Mga Dispensasyon sa Ebanghelyo

Ang Dios miestablisar ug mitudlo sa iyang ebanghelyo sa sinugdanan, mipadayag na usab niini sa nagkalainlaing mga dispensasyon taliwala sa mga panahon sa apostasiya, ug mipahiuli niini pag-usab karon niining katapusang panahon. Si Presidente Brigham Young nagmaya kalabut niining katapusang “dispensasyon sa tanang mga dispensasyon,” diin, siya miingon, “molabaw pa sa katahum ug himaya sa kada laing dispensasyon nga sukad gihatag ngadto sa mga tawo dinhi sa yuta” (DBY, 442).

Mga Pagtulun-an ni Brigham Young

Ang Dios unang mipadayag sa plano sa kaluwasan ngadto ni Adan sa mortalidad ug sukad niana sa matag karon ug unya mipahiuli sa Iyang gingharian pinaagi sa Iyang mga propeta.

Ang mahinungdanong plano nga gitawag og plano sa kaluwasan––ang kahugpungan sa doktrina, mga ideya, ug mga gipangbuhat nga adunay kalabutan sa tanang salabutan nga anaa sa kahangturan (DBY, 56 ) … [gi] plano didto sa kalangitan alang sa katubsanan sa katawhan gikan sa sala, ug sa ilang pagkahiuli ngadto sa presensya sa Dios (DBY, 448).

Sa dihang kini nga Gingharian gitukod sa bisan unsa nga panahon [dinhi sa yuta], ang Espiritu niini nagpuyo diha sa mga kasingkasing sa mga matinud-anon, samtang ang makita niini nga bahin anaa sa katawhan, mga balaod, mga ordinansa, mga panabang, mga panggobyerno, mga opisyales, mga tigdumala, ug kada laing madugang nga gikinahanglan alang sa tibuok niini nga paglihok aron pagkab-ot sa katuyoan niini [tan-awa sa Moises 6:7; D&P 22:3] (DBY, 441).

Adan. Ang Dios sa makausa nailhan sa yuta diha sa iyang mga anak … sama sa pagkaila nato sa usag usa. Si Adan sinati sa iyang Amahan kinsa mibutang kaniya dinhi niini nga yuta ingon nga kita sinati sa atong yutanong mga ginikanan. Ang Amahan kanunay nga mianhi aron sa pagbisita sa iyang anak nga si Adan, ug nakig-istorya ug nakiglakaw uban kaniya; ug ang mga anak ni Adan sa ingon man nasinati kaniya, ug ang mga butang nga may kalabutan sa Dios ug sa langit ingon ka sinati diha sa katawhan sa unang mga kapanahonan sa ilang pagpuyo dinhi sa yuta, sama sa … atong mga tanaman ngadto sa atong mga asawa ug mga anak, o sama sa dalan paingon sa Kadagatang Pasipiko ngadto sa sinati nga magbibiyahe [tan-awa sa Moises 3:15–21; 4:14–30; 5:4–5, 9, 12; 6:51] (DBY, 104).

Luwas kita sa pag-ingon nga gikan sa adlaw nga si Adan gilalang ug gibutang diha sa Tanaman sa Eden hangtud karong adlawa, ang plano sa kaluwasan ug ang mga pinadayag kabahin sa kabubut-on sa Dios ngadto sa tawo wala mausab, bisan tuod og ang katawhan sulod sa daghang mga kapanahonan wala mauyoni, agig sangputanan sa apostasiya ug kadautan. Walay ebidensya nga makita diha sa Biblia nga ang Ebanghelyo kinahanglang usa ka butang sa mga panahon sa mga Israelita, lain sa mga panahon ni Kristo ug sa iyang mga Apostoles, ug lain sa ika-19 nga siglo, apan, sukwahi niini, gimandoan kita nga ang Dios mao sa matag panahon, ug nga ang iyang plano sa pagluwas sa iyang mga anak pareho. Ang plano sa kaluwasan usa ra, gikan sa sinugdanan sa kalibutan hangtud na sa katapusan niini [tan-awa sa Moises 6:51–68] (DBY, 103–4).

