Pag-ugmad og Pagpasalamat, Pagkamapainubsanon, ug Pagkamatinuoron

Si Presidente Brigham Young nagtuo ug nagpuyo sumala sa yano, tinuod nga mga baruganan. Gikan sa iyang mga kasinatian isip usa ka karpentero ug kontraktor, nakat-unan niya ang paghatag og bili sa matinuoron nga mga trabahante kinsa mitukod og mga bongbong nga molungtad, motaod og mga pultahan nga wala magkinahanglan nga ayohon, ug sila mibiya nga wala magdala og mga gamit sa tag-iya og mga lansang sa ilang bulsa. Gitambagan niya ang mga tawo sa tanang matang sa kinabuhi sa “pagbuka sa ilang mga mata aron makakita ug makasabut kon unsa ka importante ang pagkamatinuoron ug pagkamatarung” (DNW, 2 sa Dis. 1857,4). Si Presidente Young miawhag usab sa nag-unang mga Santos kinsa nagsagubang sa mga pagsulay sama sa pagpanglutos, kakabus, ug kagutom sa pagdawat sa ilang mga kasakit uban sa pagpasalamat ug pagkamapainubsanon, kay ang Ginoo sa pagkatinuod milig-on kanila diha sa ilang pag-antus. Ang iyang mga pulong ug ang iyang kinabuhi mipatigbabaw nga ang atong katungdanan mao ang pagpakita og kaligdong ug pagpasalamat pinaagi sa pagpalambo sa bisan unsa nga gipanalangin kanato sa Ginoo.

Mga Pagtulun-an ni Brigham Young

Ang pag-ila sa mga kamot sa Ginoo dinhi sa atong mga kinabuhi nag-ugmad og pagkamapasalamaton.

Ako walay nahibaloan bisan unsa, gawas sa walay kapasayloan nga sala, nga mas labaw pa kay sa sala sa pagkadili mapasalamaton (DBY, 228).

Tingali mosulti ako og pipila ka butang mahitungod sa malisud nga mga panahon. Nasayud kamo nga ako miingon kaninyo nga kon aduna may nahadlok nga mamatay sa kagutom, pasagdi siyang mobiya, ug moadto kon asa ang daghang pagkaon. Ako walay nahibaloan bisan gamayng kakuyaw nga magutman, kay hangtud atong makaon ang katapusan nga asno, gikan sa tumoy sa dunggan hangtud sa tumoy sa ikog, dili ako mahadlok nga mamatay sa kagutom. Daghan kaayo sa pagkakaron ang dili madawat sa panrabaho, apan ang tingpamulak mobukas ra unya ngari kanato, ug dili na kita mag-antus labaw sa unsay alang sa atong kaayohan. Mapasalamaton ako sa kamot sa Ginoo nga anaa gayud: sama ako ka mapasalamaton niini nga mga tabang nga iyang gihatag sama sa uban nga sukad akong nadawat. Giingnan ko kamo, mga tuig na ang milabay, sa akong mga pagbati mahitungod sa ilang mga kalooy, ilang hugot nga pagtuo, pagka mapasalamaton ug utang buot, ug sa ilang pag-ila sa kamot sa Ginoo ug sa mga pagpanghatag sa iyang mga panalangin. Ang akong kalag nagsubo kaayo gani nagadugo, nga makita ang nangausik, ug ang usikan nga pagbati niining mga katawhan sa paggamit sa ilang daghan kaayo nga panalangin. Daghan ang miyatakyatak lamang niini, ug andam na sila sa pagtunglo sa Dios kinsa mipanalangin kanila. Gusto nila ang mga bulawan ug pilak, kay sa trigo ug mais, ug pino nga harina, ug sa pinakamaayo nga utanon nga sukad mitubo dinhi sa yuta. Ila kini nga giyatak-yatakan, ug wala hatagi sa pagtagad ang pinili nga mga panalangin sa Ginoo nga ilang Dios (DNW, 6 sa Peb. 1856, 4).

