Ang Komunikasyon tali sa Dios ug sa Tawo

Si Presidente Brigham Young mitudlo nga ang atong “una ug labing importante nga katungdanan [mao] ang pagpangita sa Ginoo hangtud atong maablihan ang dalan sa komunikasyon gikan sa Dios ngadto sa atong kaugalingong kalag.” Human gayud sa kamatayon ni Propeta Joseph Smith, si Brigham Young misulti sa usa ka damgo diin si Joseph mibisita ug mitudlo kaniya: “Si Joseph mipaduol kanamo, ug nagtan-aw nga matinguhaon kaayo, apan malipayon, miingon: ‘Sultihi ang mga tawo nga magmapainubsanon ug magmatinud-anon, ug siguroha paghupot sa espiritu sa Ginoo ug kini mogiya kanila sa katarung. Pagbantay ug ayaw isalikway ang ligdong nga hinagawhaw nga tingog; motudlo kini kanila sa unsay buhaton ug kon asa moadto; mohatag kini og mga bunga sa gingharian. … Sultihi ang mga kaigsoonan nga kon sila mosunod sa espiritu sa Ginoo, sila maglakaw sa katarung’ ” (JH). Ang tanang mga anak sa Dios adunay kahigayunan nga malamdagan pinaagi sa Espiritu ni Kristo ug makadawat og personal nga pagpadayag pinaagi sa Espiritu Santo samtang sila matinguhaong nangita sa Ginoo.

Mga Pagtulun-an ni Brigham Young

Ang Espiritu ni Kristo gihatag ngadto sa tanang mga anak sa Dios aron molamdag kanila ug motabang kanila nga makahibalo sa maayo ug dautan.

Ang Espiritu sa Ginoo molamdag sa matag tawo nga moabut dinhi sa kalibutan. Walay usa nga nagpuyo dinhi sa yuta nga wala malamdagi kapin o kulang sa Espiritu ni Ginoong Jesus. Gikasulti kini mahitungod kaniya, nga siya mao ang kahayag sa kalibutan. Siya naglamdag sa matag tawo nga moabut sa kalibutan ug ang matag tawo, usahay, adunay kahayag sa espiritu sa kamatuoran diha kaniya [tan-awa sa Juan 1:9; 8:12; Moroni 7:16; D&P 84:46] (DBY, 32).

Dili ako motuo bisan sa makadiyot nga adunay lalaki o babaye sa ibabaw sa yuta, gikan sa mga adlaw ni Adan hangtud niining adlawa, nga wala malamdagi, mapahimangnoi, ug matudloi pinaagi sa mga pagpadayag ni Jesukristo. “Unsa! ang mga hentil?” Oo, ang matag tawo nga adunay tarung nga panghunahuna. Dili gayud ako motuo nga ang mga katawhan gihikawan sa kahigayunan sa pagdawat sa Espiritu sa Ginoo sa pagtudlo kanila sa matarung gikan sa sayop (DBY, 32).

Ako. … positibong nagtuo nga walay mahibaloan gawas kon pinaagi sa pagpadayag ni Ginoong Jesukristo, bisan sa teyolohiya, siyensya, o sa art (DBY, 38).

Adunay mga tawo nga may talento, may taas nga salabutan, gahum sa paghunahuna, ug kahibalo kabahin sa tanang maliputon nga mga pamaagi; mga batid sila niana, bisan og sila wala masayud diin gikan ang ilang nadawat nga salabutan. Ang Espiritu sa Ginoo wala pa sa kinatibuk-an [mahuman] sa pagpabilin diha sa mga tawo, sa paghatag kanila sa kahibalo ug salabutan; tungod niana, kini mopadayag kanila, mopahimangno kanila, motudlo kanila, ug mogiya kanila (DBY, 33).

