Kaluwasan pinaagi ni Jesukristo

Si Presidente Brigham Young nangutana, “Wala bay mawala? Wala bay mag-antus sa kasuko sa Makagagahum? Ako moingon, sa sinugdanan, sama sa akong gisulti sa akong tibuok kinabuhi, diin ako nagsangyaw, wala gayud akoy espiritu sa pagsangyaw og impyerno ug panghimaraut sa mga katawhan. Akong gisulayan sa daghang mga higayon—akong gisulayan sa miaging Igpapahulay, ug akong gisulayan karon nga moabut niana nga punto—ang mga pag-antus sa dautan. Sila mag-antus, ingon og; apan ako dili mobati og laing butang; gawas lamang sa kaluwasan sa mga katawhan” (DBY, 388). Si Presidente Young mitudlo nga ang “tanan mabanhaw” (DBY, 391). Naghisgot siya og kaluwasan nga “maangkon sa tibuok tawhanong pamilya” (DBY, 389). Ug siya namulong mahitungod sa kinabuhing dayon alang niadtong kinsa higpit nga “mosunod sa mga panginahanglanon sa mga [balaod] sa Dios, ug nagpadayon sa pagkamatinudanon” (DBY, 387).

Mga Pagtulun-an ni Brigham Young

Ang kaluwasan nga gitanyag ni Jesus maangkon sa tibuok tawhanong pamilya.

Tan-awa ang kaayo, ang pagkamainantuson, ang pagkamabination, ug ang lig-on nga pagbati sa pagkaginikanan sa atong Amahan ug Dios sa pagandam og paagi ug paghatag og mga paagi sa pagluwas sa mga katawhan— dili lamang ang mga Santos sa Ulahing mga Adlaw—dili lamang niadtong kinsa adunay kahigayunan sa unang mga baruganan sa celestial nga balaod, apan sa pagluwas sa tanan. Kaluwasan kini sa tanan—katubsanan sa tanan (DBY, 388).

Unsa ka daghan ang ipatunhay? Ang tanan nga wala molimud ug mosalikway sa gahum ug kinaiya sa Anak sa Dios—ang tanan nga wala makasala batok sa Espiritu Santo (DBY, 387).

Ang tanang mga nasud makaangkon niini nga mga panalangin, ang tanan gilakip sa katubsanan sa Manluluwas. Nakasinati siya og kamatayon alang sa matag tawo; sila anaa sa iyang gahum, ug iyang giluwas silang tanan, sama sa iyang giingon, gawas sa mga anak sa perdisyon, ug gibutang sa Amahan diha sa iyang gahum ang tanang mga nilalang niini nga yuta. Ang yuta mismo, ug ang katawhan nga anaa niini, ang bangis nga mananap, ang isda sa dagat, ug ang mga kalanggaman sa langit, ang mga insekto, ug ang nagkamang nga butang, uban sa tanang mga butang kabahin niining yuta,—ang tanan anaa sa mga kamot sa Manluluwas, ug iyang gitubos silang tanan (DBY, 388).

Ang mga pangalan sa matag anak nga lalaki ug babaye ni Adan gisulat na diha sa Basahon sa Kinabuhi sa Kordero. Adunay bay panahon nga sila kuhaon gikan niini? Oo, kon sila mahimong mga anak sa perdisyon, ug dili hangtud nga mahitabo kini. Ang matag tawo adunay kahigayunan nga ipabilin kini diha hangtud sa kahangturan. Kon sila mosalikway niini nga kahigayunan, ang ilang mga pangalan pagapapason, ug dili hangtud nga mahitabo kini. Ang tanang mga pangalan sa tawhanong pamilya gisulat dinhi, ug ipabilin sila sa Ginoo diha hangtud nga sila makahibalo sa kamatuoran, nga sila makasukol batok kaniya, ug makasala batok sa Espiritu Santo; niana itambug sila ngadto sa impyerno, ug ang ilang mga pangalan papason gikan sa Basahon sa Kinabuhi sa Korderno (DBY, 387–88).

