Tawag alang sa Panaghiusa, sa Pagpamatuod, ug sa Panalangin

Sa iyang pagkabatan-on si Brigham Young nangita og relihiyon nga makatagbaw sa iyang espirituhanong mga panginahanglan, apan wala siya makakita. Human mahatagi sa Basahon ni Mormon niadtong 1830 ug sunod niana nagtuon sa gipahiuli nga ebanghelyo sulod sa hapit duha ka tuig, nasayud siya nga siya nakakaplag sa kamatuoran. Gibunyagan siya ngadto sa Simbahan, ug gikan nianang panahona wala matarug ang iyang pagpamatuod sa ebanghelyo, diin, siya miingon, “anaa ang tanang kamatuoran sa langit ug sa yuta. … Bisan asa makita kini nga mga baruganan diha sa tanang mga nilalang sa Dios, ang ebanghelyo ni Jesukristo, ug ang Iyang kapunongan ug Priesthood, dawata kini” (DNSW, 5 sa Mayo 1866, 2). Ang iyang lig-on nga pagpamatuod ug hingpit nga debosyon ngadto sa Simbahan nakapadasig sa unang mga Santos sa pag-atubang sa hagit sa pagtukod og mga panimalay sa kamingawan ug sa paghiusa sa pagsunod sa kasugoan sa Ginoo sa pagtukod sa Iyang Simbahan ug pagsangyaw sa Iyang ebanghelyo sa tibuok kalibutan. Siya mipahayag: “Ang Dios, mga anghel ug buotan nga mga tawo ingon nga akong mga tigtabang, ako dili gayud mohunong sa pagpaningkamot hangtud makab-ot nato ang atong tumong ug manag-iya sa gingharian. Kana mao ang akong pagbati ug hugot nga pagtuo, ug kita makatuman niini, ako managna, pinaagi sa pangalan ni Ginoong Jesukristo, nga kita manag-iya sa Gingharian sa Dios sa tibuok yuta” (DBY, 453). Ang pagpamatuod ni Presidente Young nagpadayon sa pagdasig kanato karon samtang kita magtambayayong sa pagtukod sa gingharian sa Dios.

Mga Pagtulun-an ni Brigham Young

Tinuod nga mga tinun-an ni Jesukristo maningkamot nga magkahiusa—usa sa kasingkasing ug usa sa hunahuna.

Mianhi kita aron sa pagtukod sa Zion. Unsaon nato kini sa paghimo? Gisultihan ko na kamo sa daghang mga higayon. Adunay usa ka butang nga akong isulti mahitungod niini. Kinahanglang magkahiusa kita sa atong mga paningkamot. Kinahanglang motrabaho kita uban sa hiniusang hugot nga pagtuo sama sa kasingkasing sa usa ka tawo; ug bisan unsa ang atong buhaton kinahanglang ipahigayon pinaagi sa pangalan sa Ginoo, ug kita panalanginan ug mouswag sa atong tanan nga buhaton (DBY, 284).

Ang hugot nga pagtuo sa Ebanghelyo ni Jesukristo gihimo sa paghiusa sa mga katawhan, ug sa pagdala kanila pagbalik ngadto sa paghiusa ug hugot nga pagtuo niadtong kinsa nagsunod sa Ebanghelyo sa karaan, ug sa katapusan sa pagdala kanila balik ngadto sa himaya (DBY, 283).

Ako nag-ampo, akong mga kaigsoonan, sa mga Bishop, sa mga Elder, sa mga Seventy, sa mga Apostoles, oo, sa matag lalaki ug babaye kinsa adunay pagtuo ni Kristo, nga mahimong usa sa kasingkasing ug usa sa hunahuna, kay kon kita dili mahimong usa sa kasingkasing ug hunahuna kita sa pagkatinuod malaglag [tan-awa sa Moises 7:18] (DBY, 281).

Ang usa ka hingpit nga panaghiusa makaluwas sa mga katawhan, tungod kay ang may salabutan nga mga binuhat dili gayud mahimong hingpit, gawas lamang kon magsunod sa mga baruganan kalabut sa kinabuhing dayon. Ang dautan nga mga tawo tingali sa gamay nga bahin magkahiusa diha sa dautan; apan, sa matang gayud sa mga butang, ang maong pagkahiusa sa mubo lamang nga panahon. Ang baruganan diin sila sa gamay nga bahin magkahiusa sa kaugalingon niini mosangpot og panagbingkil ug panagsumpaki (DBY, 282).

