Ang Atong Pagpangita sa Kamatuoran ug Personal nga Pagpamatuod

Ang pagpangita ni Presidente Young alang sa kamatuoran sa Dios sa katapusan nasulbad pinaagi sa sinsero ug yano nga pagpamatuod sa usa ka “tawo nga dili larino … kinsa makasulti lamang og, ‘Ako nasayud, pinaagi sa gahum sa Espiritu Santo, nga ang Basahon ni Mormon tinuod, nga si Joseph Smith usa ka Propeta sa Ginoo.’ “Miingon si Presidente Young, “Ang Espiritu Santo nga mitabang niana nga indibidwal nakalamdag sa akong pagsabut, ug ang kahayag, ug himaya, ug imortalidad diha sa akong atubangan” (DNW, 9 sa Peb. 1854, 4). Sa iyang tibuok kinabuhi, naningkamot siya sa pagsunod sa mga kamatuoran sa ebanghelyo, “Samtang nagtubo ang akong edad ako naglaum nga mouswag sa tinuod nga kahibalo sa Dios ug pagkadiosnon. Ako naglaum nga madugangan ang akong gahum diha sa Makagagahum ug pag-impluwensya sa pagpalig-on sa kalinaw ug pagkamatarung diha sa yuta, ug sa pagdala … sa tanan nga mopatalinghug sa mga baruganan sa pagkamatarung, ngadto sa usa ka tinuod nga kahulugan sa kahibalo sa Dios ug pagkadiosnon, sa ilang mga kaugalingon ug sa relasyon nga ilang padayunon didto sa langit ug sa mga langitnong mga binuhat. … Ako mag-ampo nga kini mao ang mahitabo dili lamang sa akong kaugalingon apan uban sa tanang mga Santos, aron kita motubo sa grasya ug sa kahibalo sa kamatuoran ug mahimong hingpit sa Iyang atubangan” (DNW, 10 sa Hunyo 1857,

Mga Pagtulun-an ni Brigham Young

Daghan ang nagtinguha nga makakita sa kamatuoran, apan dili tanan modawat niini.

Ang daghang bahin sa mga lumulupyo sa yuta adunay hilig sa pagbuhat sa matarung. Tinuod kana. Adunay tigpasidaan sa matag tawo nga mao ang adunay tibuok gahum, kon tugutan sa pagbuhat, ug mogiya ngadto sa kamatuoran ug hiyas [tan-awa sa Moroni 7:15–17] (DBY, 423).

Ang matinuoron nga mga kasingkasing, bisan asa sa kalibutan, nagtinguha nga makahibalo sa matarung nga paagi. Nangita sila niini, ug nangita sa gihapon niini. Dihay mga katawhan sa yuta sa tanang panahon kinsa naningkamot sa bug-os nilang kasingkasing nga makahibalo sa mga paagi sa Ginoo. Kadtong mga indibidwal nakahimo og maayo, tungod kay sila adunay abilidad (DBY, 421).

Hangtud nga sila dili mosalikway sa adlaw sa grasya, adunay butang nga anaa sa tanang mga tawo nga malipay mobarug ug mosalikway sa dautan ug modawat sa kamatuoran. Walay tawo dinhi sa yuta nga dautan kaayo nga, kon siya mosusi sa iyang kaugalingong kasingkasing, dili mopasidungog sa lalaki ug sa babaye nga nag-alagad sa Dios—ang mahiyason ug balaan—ug motamay sa iyang mga kauban nga anaa sa kadautan nga sama sa iyang kaugalingon. Walay tawo dinhi sa yuta, nga anaa sa gahum sa grasya sa Dios sa pagluwas, gawas kon siya nakasala nga ang Espiritu sa Ginoo mihunong sa pagdasig kaniya ug paglamdag kaniya, kon dili mahimuot sa maayo, sa kamatuoran, ug sa mahiyason (DBY, 421).