Kini makapahimuot nga makahibalo nga atong maluwas ang tanan nga gihatag sa atong Amahan sa atong gahum [pagkatinugyanan]. Si Jesus miingon nga walay mawala kaniya gawas sa mga anak sa perdisyon. Walay mawala sa iyang mga kaigsoonan, gawas sa mga anak sa perdisyon. Luwason nato ang tanan nga gibutang sa Amahan diha sa atong gahum (DBY, 388).

Ang atong relihiyon gipahiangay sa kasarang sa tibuok tawhanong pamilya. Dili kini mopadala og pipila ka mga tawo nga mominatay hangtud sa kahangturan, apan kini moabut human sa katapusan nga mga anak ni Adan ug Eva, ug kuhaon sila gikan sa bilanggoan, ablihan ang mga pultahan, ug putlon ang mga higot ug kuhaon ang matag kalag kinsa makadawat og kaluwasan (DBY, 389).

Ang tanang kalangitan buot nga ang katawhan maluwas gayud. Ang kalangitan magbakho alang sa mga katawhan, tungod sa ilang katig-a og kasingkasing, pagkawalay pagtuo, ug kadugay motuo ug molihok (DBY, 388–89).

Sa dihang gipadayag sa Dios ngadto ni Joseph Smith ug Sidney Rigdon nga dihay usa ka dapit nga giandam alang sa tanan, sumala sa kahayag nga ilang nadawat ug sa ilang pagsalikway sa dautan ug pagbuhat og maayo, dako kini nga pagsulay alang sa kadaghanan, ug ang uban mibiya sa kamatuoran tungod kay ang Dios dili mopadala sa mga pagano ug mga masuso ngadto sa walay katapusan nga silot, apan adunay dapit sa kaluwasan, sa tukmang panahon, alang sa tanan, ug mopanalangin sa matinuoron ug mahiyason ug matinud-anon, bisan og sila nasakop sa bisan unsa nga simbahan o wala. Bag-o kini nga doktrina niini nga henerasyon, ug daghan ang wala modawat niini (DBY, 390–91).

Dili ba kini mahimayaon nga hunahuna nga adunay mga gingharian, mga mansyon sa himaya ug hayahay nga puy-anan nga giandam alang sa tanang mga anak ni Adan, gawas sa mga anak sa perdisyon? Ang tanan walay apil sa unang pagkabanhaw, ug tingali daghan ang dili makita sa ikaduha; apan ang tanan mabanhaw (DBY, 391).

Pinaagi sa Pag-ula ni Kristo, ang tanan nga matinud-anon sa mga balaod ug mga ordinansa sa ebanghelyo maluwas ngadto sa celestial nga gingharian.

Adunay kahigayunan [alang sa kahimayaan] alang niadtong kinsa nabuhi kaniadto ug alang niadtong kinsa nabuhi karon. Ang Ebanghelyo miabut. Ang kamatuoran ug kahayag ug pagkamatarung gipadala nganhi sa kalibutan, ug niadtong kinsa nakadawat kanila pagaluwason ngadto sa celestial nga gingharian sa Dios. Ug kadaghanan niadtong kinsa, tungod sa kawalay kahibalo, tungod sa tradisyon, sa bakak nga tinuohan, ug sa sayop nga mga pagtuo sa mga katigulangan, wala modawat niini, makapanunod pa og maayo ug mahimayaon nga gingharian, ug makapahimulos og daghan ug makadawat og dugang kay sa mahunahuna sa tawo, gawas kon siya nakadawat og pagpadayag (DBY, 389).

Kini nga mga pulong [tan-awa sa D&P 88:21–24] nagpahayag sa kamatuoran nga gipasabut ni Jesus sa dihang siya miingon, “Sa balay sa akong amahan anaay daghang puluy-anan” [Juan 14:2; D&P 98:18]. Kon pila ka buok ako dili andam nga mosulti, apan adunay tulo nga gihisgutan: Ang celestial, ang pinakataas, ang terrestrial, ang sunod ubos niini; ug ang telestial, ang ikatulo. Kon kita maningkamot sa pagbasa unsa ang gisulti sa Ginoo sa iyang mga katawhan sa ulahing mga adlaw atong makita nga siya nagtagana alang sa tanang mga lumulupyo sa yuta, sa tanang mga nilalang kinsa nagtinguha, ug kinsa naningkamot pag-ayo, sa pagbuntog sa dautan ug paglupig sa kadautan sa iyang kaugalingon, ug sa pagpuyo nga takus sa usa ka himaya, makaangkon og usa. Kita kinsa nakadawat sa kahingpitan sa Ebanghelyo sa Anak sa Dios, o sa Gingharian sa langit nga miabut sa yuta, nakaangkon niadto nga mga balaod, mga ordinansa, mga kasugoan ug mga pagpadayag nga makapaandam kanato, pinaagi sa higpit nga pagsunod, aron makapanunod sa celestial nga gingharian, makaadto ngadto sa presensya sa Amahan ug sa Anak (DBY, 391).

