron ang tanan modangat ngadto sa iyang himaya ug sa kahingpitan sa iyang buhat” (DBY 22).

Nagdumala siya sa dili maihap nga mga kalibutan nga nagdan-ag niining gamay nga planeta, ug minilyon ka mga kalibutan nga dili nato makita; ug bisan pa niana nagtan-aw siya sa pinakagamay nga butang sa iyang nilalang, walay usa niini nga mga nilalang ang makalingkawas sa iyang pananaw; ug walay usa niini nga nahimo gawas pinaagi sa iyang kaalam ug gahum (DBY, 20).

Ang atong Amahan sa Langit maoy amahan sa tanang mga espiritu nga sukad natawo, o sa matawo pa, niini nga yuta [tan-awa sa Mga Hebreohanon 12:9]; ug sila natawo nga mga espiritu didto sa mahangturong kalibutan. Dayon ang Ginoo pinaagi sa iyang gahum ug kaalam mihan-ay sa mortal nga tabernakulo sa tawo. Una kitang gihimo nga espiritwal, ug pagkahuman temporal (DBY, 24).

Nahisulat nga ang Dios nasayud sa tanang mga butang ug aduna sa tanan nga gahum [tan-awa sa 1 Nephi 9:6] (DBY, 20).

Siya ang Labing Gamhanan nga Tagdumala sa kalibutan. Sa iyang pagbadlong ang dagat miuga, ug ang mga suba nahimong kamingawan. Siya mitakus sa mga tubig sa palad sa iyang kamot, ug misukod sa langit pinaagi sa dangaw, ug nasayud sa abug sa yuta pinaagi sa taksanan, ug mitimbang sa mga bukid pinaagi sa mga timbangan, ug sa mga bungtod sa usa ka timbangan; ang mga nasud alang kaniya sama sa tinulo diha sa balde, ug iyang gitan-aw ang mga isla nga usa ka gamay kaayo nga butang, ang mga buhok sa atong mga ulo iyang giihap, ug walay usa ka goryon ang mahulog sa yuta nga wala ang atong Amahan; ug siya nakahibalo sa matag hunahuna ug tinguha sa kasingkasing sa tanang tawo, kay siya anaa bisan asa pinaagi sa gahum sa iyang Espiritu—ang iyang tigpangalagad, ang Espiritu Santo. Siya ang Amahan sa tanan, labaw sa tanan ug anaa sa tanan, ug sulod sa tanan [tan-awa sa Mga Taga-Efeso 4:6]; nasayud siya sa tanang butang kalabut niini nga yuta, ug siya nasayud sa tanang mga butang kalabut sa minilyon ka mga yuta nga sama niini (DBY, 19).

Gihatagan niya og porma, paglihok, ug kinabuhi kining materyal nga kalibutan; mihimo sa dagko ug gagmay nga kahayag nga mosanag sa kalangitan; mihatag ngadto kanila sa ilang mga higayon ug sa ilang mga panahon, ug mibutang og timaan sa ilang mga kalibutan. Iyang gihimo ang mga hangin ug katubigan aron mapuno sa kinabuhi, ug mitabon sa kabungturan ug kapatagan sa nagkamang nga mga kahayupan, ug mihimo sa tawo nga magmando sa iyang mga gilalang (DBY, 18).

Ang Dios mao ang tinubdan, ang tuburan sa tanang salabutan, nga wala magsapayan kon si kinsa ang nagbaton niini, ang tawo ba dinhi sa yuta, ang mga espiritu ba didto sa kalibutan sa espiritu, ang mga anghel ba nga nagpuyo sa kahangturan sa mga Dios, o ang labing ubos nga mga tawo taliwala sa mga yawa sa impyerno. Ang tanan nakaangkon sa unsa nga salabutan, kahayag, gahum, ug pagkatawo nga sila aduna gikan sa Dios—gikan sa sama nga tinubdan diin kita nakadawat sa ato. Ang tanang maayo ug hingpit nga gasa nagagikan sa Dios [tan-awa sa Santiago 1:17]. Ang tanang nakaplagan sa siyensya ug sa art, nga tinuod gayud ug mapuslanon ngadto sa mga katawhan gihatag pinaagi sa yano nga pagpadayag gikan sa Dios, bisan og diyutay ang modawat niini. Gihatag kini uban sa katuyoan sa pagandam og paagi alang sa katapusang kadaugan sa kamatuoran, ug sa katubsanan sa yuta gikan sa gahum sa sala ug ni Satanas (DBY, 18).