Naglipay kita tungod kay ang Ginoo maayo kanato, tungod kay kita gipugas diha sa kahuyang alang sa tino nga katuyoan sa pagkab-ot og mas dako nga gahum ug pagkahingpit. Sa tanang mga butang ang mga Santos unta maglipay—sa pagpanggukod, tungod kay gikinahanglan ang paghashas kanila, ug pag-andam sa mga dautan alang sa ilang kaalautan, sa sakit ug sa kasakit, bisan og malisud ang pagpas-an niini, tungod kay kita gipaila na niini nga mga sakit uban ang kasub-anan, ug sa tanang mga kasakit nga maantus sa mga mortal, kay pinaagi sa pagtagamtam ang tanang mga butang gipakita diha sa atong kaugalingong mga pagbati. Kita adunay hinungdan nga maglipay sa hilabihan nga ang hugot nga pagtuo ania sa kalibutan, nga ang Ginoo maghari, ug maghimo sa iyang gusto dinhi sa mga lumulupyo sa yuta. Mangutana ba kamo kon ako nalipay tungod kay ang Panulay adunay bintaha ibabaw sa mga lumulupyo sa yuta, ug misakit sa mga katawhan? Ako sa dakong kasiguroan motubag og “oo”; gikalipay ko kini pag-ayo sama sa ubang butang. Nalipay ako tungod kay ako gisakit. Nalipay ako tungod kay ako kabus. Nalipay ako tungod kay ako naguol. Ngano man? Tungod kay ako pagabayawon pag-usab. Nalipay ako nga ako kabus tungod kay ako pagahimoong adunahan, nga ako gisakit, tungod kay ako pagahupayon, ug giandam alang sa pagpahimulos sa katam-is sa hingpit nga kalipay, tungod kay kini dili mahimo ang husto nga pagpasalamat sa kalipay gawas sa paglahutay sa katugbang niini (DBY, 228).

Gihisgutan nato ang atong mga pagsulay ug mga kahasol niini nga kinabuhi; apan pananglit inyong nakita sa inyong kaugalingon liboan ug minilyon ka mga katuigan human ninyo mapamatud-an nga kamo nagmatinud-anon sa inyong relihiyon sulod sa mubo kaayong katuigan niini nga panahon, ug nakaangkon og mahangturong kaluwasan ug usa ka korona sa himaya diha sa atubangan sa Dios? Busa lingia ang inyong kinabuhi dinhi, ug tan-awa ang mga kapildihan, mga pagsulay, ug mga kapakyasan, ang mga kagul-anan … ; mapugos kamo sa pagsinggit, “apan unsa man kadtong tanan? Kadtong mga butanga mga lumalabay lamang, ug ania na kita karon dinhi. Nagmatinud-anon kita sulod sa mubo nga mga panahon sa atong mortalidad, ug karon atong gipahimuslan ang kinabuhing dayon ug himaya, uban ang gahum sa pag-uswag diha sa tanan nga walay kinutuban nga kahibalo ug pinaagi sa dili maihap nga mga ang-ang sa paguswag, nagtagamtam sa mga pahiyum ug pagtugot sa atong Amahan ug Dios, ug ni Jesukristo nga atong magulang nga igsoong lalaki” (DNW, 9 sa Nob. 1859, 1).

Adunay laing butang nga karon akong hisgutan, ug gawas nga atong makat-unan kanang mga butanga ako mosaad kaninyo nga dili gayud kita makapanunod sa Celestial nga Gingharian. Gipundok kita sa katuyoan nga makakat-on kon unsay buhaton niining kinabuhi karon ug sa mga panalangin karon nga gihatag kanato. Kon dili nato makat-unan kini nga mga leksyon, unsaon man nato sa pagpaabut nga masaligan sa katigayunan sa kahangturan; kay siya nga nagmatinud-anon sa diyutay nga mga butang himoon nga magmamando sa daghang mga butang [tan-awa sa Mateo 25:21]. … Kon gipanalanginan kita nga nidaghan ang atong mga baka, ug wala nato hatagi sa pagtagad kini nga panalangin nga gihatag sa Ginoo kanato, niana kita mahiagum sa Iyang kasuko, ug gibutang ang atong mga kaugalingon nga angay manubag sa silot. Kinsang yutan-on nga mga amahan ang mohatag og mga panalangin diha sa usa ka anak nga lalaki uban sa katagbawan ug kalipay samtang kana nga anak nga lalaki nagpadayon nga nag-usik-usik niini ug gigamit kini sa walay hinungdan? Human niana nga panahon kana nga amahan moputol sa mga kaayo, ug mohatag niini ngadto sa mas takus nga anak. Ang Ginoo labaw kaayo ka manggiloloy-on kay kanato; apan tingali adunay pagputol sa Iyang mga gasa, kon dili nato kini dawaton uban sa pagpasalamat ug dili kini atimanon og maayo samtang anaa kini kanato. Himoa nga ang mga katawhan moatiman sa ilang mga baka ug mga kabayo, ug ang tawo nga dili mohimo niini nagbutang sa iyang kaugalingon nga manubag sa sayop ubos sa mga mata sa hustisya (DNSW, 29 sa Okt. 1865, 2).