Dili igsapayan unsa ang panagway sa gawas—kon ako makahibalo sa pagkatinuod nga ang mga kasingkasing sa mga tawo hingpit nga giandam sa buhat sa kabubut-on sa Amahan sa Langit, bisan og sila masayop ug nagbuhat og daghang mga kasaypanan tungod sa kahuyang sa kinaiyahan sa tawo, bisan pa sila maluwas (DBY, 389).

Ug kon kita modawat sa kaluwasan ubos sa mga kasabutan nga gitanyag ngari kanato, kita kinahanglang magmatinuoron sa matag hunahuna, sa atong mga paghinuktok, sa atong mga pagpamalandong, sa atong pundok sa mga kahigalaan, sa atong mga pakigsabut, sa atong mga pamahayag, ug sa matag lihok sa atong mga kinabuhi, walay kahadlok ug walay pagtagad sa matag baruganan nga sayop, sa matag baruganan nga bakak nga mahimong itanyag (DBY, 389).

Bisan og ang atong tinguha nagkahiusa isip mga katawhan, apan hinumdumi, ang kaluwasan indibidwal nga trabaho; kini sa matag tawo alang sa iyang kaugalingon. Daghan ang akong buot ipasabut kay sa akong panahon sa pagsulti kaninyo sa tanan, apan hatagan ko kamo og pasumbingay. Adunay anaa niini nga Simbahan kinsa nagbanabana nga maluwas pinaagi sa pagkamatarung sa uban. Wala nila masabti ang tumong. Sila mao kadtong moabut sa dihang gisirad-an ang ganghaan, mao nga nianang kahimtanga kamo pagasirad-an; dayon motawag kamo og usa ka tawo, kinsa, tungod sa ilang kaugalingong pagkamatinud-anon, pinaagi sa kalooy ni Jesukristo, misulod agi sa celestial nga ganghaan, sa pagduol ug sa pag-abli niini alang kaninyo; apan sa pagbuhat niini dili ilang katungdanan. Ang ingon mao ang kapalaran niadtong mga tawo kinsa naglaum nga maluwas tungod sa pagkamatarung ug pinaagi sa impluwensya ni Brother [o Sister]. Busa ako mopasidaan kaninyo sa pag-ugmad og pagkamatarung ug pagkamatinud-anon sa inyong mga kaugalingon, nga mao lamang ang pasaporte ngadto sa celestial nga kalipay (DBY, 390).

Kon si Brother Brigham mosubay sa sayop nga agianan, ug dili makasulod sa Gingharian sa langit, walay tawo ang mabasol gawas ni Brother Brigham. Ako lamang ang bugtong tawo sa langit, sa yuta, o sa impyerno ang mabasol (DBY, 390).

Kini alang usab sa tanang mga Santos sa Ulahing mga Adlaw. Ang kaluwasan usa ka indibidwal nga paningkamot. Ako lamang ang bugtong tawo nga mahimong makaluwas sa akong kaugalingon. Kon ang kaluwasan ihatag ngari kanako, mahimong isalikway ko kini o dawaton. Sa pagdawat niini, ako mohatag og bug-os nga pagsunod ug pagtugyan sa akong tibuok kinabuhi ngadto sa Ginoo, ug ngadto niadtong kinsa iyang itudlo sa pagtudlo kanako; sa pagsalikway niini, ako mosubay sa mando sa akong kaugalingong kabubut-on nga pinasubay sa kabubut-on sa akong Tiglalang (DBY, 390).

Walay si bisan kinsa nga tawo nga nanobra ang kaluwasan; ang tanan kinsa naluwas, ug kinsa maluwas sa umaabut, maluwas lamang, ug niana kini dili sabton nga walay mga kalisud nga pagabuntugon, nga nagkinahanglan sa tanang kalagsik sa kalag (DBY, 387).