Na-rekord nga ang uban adunay mga mata sa pagtan-aw, ug dili makakita; mga dunggan sa pagpaminaw, ug dili makadungog; mga kasingkasing aduna sila , apan sila dili makasabut. Kamo kinsa adunay espirituhanong hunahuna, kinsa adunay mga panan-awon nga nabuksan sa inyong mga hunahuna, … makasabut nga ang gahum nga nakahatag kaninyo og pisikal nga pagbati mao ang gahum sa samang Dios nga nakapasabut kaninyo sa kamatuoran [tan-awa sa D&P 88:11–13]. Ang gahum sa naulahi anaa sa kaugalingon … Liboan ug liboan ang nakahibalo, pinaagi sa ilang kaugalingon ug dili makita nga pagbati, sa mga butang kaniadto, sa mga butang karon, ug sa mga butang sa umaabut, sama nga sila nakahibalo sa kolor sa usa ka piraso nga sinina pinaagi sa ilang dayag o pisikal nga panan-aw. Kon kining kahayag sa kaugalingon kuhaon gikan kanila, sila mahimong mas dautan kay sa kaniadto, dili sila makasabut, ug mopahilayo gikan sa mga butang sa Dios (DBY, 421–22).

Ang espiritu nga nagpuyo niini nga mga tabernakulo sa kinaiyanhon nagmahal sa kamatuoran, kini sa kinaiyanhon nagmahal sa kahayag ug sa salabutan, kini sa kinaiyanhon nagmahal sa hiyas, sa Dios ug pagkadiosnon, apan tungod kay nahiusa kaayo sa unod ang ilang mga pagbati nagkasagol ug ang ilang panaghiusa nga gikinahanglan aron sa pag-angkon og hingpit nga kalipay [tan-awa sa D&P 93:33–34], ang espiritu sa tinuod ubos sa impluwensya sa sala nga anaa sa mortal nga lawas, ug nga pagabuntugon pinaagi niini ug pinaagi sa gahum sa Yawa, gawas kon kanunay kining mahayagan niana nga espiritu nga naglamdag sa matag tawo nga moabut sa kalibutan, ug pinaagi sa gahum sa Espiritu Santo nga gihatag pinaagi sa Ebanghelyo (DBY, 422–23).

Bisan asa isangyaw ang Ebanghelyo ni Jesukristo, karon o sa kaniadto, makasugat kini og pundok sa mga tawo nga makita diha kanila ang katahum sa kamatuoran ug ka diosnon, ug ang espiritu moaghat kanila sa pagdawat niini; apan ilang nakita ang ilang mga kaugalingon nga adunay daghang pakiglambigit sa kalibutan, ug adunay daghan kaayong mga kaayohan nga mawala kon sila modawat niini, nakahukom sila nga kini dili maayo, ug ania usab ang panagsumpaki. Ang pipila makabuntog sa mga pangatarungan sa tawo, ug mosunod sa gisulti sa espiritu, samtang ang kadaghanan niiini nga matang sa mga tawo nadani sa hakog nga mga hunahuna ug mounong ngadto sa ilang mga dios-dios (DBY, 434).

Ang matag usa kanato adunay katungdanan sa pagpangita og kahibalo ug saksi sa kamatuoran.

Unsa ang atong katuyoan dinhi? Sa pagkat-on nga malipay og dugang, ug sa pagpalambo sa kahibalo ug kasinatian (DNW, 27 sa Sep. 1871, 5).

Dili gayud kita mohunong sa pagkat-on, gawas kon kita mobiya sa kamatuoran. … Nakasabut ba kamo niana? (DNW, 27 sa Peb. 1856, 2).

Kon kita adunay kahigayunan atong mapabuhong ang atong mga hunahuna sa kahibalo, magbutang niining pisikal nga mga lawas sa daghang mga bahandi sa langitnong kaalam (MS, Okt. 1862, 630).