Daghan ang naningkamot sa pagpangita sa Tigbuhat sa tanang mga butang; apan mas sayon alang sa usa ka hulmigas sa pag-ihap sa mga balas sa yuta. Dili alang sa tawo, uban sa iyang limitado nga salabutan, sa pagsabut sa kahangturan. … Kini mas sayon alang sa langaw sa pagsubay sa kasaysayan sa tawo balik ngadto sa iyang gigikanan kay sa tawo sa pagtugkad sa Tigbuhat sa tanang mga butang, pagbukas sa tabil sa kahangturan, ug pagpadayag sa mga misteryo nga gipangita sa mga batid sa pangatarungan gikan sa sinugdan. Busa unsa man, ang buhat ug katungdanan sa mga katawhan? Kay sa mangutana sa gigikanan sa mga Dios—kay sa maninguha sa pagsuhid sa mga kinahiladman sa kahangturan nga miagi na, nga mao karon, ug mao sa umaabut, kay sa maningkamot sa pagdiskobre sa mga utlanan sa walay kinutuban nga kawanangan, ipapangita kanila nga mahibalo sa tumong sa ilang pagpakabuhi karon, ug unsaon sa paggamit, sa labing makaayo nga paagi alang sa ilang isig kaugalingong kaayohan ug kaluwasan, ang salabutan nga ilang naangkon. Ipapangita nila nga mahibalo ug makasabut pag-ayo sa mga butang nga ilang masabtan, ug paghimo sa ilang mga kaugalingon nga makasabut og maayo sa tumong sa ilang pagkaanaa dinhi, pinaagi sa makugihong pagpangita ngadto sa labing gamhanan alang sa impormasyon ug pinaagi sa mainampingong pagtuon sa labing maayong mga basahon (DBY, 25).

Si Jesukristo, ang Bugtong Anak sa Amahan sa unod, miula alang sa mga sala sa tanan kinsa maghinulsol.

Ang mga Santos sa Ulahing mga Adlaw nagtuo ni Jesukristo, ang bugtong Anak sa Amahan [sa unod], kinsa mianhi sa tunga-tunga sa panahon, mihimo sa iyang buhat, nag-antus sa silot ug mibayad sa utang sa salang panulundon sa tawo pinaagi sa paghalad sa iyang kaugalingon, nabanhaw gikan sa mga patay, ug mikayab ngadto sa iyang Amahan, ug sama nga si Jesus nagpaubos sa tanang mga butang, busa siya mopatigbabaw sa tanang mga butang. Kita nagtuo nga si Jesukristo mobalik pag-usab, sama sa gisulat mahitungod kaniya: “Kining maong Jesus, nga gikuha gikan kaninyo ngadto sa langit, mobalik ra unya sa paagi nga sama sa inyong nakita sa iyang pagsaka sa langit” [Mga Buhat 1:10–11] (DBY, 26).

Ang atong hugot nga pagtuo itingub diha sa Anak sa Dios, ug pinaagi kaniya ngadto sa Amahan (DBY, 26).

Ang mga Santos sa Ulahing mga Adlaw ug ang matag tawo kinsa adunay katungod sa kaluwasan, ug ang tanan gawas sa nakasala batok sa Espiritu Santo, mahimong makahibalo nga si Jesus mao ang Kristo sa samang paagi sa pagkahibalo ni Pedro [tan-awa sa Mateo 16:13–19]. Ang mga milagro dili mohatag niini nga kahibalo ngadto sa katawhan, bisan og kini mohatag og kolateral sa paglig-on sa tumutuo. Nasayud ang mga Judeo sa milagro ni Jesus, apan sila mitugot nga siya pahamtangan sa kamatayon isip usa ka mangingilad sa katawhan ug usa nga nasudlan og yawa (DBY, 28).

Si Jesus nisagubang sa pagtukod sa Gingharian sa Dios dinhi sa yuta. Iyang gitudlo ang mga balaod ug mga ordinansa sa Gingharian (DBY, 29).