Kon asa magpuyo ang Dios ug si Kristo, mao kana ang gingharian—ang celestial nga gingharian (DBY, 388).

Ang mga lalaki ug mga babaye, nga nagtinguha nga makaangkon og bahin sa celestial nga gingharian, nasayud nga kinahanglan sila makigbisog kada adlaw (DBY, 392).

Kalabut sa usa ka tawo nga maluwas ngadto sa celestial nga gingharian sa Dios nga wala makaandam sa pagpuyo sa putli ug balaan nga dapit, kini binuang ug kataw-anan; ug kon adunay maghunahuna nga sila makaadto sa presensya sa Amahan ug sa Anak pinaagi sa pagpakig-away, kay sa pagpuyo, sa ilang relihiyon, masayop sila, tungod niana kon mas dali kitang makahukom sa pagpuyo sa atong relihiyon mas maayo kini alang kanato (DBY, 392).

Ang paagi sa pagdumala sa langit mao ang pagpundok sa tanan, ug pagluwas sa tanan nga mahimong maluwas (DBY, 387).

Ang mga tawo kinahanglan makasabut nga walay lalaki [o babaye] nga matawo sa ibabaw sa yuta nga dili maluwas sa Gingharian sa Dios, kon siya angay nga maluwas (DBY, 387).

Ang tanan nga nagpakabuhi o magpakabuhi niini nga yuta adunay pribilehiyo sa pagdawat sa Ebanghelyo. Sila makabaton og mga Apostoles, mga Propeta, ug mga ministro didto, sama kanato dinhi, nga mogiya kanila sa mga pamaagi sa kamatuoran ug pagkamatarung, ug dad-on sila balik ngadto sa Dios. Ang tanan adunay kahigayunan alang sa kaluwasan ug kinabuhing dayon (DBY, 387).

Kon kita nagkahiusa sa hugot nga pagtuo, ug nagkahiusa nga makaangkon sa mahinungdanong tumong, ug ako, isip usa ka indibidwal, mahimong makaabut ngadto sa celestial nga gingharian, kamo ug ang matag tawo, pinaagi sa samang lagda, mahimong makasulod usab didto (DBY, 387).

Ang Langitnong Amahan mohimaya sa Iyang masulundong mga anak nga mopuyo sa Iyang presensya diha sa gahum ug himaya sa kahangturan.

Ang tanang mga espiritu managsama bang gitugahan? Dili, sa bisan unsang paagi. Managsama ba ang tanan sa celestial nga gingharian? Dili. [Tan-awa sa D&P 131:1–4.] Ang ubang mga espiritu mas halangdon kay sa uban; ang uban mas makahimo sa pagdawat labaw kay sa uban. Adunay managsama nga matang nga inyong makita sa kalibutan sa espiritu sa inyong nakita dinhi, gani sila gikan sa samang ginikanan, usa og Amahan; usa ka Dios (DBY, 391).

Mao kini ang plano, tinguha, kabubut-on, ug hunahuna sa Ginoo nga ang mga lumulupyo sa yuta kinahanglang mahimaya ngadto sa mga trono, mga gingharian, mga kamandoan, ug mga gahum, sumala sa ilang mga kapasidad. … Silang tanan kinahanglan nga mapaubos sa sala ug mga katalagman sa mortal nga unod, aron ilang mapakita ang ilang mga kaugalingon nga takus, niana ang Ebanghelyo andam sa pagtudlo kanila ug pagdala kanila, paghiusa kanila, paglamdag sa ilang mga hunahuna, ug paghiusa kanila diha ni Ginoong Jesus, aron ang ilang hugot nga pagtuo, mga pag-ampo, mga paglaum, mga pagbati, ug ang ilang tanang mga tinguha mapunting sa usa ka tumong (DBY, 391–92).

Ang kalainan tali sa matarung ug sa makasasala, kinabuhing dayon o kamatayon, kalipay o kasakit, mao kini, kadtong kinsa nahimaya walay utlanan o mga kinutuban sa mga pribilehiyo, ang ilang mga panalangin magpadayon, ug sa ilang mga gingharian, mga trono, ug mga dominyon, mga kamandoan, ug mga gahum, walay katapusan, apan sila mouswag hangtud sa kahangturan (DBY, 63).