Ang Ebanghelyo anaa na diha sa mga tawo gikan sa kapanahonan ni Adan hangtud sa pag-abut sa Mesiyas; kini nga Ebanghelyo ni Kristo naggikan sa sinugdanan ngadto na sa katapusan [tan-awa sa Moises 5:58–59; D&P 20:25–26] (DBY, 103–4).

Enoch. Si Enoch nakaangkon og salabutan ug kaalam gikan sa Dios nga pipila ra ka mga tawo ang nakapahimulos sukad, nakiglakaw ug nakigistorya sa Dios sulod sa daghang mga katuigan; apan, sumala sa kasaysayan nga gisulat ni Moises, taas-taas ang iyang panahon sa pagtukod sa iyang gingharian diha sa katawhan. Ang pipila nga misunod kaniya nakapahimulos sa kahingpitan sa Ebanghelyo, ug ang uban sa kalibutan misalikway niini (DBY, 105).

Si Enoch kinahanglang moistorya ug motudlo sa iyang mga katawhan atol sa panahon sa tulo ka gatus ug saysenta ka tuig, una pa niya sila naandam nga mosulod sa ilang kapahulayan, ug dayon siya nakabaton og gahum sa pagbalhin sa pagkahimaya sa iyang kaugalingon ug sa iyang mga katawhan, uban sa rehiyon nga ilang gipuy-an, ilang mga balay, mga tanaman, mga umahan, mga baka ug tanang nilang mga kabtangan [tan-awa sa Moises 7:68–69] (DBY, 105).

Si Enoch ug ang iyang kaubanan gikuha gikan sa yuta, ug ang kalibutan nagpadayon sa paghinog diha sa kadautan hangtud nga sila nalaglag pinaagi sa dakong baha sa kapanahonan ni Noe; ug, “sama sa kapanahonan ni Noe, ingon man usab ang mahitabo sa kapanahonan sa pag-abut sa Anak sa Tawo” [tan-awa sa Genesis 6:5; Moises 6:26–7:69] (DBY, 105).

Noe. Sa sinugdanan, human kini nga yuta giandam alang sa tawo, ang Ginoo misugod sa iyang buhat diha sa unsay gitawag karon nga kontinente sa Amerika, diin ang Tanaman sa Eden gibuhat (DBY, 102).

Ang Ginoo mipadala sa iyang Ebanghelyo ngadto sa mga tawo; siya miingon, ako kining ihatag ngadto sa akong anak nga si Adan, kang kinsa gikan kaniya gidawat kini ni Methuselah; ug si Noe midawat niini gikan ni Methuselah (DBY, 105).

Sa kapanahonan ni Noe, sa mga adlaw sa paglutaw sa arka, iyang gidala ang mga tawo ngadto sa laing dapit sa yuta; ang yuta nabahin, ug didto iyang gitukod ang iyang gingharian [tan-awa sa Genesis 6:1–8:21] (DBY, 102).

Abraham. Si Abraham matinud-anon ngadto sa tinuod nga Dios; iyang gigun-ob ang mga dios-dios sa iyang amahan ug nakabaton sa Priesthood nga sunod sa kapunongan ni Melchizedek [tan-awa sa D&P 84:14], nga sunod sa kapunongan sa Anak sa Dios [tan-awa sa D&P 107:2–3], ug usa ka saad nga kabahin sa pagsanay sa iyang binhi nga walay katapusan; kon kamo makabaton sa balaang Priesthood, nga sunod sa kapunongan ni Melchizedek, gisilyo diha kaninyo, ug ang saad nga ang inyong binhi mahimong daghan sama sa mga bitoon sa kalangitan, o sama sa mga balas sa baybayon, ug kabahin sa inyong pagsanay nga walay katapusan, niana makabaton na kamo sa saad ni Abraham, Isaac, ug Jacob, ug sa tanang mga panalangin nga gihatag ngadto kanila [tan-awa sa Genesis 12:2–3; 13:16; 14:18–19; 15:5; Abraham 1:2–4, 18–19; 2:9–11; D&P 84:14] (DBY, 106).