Ang relihiyon sa langit mohiusa sa mga kasingkasing sa mga tawo ug mohimo nilang usa. Mahimong pundukon ninyo ang usa ka katawhan, ug bisan unsa pa ka dako ang ilang kalainan sa politika, ang Ebanghelyo ni Jesukristo mohiusa kanila, bisan og diha kanila makita ang mga miyembro sa tanang politikanhong mga pundok sa nasud (DBY, 285).

Wala sa atong katilingban ang pundok sa piniling mga dungganan. Kon ang usa ka igsoon magsul-ob og kalo nga hinimo gikan sa balhibo sa raccoon, o maanindot nga kalo nga hinimo gikan sa castor ang tanan mao ra ngari kanamo. Kon ang usa ka tawo matinud-anon nga sulugoon sa Dios dili kita mosupak sa iyang pagtambong sa miting, bisan og siya adunay usa lamang ka piraso sa panit sa kabaw nga isul-ob sa iyang ulo. Kita moambit sa Sakramento uban kaniya, motimbaya kaniya diha sa dalan isip usa ka igsoon ug usa ka higala, makigsulti kaniya, makig-uban knaiya sa mga salosalo ug motimbaya kaniya isip managsama (DBY, 283–84).

Ang Manluluwas naningkamot kanunay sa pagtisok diha sa mga hunahuna sa Iyang mga tinun-an nga ang hingpit nga panaghiusa maghari sa tanang celestial nga mga binuhat—nga ang Amahan ug ang Anak ug ang ilang Ministro, ang Espiritu Santo, nagkahiusa sa ilang pagpangalagad didto sa langit ug taliwala sa mga katawhan kabahin niini nga yuta… Kon ang langitnong mga panon wala magkahiusa, sila sa hingpit dili angayan nga mopuyo … uban sa Amahan ug sa Tigmando sa kalibutan (DBY, 282).

Si Jesus … nag-ampo sa Amahan aron magkahiusa ang Iyang mga tinunan, sama nga Siya ug ang Iyang Amahan usa ra. Nasayud Siya nga kon sila dili magkahiusa, sila dili maluwas ngadto sa celestial nga Gingharian sa Dios. Kon ang mga tawo dili makakita sama sa Iyang nakita samtang dinhi pa sa unod, makadungog sama sa Iyang nadunggan, makasabut sama sa Iyang nasabtan, ug mahimong sama gayud Kaniya, sumala sa ilang nagkalainlain nga mga kasarang ug mga calling, dili gayud sila makapuyo uban Kaniya ug sa Iyang Amahan [tan-awa sa Juan 17:20–21; 3 Nephi 19:23] (DBY, 281).

Sa unsa nga paagi nga ang mga Santos sa Ulahing mga Adlaw managsama ang gibati ug pagsabut, usa sa kasingkasing ug usa sa hunahuna, dili magsapayan kon asa sila sa higayon nga modawat sila sa Ebanghelyo, sa amihanan, o sa habagatan, sa silangan o sa kasadpan, bisan sa kinatumyang bahin sa yuta? Sila nakadawat niana nga gisaad sa Manluluwas sa dihang hapit na Siya mobiya sa yuta, nga mao, ang Maghuhupay, kana nga balaan nga katungdanan gikan sa kahitas-an nga nakaila sa usa ka Dios, usa ka pagtuo, usa ka bunyag [tan-awa sa Mga Taga-Efeso 4:5], kansang hunahuna mao ang kabubut-on sa Dios nga Amahan, diin adunay panaghiusa sa pagtuo ug kalihokan, ug diin walay panagbahin o kalibug; kon sila makadawat niining dugang kahayag, dili igsapayan kon nakakita ba sila sa usag usa, sila nahimong mga kaigsoonan, nga gisagop ngadto sa pamilya ni Kristo pinaagi sa pagbugkos sa walay katapusan nga pakigsaad, ug ang tanan makatuaw, sa matahum nga pinulongan ni Ruth “Ang imong katawhan mamahimo nga akong mga katawhan, ug ang imong Dios mamahimo nga akong Dios”! [Ruth 1:16] (DBY, 282–83).

Kon kita usa, kita kinahanglan momatuod ngadto sa langit, ngadto sa Dios nga atong Amahan, ngadto ni Jesukristo nga atong Magulang nga Igsoon, ngadto sa mga anghel, ngadto sa mga buotan sa yuta, ug ngadto sa tanang mga katawhan nga kita mga tinun-an ni Ginoong Jesukristo. Kon kita dili magkahiusa, sa tinuod nga pagsabut sa pulong kita dili mga tinunan ni Ginoong Jesus [tan-awa sa D&P 38:27] (DBY, 281).