Kinsa ang makahatag og kahulugan sa pagkadiosnon sa tawo? Kadto lamang kinsa nakasabut sa tinuod nga mga baruganan sa kahangturan— mga baruganan nga kalabut sa kinabuhi ug kaluwasan. Ang tawo, nga mahimaya, dili mawad-an sa gahum ug abilidad nga kinaiyanhon nga gihatag ngadto kaniya, apan, sa laing bahin, pinaagi sa pag-agi sa dalan padulong ngadto sa kinabuhi, makaangkon siya og dugang gahum, dugang impluwensya ug abilidad sa matag lakang nga siya nag-uswag (DBY, 392).

Ang gingharian nga anaa niini nga mga katawhan mao ang Celestial nga gingharian; mao kini ang gingharian diin kita makaandam sa pag-adto ngadto sa presensya sa Amahan ug sa Anak. Mao nga kinahanglang magpakabuhi kita aron makapanunod sa himaya. Ang Dios misaad kaninyo, si Jesus misaad kaninyo, ug ang mga apostoles ug mga propeta sa karaan ug sa atong panahon misaad kaninyo nga kamo pagagantihan sumala sa tanan nga inyong gitinguha diha sa pagkamatarung sa atubangan sa Ginoo, kon kamo nagpakabuhi alang niana nga ganti (DNW, 31 sa Okt. 1860, 1).

Ang kaluwasan mao ang hingpit nga pagpuyo sa tawo, sa mga anghel, ug sa mga Dios; kini mao ang kinabuhing dayon—ang kinabuhi nga mao kaniadto, mao karon, ug mao ang umaabut. Ug kita, isip mga tawo, mga manununod sa tanan niini nga kinabuhi, kon kita higpit nga misunod sa mga kinahanglanon sa balaod sa Dios, ug nagpadayon sa pagkamatinudanon (DBY, 387).

Kon kamo adunay bulawan ug pilak, ayaw itugot nga kini mobabag kaninyo ug sa inyong katungdanan. Ako mosulti kaninyo unsay buhaton aron makaangkon og kahimayaan, nga dili ninyo maangkon gawas kon kamo moagi niini nga dalan. Kon ang inyong mga pagbati anaa sa bisan unsa nga makapugong kaninyo bisan gamay sa pagpahinungod niini ngadto sa Ginoo, unaha sa pagpahinungod kanang butanga, nga ang pagpahinungod sa tanan mahingpit. … Kon ang akong kasingkasing dili pa bug-os nga mipahinungod niini nga buhat, akong ihatag ang akong panahon, ang akong mga talento, ang akong mga kamot, ug ang akong mga kabtangan ngadto niini, hangtud ang akong kasingkasing mouyon niini. Akong palihokon ang akong mga kamot alang sa Dios, hangtud ang akong kasingkasing moyukbo sa pagdawat niini. … Gisultihan ko na kamo karon kon unsang dalana ang subayon aron makaangkon og kahimayaan. Ang Ginoo kinahanglan gayud mao ang una ug labing importante sa atong mga pagbati; ang paghimo sa iyang kawsa ug gingharian nagkinahanglan sa atong unang pagtagad (DNW, 5 sa Ene. 1854, 2).

Walay tawo nga maluwas ug makaadto sa presensya sa Amahan, gawas lamang pinaagi sa Ebanghelyo ni Jesukristo—sama alang sa usa ug sa lain. Ang Ginoo adunay iyang kawsa, iyang mga paagi, iyang buhat, humanon niya kini. Si Jesus naningkamot pag-ayo sa pagbalaan ug pagtubos sa yuta ug sa pagdala og balik sa iyang mga kaigsoonan ngadto sa presensya sa Amahan. Naningkamot kita uban kaniya alang sa paglimpyo sa tibuok tawhanong pamilya, aron kita ug sila makaandam sa pagpuyo uban sa Dios sa iyang Gingharian (DBY, 389).

Mga Sugyot alang sa Pagtuon

Ang kaluwasan nga gitanyag ni Jesus maangkon sa tibuok tawhanong pamilya.