Siya walay gihimo alang sa iyang kaugalingon. Naghimo siya og mga milagro ug mihimo og maayong buhat dinhi sa yuta; apan siya walay gihimo alang sa iyang kaugalingon. Miingon Siya, “Gawas nga akong nakita nga gibuhat sa Amahan, maoy akong buhaton” [tan-awa sa Juan 5:19]. “Ako walay arang mahimo sa akong kaugalingong kabubut-on, kon dili sa kabubut-on sa nagpadala kanako” [tan-awa sa Juan 5:30]. Kinahanglang moabut kita sa paghukom nga ang Anak sa Dios wala mosugyot, modiktar, molihok, o mopakita og bisan unsa nga pagpakita sa iyang gahum, sa iyang himaya, o sa iyang buluhaton dinhi sa yuta gawas kon kini hunahuna ug kabubut-on sa iyang Amahan (DBY, 26).

“Ako ug ang Amahan usa ra,” [Juan 10:30] miingon si Jesus; unsa, usa ka lawas? Dili … Dili sila usa ra ka tawo sama nga ako ug usa sa akong mga anak dili usa ra ka tawo. Kon ang akong anak makadawat sa akong pagtulun-an, maglakaw sa dalan nga akong gitudlo nga iyang subayon, kon ang iyang hugot nga pagtuo sama sa ako, ang iyang katuyoan mao ra, ug iyang gibuhat ang buhat sa iyang amahan sama nga gibuhat ni Jesus ang buhat sa iyang Amahan, niana ang akong anak usa uban kanako kon sabton pinaagi sa kasulatan (DBY, 28).

Ang Ginoo mipadayag kanato og plano diin kita mahimong maluwas dinhi ug sa umaabut. Ang Dios nakahimo sa tanan nga atong gipangayo, ug labaw pa kay sa atong gipangayo. Ang misyon ni Jesus nganhi sa yuta mao ang pagdala sa iyang mga kaigsoonan balik ngadto sa presensya sa Amahan; nahimo niya ang iyang bahin sa buhat, ug nagpabilin alang kanato ang pagbuhat sa ato. Walay bisan usa ka butang nga mahimo sa Ginoo alang sa kaluwasan sa tawhanong pamilya nga wala niya mabuhat; ug nagpabilin kini alang sa mga katawhan sa pagdawat sa kamatuoran o sa pagsalikway niini; ang tanan nga mahimo alang sa ilang kaluwasan, bisan wala sila, nahimo na ug pinaagi sa Manluluwas… Siya mao na ang Hari sa mga hari ug ang Ginoo sa mga ginoo, ug ang panahon moabut nga ang matag tuhod moluhod ug matag dila mokumpisal [tan-awa sa Mosiah 27:31], ngadto sa himaya sa Dios nga Amahan, nga si Jesus mao ang Kristo [tan-awa sa Mga Taga- Filipos 2:10–11]. Kanang maong tawo nga gitan-aw, dili isip Manluluwas, apan usa ka sinalikway, kinsa gilansang sa krus taliwala sa duha ka mga kawatan ug gitamay ug gibiaybiay, pagadawaton sa tanang mga tawo isip ang bugtong Binuhat diin sila makaangkon og kaluwasan (DBY, 27).

Ang Espiritu Santo usa ka personahe sa espiritu kinsa nagsaksi sa kamatuoran.

Ang Espiritu Santo, kita nagtuo, mao ang usa sa mga personahe nga langkob … sa Dios nga Kapangulohan. Dili usa ka tawo diha sa tulo, ni tulo ka tawo diha sa usa; apan ang Amahan, Anak, ug ang Espiritu Santo usa ra sa kinaiya, sama sa mga kasingkasing sa tulo ka tawo kinsa nagkahiusa sa tanang mga butang. Siya usa sa tulo ka mga personahe nga atong gituohan, kansang katungdanan mao ang pagpangalagad sa tawhanong pamilya kinsa nagmahal sa kamatuoran. Namahayag ako nga sila usa ra, sama sa mga kasingkasing sa tulo ka mga tawo nga mahimong usa. Aron kamo dili masayop sa pagsabut kanako, ako moingon nga ako dili gusto nga inyong sabton nga ang Espiritu Santo usa ka personahe nga adunay tabernakulo, sama sa Amahan ug sa Anak; apan siya usa ka mensahero sa Dios nga mopakatap sa iyang impluwensya pinaagi sa tanang mga buhat sa Makagagahum (DBY, 30).

