Paglikay sa Personal nga Apostasiya

Samtang didto sa Kirtland, si Presidente Brigham Young nakahimamat og usa ka pundok sa mga mibiya sa kamatuoran kinsa nagplano batok kang Propeta Joseph Smith sa sulod mismo sa templo. Siya namahayag, “Mibarug ako, ug sa yano ug dayag nga paagi miingon ngadto kanila nga si Joseph usa ka Propeta, ug ako nasayud niini, ug sila mahimong motamay ug mopakaulaw kaniya kutob sa ilang gusto, dili sila makaguba sa pagkatudlo sa Propeta sa Dios, ila lamang maguba ang ilang kaugalingong katungod, moputol sa higot nga nagbugkos kanila ngadto sa Propeta ug ngadto sa Dios ug mopaunlod sa ilang mga kaugalingon ngadto sa impyerno” (“History of Brigham Young,” DNW, 10 sa Peb. 1858, 386). Didto sa Kirtland, Missouri, Nauvoo, ug Utah, si Presidente Young nakasaksi sa kadaut nga nahitabo sa personal nga mga kinabuhi niadtong kinsa nagpadala sa apostasiya. Daghan sa mga mibiya sa kamatuoran nahimo niya kaniadtong pinakasuod nga mga kaubanan. Iyang nabantayan nga sa kasagaran ang “walay hinungdan nga mga butang” mao ang sinugdanan sa ilang pagbiya gikan sa kamatuoran, ug siya tataw nga mipasidaan sa kada miyembro sa pagbantay og maayo batok sa bisan unsa nga matang sa sayop nga binuhatan.

Mga Pagtulun-an ni Brigham Young

Ang apostasiya mao ang pagpalayo gikan sa Simbahan ug sa katapusan ang paglimud sa pagtuo.

Unsa kana nga mopahilayo sa mga tawo gikan niini nga Simbahan? Ang wala gayuy hinungdan nga mga butang sa kinatibuk-an mao ang sinugdanan sa ilang pagtipas gikan sa husto nga dalan. Kon mosunod kita og usa ka kompas, ang dagum niini wala na magtudlo sa hustong direksyon, ang usa ka gamay kaayo nga pagtipas sa sinugdanan modala kanato, kon nakabiyahe na kita og taas-taas nga distansya, palayo ngadto sa usa ka bahin sa tinuod nga dapit diin mao ang atong gitinguha (DBY, 83).

Kon ang mga Santos mobaliwala sa pag-ampo, ug mosupak sa adlaw nga gitagana alang sa pagsimba sa Dios, mawala kanila ang iyang Espiritu. Kon ang usa ka tawo motugot sa iyang kaugalingon nga mabuntog sa kasuko, ug manunglo ug mamalikas, mogamit sa pangalan sa Dios sa pasipala, dili niya mapabilin ang Balaang Espiritu. Sa ato pa, kon ang usa ka tawo mobuhat og bisan unsa nga butang nga siya nasayud nga sayop, ug dili maghinulsol, dili niya mapahimuslan ang Balaang Espiritu, apan molakaw diha sa kangitngit ug sa katapusan molimud sa pagtuo (DBY, 85).

Hilabihan kini nga makapatingala sa kada baruganan sa salabutan nga bisan kinsa nga lalaki o babaye nga mopiyong sa ilang mga mata sa mahangturong mga butang human sila nasinati niini, ug motugot sa … mga butang niini nga kalibutan, sa mga tinguha nga dautan sa mata, ug sa mga tinguha nga dautan sa unod, nga mobitik sa ilang mga hunahuna ug mopalayo kanila bisan sa pinakagamay nga hinungdan gikan sa mga baruganan sa kinabuhi (DBY, 82).

Gipamulong na dinhi karong buntaga nga walay tawo nga sukad mibiya sa kamatuoran, nga sa tinuoray wala makalapas. Ang dili pagbuhat sa katungdanan modala ngadto sa paglapas (DBY, 82).

