Hugna 27

Pagkat-on pinaagi sa Pagtuon ug pinaagi sa Hugot nga Pagtuo

Bisan tuod og si Presidente Brigham Young nakaeskwela lamang og 11 ka adlaw sa pormal nga edukasyon, nakasabut siya sa panginahanglan sa pagkat-on sa mga butang sa kalibutan ug sa kaalam sa Dios. Wala gayud siya mohunong sa pagkat-on gikan sa mga libro, ug gikan sa mga kasulatan, ug gikan sa mga pagpadayag sa Ginoo ug iyang gitudloan ang mga Santos sa pagtukod og mga eskwelahan ug sa paglipay diha sa pagkat-on. Sa pagka 1850 iyang gitukod ang Deseret University, nga sa wala madugay nahimo nga University of Utah; sa pagka 1875 iyang gitukod ang eskwelahan sa Provo, Utah, nga sa wala madugay nahimong Brigham Young University. Ang Brigham Young College sa Logan, Utah, natukod niadtong 1877 aron sa pagbansay og mga magtutudlo alang sa tanang eskwelahan sa tibuok pamuy-anan mga Santos sa Ulahing mga Adlaw. Uyon sa mga pasalig sa edukasyon, siya usab mipahiluna og usa ka balay tulunghaan klasehanan sa pamilya duol sa iyang balay sa katapusang 12 ka tuig sa iyang kinabuhi. Usa ka tigtukod og mga unibersidad ug usa ka hanas nga magtutudlo, si Presidente Brigham Young nagtudlo nga kon kita nangandoy nga mahimong sama sa Langitnon nga Amahan, kinahanglan gayud kitang motubo sa walay paghunong sa kahibalo ug sa kaalam.

Mga Pagtulun-an ni Brigham Young

Kita “gikinahanglan nga magtuon,” magkat-on, ug magpuyo sa mahangturon nga mga baruganan.

Samtang ang mga lumolupyo sa yuta mitugyan sa tanan nilang mga abilidad, sa mental ug sa pisikal, diha sa mga butang nga mahanaw, kadtong kinsa nag-angkon nga sila mga Santos sa Ulahing mga Adlaw, kinsa adunay mga kahigayunan sa pagdawat ug pagsabut sa mga baruganan sa balaan nga ebanghelyo, gikinahanglan nga magtuon ug mangita, ug mobansay niini diha sa ilang mga kinabuhi, niadtong mga baruganan nga giplanong molahutay, nga malagmit mohimo og hunong nga pagtubo dinhi, ug sa kalibutan nga moabut (DNW, 20 sa Hulyo 1854, 1).

Ang relihiyon ni Jesukristo dili lamang mohimo sa mga tawo nga makasinati sa mga butang sa Dios, ug mopalambo sulod kanila og labing maayo nga pamatasan ug kaputli, apan kini naghatag sa matag pagdasig ug pagaghat nga mahimo, aron sila motubo sa kahibalo ug sa salabutan, sa matag sanga sa mekanismo, o sa mga arte o mga siyensya, kay alang sa tanang kaalam, ug ang tanan nga mga arte ug mga siyensya sa kalibutan nagikan sa Dios, ug kini gihimo alang sa kaayohan sa iyang mga katawhan (DBY, 247).

Ang matag arte ug siyensya nga nahibaloan ug gitun-an sa mga katawhan gihilakip diha sa Ebanghelyo. Diin gikan ang kahibalo nga maoy naghimo sa tawo nga makahimo og ingon ka talagsaon nga mga kalampusan sa siyensya ug sa mekanismo sulod sa miaging pipila ka mga tuig? Nasayud kita nga ang kahibalo gikan sa Dios, apan nganong wala man sila moila kaniya? Tungod kay sila buta tungod sa ilang kaugalingon nga mga interes, wala sila makakita ug makasabut sa mga butang ingon nga sila mao. Kinsa ang nagtudlo sa tawo sa pagkontrolar sa kilat? Ang tawo ba nga sa walay pag-abag nakadiskobre niini? Dili, nadawat niya ang kahibalo gikan sa Labaw nga Makagagahum. Gikan kaniya, usab, nga ang matag arte ug siyensya nagpadayon, bisan og ang dungog gihatag ngadto niining tawhana ug diha nianang tawhana. Apan diin nila nakuha ang kahibalo, gikan ba kini kanila ug sa ilang kaugalingon? Dili, kinahanglan gayud nga ilhon nila nga, kon dili nila mahimo ang pagpatubo sa usa kabuok sagbot, usa ka buhok himoong puti o itom [tan-awa sa Mateo 5:36] nga walay abag sa artipisyal nga paagi, sila nagkinahanglan sa Labaw nga Makagagahum sama usab sa kabus ug walay kahibalo Diin man nato madawat ang kahibalo sa pagtukod sa makinarya aron makaminos sa mga suholan nga ang karon nga panahon takus ilhon? Gikan sa Langit. Diin kita makadawat og kinaadman sa kabitoonan, o gahum sa paghimo og mga lente aron makalapus sa walay katapusan nga kawanangan? … Gikan sa [Dios] nga naangkon sa matag batid sa kabitoonan, artist ug mga mekaniko nga sukad nagpuyo dinhi sa yuta (DBY, 246).