Ang Dios ania dinhi: ang iyang impluwensya mopuno sa kawanangan. Siya adunay iyang mga mensahero diha sa tanang mga binuhat sa iyang mga kamot. Iyang gibantayan ang tanan niyang mga nilalang; ang ilang mga buhat, ang ilang mga pagbati, ug mga hunahuna tanan iyang nasayran; kay ang iyang salabutan ug gahum mipuno sa kawanangan [tan-awa sa D&P 88:6–13]. Dili ingon nga ang iyang pagkatawo ang naghimo, apan ang Iyang Espiritu ang naghimo; ug siya ania dinhi nagtudlo, naggiya ug nagagak sa mga nasud sa yuta (DBY, 32).

Ang Dios namulong ngadto sa Iyang mga anak pinaagi sa pagpadayag.

Kini nga mga katawhan nagtuo sa pagpadayag. Kini nga mga katawhan mituo ug nagtuo nga ang Ginoo namulong gikan sa mga kalangitan. Sila mituo ug nagtuo nga ang Dios nagpadala og mga anghel sa pagpahayag sa walay katapusan nga Ebanghelyo, sumala sa pagpamatuod ni Juan [tan-awa sa Pagpadayag 14:6–7] (DBY, 38).

Kanunay nato kining madunggan nga ang mga buhing orakulo kinahanglang anaa sa Simbahan, aron nga ang Gingharian matukod ug mouswag dinhi sa yuta. Mohatag ako og laing bersyon niini nga sentimento. Moingon ako nga ang buhi nga mga orakulo sa Dios, o ang Espiritu sa pagpadayag kinahanglang anaa sa usa ug matag indibidwal, aron makahibalo sa plano sa kaluwasan ug magpadayon diha sa dalan nga mogiya kanila ngadto sa presensya sa Dios (DBY, 38).

Ang Ginoo wala sa tanang dapit; apan siya adunay mga tinugyanan nga nagsulti ug naglihok alang kaniya. Ang iyang mga anghel, iyang mga mensahero, iyang mga apostoles ug mga sulugoon gitudlo ug gitugutan sa paglihok alang kaniya. Ug ang iyang mga sulugoon gitugutan sa pagtambag ug pagdiktar sa labing maayo ug sa unsay giisip sa uban nga gamay ra kaayo og bili nga mga butang, sa pag-agak, pagdirekta ug paggiya sa iyang mga Santos (DBY, 41).

Walay tawo nga makaangkon og impluwensya niini nga Gingharian, ug magpadayon sa iyang kaugalingon diha niini, magpalambo sa iyang calling nga wala ang gahum sa Dios uban kaniya. Ang mga tawo kinahanglang magpuyo aron sila makatagamtam sa kahayag sa Espiritu Santo, o sila walay pagsalig sa ilang mga kaugalingon, sa ilang relihiyon, o sa ilang Dios, ug sa madugay ug sa madali mobiya sa pagtuo (DBY, 33).

Gipangutana ako sa usa ka tawo kon giunsa nako paggiya ang mga katawhan pinaagi sa pagpadayag. Gitudloan nako sila sa pagpakabuhi sa ingon nga ang Espiritu sa pagpadayag mohimo nga yano ngadto kanila sa ilang katungdanan sa matag adlaw nga sila makahimo sa paggiya sa ilang mga kaugalingon. Aron makaangkon niini nga pagpadayag gikinahanglan nga ang mga tawo magpakabuhi nga ang ilang mga espiritu putli ug limpyo sama sa usa ka piraso sa blangko nga papel nga anaa sa lamesa atubangan sa [magsusulat], andam sa pagdawat sa bisan unsa nga marka nga isulat sa magsusulat diha niana (DBY, 41).

Walay yutan-ong panaglalis, walay yutan-ong pangatarungan nga makaabli sa mga hunahuna sa maalamon nga mga binuhat ug magpakita kanila sa langitnong mga butang; kana mahimo lamang pinaagi sa Espiritu sa pagpadayag [tan-awa sa 1 Mga Taga-Corinto 2:9–14] (DBY, 37).