Ang atong tanang pagpaningkamot sa edukasyon anaa sa pagserbisyo sa Dios, kay ang tanan niini nga mga paningkamot mao ang pagpalig-on sa kamatuoran dinhi sa yuta, ug nga kita madugangan og kahibalo, kaalam, pagsabut sa gahum sa hugot nga pagtuo ug sa kaalam sa Dios, aron kita mahimong angay nga mga sakop nga mopuyo sa mas taas nga kahimtang sa pagpakabuhi ug salabutan nga karon atong natagamtaman (DNSW, 25 sa Okt. 1870, 2).

Mahimo alang sa usa ka tawo kinsa nahigugma sa kalibutan sa pagbuntog niana nga gugma, sa pag-angkon og kahibalo ug pagsabut hangtud nga iyang makita ang mga butang ingon nga mao gayud, niana dili na siya mahigugma sa kalibutan apan motan-aw niini nga ingon niana (DNW, 28 sa Nob. 1855, 2).

Atong pangitaon ang Ginoo uban sa atong tibuok kasingkasing, dayon kita lutason gikan sa kalibutan; walay tawo nga mahigugma niini, nga, o sa ubang butang, gawas sa pagbuhat og maayo niini, sa pagpasiugda sa mahangturong kaayohan sa katawhan, ug sa pag-andam kanila nga mahimaya sa pagka-imortal. … Alang kini kaninyo ug kanako sa pagdawat og kaalam aron makaandam sa kahimayaan ug kinabuhing dayon sa mga gingharian nga anaa na karon sa kahangturan (DNW, 14 sa Mayo 1853, 3).

Ang usa ka lalaki ug babaye nga matinguhaon nga makahibalo sa kamatuoran, kon makadungog sa Ebanghelyo sa Anak sa Dios nga gipahayag sa kamatuoran ug kayano, mangutana sa Amahan, pinaagi sa pangalan ni Jesus, kon kini tinuod. Kon dili sila mosunod niini nga dalan, sila mosulay ug magpatuo sa ilang mga kaugalingon nga sila matinuoron sama ni bisan kinsa nga lalaki ug babaye sa ibabaw sa yuta; apan sila dili, sila walay pagbantay sa ilang kaugalingong mga tinguha (DBY, 430).

Paghulat hangtud kamo makasiksik ug makasiksik pag-usab ug nakaangkon og kaalam sa pagsabut unsa ang atong gisangyaw. … Kon kini buhat sa Dios, kini mobarug [tan-awa sa Mga Buhat 5:38–39] (DBY, 435).

Kini katungdanan ug kahigayunan sa mga Santos sa Ulahing mga Adlaw nga makahibalo nga ang ilang relihiyon tinuod (DBY, 429).

Himoa nga makaangkon ang tanan og kahibalo sa iyang kaugalingon nga kini nga buhat tinuod. Dili kami buot nga kamo moingon nga kini tinuod hangtud nga makahibalo nga kini tinuod; ug kon kamo makahibalo niini, kana nga kahibalo maayo alang kaninyo ingon og ang Ginoo mikanaog ug misulti kaninyo (DBY, 429).

Usa kini ka talagsaon nga pribilehiyo ug panalangin sa Espiritu Santo ngadto sa matag tinuod nga tumutuo; sa pagkahibalo sa kamatuoran alang sa iyang kaugalingon (DBY, 429).

Dili ako buot nga ang mga tawo moduol kanako o sa akong mga kaigsoonan alang sa pagpamatuod sa kamatuoran niini nga buhat; apan ipakuha nila ang mga Kasulatan sa balaan nga kamatuoran, ug diha itudlo nganha kanila ang dalan sama ka yano sa karatula nga nagtudlo sa hustong dalan sa gikapoy nga nagbiyahe. Diha sila giyahi sa pagduol, dili ngadto ni bisan kinsa nga Apostol o Elder sa Israel, apan ngadto sa Amahan pinaagi sa pangalan ni Jesus, ug mangutana sa impormasyon nga ilang gikinahanglan. Sila ba nga moagi niini nga dalan diha sa pagkamatinuoron ug sa kinasingkasing makadawat sa impormasyon? Molingiw ba ang Ginoo gikan sa matinuoron sa kasingkasing nga nangita sa kamatuoran? Dili, dili siya molingiw; ipamatuod kini niya ngadto kanila, pinaagi sa mga pagpadayag sa iyang Espiritu, ang mga kamatuoran niini. Ug kon ang hunahuna bukas sa mga pagpadayag sa Ginoo mas dali kining makasabut mas matin-aw kay sa bisan unsa nga makita sa natural nga mata. Dili ang unsay nakita sa atong mga mata—mahimong mailad kini—apan unsay gipadayag sa Ginoo gikan sa langit nga tinuod ug makanunayon, ug molungtad sa kahangturan (DBY, 429–30).