Sa unsa nga pagsabut nga ang kaluwasan nga gitanyag ni Jesukristo “usa ka kaluwasan sa tanan—usa ka katubsanan sa tanan”? Sa unsa nga paagi nga kini nga kaluwasan sa tanan nagpakita “sa lig-ong pagbati sa ginikanan” nga ang sa atong Langitnong Amahan aduna alang sa Iyang mga anak? Sa unsa nga paagi nga kini nga kahibalo nakahatag kaninyo og kalipay?
Si Presidente Young miingon nga daghang mga katawhan mibiya sa kamatuoran sa dihang gipadayag sa Dios ngadto ni Propeta Joseph Smith ug Sidney Rigdon nga ang tanang katawhan makadawat og kaluwasan. Ngano sa inyong pagtuo nga kana nga pagtulun-an malisud dawaton alang sa ubang mga miyembro? Sa unsa nga paagi kita makalikay sa susamang mga problema karon sa mga pagtulun-an sa moderno nga mga propeta ug mga apostoles?

Pinaagi sa Pag-ula ni Kristo, ang tanan nga matinud-anon sa mga balaod ug mga ordinansa sa ebanghelyo maluwas ngadto sa celestial nga gingharian.

Unsa sa inyong hunahuna ang gipasabut ni Presidente Young sa dihang siya miingon nga ang “kaluwasan usa ka indibidwal nga buhat”? Ngano nga ang kaluwasan nagkinahanglan nga “gamiton [ang] tanang kalagsik sa kalag”? (Tan-awa usab sa 2 Nephi 25:23.)
Itandi ang gihisgutan ni Presidente Young niadtong “kinsa nagbanabana nga maluwas pinaagi sa pagkamatarung sa uban” uban sa sambingay sa Manluluwas sa maalamon ug buang nga mga birhen. (Tan-awa usab sa Mateo 25:1–13; D&P 33:17; 45:56–57.) Miingon usab si Presidente Young nga “kita naningkamot uban ni [Jesus] alang sa paglimpyo sa tibuok tawhanong pamilya.” Nag-ila nga ang “kaluwasan indibidwal nga trabaho,” unsaon nato sa pagtabang ang uban sa ilang mga paningkamot sa pagduol ngadto ni Jesukristo ug pagdawat og kinabuhing dayon?
Ngano nga bisan ang pinakamatinud-anon nga mga Santos nagkinahanglan sa kalooy ni Jesukristo aron makasulod sa celestial nga gingharian?
Sumala ni Presidente Young, unsa ang gipasabut sa pagdawat og kaluwasan nga gitanyag kanato? Unsa ang gipasabut sa pagsalikway sa kaluwasan? Unsa nga mga kasinatian ang nakatabang kaninyo nga makakat-on sa kaimportante sa pagkamasulundon sa kabubut-on sa Dios?
Ngano nga “binuang ug kataw-anan” ang paghunahuna nga kita makapuyo sa presensya sa Dios nga dili andam sa pagbuhat sa ingon? (Tan-awa usab sa Mormon 9:4.) Sa unsa nga paagi nga ang matinud-anon nga pagserbsiyo sa Ang Simbahan ni Jesukristo sa mga Santos sa Ulahing mga Adlaw makapaandam kanato sa pagsulod sa celestial nga gingharian? Ngano nga kini nga pagpangandam kinahanglan nga kita “makigbisog kada adlaw”?

Ang Langitnong Amahan mohimaya sa Iyang maunungon nga mga anak nga mopuyo sa Iyang presensya diha sa gahum ug himaya sa kahangturan.

Unsa ang gipasabut ni Presidente Young sa dihang siya miingon nga ang ebanghelyo makahimo kanato sa “paghiusa diha ni Ginoong Jesus”? (Tan-awa usab sa Juan 17; 4 Nephi 1:15–17; D&P 38:27.)
Si Presidente Young mitudlo nga si “Jesus naningkamot pag-ayo … sa pagdala og balik sa iyang mga kaigsoonan ngadto sa presensya sa Amahan. Kita naningkamot uban kaniya.” Sa unsa nga mga paagi nga kita naghago uban Kaniya “alang sa paglimpyo sa tibuok tawhanong pamilya”?