Moises. Ang Ebanghelyo diha na sa katawhan gikan sa kapanahonan ni Adan hangtud na sa pag-abut sa Mesiyas; kini nga Ebanghelyo ni Kristo naggikan pa sa sinugdanan ngadto sa katapusan. Nan nganong gihatag man ang balaod ni Moises? Agig sangputanan sa pagkadili masulundon sa mga Anak ni Israel, ang pinili sa Dios; ang mismong binhi nga iyang gipili nga mahimo niyang katawhan, ug kang kinsa siya miingon nga iyang ibutang ang iyang pangalan. Kini nga binhi ni Abraham hilabihan nga misupak batok kaniya ug sa iyang mga mando nga ang Ginoo miingon ngadto kang Moises, “Ako mohatag kanimo og usa ka balaod nga mahimong magtatagad sa pag-agak kanila ngadto kang Kristo” [tan-awa sa Mga Taga-Galacia 3:24]. Apan kini nga balaod lisud tumanon; usa kini ka balaod sa kalibutanon nga mga sugo [tan-awa sa D&P 84:23–27] (DBY, 104).

Kon sila nalimpyo ug balaan, ang Anak ni Israel dili unta mobiyahe og usa ka tuig uban ni Moises sa wala pa sila makadawat sa ilang mga pagtuga ug sa Melchizedek Priesthood [tan-awa sa D&P 84:23] (DBY, 106).

Jesukristo. Si Jesus mipahigayon sa pagtukod sa Gingharian sa Dios dinhi sa yuta. Iyang gipasiugdahan ang mga balaod ug mga ordinansa sa Gingharian [tan-awa sa Mateo 16:18–19; Mga Taga-Efeso 1:22–23; 4:11–15] (DBY, 29).

Ang priesthood ug ang hingpit nga ebanghelyo sa gingharian nawala gikan sa yuta sa panahon sa Dakong Apostasiya.

Sa unang mga adlaw sa Kristiyanong Simbahan atong nasabtan nga dihay dako nga pagpangagpas diha sa mga miyembro niini kalabut sa ilang gituohan ug gipangbuhat, ug ang pagpakatap niining mapangagpason nga mga ideya nakahimo og panagbahin ug panagbulag. Bisan sa panahon sa mga Apostoles adunay ebidensya sa dakong panagbahin, kay atong mabasa nga ang pipila iya ni Pablo, ang pipila iya ni Apolos, ug ang uban iya ni Cefas [tan-awa sa 1 Mga Taga-Corinto 1:10–13]. Ang mga tawo niadtong panahona adunay ilang mga pinalabi, kinsa nagtudlo kanila sa lahi nga mga doktrina nga wala gidawat ug gipahibalo sa kinatibuk-an (DBY, 107).

Nganong ingon man ka layo ang ilang pagkahisalaag gikan sa dalan sa kamatuoran ug pagkamatarung? Tungod kay mibiya sila sa Priesthood ug wala nay giya, walay lider, walay paagi sa pagkasayud sa unsay tinuod ug unsay dili tinuod. Kini ginaingon nga ang Priesthood gikuha gikan sa Simbahan, apan dili kini mao, ang Simbahan mibiya sa Priesthood ug nagpadayon sa paglakaw diha sa kasaypanan, mipahilayo gikan sa mga sugo sa Ginoo, ug mipasiugda sa laing mga ordinansa [tan-awa sa Mga Taga-Galacia 1:6–8; 2 Timoteo 1:15; 3 Juan 1:9–10] (DBY, 107).

Apan mao kadto ang panahon nga nagsugod sila sa paglapas sa mga balaod sa hinayhinay, miusab sa mga ordinansa, ug misupak sa walay katapusang pakigsaad, ug ang Ebanghelyo sa gingharian nga gipahigayon ni Jesus sa pag-establisar sa iyang panahon ug ang Priesthood gikuha gikan sa yuta [tan-awa sa Isaias 24:5; 2 Mga Taga-Tesalonica 2:1–12; Pinadayag 12:6; D&P 1:15] (DBY, 107).

Ang Ginoo mipahiuli sa Iyang ebanghelyo ug sa katungod sa priesthood niining katapusang dispensasyon pinaagi ni Propeta Joseph Smith.