Kinahanglan nga kita adunay pagpamatuod ni Ginoong Jesus aron makahimo kita sa pag-ila tali sa kamatuoran ug sa sayop, kahayag ug kangitngit, kaniya nga iya sa Dios, ug kaniya nga dili iya sa Dios, ug nakahibalo unsaon sa pagbutang sa tanan diin kini mahisakop. … Walay laing paagi o proseso nga maoy makatudlo gayud sa usa ka tawo aron siya mahimong usa ka Santos sa Dios, ug makapaandam kaniya alang sa celestial nga himaya; kinahanglang makabaton siya diha sulod sa iyang kaugalingon sa pagpamatuod sa espiritu sa Ebanghelyo (DBY, 429).

Kamo ug ako kinahanglang adunay pagpamatuod ni Jesus sulod kanato, o gamay ra kini og kapuslanan alang kanato sa pagpakaaron-ingnon nga mahimong mga sulugoon sa Dios. Kinahanglang makabaton kita og buhi nga saksi sulod sa atong kaugalingon (DBY, 430).

Ang kamatuoran nagdayeg sa matag matinuoron nga tawo, dili igsapayan kon giunsa kini sa pagsulti, ug kon kini madawat ingon og nasinati na nato kini sa atong tibuok kinabuhi. Kini ang pagpamatuod sa kadaghanan sa mga Santos sa Ulahing mga Adlaw sa dihang una silang nakadungog nga gisangyaw ang ebanghelyo, … bisan og bag-o ngadto kanila, ingon og sila nakasabut na niini, ug nga sila nahimong mga “Mormon” gikan sa sinugdanan [tan-awa sa Juan 10:27] (DBY, 432).

Ang Espiritu Santo mohatag kanato og kahibalo sa kamatuoran.

Ang mga tawo mobarug dinhi ug moingon nga sila nasayud nga kini buhat sa Dios, nga si Joseph usa ka Propeta, nga ang Basahon ni Mormon tinuod, nga ang mga pagpadayag pinaagi ni Joseph Smith tinuod, ug kini mao ang katapusang dispensasyon ug ang kahingpitan sa mga panahon, diin ang Dios mipahimutang sa iyang kamot sa pagpundok sa Israel sa katapusang higayon, ug pagtubos ug pagtukod sa Zion…. Giunsa nila sa pagkahibalo niini? Ang mga tawo makahibalo ug magpadayon sa pagkahibalo ug makasabut og daghang mga butang pinaagi sa pagpakita sa Espiritu, nga pinaagi sa pagkahan-ay sa pisikal nga lawas kini dili mahimong ipasabut sa laing paagi. Kadagahan sa labing mahinungdanon nga impormasyon nagagikan lamang sa gahum ug pagpamatuod sa Espiritu Santo…. Mao kini ang bugtong paagi nga kamo makasulti sa kahibalo sa dili makita nga mga butang sa Dios [tan-awa sa 1 Mga Taga-Corinto 2:9–14; 12:3] ( DBY, 430).