Ang mga pagpadayag ni Ginoong Jesukristo, ang espiritu sa kamatuoran mopadayag sa tanan, ug mopahimo sa tanan nga aduna niini sa pagsabut sa kamatuoran gikan sa sayop, sa kahayag gikan sa kangitngit, sa mga butang sa Dios gikan sa mga butang nga dili sa Dios. Mao kini ang bugtong butang nga makapasabut kanato sa Ebanghelyo sa Anak sa Dios, sa kabubut-on sa Dios, ug sa unsa nga paagi kita maluwas. Sunda kini, ug kini mogiya ngadto sa Dios, ang Tuburan sa kahayag, diin ang ganghaan mabuksan, ug ang hunahuna malamdagan aron kita makakita, makahibalo ug makasabut sa mga butang ingon nga sila mao (DBY, 34).

Walay tawo nga makaila ni Jesus nga mao ang Kristo gawas kon kini ipadayag gikan sa langit ngadto kaniya [tan-awa sa 1 Mga Taga-Corinto 12:3] (DBY, 37).

Kon wala ang pagpadayag nga direkta gikan sa langit, imposible kini alang ni bisan kinsa nga tawo sa pagsabut sa hingpit sa plano sa kaluwasan (DBY, 38).

Kon wala ang mga pagpadayag sa Dios dili kita makaila kinsa kita, diin kita gikan, ni kinsa ang nagporma sa yuta diin kita nagpuyo, naglihok, ug nagalungtad (DBY, 37).

Kon ang Espiritu sa pagpadayag nga gikan sa Dios modasig og usa ka tawo, ang iyang hunahuna bukas aron sa pagtan-aw sa kanindot, kahusay, ug himaya sa paglalang niini nga yuta ug sa mga lumulupyo niini, ang tumong sa pagkalalang niini, ug ang katuyoan sa Tiglalang niini sa pagbutang niini og iyang mga anak. Niana tataw dayon niyang masabtan nga ang atong pagpuyo dinhi mao ang alang sa bugtong katuyoan sa kahimayaan ug pagpahiuli ngadto sa presensya sa atong Amahan ug Dios (DBY, 37).

Sa matag bahin ug tipik sa mga pagpadayag sa Dios nga gihatag ngadto sa mga katawhan, o ngadto ni bisan kinsa nga indibidwal didto sa langit o dinhi sa yuta, aron sa pagsabut kanila sa hustong paagi, ang usa ka tawo nagkinahanglan sa Espiritu nga gihatag kanila—ang Espiritu nga nagpadayag sa mao nga mga butang ngadto sa panabut, ug makapasinati niini ngadto sa hunahuna (DBY, 39).

Apan kinahanglan nga kita magpakabuhi sa ingon nga ang Espiritu sa pagpadayag makaagak ug makasulat diha sa kasingkasing ug mosulti kanato kon unsay atong buhaton imbis sa mga tradisyon sa atong mga ginikanan ug mga magtutudlo. Apan sa pagbuhat niini kita kinahanglan nga mahimong sama sa mga bata; ug si Jesus miingon nga kon dili nato buhaton kita dili makasulod sa gingharian sa langit. Pagkasayon niini! Magpuyo nga walay kasina, malisya, kasuko, panagbangi, mga pagbati sa kalagot, ug pagsulti og mga dautan sa atong mga pamilya ug mahitungod sa atong mga silingan ug mga higala ug sa tanang mga lumulupyo sa yuta, bisan asa nato sila igkita. Pagpakabuhi sa ingon nga ang atong mga konsensya gawasnon, limpyo ug hinlo (DBY, 36).

Kon ugaling makadawat kamo og panan-awon o pagpadayag gikan sa Makagagahum, kanang gihatag sa Ginoo kaninyo mahitungod sa inyong mga kaugalingon, o niini nga mga katawhan, apan gidili nga inyong ipadayag tungod kay kamo dili ang tukma nga tawo, o tungod kay dili kini angay nga ipahibalo sa mga tawo sa pagkakaron, kinahanglang tipigan ninyo kini ug sirad-an pag-ayo sama sa langit nganha kaninyo, ug tagoon kini pag-ayo sama sa lubnganan. Ang Ginoo walay pagsalig niadtong mopadayag og mga tinago, kay dili niya ikapadayag ang iyang kaugalingon sa mao nga mga tawo (DBY, 40–41).