Si Presidente Young kanunay nga nagpamatuod sa ebanghelyo ni Jesukristo.

Ang ebanghelyo sa kaluwasan gituyo gayud sa paghimo aron mahimong mga Santos ang mga makasasala, nga mabuntog ang dautan gikan sa maayo, mahimo nga mabalaan, mabuotan ang nahibaloan nga dautan, dili maayo nga mga tawo, ug mahimo ang mas buotan nga mga tawo nga nailhan. Kon kita dautan, kon kita adunay dautan nga mga kahinam, ang Ebanghelyo motabang kanato sa pagbuntog sa dautan. Makahatag kini kanato og impluwensya, gahum, kahibalo, kaalam, ug pagsabut sa pagbuntog sa atong mga kahuyang ug sa pagputli sa atong mga kaugalingon sa atubangan sa Ginoo nga atong Dios (DBY, 448–49).

Ang atong relihiyon motudlo kanato sa kamatuoran, hiyas, pagkabalaan, hugot nga pagtuo sa Dios ug sa iyang Anak nga si Jesukristo. Mopadayag kini sa mga misteryo, mopahinumdom kini sa hunahuna sa mga butang nga milabay ug sa karon—tin-aw nga mopakita sa mga butang nga moabut. Kini ang pundasyon sa mga kalihokan; kini ang Espiritu nga naghatag og salabutan sa matag buhi nga binuhat dinhi sa yuta. Ang tanan nga tinuod nga pilosopiya nagagikan sa tuburan diin kita makakuha og kaalam, kahibalo, kamatuoran ug gahum. Unsa ang gitudlo niini kanato? Sa paghigugma sa Dios ug sa atong isig ka tawo; nga magmabination, puno sa kalooy, mainantuson, ug mapailubon sa masinupakon ug ngadto niadtong kinsa walay mga alamag. Adunay himaya sa atong relihiyon nga sukad wala maangkon sa laing relihiyon nga natukod sa yuta sukad, nga wala ang tinuod nga priesthood—Kini mao ang tuburan sa tanang salabutan; kini ang pagdala sa langit nganhi sa yuta ug himayaon ang yuta ngadto sa langit, ang pag-andam sa tanang salabutan, nga gibutang sa Dios diha sa mga kasingkasing sa mga katawhan, ang pakigsandurot niana nga salabutan nga nagpuyo sa kahangturan, ug ang pagtuboy sa hunahuna ibabaw sa walay hinungdan ug walay pulos nga mga butang nga ingon og mobitad kanato ngadto sa kalaglagan. Maghatag kini og kagawasan sa hunahuna sa tawo gikan sa kangitngit ug kawalay kahibalo, maghatag kaniya sa salabutan nga nagagikan sa Langit, ug magpasarang kaniya sa pagsabut sa tanang mga butang (DNW, 1 sa Hunyo 1859, 1).

Ang atong pagtuo makahatag og kalinaw ngadto sa tanang mga tawo ug maayong kabubut-on ngadto sa tanang mga lumulupyo sa yuta. Makakabig kini sa tanan kinsa kinasingkasing nga mosunod sa pagmando niini sa pagugmad og pagkamatarung ug kalinaw; sa pagpuyo nga malinawon sa ilang mga pamilya; sa pagdayeg sa Ginoo sa buntag ug gabii, sa pag-ampo uban sa ilang mga pamilya, ug mopuno kanila sa espiritu sa kalinaw nga sila dili gayud mohukom ug mopanton ni bisan kinsa gawas kon kini angay. Sila mobangon sa buntag uban sa ilang mga espiritu nga hapsay ug malinawon sama sa adlaw nga mosidlak ug mohatag og kinabuhi ug kainit sa kalibutan, sama ka malinawon ug ka hapsay sa hoyohoy sa kagabhion sa ting-init. Walay kasuko, walay kapungot, walay malisya, panagbingkil o panagbangi (DBY, 449–50).

Kon ang mga tawo makadawat niini nga Ebanghelyo, unsa ang ilang gisakripisyo! Ngano, nga kamatayon alang sa kinabuhi. Mao kini ilang gihatag: kangitngit alang sa kahayag, sayop alang sa kamatuoran, pagduhaduha ug pagkawalay pagtuo alang sa kahibalo ug sa kasiguroan sa mga butang sa Dios (DBY, 450).