Mga henerasyon ang miabut ug nawala nga wala makabaton sa pribilehiyo nga makadungog sa tingog sa Ebanghelyo, nga miabut kaninyo pinaagi ni Joseph Smith––gipadayag kana kaniya gikan sa langit pinaagi sa mga anghel ug mga panan-awon. Anaa kanato ang Ebanghelyo ug ang mga yawe sa balaang Priesthood [tan-awa sa D&P 1:17–23, 30; 27:5–13; 110:11–16; 128:18–21] (DBY, 107–8).

Usa kita ka katawhan kansang pagbarug ug pag-uswag gikan sa sinugdanan, nahimong buhat sa Dios ang atong Langitnong Amahan, diin sa iyang kaalam iyang nakita nga angayan sa pagsugod alang sa pagtukod pag-usab sa iyang Gingharian dinhi sa yuta (DBY, 108).

Apan sama sa kapanahonan sa atong Manluluwas, mao usab kini sa pagabut niining bag-ong dispensasyon. Dili kini pinasubay sa mga gituohan, mga tradisyon, ug gihunahuna nang daan nga mga ideya sa mga tawo sa Amerika. Ang mensahero wala moadto sa usa ka bantugan nga ministro sa bisan unsa sa gitawag nga gitukod nga mga relihiyon, wala niya gidawat ang ilang interpretasyon sa mga Balaang Kasulatan. Ang Ginoo wala moabut uban sa mga kasundalohan sa langit diha sa gahum ug hilabihan nga himaya, ni mipadala sa iyang mga mensahero nga [tinamingan] sa bisan unsang butang gawas sa kamatuoran sa langit, sa pagpakigsulti ngadto sa maaghup, mapainubsanon, batan-on nga ubos ang kagikan, nga kinasingkasing nga nangutana kabahin sa kahibalo sa Dios. Apan iyang gipadala ang iyang anghel ngadto sa samang wala mailhi nga tawo, si Joseph Smith, Jr., kinsa human niana nahimong usa ka Propeta, Manalagna, ug Tigpadayag, ug [ang Ginoo] mipahibalo kaniya nga kinahanglang dili siya moapil bisan hain sa mga relihiyosong sekta nianang panahona, kay silang tanan sayop; nga sila nagsunod sa mga baruganan sa mga tawo kay sa ni Ginoong Jesus; nga siya adunay usa ka buhat nga ipahigayon alang kaniya, ingon nga siya mipamatuod sa pagkamatinud-anon diha sa iyang atubangan [tan-awa sa Joseph Smith––Kasaysayan 1:11–26] (DBY, 108).

Kini gimando didto sa katiguman sa kahangturan, dugay na kaayo sa wala pa ang katukuran sa yuta, nga siya, si Joseph Smith, kinahanglan mao ang tawo, sa katapusang dispensasyon niini nga kalibutan, ang modala sa pulong sa Dios ngadto sa mga katawhan, ug modawat sa kahingpitan sa mga yawe ug gahum sa Priesthood sa Anak sa Dios. Ang Ginoo nagtanaw kaniya, ug sa iyang amahan, ug sa amahan sa iyang amahan, ug sa ilang mga kaliwatan balik ngadto kang Abraham, ug gikan ni Abraham ngadto sa lunop, gikan sa lunop ngadto kang Enoch, ug gikan ni Enoch ngadto kang Adan. Iyang gibantayan kana nga pamilya ug kana nga dugo samtang naglatay kini gikan sa gigikanan niini ngadto na sa pagkahimugso niana nga tawo. Gi-ordinahan na siyang daan didto sa kahangturan sa pagdumala niining katapusang dispensasyon [tan-awa sa 2 Nephi 3:6–15] (DBY, 108).

Ang Ginoo naglihok sulod sa mga siglo aron sa pag-andam sa dalan alang sa pag-abut sa mga sulod niana nga Basahon [ang Basahon ni Mormon] gikan sa ilawom sa yuta, aron mamantala ngadto sa kalibutan, aron sa pagpakita ngadto sa mga lumulupyo niini nga siya buhi gihapon, ug nga siya, sa ulahing mga adlaw, mopundok sa iyang mga pinili gikan sa upat ka mga suok sa yuta. … Ang Ginoo misugo ug midumala sa tanan niini, alang sa pagpagawas, ug sa pagtukod sa iyang Gingharian sa katapusang mga adlaw [tan-awa sa 1 Nephi 13; D&P 20:6–16] (DBY, 109).