Unsa ang atong katungdanan? Atong katungdanan ang pagpalambo sa matag panalangin nga ihatag sa Ginoo kanato. Kon mohatag siya kanato og yuta, palamboa kini, kon siya mohatag kanato og kahigayunan nga makatukod og mga balay, palamboa kini, kon siya mohatag kanato og mga asawa og mga anak, paningkamot ug tudloi sila sa mga pamaagi sa Ginoo, ug ipataas sila ibabaw sa sala, sa pagpakaulaw, ug timawa nga kahimtang sa katawhan. … Sa iyang kamapinanggaon gitawag niya ang mga Santos sa Ulahing mga Adlaw gikan sa kalibutan, gipundok sila gikan sa laing mga nasud, ug gihatagan sila og dapit sa kalibutan. Panalangin ba kini? Oo usa sa pinakadako nga mapahimuslan sa tawo, nga malikay sa kadautan sa mga dautan, gikan sa mga katalagman ug hugyaw sa kalibutan. Pinaagi niini nga mga panalangin mapakita nato sa atong Amahang Langitnon nga kita matinudanong mga tinugyanan; ug dugang pa, kini usa ka panalangin nga makabaton og kahigayunan sa pag-uli ngadto kaniya sa mga butang nga iyang gipahuptan kanato. … Niana kini tataw nga kon unsa ang ingon og akong nabatunan sa tinuod lang wala gayud nako mapanag-iya, ug ako kining i-uli ngadto sa Ginoo kon siya mangayo niini, iya kini, ug iya kini sa tanang panahon. Wala ako manag-iya niini, wala gayud sukad (DN, 20 sa Hunyo 1855, 4).

Walay bisan usa nga kahimtang sa kinabuhi [o] usa ka oras nga kasinatian nga dili makahatag og kaayohan sa tanan kinsa mogamit niini sa ilang pagtuon, ug nagtumong sa paglambo diha sa mga kasinatian nga ilang naangkon (DNW, 9 sa Hulyo 1862, 1).

Kadto kinsa mapainubsanon nakaila sa ilang panginahanglan sa Ginoo.

Kinahanglan kitang magpaubos sa atong mga kaugalingon ug mahimong sama sa gagmayng mga bata sa atong mga pagbati—nga mahimong mapainubsanon ug sama sa usa ka bata diha sa espiritu, aron makadawat sa una nga mga kasanag sa espiritu sa Ebanghelyo, niana atong maangkon ang kahigayunan sa pagtubo, sa paglambo sa kahibalo, sa kaalam, ug sa panabut (DBY, 228).

Kita wala gayud gawas sa unsay buhaton sa Ginoo kanato (DNW, 28 sa Okt. 1857, 5).

Kon ang usa ka tawo makakita og mga butang nga ingon nga sila mao, … kon makita niya nga siya nakalipay sa Dios ug sa iyang mga kaigsoonan, manobra ang iyang kalipay, ug bation niya ang nagtubo nga pagkamapainubsanon ug pagkamatinugyanon. Kon ang usa ka tawo mapahitas-on ug mapalabilabihon, ang pag-ulog-ulog molukop kaniya uban sa garbo ug modaot kaniya, apan dili kini mao kon ang iyang pagtuo sa Dios nagtubo (DBY, 228).