Unsaon nato sa pagkahibalo nga ang mga propeta misulat sa pulong sa Ginoo? Pinaagi sa pagpadayag. Unsaon nato sa pagkahibalo nga si Joseph Smith gitawag sa Dios aron sa pagtukod sa iyang gingharian dinhi sa yuta? Pinaagi sa pagpadayag. Unsaon nato sa pagkahibalo nga ang mga lider niini nga mga katawhan nagtudlo sa kamatuoran? Pinaagi sa pagpadayag (DBY, 38).

Unsaon nato sa pagkahibalo nga ang buhat sa Ulahing mga Adlaw tinuod? Mahibaloan lamang ninyo kini pinaagi sa espiritu sa pagpadayag nga direkta gikan sa langit. Unsa ang nakapamatuod nga kini nga buhat tinuod nganha kaninyo … ? Dili ba ang espiritu sa pagpadayag nga anaa kaninyo? … Kinahanglan dugangan pa kini matag adlaw; kinahanglang inyong dugangan ang gihatag sa Ginoo—gamay dinhi ug gamay didto, ug mahala ang kamatuoran diha sa inyong hugot nga pagtuo ug pagsabut, hangtud nga kamo mahimong hingpit diha sa atubangan sa Ginoo ug makaandam sa pagdawat sa dugang nga mga butang kalabut sa Gingharian sa Dios (DBY, 36).

Kon kamo matinud-anong naningkamot sa daghang mga tuig, kamo makakat-on niining yano nga kamatuoran—nga kon ang inyong mga kasingkasing matarung, ug kamo magpadayon nga magmasulundon, magpadayon sa pagserbisyo sa Dios, magpadayon sa pag-ampo, ang Espiritu sa pagpadayag maanaa kaninyo sama sa atabay sa tubig nga magtubod ngadto sa walay katapusan nga kinabuhi [tan-awa sa D&P 19:38; 63:23]. Himoa nga walay tawo nga mohunong sa pag-ampo tungod kay siya walay diwa sa pagampo, ni motugot sa bisan unsa nga yutan-on nga hinungdan sa pagpadalidali kaninyo samtang naghimo niining importante nga katungdanan. Pinaagi sa pagyukbo sa atubangan sa Ginoo sa paghangyo kaniya sa pagpanalangin kaninyo, kamo sayon nga makakita niini nga resulta—ang Dios mopilo-pilo sa inyong mga panalangin sa temporal ug sa espirituhanong paagi (DBY, 46).

Usa sa atong labing importante nga mga katungdanan mao ang pagpangita sa kabubut-on sa Dios diha sa inadlaw nga pag-ampo.

Kon ako pahimoon og kalainan sa tanang mga katungdanan nga kinahanglang buhaton sa mga katawhan, gikan sa una ngadto sa katapusan, akong ibutang pag-una ug labing importante ang katungdanan sa pagpangita sa Ginoo nga atong Dios hangtud atong maablihan ang dalan sa komunikasyon gikan sa langit nganhi sa yuta—gikan sa Dios nganhi sa atong kaugalingon nga kalag. Himoa ang matag dalan sa inyong mga kasingkasing nga limpyo ug putli sa iyang atubangan (DBY, 41).

Kon kita magpaduol ngadto kaniya, siya magpaduol ngari kanato; kon maningkamot kita sa pagpangita kaniya, kita makakaplag kaniya; kon kita mogamit sa atong mga hunahuna sa matinud-anon ug makugihong paagi matag adlaw, aron makahibalo ug makasabut sa hunahuna ug kabubut-on sa Dios, ingon kini kasayon sama sa, oo, ako moingon nga mas sayon kay sa mahibalo sa mga hunahuna sa usag usa (DBY, 42).

Magmapainubsanon kita, mainiton, manunuton, mauyunon sa atong mga kaugalingon ngadto sa kabubut-on sa Ginoo, ug walay kakuyaw hinoon kita makabaton sa iyang Espiritu sa paggiya kanato. Kon kita moabli sa atong mga ngabil ug motawag sa atong Langitnong Amahan, diha sa pangalan ni Jesus, kita makabaton sa diwa sa pag-ampo (DBY, 44).