Ania ang Basahon ni Mormon. Nagtuo kami nga naglangkob kini sa kasaysayan sa orihinal nga mga lumulupyo sa kontinente [sa Amerika], sama nga ang Daang Tugon naglangkob sa kasaysayan sa nasud sa mga Judeo. Sulod niana nga basahon atong mahibaloan nga si Jesus mibisita niini nga kontinente, mihatag sa iyang Ebanghelyo ug mi-ordinar og Napulog Duha ka mga Apostoles. Mituo kami niining tanan, apan wala kami mohangyo kaninyo sa pagtuo niini. Unsay among gihangyo mao nga kamo motuo sa unsay girekord diha sa Balaang Biblia kalabut sa Dios ug sa iyang mga pinadayag ngadto sa mga tawo. Buhata kini sa tanang kamatinuoron ug sa kinasingkasing, dayon kamo masayud nga ang Basahon ni Mormon tinuod. Ang inyong mga hunahuna mabuksan ug masayud kamo pinaagi … sa Espiritu sa Dios nga nagtudlo kami sa kamatuoran (DBY, 109).

Unsa ang giingon ni Oliver Cowdery (usa sa Tulo ka mga Saksi sa Basahon ni Mormon), human siya nahilayo sa Simbahan sa daghang mga katuigan? Nakakita siya ug nakig-istorya sa mga anghel, kinsa mipakita kaniya sa mga panid, ug iya kining gigunitan. Mibiya siya sa Simbahan tungod kay nawala kaniya ang gugma alang sa kamatuoran; ug human siya mibiyahe nga nag-inusara sulod sa mga katuigan, usa ka maayong tawo ang misulod sa iyang opisina ug miingon kaniya, “Mr. Cowdery, unsa ang imong hunahuna kabahin sa Basahon ni Mormon karon? Nagtuo ka ba nga kini tinuod?” Mitubag siya, “Wala, sir, ako wala nagtuo!” “Nan,” miingon ang maayong tawo, “Naghunahuna ako og sama; kay ako nakahukom nga imo nang nakita ang kabuang sa imong mga pamaagi ug nakahukom sa pagbakwi sa unsay sa makausa imong gipamahayag nga tinuod.” “Sir, nasaypan ko nimo; wala ako magtuo nga ang Basahon ni Mormon tinuod; milabay na ako nianang puntoha sa pagtuo, kay ako nasayud nga kini tinuod, sama nga ako nasayud nga ikaw karon naglingkod sa akong atubangan.” “Mopamatuod ba gihapon ikaw nga nakakita ka og usa ka anghel?” “Oo, sama sa akong pagkakita kanimo karon; ug ako nasayud nga ang Basahon ni Mormon tinuod” (DBY, 110).

Si Joseph Smith mipahimutang sa pundasyon sa Gingharian sa Dios sa katapusang mga adlaw (DBY, 458).

Gusto kong mosinggit og Aleluya, sa tanang panahon, kon maghunahuna ako nga ako nakaila gayud ni Joseph Smith, ang Propeta kinsa giamumahan ug gi-ordinahan sa Ginoo, ug ngadto kang kinsa iyang gihatag ang mga yawe ug gahum sa pagtukod sa Gingharian sa Dios dinhi sa yuta ug sa pagpadayon niini. Kini nga mga yawe gisalig ngadto niining mga katawhan, ug kita adunay gahum sa pagpadayon sa buhat nga gisugdan ni Joseph, hangtud nga ang tanan andam na alang sa pag-abut sa Anak sa Tawo. Mao kini ang tuyo sa mga Santos sa Ulahing mga Adlaw (DBY, 458).

Kini nga gingharian dili mabungkag nila [sa mga dautan], tungod kay mao kini ang katapusang dispensasyon––tungod kay mao kini ang kahingpitan sa panahon. Mao kini ang dispensasyon sa tanang mga dispensasyon, ug molabaw diha sa katahum ug himaya sa matag dispensasyon nga sukad gisalig ngadto sa mga tawo dinhi sa yuta. Ang Ginoo modala pagbalik sa Zion, motubos sa iyang Israel, mougbok sa iyang sumbanan dinhi sa yuta, ug mohan-ay sa mga balaod sa iyang Gingharian, ug kadtong mga balaod molabaw (DBY, 442).