Walay mas kubos sa Espiritu Santo … nga makapamatuod nganha kaninyo nga kini mao ang buhat sa Dios. Ang mga tawo nga wala dasiga sa Dios sa ilang kalibutanon nga kaalam dili makalalis niini, o makabatok niini, ni sila pinaagi sa kaalam lamang makapamatuod nga kini tinuod, ni sa ilang mga kaugalingon o ngadto sa uban. Ang ilang pagkadili makahimo sa pagbatok niini wala magpasabut nga kini dili mao ang Gingharian sa Dios, kay adunay daghang mga pangagpas ug mga pamaagi sa yuta, nga dili malalis sa kaalam sa kalibutan, nga bisan pa niana sayop. Walay lain gawas sa gahum sa Makagagahum, naglamdag sa mga hunahuna sa mga tawo, ang makapakita niining mahimayaong kamatuoran nganha sa hunahuna sa tawo (DBY, 430–31).

Unsaon nato sa pagkahibalo sa tingog sa Maayong Magbalantay gikan sa tingog sa usa ka langyaw? Aduna bay tawo nga makatubag niini nga pangutana? Ako makatubag. Sayon ra kaayo. Ngadto sa matag pilosoper dinhi sa yuta, ako moingon, ang inyong mata mahimong mailad, mao usab ang ako; ang inyong mga dunggan mahimong mailad, mao usab ang ako; ang paghikap sa inyong kamot mahimong mailad, mao usab ang ako; apan ang Espiritu sa Dios nga mohatag sa nilalang sa pagpadayag ug sa kahayag sa kahangturan, dili masayop—ang pagpadayag nga nagagikan sa Dios dili gayud masayop. Kon ang usa ka indibidwal, nga napuno sa Espiritu sa Dios, mopahayag sa kamatuoran sa langit, ang karnero makadungog niana [tan-awa sa D&P 29:7], ang Espiritu sa Ginoo motuhop sa kinahiladman sa ilang kalag ug mosulod ngadto sa ilang mga kasingkasing; pinaagi sa pagpamatuod sa Espiritu Santo molamdag kanila, ug sila makakita ug makasabut alang sa ilang mga kaugalingon (DBY, 431).

Adunay usa lamang ka saksi—usa ka pagpamatuod, kalabut sa ebidensya sa Ebanghelyo sa Anak sa Dios, ug kana mao ang Espiritu nga iyang gihatag ngadto sa iyang mga tinun-an. Buhata ang iyang kabubut-on, ug kita makahibalo kon siya namulong pinaagi sa awtoridad sa Amahan o sa iyang kaugalingon. Buhata kon siya momando kanato, ug kita makahibalo sa doktrina, kon kini ba iya sa Dios o dili [tan-awa Juan 7:16–17]. Pinaagi lamang sa mga pagpadayag sa Espiritu nga kita makahibalo sa mga butang sa Dios (DBY, 431–32).

Pagmakugihon ug pagmainampoon. Inyo ang kahigayunan nga makahibalo alang sa inyong mga kaugalingon nga ang Dios buhi ug nga Siya adunay gibuhat niining katapusang mga adlaw ug kita mao ang Iyang pinasidunggang mga ministro. Pagpakabuhi alang niini nga kahibalo ug kamo makadawat niini. Hinumdumi ang inyong mga pag-ampo ug pagmainiton diha sa espiritu (LBY, 245).

Ang akong pagpamatuod gipasikad sa kasinatian, sa akong kaugalingon nga kasinatian, kalabut nianang naangkon pinaagi sa pag-obserbar sa uban. … Ang langitnong kamatuoran mitugyan niini ngadto sa paghukom sa matag tawo ug sa ilang hugot nga pagtuo; ug ilabi na sa pagbati niadtong buot magmatinuoron sa ilang mga kaugalingon, uban sa ilang Dios, ug uban sa ilang silingan. … Kon ang tawo makadawat og gamay, kini nagmatuod nga sila makadawat pa og daghan. Kon sila makadawat sa una ug sa ikaduhang mga baruganan uban sa matarung nga pagbati, sila makadawat pa og dugang (DBY, 433).