Ang mga Santos sa tanang mga panahon gipanalipdan, gipaluyohan ug gituboy sa Makagagahum sa ilang mga pag-antus, ug gahum sa relihiyon ni Jesukristo maoy nagpaluyo kanila (DBY, 450).

Ang atong relihiyon usa ka nagpadayon nga kasaulogan ngari kanako. Alang kanako kini Himaya! Hallelujah! Daygon ang Dios! kay sa kasubo ug kaguol. Hatagi ako sa kahibalo, gahum, ug mga panalangin aron ako adunay kasarang sa pagdawat, ug dili nako igsapayan kon diin gikan ang Yawa, ni ang bisan unsa nga mahitungod kaniya; ako buot og kaalam, kahibalo, ug gahum sa Dios. Ihatag kanako ang relihiyon nga makabayaw kanako diha sa timbangan sa kaalam—nga makahatag kanako og gahum sa paglahutay—nga kon akong makab-ot ang kahimtang sa kalinaw ug kapahulayan nga giandam alang sa mga matarung, akong matagamtaman sa tanang kahangturan ang katilingban sa mga balaan (DBY, 451).

Akong gibati ang kalipay. Ang “Mormonismo” maoy nakahimo sa tanan kanako karon, ug ang grasya, ang gahum, ang kaalam sa Dios mohimo kanako sa tanan nga ako sukad mamahimo, karon o sa kahangturan (DBY, 451).

Ang Ginoo mipanalangin kanako; kanunay siyang mipanalangin kanako, gikan sa higayon nga ako nagsugod sa pagtukod sa Zion, gipanalanginan ako pag-ayo. Makaistorya ako og mga hitabo nga dili kasarangan nga kinaiya mahitungod sa mga kalooy sa Dios ngari kanako, nga ang akong mga kaigsoonan moingon diha sa ilang mga kasingkasing, “dili kaayo ako makasalig niini.” Apan ang akong kasingkasing nagtinguha sa pagbuhat sa kabubut-on sa Dios, sa pagtukod sa iyang Gingharian dinhi sa yuta, sa pagtukod sa Zion ug sa mga balaod niini, ug sa pagluwas sa mga katawhan… Dili ako mohigugma, moserbisyo o mahadlok sa Ginoo aron lamang makalikay nga panghimarauton, ni aron makaangkon og dagkong gasa o mga panalangin sa kahangturan, apan tungod kay ang mga baruganan nga gipadayag sa Dios alang sa kaluwasan sa mga lumulupyo sa yuta mga putli, balaan ug makapahimaya. Niini adunay dungog ug mahangturong kauswagan, sila magpadayon gikan sa kahayag ngadto sa kahayag, kalig-on ngadto sa kalig-on, himaya ngadto sa himaya, kahibalo ngadto sa kahibalo, ug gahum ngadto sa gahum (DBY, 452).

Mapasalamaton kaayo ako … nga ako adunay pribilehiyo sa pagpakiguban sa mga Santos, ug sa pagkamiyembro sa Gingharian sa Dios, ug nga ako adunay mga higala sa Simbahan sa Buhi nga Dios (DBY, 452).

Ang “Mormonismo” nakabuhat sa tanan alang kanako nga sukad nahimo alang kanako dinhi sa yuta; nakalipay kini kanako; … nakahatag kini kanako og maayong mga pagbati, uban sa kalipay ug pagmaya. Hinoon, sa wala pa ako makaangkon sa espiritu sa Ebanghelyo ako nahasol nianang akong madungog nga gibagulbol sa uban, nga mao, usahay, mobati og kasubo, kabug-at, ug walay kadasig; nga ang tanan nagpakita kanako nga aduna, usahay, masulub-on nga bahin (DBY, 452).

Apan sukad nga ako midawat sa Ebanghelyo walay sulod sa usa ug tunga nga minuto, kutob sa akong mahinumduman, adunay masulub-on nga bahin (DBY, 453).

Sa dihang gilibutan sa manggugubot nga panon ug ang pagkalaglag naghulga sa tanang bahin, wala ako makamatikod gawas nga ako mibati og kalipay, sama usab sa akong mga espiritu, sama sa akong gibati karon. Ang umaabut ingon og dili maayo, ug mangitngit kaayo, apan wala ako sukad makakita og panahon niini nga Ebanghelyo gawas sa unsay akong nahibaloan nga ang sangputanan makaayo sa kawsa sa kamatuoran ug sa mga nagmahal sa pagkamatarung, ug akong gibati kanunay nga malipayon nga modawat sa kamot sa Ginoo sa tanang mga butang (DBY, 453).