Ang Ginoo miingon, pangitaon ako sa akong mga katawhan tungod sa mga panalangin nga ilang gikinahanglan. Ug imbis sa atong nagkalainlaing pag-ampo taliwala sa mga katungdanan nga gikinahanglan gikan kanato isip mga Santos sa Ulahing mga Adlaw, kinahanglang magpuyo kita aron sa paghunahuna niini nga usa sa labing dakong kahigayunan nga gihatag kanato; kay kon dili pa sa ka epektibo sa pag-ampo unsa kahay nahitabo kanato isip mga katawhan ug isip mga indibidwal? (DBY, 43).

Ang katungdanan sa mga Santos sa Ulahing mga Adlaw mao ang pagampo nga walay paghunong, ug sa tanan mohatag og pasalamat, sa pag-ila sa kamot sa Ginoo diha sa tanang mga butang, ug mopaubos ngadto sa iyang mga gikinahanglan (DBY, 42).

Himoa nga ang matag lalaki ug matag babaye motawag sa pangalan sa Ginoo, ug kana, usab, gikan sa putli nga kasingkasing, samtang sila anaa sa trabaho o sa ilang kwarto, samtang sila anaa sa publiko ingon man usab sa pribado, mangayo sa Amahan diha sa pangalan ni Jesus, sa pagpanalangin kanila, ug sa pagpatunhay ug paggiya, ug sa pagtudlo kanila, sa paagi sa kinabuhi ug kaluwasan ug sa paghimo kanila sa pagpakabuhi sa ingon nga sila makaangkon og mahangturong kaluwasan nga atong gitinguha (DBY, 43).

Dili igsapayan kon ikaw o ako dili ganahan nga mag-ampo, kon ang panahon moabut aron mag-ampo, pag-ampo. Kon kita dili ganahan nga mobuhat niini, kinahanglang mag-ampo kita hangtud nga kita ganahan (DBY, 44).

Ang ubang mga kaigsoonan moduol kanako ug moingon, “Brother Brigham, katungdanan ba nako ang mag-ampo bisan og walay gamay nga bahin sa diwa sa pag-ampo ngari kanako?” Tinuod, usahay, ang mga tawo maglibog ug puno sa kabalaka ug kaguol, ang ilang mga daro ug ubang mga himan nangaguba, ang ilang kahayupan nagkatibulaag ug daghang mga butang ang nakahasol kanila; apan ang atong hunahuna nagtudlo kanato nga atong katungdanan ang pag-ampo, kita maanaa may diwa sa pag-ampo o wala. Ang akong doktrina mao, kini katungdanan ninyo ang pag-ampo; ug kon ang panahon sa pag-ampo moabut, si Juan moingon, “Mao kini ang dapit ug mao kini ang panahon sa pag-ampo; mga tuhod iluhod sa salog ug pag-ampo, buhata og dungan.” Apan si Juan miingon, “Dili ako gustong mag-ampo; wala ako ganahi niini.” Mga tuhod iluhod, miingon ko; ug ang mga tuhod iluhod, ug magsugod siya sa paghunahuna ug sa pagpamalandong. Makasulti ba kamo og bisan unsa? Dili ba kamo makasulti og, Dios malooy ka kanako nga usa ka makasasala? Oo, siya makabuhat niini, kon siya makahimo sa pagpangisug ug sa pagtunglo sa iyang silingan tungod sa dautan nga mga buhat. Karon, Juan, abliha ang imong ba-ba ug sulti, Ginoo, kaloy-i ako. “Apan wala nako batia ang diwa sa pagampo.” Dili ikaw makapamalibad niana, kay ikaw nasayud kon unsa ang imong katungdanan (DBY, 45).

Kon ang Yawa moingon nga dili ikaw makaampo kon ikaw nasuko, sultihi siya nga wala siyay labut, ug pag-ampo hangtud kana nga mga matang sa pagkabuang mawala ug ang kalinaw mobalik sa hunahuna (DBY, 45).