Kamo nakadungog sa daghan, “Ako usa ka Santos sa Ulahing mga Adlaw, ug dili gayud mobiya sa kamatuoran;” “Ako usa ka Santos sa Ulahing mga Adlaw, ug magpabilin hangtud sa adlaw sa akong kamatayon.” Wala gayud ako mohimo sa maong mga pamahayag, ug dili gayud. Sa akong hunahuna nakakat-on ako nga kon ako lamang, ako walay gahum, apan ang akong kinatibuk-an nahan-ay sa pagpalambo sa kaalam, kahibalo, ug gahum, magkuha og gamay diri ug gamay didto. Apan kon ako biyaan nga ako lamang usa, ako walay gahum, ug ang akong kaalam binuang; dayon modutdot ako pagayo sa Ginoo, ug ako makabaton og gahum diha sa iyang pangalan. Sa akong hunahuna nakakat-on ako sa Ebanghelyo aron sa pagkasayud, nga diha ug sa akong kaugalingon ako walay bili [tan-awa sa Alma 26:12] (DBY, 84).

Kon ang usa ka lalaki o babaye kinsa nakadawat og dako sa gahum sa Dios, mga panan-awon ug mga pinadayag, mopalayo gikan sa balaang mga sugo sa Ginoo, ug daw ang ilang mga pagbati gikuha gikan kanila, ang ilang panabut ug paghukom diha sa pagkamatarung gikuha, sila moadto sa kangitngit, ug mahimong sama sa usa ka buta nga tawo kinsa nagkapa-kapa sa bongbong [tan-awa sa Isaias 59:9–10; Deuteronomio 28:29] (DBY, 82–83).

Daghan ang midawat sa Ebanghelyo tungod kay nasayud sila nga kini tinuod; nakabig sila diha sa ilang paghukom nga kini tinuod; lig-on nga pangatarungan mibuntog kanila, ug sila salabtunong napugos sa pagdawat sa Ebanghelyo nga tinuod human sa pagsusi niini sa makiangayong paagi. Sila minunot niini, ug mituman sa unang mga baruganan niini, apan wala gayud magtinguha nga mahayagan pinaagi sa gahum sa Espiritu Santo; ang ingon nga mga tawo sa kasagaran mohunong sa pagpadayon diha sa pagtuo (DBY, 86).

Kon mangita kita og sayop sa mga lider sa Simbahan, nagsugod kita sa pagpalayo sa atong mga kaugalingon gikan sa Simbahan.

Sa higayon nga adunay usa ka taras nga gipakita ni bisan kinsa sa mga miyembro niini nga Simbahan sa pagpangutana sa katungod sa Presidente sa tibuok Simbahan sa pagdumala sa tanang mga butang, makita ninyo ang dayag nga mga ebidensya sa apostasiya––sa usa ka espiritu diin, kon awhagon, mosangput ngadto sa pagpalayo gikan sa Simbahan ug ngadto sa katapusan nga kalaglagan; bisan asa nga adunay usa ka taras nga molihok batok ni bisan kinsa nga sa legal nga paagi gitudlo nga opisyal niini nga Gingharian, di magsapayan kon bisan sa unsa pa man nga kapasidad siya gitawag sa pagbuhat, kon ipadayon gayud, pagasundan kini sa samang mga resulta; sila “nagapahiuyon sa makapahugawng pangibog sa unod, ug dili motagad sa langitnong kagamhanan. Ang mga tawong mapangahason ug mapahitas-on, sila wala lamay kahadlok sa pagpasipala sa mga halangdon” [tan-awa sa 2 Pedro 2:10] (DBY, 83).