Mga Sugyot alang sa Pagtuon

Ang Dios unang mipadayag sa plano sa kaluwasan ngadto ni Adan sa mortalidad ug sukad niana sa matag karon ug unya mipahiuli sa Iyang gingharian pinaagi sa Iyang mga propeta.

Giunsa ni Presidente Young paghulagway ang “mahinungdanong plano nga gitawag og plano sa kaluwasan”? (Tan-awa usab sa Abraham 3:21–28.)
Sa dihang gipadayag sa Ginoo ang plano sa kaluwasan ngadto sa mga tawo ug mitukod sa Iyang gingharian dinhi sa yuta, unsa man ang gikinahanglan alang sa “tibuok niini nga paglihok”?
Sumala ni Presidente Young, kanus-a gipasiugdahan sa Dios ang plano sa kaluwasan ug ang priesthood ngadto sa Iyang mga anak dinhi sa yuta? (Tan-awa usab sa Moises 5:58–59; 6:7.)
Unsa ang linain nga calling sa kada propeta kinsa nangulo sa usa sa nagunang mga dispensasyon sa ebanghelyo?

Ang priesthood ug ang hingpit nga ebanghelyo sa gingharian nawala gikan sa yuta sa panahon sa Dakong Apostasiya.

Sumala ni Presidente Young, nganong gikuha man ang unang Simbahan ni Kristo gikan sa yuta?
Unsa ang pipila ka mga ebidensya nga ang unang Simbahan ni Kristo ug ang priesthood nawala gikan sa yuta? (Tan-awa usab sa Joseph Smith––Kasaysayan 1:17–20.) Unsa ang gibuhat sa mga miyembro sa unang Simbahan nga nahisalaag “ingon ka layo gikan sa dalan sa kamatuoran”? Sa unsang paagi nga ang priesthood nahimong usa ka “paagi sa pagkasayud kon unsay tinuod ug unsay dili tinuod” diha sa inyong kinabuhi?

Ang Ginoo mipahiuli sa Iyang ebanghelyo ug sa katungod sa priesthood niining katapusang dispensasyon pinaagi ni Propeta Joseph Smith.

Ang Dios mipahayag sa Iyang kamatuoran ngadto sa usa ka “maaghup, mapainubsanon, nga batan-on nga ubos ang kagikan, nga sinsero nga nangutana kabahin sa kahibalo sa Dios.” Unsa man ang kahulugan niini alang kaninyo ug sa uban pa kinsa matinuorong nangita sa kamatuoran?
Unsa nga mga kinaiya nga anaa kang Joseph nga nakatabang kaniya nga makatuman sa iyang calling nga mahimong “ang tawo, sa katapusang dispensasyon niini nga kalibutan, nga modala sa pulong sa Dios ngadto sa mga tawo”?
Unsa ang papel sa Basahon ni Mormon diha sa pagpahiuli sa ebanghelyo? (Tan-awa usab sa D&P 20:6–16.) Unsa ang inyong makat-unan gikan sa pagpamatuod ni Oliver Cowdery kabahin sa Basahon ni Mormon?
Unsa ang pagpamatuod ni Presidente Young kalabut “sa tuyo sa mga Santos sa Ulahing mga Adlaw”?

Peter, James, and John ordaining Joseph — Ang paghulagway sa *artist* kang Pedro, Santiago, ug Juan nga mipahiuli sa mga yawe sa miaging mga dispensasyon. Ang dispensasyon sa kahingpitan sa panahon, miingon si Presidente Young, “molabaw diha sa katahum ug himaya sa matag dispensasyon nga sukad gisalig ngadto sa mga tawo” (*DBY,* 442).

log home — Ang sulod sa gitukod pag-usab nga panimalay nga troso ni Peter Whitmer, sa Fayette, New York. Ang Simbahan gitukod didto sa orihinal nga panimalay niadtong 6 sa Abril 1830.