Ang Dios, mga anghel ug buotan nga mga tawo ingon nga akong mga tigtabang, ako dili gayud mohunong sa pagpaningkamot hangtud makabot nato ang atong tumong ug manag-iya sa gingharian. Kana mao ang akong pagbati ug hugot nga pagtuo, ug kita makatuman niini, ako managna diha, sa pangalan ni Ginoong Jesukristo, nga kita manag-iya sa Gingharian sa Dios sa tibuok yuta (DBY, 453).

Si Presidente Young misaad og mga panalangin ngadto sa matinud-anong mga Santos.

Mga kaigsoonan, tungod kay adunay katungod ug pribilehiyo, pinaagi sa Priesthood, ako manalangin kaninyo pinaagi sa pangalan sa Ginoo, ug moingon, panalanginan kamo. Mao kini ang akong mga pagbati ngadto sa mga Santos sa Ulahing mga Adlaw, ug mao ngadto sa tanang tawhanong pamilya, kon sila modawat sa akong mga panalangin (DBY, 456).

Ang Dios manalangin sa matag buotan nga tawo. Ang Dios manalangin sa buhat sa kinaiyahan, ang Dios mopanalangin sa iyang kaugalingong buhat, mobuntog sa dautan ug dili diosnon ug sila nga molaglag sa ilang isigka tawo, nga aron ang mga gubat ug mga panagbingkil mohunong sa yuta. O Ginoo, kuhaa kini gikan sa buhatan ug butangi og buotan nga mga tawo nga mahimong pangulo sa mga nasud, aron sila dili na makakat-on og pakiggubat, apan mobuhat, sama sa mabuot ug sibilisado nga mga binuhat, mopasiugda og kalinaw sa yuta ug sa pagbuhat og maayo ngadto sa usag usa [tan-awa sa Isaias 2:4] (DBY, 456).

Akong gibati ang pagpanalangin kaninyo kanunay, ang akong kinabuhi ania dinhi, ang akong tinguha, ang akong himaya, ang akong garbo, ang akong kahupayan, ang akong tanan ania dinhi, ug ang tanan nga akong gipaabut nga maangkon, hangtud sa kahangturan ania sa taliwala niini nga Simbahan (DBY, 456).

Kon ako adunay gahum, ako mopanalangin gayud sa mga katawhan sa tanan nga gihandum sa ilang mga kasingkasing kon sila dili makasala. … Ug kon anaa sa akong gahum akong panalanginan ang tanang mga lumulupyo sa yuta, sa tanan diin sila makahimaya sa Dios, ug makapahimo sa ilang kaugalingong mga kasingkasing nga putli (DBY, 457).

Kon ang Ginoo adunay mga katawhan sa yuta nga kasaligan sa hingpit, walay panalangin diha sa kahangturan sa atong Dios, nga ilang madawat sa unod, nga dili niya ibu-bu nganha kanila. Ang dila dili makasulti sa mga panalangin sa Ginoo alang sa mga katawhan kinsa mimatuod sa ilang mga kaugalingon diha sa iyang atubangan [tan-awa sa 1 Mga Taga-Corinto 2:9–14] (DBY 455).

Imbis ang mga matarung hugtan sa paggapos, sila magpadayon nga makaangkon og dugang kalingkawasan, samtang kita magkadugang ug magkadugang sa pagkamatinud-anon, ug makaangkon og dugang gahum uban sa mga kalangitan ug dugang gahum sa Dios ngari kanato. Magkugi kita sa pagpangita sa Ginoo, hangtud nga atong maangkon ang hugot nga pagtuo ni Jesus sa kahingpitan niini, alang niadtong kinsa nakaangkon niini gawasnon gayud (DBY, 455).

Ako manghinaut nga ang mga katawhan makaamgo nga sila makalakaw, makapuyo, ug magpabilin sa presensya sa Makagagahum. Ang mga matinudanon makabaton og mga mata nga makakita ingon sa makita, ug kamo makakita nga kamo anaa sa taliwala sa kahangturan ug sa presensya sa balaan nga mga binuhat, ug makahimo sa dili madugay nga makatagamtam sa ilang katilingban ug presensya. Kamo napanalanginan pag-ayo (DBY, 454–55).