Kon ang usa ka tawo magsugod sa pagpangita og sayop, mangutana kalabut niini, niana, ug sa lain nga butang, nga mag-ingon, “Kini ba o kana nagpakita ingon nga ang Ginoo nagdiktar niini?” mahimo kamong masayud nga kana nga tawo adunay espiritu sa apostasiya. Matag tawo niini nga Gingharian, o dinhi sa yuta, kinsa nagtinguha sa tibuok niyang kasingkasing sa pagluwas sa iyang kaugalingon, adunay daghang buhaton ingon nga siya may panahon sa pag-atiman, nga dili mangutana nianang walay kalabutan kaniya. Kon magmalampuson siya sa pagluwas sa iyang kaugalingon, naayo niini paggamit ang iyang panahon ug pagtagad. Siguroa nga kamo mismo husto; siguroa nga ang mga sala ug kabuang wala magpakita sa ilang kaugalingon uban sa pagsidlak sa adlaw (DBY, 83).

Daghan ang naghunahuna sa ideya nga sila makahimo sa pag-una-una sa pagtudlo sa mga baruganan nga wala pa gayud sukad gitudlo. Wala sila makahibalo nga sa higayon nga magpadala sila ngadto niini nga paghanduraw ang Yawa adunay gahum ibabaw kanila sa pagdala kanila ngadto sa dili balaan nga dapit; bisan tuod og kini usa ka leksyon nga angayan unta nilang nakat-unan sa dugay nang panahong milabay, apan usa kini ka leksyon nga nakat-unan sa pipila lamang sa panahon ni Joseph (DBY, 77–78).

[Ang maong tawo] mohimo og sayop nga mga panagna, apan iya kining buhaton pinaagi sa espiritu sa panagna; mobati siya nga usa siya ka propeta ug makahimo sa pagpanagna, apan iya kanang buhaton pinaagi sa lain nga espiritu ug gahum kaysa unsay gihatag kaniya sa Ginoo. Iyang gamiton ang gasa sama sa paggamit ninyo ug nako sa atoa (DBY, 82).

Usa sa unang mga lakang ngadto sa apostasiya mao ang pagpangita og sayop sa inyong Bishop; ug kon mahitabo kana, gawas kon mahinulsolan ang ikaduhang lakang sa dili madugay mahitabo, ug sa hinayhinay ang tawo mawala gikan sa Simbahan, ug mao kana ang katapusan niini. Makatugot ba kamo sa pagpangita og sayop sa inyong Bishop? (DBY, 86).

Walay tawo nga makakuha og gahum gikan sa Dios aron paghimo og kasamok sa bisan hain nga Branch sa Simbahan. Ang maong gahum nakuha gikan sa usa ka dautan nga tinubdan (DBY, 72).

Ang mga tawo mohimo, hinoon, sa pagbiya niini nga Simbahan, apan mobiya sila niini tungod kay moadto sila sa kangitngit, ug sa mao gayung adlaw nga sila mohukom nga kinahanglang adunay usa ka demokratikanhong pagbotar, o sa ato pa, nga kinahanglan kita adunay duha ka mga kandidato alang sa nagdumalang Priesthood diha sa mga Santos sa Ulahing mga Adlaw, sila mohukom sa pagbiya sa kamatuoran. Walay giingon nga butang sama sa kalibug, pagkabahin, panagbingkil, pagdumot, kasilag, dautang tinguha, o duha ka mga bahin sa pangutana diha sa balay sa Dios; adunay usa lamang ka bahin sa pangutana didto (DBY, 85).

Kadto kinsa nawad-an sa Espiritu mapuno sa kangitngit ug kalibug.

Kon ang mga tawo mawad-an na sa espiritu sa buhat diin kita nahilakip, mahimo silang mga dili tumutuo diha sa ilang mga pagbati. Moingon sila nga wala sila masayud kon ang Biblia tinuod, kon ang Basahon ni Mormon tinuod, ni kabahin sa bag-ong mga pinadayag, ni kon aduna ba’y Dios o wala. Kon sila mawad-an na sa espiritu niini nga buhat, sila mawad-an sa kahibalo kabahin sa mga butang sa Dios karon ug sa kahangturan; ang tanan mawala kanila (DBY, 83–84).

