Ang Impluwensya sa Espiritu Santo

Si Presidente Brigham Young miingon: “Kon ako makakita og tawo nga walay kahanas sa pagsulti, o talento sa pagpamulong sa publiko, kinsa makasulti og, ‘Ako nasayud, pinaagi sa gahum sa Espiritu Santo, nga ang Basahon ni Mormon tinuod, nga si Joseph Smith usa ka Propeta sa Ginoo,’ ang Espiritu Santo nga gikan niana nga indibidwal nakapasanag sa akong pagsabut, ug kahayag, himaya, ug pagka-imortal gipadayag ngari kanako.” Miingon siya nga siya gilibutan ug napuno niini, ug nasayud siya sa iyang kaugalingon nga ang pagpamatuod sa tawo tinuod (DNW, 9 sa Peb. 1854, 4). Si Presidente Young mitudlo nga ang Espiritu Santo mao “ang talagsaon nga gasa sa Amahan” (DBY, 160), gihatag sumala sa atong pagkamatinud-anon, ug makatudlo kanato sa tanang mga butang ug mogiya kanato ngadto sa kahingpitan.

Mga Pagtulun-an ni Brigham Young

Ang Espiritu Santo usa ka gasa gikan sa Dios nga atong mapahimuslan sumala sa kaalam sa Dios ug sa atong pagkamatinud-anon.

Sa pagsabut sa unang mga baruganan sa Ebanghelyo—aron masabtan kini sa husto, ang tawo kinahanglang adunay kaalam nga gikan sa kahitas-an; kinahanglang nalamdagan siya sa Espiritu Santo; ang iyang hunahuna kinahanglang andam sa panan-awon; kinahanglang makapahimulos siya sa mga panalangin sa kaluwasan sa iyang kaugalingon, aron ikapaambit kini ngadto sa uban (DBY, 152).

Unsa ang gikinahanglan gikan kanato inig abut dayon nato sa mga tuig sa pagkamay-tulubagon? Gikinahanglan kini gikan kanato, kay kini ang katukuran sa langit, ang gigikanan diin kamo ug ako dili makasulti, tungod sa yano nga rason nga kini walay sinugdanan, kini gikan sa kahangturan ngadto sa kahangturan—kini nagkinahanglan nga kita manaug ngadto sa tubig sa bunyag. Dinhi mao ang tuburan o elemento, sanglitanan sa kaputli sa kahangturan. Kanaog ngadto sa tubig sa bunyag, ug diha pagpabunyag alang sa kapasayloan sa mga sala, ug dayon ipapandong ang mga kamot diha kanato aron sa pagkumpirma kanato nga mga miyembro sa Simbahan ni Jesukristo sa mga Santos sa Ulahing mga Adlaw. Dayon dawata ang Espiritu sa Kamatuoran, o ang Espiritu Santo (DBY, 159).

Sa bag-ong Tugon ug sa Basahon ni Mormon, atong makat-unan nga kon ang Ebanghelyo isangyaw ang mga tawo gitudloan sa pagtuo kang Jesukristo, sa paghinulsol sa ilang mga sala, sa pagpabunyag alang sa kapasayloan sa sala, ug sa pagdawat sa Espiritu Santo pinaagi sa pagpandong sa mga kamot; ang Espiritu Santo mao ang talagsaon nga gasa sa Amahan ug mao ang iyang tigpangalagad. Mohatag usab siya og salabutan pinaagi sa mga anghel, ingon man usab pinaagi sa inspirasyon sa Espiritu Santo, ug pinaagi sa pag-abli sa mga hunahuna sa mga Santos aron makakita diha sa panan-awon sa mga butang ingon nga sila mao diha sa kahangturan. Kon ang tinuod nga mga doktrina gitudlo, bisan og kini bag-o ngadto sa mga tigpaminaw, apan ang mga baruganan nga anaa niini hingpit nga ordinaryo ug sayon nga sabton, nga sa ingon nga ang mga tigpaminaw sa kasagaran maghunahuna nga nakahibalo na gayud niini. Kini moabut gikan sa impluwensya sa Espiritu sa Kamatuoran diha sa espiritu sa salabutan nga anaa sa matag tawo [tan-awa sa D&P 6:15]. Ang impluwensya nga moabut gikan sa langit sa tanang higayon nagtudlo sa mga katawhan (DBY, 160).

Ang mga gasa sa Ebanghelyo gihatag aron sa pagpalig-on sa pagtuo sa tumutuo (DBY, 161).

Kita nagtuo nga kita adunay katungod sa gasa sa Espiritu Santo … sumala sa paghukom ug kaalam sa Dios ug sa atong pagkamatinud-anon; diin nga gasa makatabang nga mahinumduman nato ang tanang mga butang, kaniadto, karon, ug sa umaabut, nga kinahanglan natong mahibaloan, ug sumala sa pagkaandam sa atong mga hunahuna sa pagdawat sa kahibalo sa Dios nga gipadayag nianang maalamon kaayo nga Tinugyanan. Ang Espiritu Santo mao ang tigpangalagad sa Dios, ug gitugyanan sa pagbisita sa mga anak nga lalaki ug mga anak nga babaye sa mga tawo. Ang tanang may salabutan nga mga binuhat kalabut niini nga yuta gitudloan gikan sa sama nga tinubdan (DBY, 160–61).