Kinsa ang adunay labing dakong hinungdan nga magpasalamat sa Dios—ang tawo nga walay mainit nga pagbati o kahinam sa dautan, o ang usa nga sa matag adlaw maninguha sa pagbuntog, ug sa gihapon gidaug sa mga kalapasan? Ang gahum sa iyang mga kusog, hugot nga pagtuo, ug paghukom nabuntog, ug siya makita nga sad-an pinaagi sa iyang mga pagkahilig sa dautan bisan og siya naningkamot sa matag adlaw, ug sa matag gabii, sa pagbuntog. Kinsa ang adunay hinungdan nga labing magmapasalamaton? Ang tawo nga walay igong kainit sa pagbati sa pagbuntog kinahanglan nga kanunayng maglakaw diha sa pagkamapainubsanon, kay sa ipanghambog ang iyang pagkamatarung labaw sa iyang igsoon. Ubos kita sa katungdanan, pinaagi sa inigsoon nga pagbati ug bugkos sa katawhan, sa pagpakigdait niadtong nagbuhat og dautan. Kinahanglan kitang molahutay niini hangtud makita sa Ginoo nga angay bulagon ang trigo gikan sa tahup—hangtud ang mga matarung mapundok na, ug ang mga dautan pagabugkuson nga binangan aron sa pag-andam alang sa pagsunog [tan-awa sa D&P 86]—hangtud ang mga karnero pagalainon gikan sa mga kanding [tan-awa sa Mateo 25:31–34]. Kadtong walay kainit sa mga pagbati nga makigbatok, sa matag adlaw, ug sa matag tuig, kinahanglang maglakaw diha sa pagkamapainubsanon; ug kon ang mga kaigsoonang lalaki ug mga babaye maunhan sa mga sayop, ang inyong mga kasingkasing kinahanglang mapuno sa pagkamabination—sa inigsoon, sama sa mga pagbati sa anghel—sa dili pagtan-aw sa ilang mga sayop kutob sa mahimo (DNW, 22 sa Ago. 1860, 1).

Ang mga kasingkasing sa mga maaghop ug mapainubsanon puno sa kalipay ug paghupay sa kanunay (DBY, 228).

Kadtong mga matinuoron mga matinud-anon sa ilang mga kaugalingon, sa uban, ug ngadto sa Ginoo.

Ang mga katawhan kinahanglang magmatinuoron, kinahanglan silang magpuyo nga matinud-anon atubangan sa ilang Dios, ug mopasidungog sa ilang mga calling ug sa pagkaania sa yuta. Mangutana kamo kon mahimo ba kana? Oo; ang doktrina nga atong gidawat mopahumok sa tig-a nga mga kasingkasing (DBY, 232).

Kinahanglan kitang magkat-on, magbansay, magtuon, makahibalo ug makasabut kon giunsa sa mga anghel ang pagpuyo uban sa usag usa. Sahigayon nga moabut kining komunidad ngadto sa hingpit nga pagkamatinuoron ug pagkamatarung dili gayud kamo makakita og tawo nga kabus; walay makulangan, ang tanan gayud adunay igo. Matag lalaki, babaye, ug bata makaangkon sa tanan nila nga panginahanglan dihadiha dayon nga mahimo silang tanan nga matinud-anon. Kon ang kadaghanan sa komunidad mga bakakon, mohimo kini sa bahin sa mga matinuoron nga kabus, kay ang mga bakakon mogamit ug mopadato sa ilang mga kaugalingon (DBY, 232).

Gisulayan nako nga mapugngan ang pagkabakakon dinha sa mga indibidwal, ug gisulayan kini nga paagi nga mohimo kanila nga matinuoron. Kon mokuha ako og karpentero ug sweldohan siya og tulo ka dolyares sa usa ka adlaw, ug tulo ka adlaw una niya mahuman ang unom ka panel nga pultahan nga humnon lamang og usa ka adlaw sa usa ka maayo nga trabahante, o gani usa ka pultahan ug tunga ang mahuman, dili ako gustong mobayad kaniya og tulo ka dolyares sa matag adlaw alang niana nga trabaho. Apan pipila dinhi nga ania wala nay paghukom, pagpili, o ideya sa eksakto o husto, kay gusto nga mabayaran alang sa trabaho nga wala nila buhata, ug kana giisip nila nga matinuoron: apan sama ra kana sa bisan unsa nga pagpamakak dinhi sa kalibutan (DNW, 2 sa Dis. 1857, 4).