Ang mga tawo magsugod sa pagbiya sa kamatuoran pinaagi sa pagbaton kunohay og kalig-on nga wala kanila, pinaagi sa pagpaminaw sa mga paghunghong sa kaaway kinsa mopahisalaag kanila sa hinayhinay, hangtud ilang mapundok nganha kanila kanang unsay ilang gitawag nga kaalam sa tawo; dayon magsugod sila sa pagpalayo gikan sa Dios, ug ang ilang mga hunahuna mahimong malibug (DBY, 84).

Unsay angayang ibiya sa mga Santos sa Ulahing mga Adlaw gikan sa kamatuoran? Ang tanang anaa diha maayo, putli, balaan, sama sa Dios, makapahimaya, makapahalangdon, makapalambo sa mga ideya, ang mga kasarang sa may salabutan nga mga binuhat nga gidala sa atong Langitnong Amahan nganhi niini nga yuta. Unsay ilang madawat agi og balos? Ako kining mapasabut sa pipila ra gayud kaayo nga mga pulong. Kini mao ang mga pulong nga akong kinahanglan gamiton: kamatayon, impyerno ug lubnganan. Mao kana ang ilang makuha isip bugti. Mahimo natong tinagsaon kanang ilang nasinati. Nakasinati sila og kangitngit, kawalay kahibalo, pagduhaduha, kasakit, kagulanan, kasub-anan, pagbangutan, kawalay kalipay; walay tawo nga moduyog sa kasubo [magbangutan] sa oras sa kalisdanan, walay tawo nga mosuporta sa panahon sa kalamidad, walay malooy kon sila magmagul-anon ug nahimangud; ug ako kining mapasabut pinaagi sa pag-ingon nga kamatayon, impyerno ug lubnganan. Mao kini ang ilang makuha agig ilis sa ilang pagbiya sa kamatuoran gikan sa Ebanghelyo sa Anak sa Dios (DBY, 85).

Nakaila kamo og mga tawo kinsa, samtang diha pa sa Simbahan, mga aktibo, madasigon ug puno sa salabutan; apan human sila mibiya sa Simbahan, nahimo silang mikupos diha sa ilang mga panabut, ang ilang mga hunahuna nangitngit ug ang tanan nahimong misteryo ngadto kanila, ug kalabut sa mga butang mahitungod sa Dios, nahimo silang sama sa uban pa sa kalibutan, kinsa naghunahuna, naglaum ug nag-ampo nga ang ingon ug maong mga butang tingali nahimong ingon niana, apan wala sila masayud sa kinagamyang bahin kalabut niini. Mao gayud kini ang kahimtang niadtong kinsa mibiya niini nga Simbahan; moadto sila sa mangitngit, dili sila makahimo sa paghukom, paghunahuna o pagsabut sa mga butang ingon nga kini mao. Sama sila sa tawong hubog––siya naghunahuna nga ang tanan grabeng mahubog sa alak gawas kaniya, ug siya lamang ang tawo nga dili hubog diha sa kasilinganan. Ang mga mibiya sa kamatuoran naghunahuna nga ang tanan sayop gawas kanila (DBY, 84).

Kadtong kinsa mibiya sa Simbahan sama sa usa ka balhibo nga ipadpad sa hangin bisan asa. Wala sila masayud kon asa sila padulong; wala sila makasabut sa bisan unsa kalabut sa ilang kaugalingong kinabuhi; ang ilang hugot nga pagtuo, paghukom ug ang lihok sa ilang mga hunahuna sama ka mabalhin-balhinon sa mga lihok sa balhibo nga naglutaw diha sa hangin. Kita wala gayuy laing kakuptan, kondili ang hugot nga pagtuo lamang diha sa Ebanghelyo (DBY, 84).

Makahimo kita sa pagbarug nga lig-on pinaagi sa pagsunod sa atong relihiyon ug pagtinguha sa Balaang Espiritu.

Aduna gihapon bay mahimong apostasiya? Oo, mga kaigsoonan, makapaabut kamo nga ang mga tawo moabut sa Simbahan ug dayon mobiya sa kamatuoran. Mahimo kamong makapaabut nga pipila ka mga tawo magpadayong matinud-anon sulod sa igo-igong panahon, ug dayon mobiya sa dalan nga ilang giagian (DBY, 85–86).