Kon mobangon kamo sa buntag, sa dili pa kamo motugot sa inyong kaugalingon sa pagkaon, tawga ang inyong asawa ug mga anak, luhod sa atubangan sa Ginoo, hangyoa siya sa pagpasaylo sa inyong mga sala, ug sa pagpanalipod kaninyo sa tibuok adlaw, sa pagpahilayo kaninyo gikan sa tintasyon ug sa tanang dautan, sa paggiya sa inyong mga lakang nga kini matarung, nga kamo makahimo og butang nianang adlawa nga makahatag og kaayohan sa Gingharian sa Dios dinhi sa yuta. Kamo aduna bay panahon sa pagbuhat niini? Mga elder, sister, kamo aduna bay panahon sa pag-ampo? (DBY, 44).

Pag-ampo kanunay sa dili pa motrabaho. Ayaw gayud kalimot niana. Ang usa ka amahan—ang pangulo sa pamilya—kinahanglang dili mopakyas sa pagtawag sa iyang pamilya ug mopahinungod sa iyang kaugalingon ug kanila ngadto sa Ginoo sa mga Panon, mangayo sa pagtudlo ug pag-agak sa iyang Balaan nga Espiritu sa paggiya kanila sa tibuok adlaw—nianang adlawa. Tultuli kami niining adlawa, giyahi kami niining adlawa, panalipdi kami niining adlawa, luwasa kami gikan sa pagpakasala batok kanimo o ni binsa kinsa nga tawo sa langit o sa yuta niining adlawa! Kon buhaton nato kini matag adlaw, sa katapusan nga adlaw nga kita buhi kita makaandam sa pagdawat og mas taas nga himaya (DBY, 44).

Nasayud kamo nga usa kini ka kalainan sa atong hugot nga pagtuo ug relihiyon nga dili gayud mohangyo sa Ginoo sa pagbuhat og butang nga dili kita andam nga motabang kaniya sa tanan nga atong mahimo; ug dayon ang Ginoo mobuhat sa uban (DBY, 43).

Dili ako mohangyo sa Ginoo sa pagbuhat sa unsay dili nako andam nga buhaton (DBY, 43).

Kon ako mangayo kaniya sa paghatag kanako og kaalam mahitungod sa gikinahanglan sa kinabuhi, o mahitungod sa akong kaugalingong pagkabutang, o sa akong mga higala, sa akong pamilya, sa akong mga anak, o niadtong akong gidumala, ug dili makadawat og tubag gikan kaniya, ug dayon mobuhat sa labing maayo kutob sa ikatudlo sa akong paghukom, siya mapugos sa pagdawat ug pagtahud niana nga kasabutan, ug iyang buhaton ang tanang paagi (DBY, 43).

Himoa nga ang matag Santos, kon siya mag-ampo, mangayo sa Dios alang sa mga butang nga iyang gikinahanglan aron siya makapasiugda og pagkamatarung dinhi sa yuta. Kon kamo wala makahibalo kon unsay pangayoon, sultihan ko kamo unsaon sa pag-ampo. Kon kamo mag-ampo sa tago uban sa inyong mga pamilya, kon wala kamo makahibalo unsa ang pangayoon, itugyan ang inyong kaugalingon ngadto sa inyong Amahan sa Langit ug pangamuyo kaniya sa paggiya kaninyo pinaagi sa mga inspirasyon sa Espiritu Santo, ug sa paggiya niini nga mga katawhan, ug pagmando sa mga kalihokan sa iyang Gingharian dinhi sa yuta, ug kutob ra diha. Hangyoa siya sa pagbutang kaninyo asa niya gusto kamo ibutang, ug sa pagsulti kaninyo kon unsay iyang gusto nga inyong buhaton, ug sa pagpabati nga kamo andam sa pagbuhat niini (DBY, 45–46).