Himoa nga [ang tanang trabahante] molambo. … Adunay dakong kalamboan nga nanghitabo taliwala niini nga mga katawhan, ug nagpadayon gihapon kita sa atong paglambo. Mangayo kita sa Ginoo og kaalam … nga aron magpadayon sa paglambo, hangtud nga kita moabut ngadto sa sumbanan sa kamatuoran sa tanan natong mga lihok ug mga pulong; aron kon ako mopatrabaho sa usa ka mason sa pagtukod og bongbong buhaton niya kini nga matinuoron, ug ingon man sa uban nga mga trabahante. Dayon kon wala hagoi sa usa ka tawo ang iyang sweldo, dili siya mangayo o mokuha niini. … Ang pagkamatinuoron dili gayud mosulod sa mga kasingkasing sa ingon nga mga tawo; ang ilang lagda mao ang pagtago sa unsay ilang makuha ug sa pagkuha kutob sa ilang makuha, pinaagi man sa pagkamatinuoron o dili, ug mangandoy pa og daghan (DNW, 2 sa Dis. 1857, 5).

Alaot ngadto niadtong kinsa miangkon nga siya Santos ug dili matinuoron. Pagmatinuoron lamang sa inyong mga kaugalingon, ug kamo mahimong matinuoron sa inyong mga kaigsoonan (DBY, 231–32).

Ang mga bata kinahanglang matudloan sa pagkamatinuoron, ug sila kinahanglang magtubo uban sa pagbati diha kanila nga sila dili gayud mokuha og alpirel nga dili ila; dili magpataka og butang bisan unsa, apan sa kanunay ang tanang butang ibutang sa iyang butanganan. Kon makakita sila og bisan unsa pangitaa ang tag-iya. Kon adunay butang sa ilang silingan nga madaot, ibutang kini sa dapit nga dili madaot, ug magpakahingpit sa pagkamatinuoron ngadto sa usag usa (DNW, 23 sa Okt. 1872, 5).

Ang matinuoron nga mga kasingkasing makahimo og matinuoron nga mga lihok—ang balaan nga mga tinguha makahimo og tukma nga mga buhat nga makita sa kadaghanan. Tumana ang inyong mga kasabutan ug sa sagrado nga paagi tumana ang inyong mga gipamulong. Ako walay pakigdait sa usa ka tawo nga mohimo og saad ug dili motuman niini. Ang yano nga kamatuoran, pagkayano, pagkamatinuoron, pagkamatarung, hustisya, kalooy, gugma, pagkamabination, pagbuhat og maayo ngadto sa tanan ug dili paghimo og dautan kang bisan kinsa, pagkasayon sa pagpakabuhi pinaagi niana nga mga baruganan! Usa ka libo pilo-piloon ang kasayon kay sa paghimo og pangilad! (DBY, 232).

Mas maayo pa nga magmatinuoron, nga magpuyo dinhi sa pagkamatarung, ug biyaan ug likayan ang dautan, kay sa mahimong bakakon. Mao kini ang pinakasayon nga agianan sa kalibutan nga magmatinuoron,—nga magmatarung atubangan sa Dios; ug kon ang mga katawhan makakat-on niini, buhaton nila kini (DBY, 232).

Mga Sugyot alang sa Pagtuon

Ang pag-ila sa mga kamot sa Ginoo dinhi sa atong mga kinabuhi makaugmad og pagkamapasalamaton.