Nganong mobiya man sa kamatuoran ang mga tawo? Kamo nasayud nga ania kita sa “Old Ship Zion.” Ania kita sa tunga sa lawod. Ang unos moabut, ug, sama sa giingon sa mga maglalawig, maningkamot siya og maayo. “Dili ako magpabilin dinhi,” miingon ang usa; “Dili ako motuo nga mao kini ang ‘Ship Zion.’ ” “Apan ania kita sa tunga sa lawod.” “Bahala na, dili ko magpabilin dinhi.” Iyang gihubo ang iyang kupo, ug miambak siya. Dili ba siya malumos? Oo. Mao usab kadtong kinsa mobiya niini nga Simbahan. Mao kini ang “Old Ship Zion,” magpabilin kita niini (DBY, 85).

Ang Dios anaa sa timon niining dakong barko, ug nakapahimo kana kanako nga mobati og maayo. … Pasagdi kadtong mobiya sa kamatuoran kinsa ganahan, apan ang Dios moluwas sa tanang kinsa matinguhaon nga maluwas (DBY, 86).

Kon ang mga tawo mosunod sa ilang relihiyon, walay mahitabong pagbiya sa kamatuoran ug kita walay madunggan nga reklamo o pagpangita og sayop. Kon ang mga tawo gutom sa mga pulong sa kinabuhing dayon, ug ang ilang tibuok mga kalag gani nasentro sa pagtukod sa Gingharian sa Dios, matag kasingkasing ug kamot mahimong andam ug matinguhaon ug ang buhat magpadayon sa kusganong paagi ug kita molambo sama sa kinahanglang mahitabo kanato (DBY, 84).

Ganahan kitang magpakabuhi aron makabaton sa Espiritu kada adlaw, kada oras sa adlaw, kada minuto sa adlaw, ug matag Santos sa Ulahing mga Adlaw angayang makadawat sa Espiritu sa Dios, sa gahum sa Espiritu Santo, nga mogiya kaniya sa iyang indibidwal nga mga katungdanan (DBY, 82).

Mga Sugyot alang sa Pagtuon

Ang pagbiya sa kamatuoran mao ang pagpalayo gikan sa Simbahan ug sa katapusan ang paglimud sa pagtuo.

Si Presidente Young miila sa pipila sa mga pagbiya gikan sa kamatuoran nga ingon og komon o “walay hinungdan.” Iyang gigamit ang larawan sa “usa ka kompas, ang dagum niini wala na magtudlo sa hustong direksyon.” Sa unsang paagi nga ang ebanghelyo susama sa usa ka tinuod ug tukma nga kompas? Unsa ang pipila sa ginagmay nga mga pagtipas diha sa atong mga kinabuhi nga mahimong makapahisalaag kanato human sa dugay nga panahon? Unsa nga mga pagtarung nga paagi ang kinahanglan natong himoon?
Unsa nga mga pasidaan ang gihatag ni Presidente Young ngadto sa tawo kinsa manghambog nga, “Ako usa ka Santos sa Ulahing mga Adlaw, ug dili gayud mobiya sa kamatuoran”? (Tan-awa usab sa 2 Nephi 28:25; D&P 20:31–34.)
Unsa nga mapanagnaong pasidaan ang gipalanog ni Presidente Young alang niadtong mga Santos kinsa nakadawat sa “gahum sa Dios” ug dayon “mipalayo gikan sa balaang mga sugo”?
Ngano nga ang intelektwal nga pangatarungan dili igo nga magpabilin kanato diha sa dalan padulong sa kinabuhing dayon?

Kon mangita kita og sayop sa mga lider sa Simbahan, nagsugod kita sa pagpalayo sa atong mga kaugalingon gikan sa Simbahan.