Himoa nga ang tanang mga tawo mainiton sa pag-ampo, hangtud sila masayud sa mga butang sa Dios alang sa ilang mga kaugalingon ug makasiguro nga sila naglakaw padulong sa walay katapusan nga kinabuhi; dayon ang kasina, ang bunga sa pagkaignorante, mawala ug wala nay hilig si bisan kinsa nga tawo sa pagpataas sa iyang kaugalingon ibabaw sa uban; kay ang mao nga pagbati dili madawat didto sa kapunongan sa langit. Si Jesukristo dili gayud buot nga malahi gikan sa iyang Amahan. Sila usa ra kaniadto ug karon. Kon ang katawhan gigiyahan sa mga pagpadayag ni Jesukristo, ug sila nakaamgo sa kamatuoran pinaagi sa ilang pagkamatinud-anon, walay kahadlokan gani sila mahiusa ni Jesukristo, ug magkasinabtanay (DBY, 42).

Mga Sugyot alang sa Pagtuon

Ang Espiritu ni Kristo gihatag ngadto sa tanang mga anak sa Dios aron molamdag kanila ug motabang kanila nga makahibalo sa maayo ug dautan.

Hunahunaa ang mga kalihokan sa Kahayag ni Kristo o ang Espiritu sa Ginoo. (Tan-awa usab ang Giya ngadto sa mga Kasulatan, “Kahayag ni Kristo,” 112–13; D&P 88:6–13; Moroni 7:12–19.) Unsa ang gipasabut sa “malamdagan sa Espiritu ni Ginoong Jesus”?
Unsaon nato sa pagkahibalo sa mga sumbanan sa “matarung gikan sa sayop”?
Sumala ni Presidente Young, sa unsa nga mga paagi nga ang Espiritu sa Ginoo sa gihapon “magpabilin uban sa mga tawo”?
Sa unsa nga gahum nga “mipuno sa kawanangan” ang pag-impluwensya sa Ginoo diha sa Iyang mga anak? Sa unsa nga paagi nga ang Dios dili layo gikan sa matag usa kanato? (Tan-awa sa Mga Buhat 17:27.) Unsa nga ebidensya ang inyong nakita nga ang Dios nag-impluwensya sa mga hitabo sa tibuok kalibutan?

Ang Dios namulong ngadto sa Iyang mga anak pinaagi sa pagpadayag.

Kinsa ang gitugutan sa Ginoo nga modawat og pagpadayag alang sa tibuok Simbahan? (Tan-awa usab sa D&P 21:4–5; 28:2; 43:3–4; 90:3–5.) Kinsa ang “buhi nga mga orakulo”? Unsa ang atong responsibilidad kalabut ngadto sa buhing mga orakulo?
Si Presidente Young miingon nga ang mga pagtulun-an sa kaluwasan mahibaloan lamang pinaagi sa pagpadayag. Unsa nga mga pagpadayag ang ihatag sa Ginoo ngari kanato isip mga indibidwal? (Tan-awa usab sa 2 Nephi 32:5; Numeros 11:29.)
Sumala ni Presidente Young, unsaon nato pagkahibalo nga kita gigiyahan sumala sa kabubut-on sa Dios? Sa unsa nga mga kondisyon nga kita makadawat og pagpadayag “matag adlaw” sa atong mga kinabuhi?
Unsa nga saad ang gihatag ngadto niadtong kinsa “matinud-anong naghago sa daghang mga tuig” sa pag-ampo, pagkamasulundon, ug pagserbisyo? Unsa nga mga kasinatian ang inyong naangkon sa pag-ampo nga nakatabang sa pagpaduol sa Espiritu sa inyong kinabuhi?

Usa sa atong labing importante nga mga katungdanan mao ang pagpangita sa kabubut-on sa Dios diha sa inadlaw nga pag-ampo.

Sumala ni Presidente Young, unsa ang atong “una ug labing importante” nga katungdanan isip mga miyembro sa Simbahan?
Sa unsa nga mga kondisyon kita malagmit makabaton sa “Espiritu sa paggiya kanato”? (Tan-awa usab sa 3 Nephi 19:9, 24.)
Unsa nga piho nga tambag ang gihatag ni Presidente Young mahitungod sa pag-ampo?
Unsa ang hugot nga pahimangno ni Presidente Young niadtong kinsa walay gana nga mag-ampo?