Si Presidente Young nagsugyot nga ang mga Santos kinahanglang magmapasalamaton sa harina, mais, ug mga utanon kay sa mga bulawan og pilak. Sa matag usa kanato unsa ang angay natong pasalamatan? (Tanawa usab sa D&P 59:7, 21.) Giunsa ninyo sa pagpahayag ang inyong pasalamat ngadto sa Dios, sa inyong pamilya, ug sa uban?
Sa inyong hunahuna ngano nga si Presidente Young mitudlo man sa mga Santos nga ikalipay ang mga pagpanggukod, mga sakit, kapait, ug kasakit? Unsa nga mga panalangin ang moresulta gikan niini nga mga kahimtang? Sa unsang paagiha nga ang mga pag-antus ug mga pagsulay mahimo nga alang sa atong kaayohan? Unsaon nato nga makakat-on sa pagpasalamat ug paghatag og bili sa mga kalisdanan sa kinabuhi samtang gisinati nato ang malisud nga mga panahon?
Si Presidente Young miingon, “Ania kita [dinhi] sa katuyoan nga makakaton kon unsay buhaton niining kinabuhi karon ug sa mga panalangin karon nga gihatag kanato.” Unsa ang mahitabo kon dili nato ipakita ang pagkamapasalamaton pinaagi sa pagkat-on og unsay buhaton sa atong mga panalangin karon? (Tan-awa usab sa Mosiah 2:20–21.) Unsa ang mahimo natong buhaton aron ikapakita ang pasalamat sa atong mga panalangin? Unsaon nato sa “pagpalambo sa matag panalangin nga gihatag sa Ginoo kanato”?

Kadto kinsa mapainubsanon makaila sa ilang panginahanglan sa Ginoo.

Si Presidente Young namulong sa panginahanglan nga mahimong sama sa usa ka bata aron “makadawat sa nag-una nga mga kasanag sa espiritu sa Ebanghelyo” ug miingon nga ang tawo makapalambo sa kahibalo ug kaalam. Unsa nga ebidensya ang inyong nakita sa kaugalingon o sa uban nga kini tinuod? Unsay anaa nga mga kinaiya sa mga bata nga makagiya sa mga hingkod sa pagkahimong mapainubsanon?
Si Presidente Young nagtudlo, “Kita wala gayud gawas kon unsay buhaton sa Ginoo kanato.” Unsaon man nato sa pagkahibalo kon unsay gusto sa Ginoo nga mahitabo kanato? Sa unsang paagi nga ang atong pagkamapainubsanon makahimo sa Ginoo sa paggiya kanato? (Tan-awa usab sa Mosiah 3:19.) Giunsa sa Ginoo paggiya sa inyong kinabuhi ug pagtabang kaninyo nga mahimong mas maayo nga tawo?
Si Presidente Young miingon, “Ang tawo nga walay igong kainit sa pagbati sa pagbuntog kinahanglan nga kanunayng maglakaw diha sa pagkamapainubsanon, kay sa ipanghambog ang iyang pagkamatarung labaw sa iyang igsoon.” Sa unsang paagi nga ang pagtandi sa atong kalig-on ngadto sa kahuyang sa uban modala ngadto sa pagkamapahitas-on? Unsa nga mga panalangin ang moabut ngadto sa mga mapainubsanon? (Tan-awa usab sa Ether 12:27.)

Kadtong mga matinuoron mga matinud-anon sa ilang mga kaugalingon, sa uban, ug ngadto sa Ginoo.

Sa unsa nga paagi nga ang mga anghel magsilbi nga mga modelo kon unsaon sa mga pamilya ug mga komunidad sa pagpuyo kauban ang usagusa?
Si Presidente Young namahayag nga diha sa komunidad sa matinuoronnga mga tawo walay makulangan ug ang tanan gayud adunay igo. Nganong tinuod man kini? Unsay epekto sa pagkabakakon diha sa atong komunidad? Unsay kaayohan nga mahimo sa pagkamatinuoron diha saatong komunidad?
Unsaon nato sa pagtudlo ang atong mga anak nga mahimong matinuoron? Nganong importante man ang pagkamatinuoron sa tanang aspeto sa atong kinabuhi?
Sumala ni Presidente Young, ngano man nga ang pagkamatinuoron “ usa ka libo pilo-piloon ang kasayon kay sa [pagbansay] og pangilad” ug mao ang pinakasayon nga dalan sa kalibutan”?