Ang Espiritu Santo mao ang tigpangalagad sa [Amahan ug sa Anak] nga mopahinumdom kanato sa tanang mga butang, mopadayag sa bag-ong mga kamatuoran ngari kanato, ug motudlo kanato, mogiya, ug motultol sa dalan sa matag hunahuna, hangtud kita mahimong hingpit ug makaandam sa pagpauli, diin atong makita ug maistorya ang atong Amahan sa Langit (DBY, 26).

Akong napamatud-an sa akong katagbawan, sumala sa labing maayo nga kahibalo nga akong naangkon, nga ang tawo mailad pinaagi sa panan-aw sa natural nga mata, mailad siya pinaagi sa pagpaminaw, ug pinaagi sa paghikap, nga siya mailad sa tanan sa unsay gitawag nga kinaiyanhong mga balatian. Apan adunay usa ka butang nga siya dili mailad. Unsa man kana? Kini mao ang trabaho sa Espiritu Santo, ang Espiritu ug gahum sa Dios diha sa tawo. Nagtudlo kini kaniya sa langitnong mga butang; naggiya kini kaniya sa paagi sa kinabuhi, naghatag kini kaniya sa yawe diin siya makasulay sa mga plano sa tawo, ug diin nagrekomendar sa mga butang sa Dios. Dili lamang ang mga Santos kinsa ania dinhi, ug kinsa nagpundok ngadto sa Zion, apan kadtong atua sa matag nasud, kayutaan, o isla kinsa nagsunod sa ilang relihiyon nga gitudlo sa atong Manluluwas ug sa iyang mga Apostoles, ug usab ni Joseph Smith; naghatag usab sila sa samang pagpamatuod, ang ilang mga mata nakakita pinaagi sa Espiritu sa Dios, ug sila nagkahiusa, ang ilang mga kasingkasing mibati, ug sila nagkahiusa sa pagbati ug pagsabut, ug walay panaglalis kanila mahitungod sa mga doktrina sa Manluluwas (DBY, 31).

Kon wala ang gahum sa Espiritu Santo ang tawo malagmit moadto sa tuo o sa wala gikan sa mapig-ot nga dalan sa katungdanan; lagmit mohimo sila sa mga butang nga ilang pagabasulan; lagmit mohimo sila og mga sayop; ug kon sila maningkamot sa pagbuhat sa labing maayo nga kutob sa ilang mahimo, tan-awa ilang buhaton kana nga wala nila kagustohi (DBY, 31).

Gusto nakong makita ang mga lalaki ug mga babaye nga maimpluwensya sa Espiritu Santo sa matag ginhawa sa ilang mga kinabuhi, makanunayong magsunod sa kahayag sa panagway sa Dios (DBY, 31).

Mga Sugyot alang sa Pagtuon

Ang Dios nga Amahan mibuhat ug midumala sa dili maihap nga mga kalibutan, milalang sa katawhan, ug usa ka personahe nga mahimong mailhan ug simbahon.

Unsa ang gitudlo ni Presidente Young mahitungod sa kaimportante nga makaila sa Dios nga Amahan? (Tan-awa usab sa Juan 17:3.) Sa unsa nga paagi nga ang atong pagkahibalo niana nga tawo makaapektar sa atong relasyon niana nga tawo? Unsa nga mga butang ang nakatabang kaninyo nga makaila sa Dios nga Amahan?
Sa unsa nga paagi nga ang impluwensya sa Dios “mahunahuna nga anaa bisan asa sa samang higayon”? Unsa ang pipila ka mga ehemplo sa pagpakabana sa Langitnong Amahan bisan sa “pinakagamay nga butang sa iyang mga nilalang”?
Ang doktrina nga ang Dios usa ka tawo kaniadto ug miuswag aron mahimong Dios talagsaon niini nga Simbahan. Unsay inyong gibati, nga nakahibalo nga ang Dios, pinaagi sa Iyang kaugalingong kasinatian, “nakahibalo sa tanan nga atong nahibaloan mahitungod sa mga kabudlay [ug] sa mga pag-antus” sa mortalidad?
Si Presidente Young mitudlo nga ang tanang maayo ug tinuod nga mga nadiskobrehan sa siyensya ug sa art “gihatag sa yano nga pagpadayag gikan sa Dios.” Sa unsa nga paagi nga ang dinasig nga mga pag-uswag niining mga bahina makatabang sa pagpadayon sa buhat sa Dios?
Unsa ang gisulti ni Presidente Young nga “buhat ug katungdanan sa mga katawhan”? Sa unsa nga paagi nga kita mas makasabut sa mga butang nga atong sabtununon ug makahibalo sa atong katuyoan dinhi sa yuta? Asa kita mangita sa mao nga pagsabut?