Buhata kutob sa nahibaloan ninyong tanang butang, nga dili gayud motugot sa inyong kaugalingon sa paghimo og buhat gawas kon ang Espiritu sa Dios mohatag og kaangayan sa pagbuhat niini [tan-awa sa Moises 6:60]. Ug kon kamo magpuyo matag adlaw sa inyong mga kinabuhi sumala sa labing maayong kahayag ug pagsabut nga inyong naangkon, maghimaya sa Dios, sa atong Langitnong Amahan, hangtud asa kutob ang inyong kahibalo, ako mosaad kaninyo og kinabuhing dayon diha sa Gingharian sa Dios (DBY, 455).

Hinaut nga ang Dios mopanalangin kaninyo! Ang kalinaw manaa kaninyo! Pagmainiton pinaagi sa espiritu, pagmapainubsanon, sayon matudloan, ug mainampoon, moatiman sa inyong mga kaugalingon, ug sa tanan nga kamo adunay impluwensya, nga mao ang akong kanunay nga pag-ampo alang kaninyo, pinaagi sa pangalan ni Jesus. Amen (DBY, 456).

Mga Sugyot alang sa Pagtuon

Tinuod nga mga tinun-an ni Jesukristo maningkamot nga magkahiusa—usa sa kasingkasing ug usa sa hunahuna.

Unsa ang gipasabut alang sa mga sumusunod ni Kristo nga “hingpit nga nagkahiusa,” o “usa sa kasingkasing ug usa sa hunahuna”? (Tan-awa sa Juan 17:20–21.)
Ngano nga importante nga ang mga Santos magkahiusa kon kita motukod sa gingharian sa Dios? Ngano nga walay usa kanato ang maluwas didto sa celestial nga gingharian kon kita dili mahimong usa sa usag usa?
Sa unsa nga paagi nga ang ebanghelyo makapahiusa sa mga miyembro sa Simbahan nga adunay mga kalainan sa sosyal, ekonomikanhon, politikanhon, ug kultura diha sa buhat sa Ginoo?
Sa unsa nga paagi nga kita sa tinud-anay mahimong “usa sa kasingkasing ug usa sa hunahuna” uban sa atong isig ka Santos ug sa atong Manluluwas, nga si Jesukristo?

Si Presidente Young kanunay nga nagpamatuod sa ebanghelyo ni Jesukristo.

Unsa nga mga epekto sa ebanghelyo ang gihulagway ni Presidente Young? Sa unsa nga paagi nga inyong nakita kini nga mga nahitabo sa inyong kinabuhi o sa mga kinabuhi niadtong anaa sa inyong palibut?
Sa unsa nga paagi nga ang ebanghelyo makatabang kanato sa “pagdala sa langit nganhi sa yuta ug paghimaya sa yuta ngadto sa langit”?
Si Presidente Young mipaila sa iyang relihiyon nga “usa ka nagpadayon nga kasaulogan.” Sa unsa nga paagi kita magsaulog sa ebanghelyo? Unsa nga mga pagtulun-an ni Presidente Young niini nga paagi sa pagtuon ang nakatabang kaninyo nga makasabut pag-ayo ug magpasalamat sa ebanghelyo?
Sa unsa nga paagi nga ang ebanghelyo ni Jesukristo mipuno kaninyo og kalipay ug pagmaya?

Si Presidente Young misaad og mga panalangin ngadto sa matinud-anong mga Santos.

Sa unsa nga paagi nga ang mga miyembro sa Simbahan mimatuod sa ilang mga kaugalingon sa atubangan sa Ginoo ug nagpakita nga sila takus sa Iyang mahinungdanong mga panalangin alang kanila?
Sa unsa nga paagi nga ang “nagkadugang ug nagkadugang nga pagkamatinud-anon” mosangpot ngadto sa “nagkadugang ug nagkadugang nga kalingkawasan” ug gahum? Ngano nga ang pagkamasulundon ug hugot nga pagtuo makahimo kanato nga gawasnon?
Sa unsa nga paagi kamo “magpuyo matag adlaw sa inyong kinabuhi sumala sa labing maayong kahayag ug pagsabut nga inyong naangkon”?
Sa unsa nga paagi nga ang dili matarug nga pagpamatuod ug kadasig ni Presidente Young alang sa ebanghelyo nakaimpluwensya sa inyong kinabuhi?

Ang Salt Lake Tabernacle gikurtinahan alang sa haya ni Presidente Brigham Young.