Sa unsa nga mga paagi nga ang pag-atiman sa atong kaugalingong mga calling kaysa pagpangutana sa inspirasyon sa kasamtangang mga lider makapalig-on kanato isip mga indibidwal, mga pamilya, mga ward, ug mga miyembro sa Simbahan sa kinatibuk-an?
Unsa ang pasidaan ni Presidente Young ngadto niadtong kinsa mosaway sa pagpangulo sa ilang ward o branch? Unsa man ang atong mabuhat diha sa simbahan ug sa panimalay sa pagpaluyo sa bishop sa atong ward, presidente sa atong branch, o sa uban pang mga lider sa Simbahan? Kon adunay matinuorong mga kalainan, unsa nga dalan ang kinahanglan natong sundon aron mahimong managhiusa? (Tan-awa usab sa Mateo 18:15; Lucas 11:34.)
Sumala ni Presidente Young, dili mahitabong adunay “usa ka demokratikanhong pagbotar” tali sa “duha ka mga kandidato alang sa nagdumalang Priesthood” diha sa Simbahan. (Tan-awa usab sa D&P 28:2, 6–7.) Sa unsang paagi nga ang pagpaluyo pinaagi sa “pag-uyon sa tanan” lahi kaysa usa ka “demokratikanhong pagbotar”? (Tan-awa usab sa D&P 20:65; 26:2.)
Gidapit kita sa paghatag sa atong pagpaluyo nga pagbotar ngadto sa mga lider sa Simbahan. Sa unsang paagi nga ang atong pagkaandam sa pagpaluyo niadto nga mga lider makapalig-on sa tibuok Simbahan? Sa unsang paagi nga ang atong pagkadili andam sa pagpaluyo kanila makapahuyang sa Simbahan?

Kadto kinsa nawad-an sa Espiritu mapuno sa kangitngit ug kalibug.

Unsa ang gipasabut ni Presidente Young sa dihang miingon siya nga ang mga mibiya sa kamatuoran nagbaton kunohay og kalig-on nga wala kanila? Unsa ang kuyaw sa pagsalig diha sa atong kaugalingong kalig-on? (Tan-awa usab sa Helaman 4:13.) Ngano nga ang uban mopili sa “kaalam sa tawo” kaysa kaalam sa Dios ingon nga gipadayag pinaagi sa Espiritu? (Tan-awa usab sa Isaias 29:13–14; 1 Mga Taga-Corinto 2:12–14.)
Basaha ang mga tubag ni Presidente Young ngadto niini nga mga pangutana: “Unsay angayang ibiya sa mga Santos sa Ulahing mga Adlaw gikan sa kamatuoran?” “Unsa may ilang madawat agi og balos?”
Unsaon nato paggamit ang atong hugot nga pagtuo sa pagtabang niadtong kinsa “sama sa usa ka balhibo nga ipadpad sa hangin bisan asa”?

Makahimo kita sa pagbarug nga lig-on pinaagi sa pagsunod sa atong relihiyon ug pagtinguha sa Balaang Espiritu.

Ngano nga ang apostasiya nagpadayon man nga anaa sa Simbahan? Unsaon man nato sa paglikay sa mga sinugdanan sa apostasiya nga mosulod sa atong mga kinabuhi? Sa unsang paagi nga ang ubang mga miyembro sa Simbahan ug ang impluwensya sa Espiritu nakatabang kaninyo nga magmatinud-anon sa dihang tingali natintal kamo nga “magpadayong matinud-anon sulod [lamang] sa igo-igong panahon”?
Kon magpabilin kita sa “Old Ship Zion,” unsa ang gisaad ngari kanato?

Judas kissing the Savior’s cheek — Si Judas nga nagbudhi sa Manluluwas didto sa Tanaman sa Getsemani. Si Presidente Young mipasidaan nga “kon ang usa ka tawo magsugod sa pagpangita og sayop” sa mga lider sa Simbahan ug sa mga pagtulun-an, “mahimo kamong masayud nga kana nga tawo adunay espiritu sa apostasiya” (*DBY*, 83).