Ang akong pagpamatuod positibo. … Ako nasayud nga ang adlaw mosidlak, ako nasayud nga ako buhi ug adunay pagkatawo, ug ako mopamatuod nga adunay Dios, ug nga si Jesukristo buhi, ug nga siya ang Manluluwas sa kalibutan. Nakaadto naba kamo sa langit ug nakakat-on sa sukwahi? Mituo ako nga si Joseph Smith usa ka propeta sa Dios, tungod kay siya adunay daghang mga pagpadayag. Kinsa ang makapanghimakak niini nga pagpamatuod? Bisan si kinsa mahimong molalis niini, apan walay usa sa kalibutan ang makapanghimakak niini. Ako adunay daghang mga pagpadayag; akong nakita ug nadunggan sa akong kaugalingon, ug nasayud nga kining mga butanga tinuod, ug walay usa sa yuta ang makalalis niini. Ang mata, ang dunggan, ang kamot, ang tanan nga mga pagbati mailad, apan ang Espiritu sa Dios dili mailad; ug kon madasig sa Espiritu, ang tibuok tawo mapuno sa kahibalo, iyang makita sa espirituhanong mata, ug masayud niana nga lapas sa gahum sa tawo sa paglimud. Unsay akong nahibaloan mahitungod sa Dios, mahitungod sa yuta, mahitungod sa panggobyerno, akong nadawat gikan sa kalangitan, dili lamang pinaagi sa akong kinaiyanhon nga abilidad, ug akong ihatag ang himaya ug pagdayeg ngadto sa Dios. (DBY, 433).

Nakadawat sa saksi sa kamatuoran, kita kinahanglan nga mangita sa pagkamatarung diha sa gingharian sa Dios.

Usa kini sa unang mga baruganan sa doktrina sa kaluwasan nga makaila sa atong Amahan ug sa atong Dios. Ang mga Kasulatan nagtudlo nga kini ang kinabuhing dayon, ang “pagkaila Kanimo, ang bugtong tinuod nga Dios, ug kang Jesukristo nga imong pinadala [tan-awa sa Juan 17:3];” sama kini sa pagsulti nga walay tawo nga makatagamtam o makaandam alang sa kinabuhing dayon nga wala niana nga kahibalo (DNW, 18 sa Peb. 1857, 4).

Kita adunay saad, kon unahon nato sa pagpangita ang gingharian sa Dios ug pagkamatarung, aron ang tanang gikinahanglang mga butang igadugang ngari kanato [tan-awa sa 3 Nephi 13:33]. Kinahanglan nga magmasaligon kita, apan pagkat-on una kon unsaon sa pagpahimuot sa atong Amahan ug Dios; paningkamot nga makahibalo unsaon sa pagluwas sa atong mga kaugalingon gikan sa “mga sayop nga ania sa kalibutan, gikan sa kangitngit ug pagkawalay pagtuo, gikan sa kawang ug bakakon nga mga espiritu nga nagsuroysuroy aron pag-ilad sa mga katawhan, ug pagkat-on unsaon sa pagluwas ug sa pagpatunhay sa atong mga kaugalingon dinhi sa yuta sa pagsangyaw sa ebanghelyo, pagtukod sa gingharian, ug pagpahimutang sa Zion sa atong Dios (DNW, 11 sa Ene. 1860, 1).

Ako … gusto nga mamalandong ug maghisgot sa mahangturong mga baruganan. Ang atong kaluwasan naglakip sa pagkahibalo, ug kini giplano sa ilang matang aron sa paglipay ug paghupay kanato. Kanang mahangturong kinabuhi nga aniaa kanako, nga nagpakabuhi diha sa mahangturong kamatuoran, gitukod aron ba laglagon? Kana ba nga lawas adunay katapusan, samtang kini nagsunod sa mahangturong kamatuoran? Dili…. Tinguhaa ang Espiritu sa Ginoo, nga walay paghunong sa inyong mga paningkamot, hangtud ang iyang Espiritu mosulod diha kaninyo sama sa walay katapusan nga pagdilaab. Pasigaa ang kandila sa Ginoo diha kaninyo, ug ang tanan maayo ra (DNW, 11 sa Ene. 1860, 2).