Si Jesukristo, ang Bugtong Anak sa Amahan sa unod, miula alang sa mga sala sa tanan kinsa maghinulsol.

Unsa ang gitudlo ni Presidente Young mahitungod ni Jesukristo ug sa Iyang misyon sa yuta?
Ang unang baruganan sa ebanghelyo mao ang hugot nga pagtuo diha ni Ginoong Jesukristo. Sa unsa nga mga paagi nga ang pagbaton og hugot nga pagtuo diha sa Anak sa Dios makapausab sa atong mga kinabuhi? (Tan-awa usab sa Jacob 4:10–11 ug Moroni 7:41–42.)
Mitudlo si Presidente Young nga ang matag Santos sa Ulahing mga Adlaw mahimong makaila nga si Jesus mao ang Kristo sa samang paagi sa pagkasayud ni Apostol Pedro (tan-awa usab sa Mateo 16:13–19). Sa unsa nga paagi nga ang usa ka tawo makaila nga si Jesus mao ang Kristo? Ngano nga ang mga milagro sa ilang kaugalingon dili makahatag og igong kahibalo aron ang tawo makaila nga si Jesus mao ang Kristo? Nganong importante man kaayo kini nga kahibalo sa atong kaluwasan?
Kang kinsa nga sugo ang gihimo ni Jesus sa dihang Siya nangalagad sa mga lumulupyo sa yuta? Unsa ang atong makat-unan gikan sa ehemplo ni Jesus ug magamit sa atong mga kinabuhi? Sa unsa nga paagi kita makakat-on ug modawat sa atong kaugalingon nga mga sugo gikan sa Ginoo?
Si Presidente Young mipahinumdom kanato nga sa umaabut nga adlaw “ang matag tuhod moluhod ug matag dila mokumpisal nga si Jesus mao ang Kristo (Mosiah 27:31; tan-awa usab sa Mga Taga-Filipos 2:9–11). Ang pagpuyo isip usa ka tinuod nga disipulo ni Jesukristo mas malisud kay sa pagsulti lamang nga si Jesus mao ang Kristo. Unsay makahatag kaninyo og kalig-on sa pagsunod sa ebanghelyo isip madasigon nga disipulo?

Ang Espiritu Santo usa ka personahe sa espiritu kinsa nagsaksi sa kamatuoran.

Unsa ang misyon sa Espiritu Santo? Sa unsa nga paagi Siya naglihok diha sa mga kinabuhi sa mga anak sa Dios?
Sa unsa nga paagi nga ang personahe sa Espiritu Santo lahi sa Dios nga Amahan ug sa Iyang Anak nga si Jesukristo? (Tan-awa usab sa D&P 130:22.) Sa unsa nga paagi nga ang tulo ka mga sakop sa Dios nga Kapangulohan “usa” ra?
Sa unsa nga paagi nga ang Espiritu Santo mao ang tigpangalagad alang sa Amahan ug sa Anak.
Unsa nga mga kasinatian ang inyong nasinati nga nagpamatuod kaninyo sa gahum sa Espiritu Santo sa pagtudlo ug paggiya kaninyo?

First Vision — Ang pagsabut sa *artist* sa Unang Panan-awon ni Joseph Smith. Si Presidente Young miingon nga si Joseph Smith “mikuha gikan sa langit, … ug midala nganhi sa yuta” sa tinuod nga kinaiyahan sa Dios nga Kapangulohan pinaagi sa pagpadayag (*DBY,* 458).