Ang pagpaminaw ug ang pagsunod sa mga pag-aghat sa Espiritu Santo makagiya kanato ngadto sa kahingpitan.

Ang akong nahibaloan mao, kon kamo mosunod sa mga pagtulun-an ni Jesukristo ug sa iyang mga Apostoles, sumala sa girekord diha sa Bag-ong Tugon, ang matag lalaki ug babaye ibutang sa pagpanag-iya sa Espiritu Santo. … Masayud sila sa mga butang nga mao karon, sa umaabut, ug sa kaniadto. Makasabut sila sa mga butang sa langit, sa mga butang sa yuta, ug sa mga butang ilawom sa yuta, sa mga butang sa panahon, ug sa mga butang sa kahangturan, sumala sa ilang lain-laing mga tawag ug mga kasarang (DBY 161).

Kon kamo buot sa hunahuna ug kabubut-on sa Dios …, kuhaa kini, kini inyo usab nga pribilehiyo sama ni bisan kinsa nga miyembro sa Simbahan ug sa Gingharian sa Dios. Kini pribilehiyo ug katungdanan ninyo sa pagpakabuhi aron kamo makahibalo kon kanus-a ang pulong sa Ginoo gipamulong nganha kaninyo ug kanus-a ang hunahuna sa Ginoo gipadayag nganha kaninyo. Ako moingon nga inyong katungdanan sa pagpakabuhi aron makahibalo ug makasabut niining tanang mga butang (DBY, 163).

Dayon magpakabuhi sumala sa matag pulong nga mogula gikan sa ba-ba sa Dios, pinaagi niadtong mga tawo kinsa iyang gitudlo dinhi sa yuta, hangtud nga kita mahingpit (DBY, 159).

Mga Sugyot alang sa Pagtuon

Ang Espiritu Santo usa ka gasa gikan sa Dios nga atong mapahimuslan sumala sa kaalam sa Dios ug sa atong pagkamatinud-anon.

Unsa ang kinahanglan nga anaa sa tawo aron “makasabut sa husto nga paagi” sa unang mga baruganan sa ebanghelyo? Ngano man? (Tan-awa usab sa Isaias 55:8–9.)
Sumala ni Presidente Young, “kon isangyaw ang Ebanghelyo” unsa ang gitudlo ngadto sa mga tawo? Unsa ang kahulugan niini nga mga panalangin sa inyong kinabuhi, tungod kay natudloan sa ebanghelyo?
Unsa ang tahas sa Espiritu Santo sa inyong kinabuhi? Ngano nga ang impluwensya sa Espiritu Santo nakapahimo sa bag-ong mga doktrina nga ingon og pamilyar? Unsaon man ninyo sa pagkahibalo kon ang mga pagbati, mga ideya, ug mga panghunahuna naggikan ba sa inyong kaugalingong kasingkasing ug hunahuna o naggikan sa Espiritu Santo?
Sumala ni Presidente Young, hangtud asa kutob kita adunay “katungod sa gasa sa Espiritu Santo”? Unsa ang mga kakuyaw nga magpakabuhi nga walay impluwensya sa Espiritu Santo o ubos sa impluwensya sa dili diosnon nga mga tinubdan sa kahibalo?
Unsa nga mga butang ang gisulti ni Presidente Young nga ang Espiritu Santo makatabang kanato aron makahibalo? Unsa ang atong responsibilidad sa pag-angkon sa mao nga kahibalo? Unsa ang atong responsibilidad kon maangkon na nato kini nga kahibalo?

Ang pagpaminaw ug ang pagsunod sa mga pag-aghat sa Espiritu Santo makagiya kanato ngadto sa kahingpitan.

Unsaon nato sa pagkahibalo “sa hunahuna ug kabubut-on sa Dios”? Ngano nga importante nga makahibalo niini? Unsa nga mga panalangin ang moabut sa pagpangita ug pagsunod sa mga pag-aghat sa Espiritu Santo ug sa gitudlo nga mga sulugoon sa Dios?
Unsa nga mga kasinatian nga naangkon ninyo ug sa uban nga nakatabang kaninyo sa pagtuo nga ang Espiritu Santo makatabang kaninyo sa pagsabut ug pagsunod sa hunahuna ug kabubut-on sa Dios sa inyong inadlaw nga kinabuhi? (Tan-awa usab sa 1 Nephi 22:2 ug 2 Nephi 32:2–3.)

woman receiving gift of Holy Ghost — Si Presidente Young mitudlo nga ang gasa sa Espiritu Santo “makapahinumdom nato sa tanang mga butang … nga kinahanglan natong mahibaloan” alang sa atong kaluwasan (*DBY*, 160).