Ania kanato ang mga pulong sa kinabuhing dayon, kita adunay kahigayunan sa pag-angkon sa himaya, pagka-imortal, ug kinabuhing dayon, karon angkunon ba ninyo kini nga mga panalangin? Igahin ba ninyo ang inyong mga kinabuhi sa pag-angkon og lingkuranan sa gingharian sa Dios, o mohigda kamo ug matulog, ug moadto sa impyerno? (DNW, 1 sa Okt. 1856, 3)

Paningkamot nga magmatarung, dili sa bisan unsa nga pagbanabana, apan tungod kay ang pagkamatarung maanindot, putli, balaan, matahum, ug makahimaya, gihimo kini aron sa paghimo sa tawo nga malipayon ug puno sa kamaya, hangtud sa tibuok kapasidad sa tawo, magpuno kaniya sa kahayag, himaya, ug kaalam (DBY, 428).

Mga Sugyot alang sa Pagtuon

Daghan ang nagtinguha nga makakita sa kamatuoran, apan dili ang tanan modawat niini.

Sumala ni Presidente Young, unsa ang nakaaghat “sa daghang mga lumulupyo sa yuta” sa pagbuhat sa matarung ug pagsiksik alang sa kamatuoran?
Ngano nga daghang mga tawo ang napakyas sa pagpuyo sa matarung nga paagi bisan human makadawat og saksi sa kamatuoran? Unsa ang nakatabang pag-ayo kaninyo sa pagpuyo sumala sa pagpamatuod nga inyong napalambo?

Ang matag usa kanato adunay katungdanan sa pagpangita og kahibalo ug saksi sa kamatuoran.

Unsa ang mga katuyoan sa atong pagpaninguha sa pagtuon? Unsa ang atong mabuhat sa pagbuntog sa gugma sa kalibutanon nga mga butang?
Unsaon nato sa pagkahibalo sa mga kamatuoran sa Dios alang sa atong mga kaugalingon? Sa unsa nga paagi nga ang pagpamatuod kang Jesukristo makatabang kanato nga makaila tali sa kamatuoran ug sayop?

Ang Espiritu Santo mohatag kanato og kahibalo sa kamatuoran.

Unsa ang bugtong paagi nga kita makahibalo nga ang ebanghelyo tinuod, nga si Jesus mao ang Kristo, ug nga kita naghimo sa buhat sa Ginoo? Unsa nga kasinatian ang gitudlo kaninyo nga ang Espiritu Santo makaimpluwensya sa inyong kinabuhi kon kamo motugot Kaniya sa pagbuhat sa ingon?
Ngano nga ang kalibutanon nga kaalam dili makamatuod o makapanghimakak sa pagkaanaa sa Dios ug sa kamatuoran sa ebanghelyo? Bisan og ang atong pisikal nga mga pagbati mailad sa pagpangita sa kamatuoran, unsa ang gisulti ni Presidente Young nga “dili masayop”?
Ngano nga si Presidente Young nakahimo sa paghatag og gamhanan nga pagpamatuod? Unsaon nato sa pagpalig-on sa atong mga pagpamatuod? Unsa ang atong mahimo aron mahimong mas gamhanan nga saksi sa kamatuoran sa Dios?

Nakadawat sa saksi sa kamatuoran, kita kinahanglan nga mangita sa pagkamatarung diha sa gingharian sa Dios.

Unsa nga saad ang gihimo sa Ginoo niadtong kinsa “mouna sa pagpangita sa gingharian sa Dios ug sa pagkamatarung niini”?
Sa unsa nga paagi nga ang mga butang sa Dios makatabang kanato nga makaangkon og kaluwasan? Unsaon nato nga kita “makaangkon og lingkuranan didto sa gingharian sa Dios”?

Joseph Smith reading — Si Joseph Smith, usa ka makugihon nga magbabasa sa Biblia, nangayo sa Dios og direksyon.