Ang pinakalisud nga atong masugatan mao ang unsay gitawag og pagkawaly kahibalo, o kakulang sa kahibalo sa mga katawhan (DBY, 247).

Ang relihiyon nga gihuptan sa mga Santos sa Ulahing mga Adlaw, kon dili masabtan og maayo, mag-aghat kanila sa pagsiksik nga makugihon og kahibalo [tan-awa sa D&P 88:118]. Walay laing katawhan nga nagpuyo nga labaw kaayo ang tinguha nga makakita, makadungog, makakat-on ug makasabut sa kamatuoran (DBY, 247).

Gamita ang inyong abilidad sa pagkat-on og dali kutob sa inyong mahimo, ug gamita ang tanang kusog sa hunahuna ug baruganan sa pagtuo kutob sa inyong mahimo, ug unya ipakigbahin ang inyong kahibalo ngadto sa mga katawhan (DBY, 247).

Atong bansayon ang atong mga hunahuna nga malipay kita magmaya sa unsay maayo maanindot ug balaan, padayong magtinguha nianang salabutan nga mohimo natong epektibong makatukod sa Zion, … magtinguha sa pagbuhat ubos sa kabubut-on sa Dios sa tanang mga adlaw sa atong kinabuhi, magpalambo sa atong mga hunahuna sa tanang siyentipiko ug sa makina nga kahibalo, makugihong magtinguha sa pagsabut sa mahinungdanong katuyoan ug plano sa tanang gilalang nga mga butang, nga kita mahimong masayud kon unsay buhaton sa atong mga kinabuhi ug unsaon sa pagpalambo sa mga kahimanan nga atong makab-ot (DBY, 247).

Gitawag kita sa pagtubo diha sa grasya ug sa kahibalo alang sa kahangturan.

Mao kini ang atong trabaho, atong atubangonon, ug atong calling—sapagtubo diha sa grasya ug sa kahibalo sa matag adlaw ug sa matag tuig(DBY, 247).

Dili ako mohunong sa pagkat-on samtang ako buhi, ni sa akong pag-but sa kalibutan sa mga espiritu; apan didto magkat-on sa mas dako nga kasayon; ug kon ako makadawat na og balik sa akong lawas, ako mokat-on labaw sa liboan ka pilo-pilo sa liboan ka pilo-pilo nga panahon; ug niana wala ako magpasabut nga mohunong ako sa pagkat-on, apan padayon gihapon ako sa akong mga pagsiksik (DBY, 248).

Dili gayud nato makit-an ang panahon diin kita wala magkinanglan nga matudloan, ni kanus-a walay butang nga makat-unan. Wala gayud ako magpaabut nga makakita sa panahon nga walay mas labaw kaayo nga gahum ug usa ka mas labaw kaayo nga kahibalo, ug, agig sangputanan, nga pag-awhag sa dugang nga pagtubo ug dugang nga mga kalamboan (DBY, 248).

Unta kita mabuhi sama sa edad ni Methuselah … ug mogahin sa atong kinabuhi diha sa pagsiksik sa mga baruganan sa kinabuhing dayon, atong makit-an, kon ang usa ka kahangturan molabay na diri kanato, nga kita mga bata pa hangtud karon, mga bata nga bag-o pa lamang nagsugod sa pagkaton sa mga butang kalabut sa mga kahangturan sa mga Dios (DBY, 249).

Makapangutana kita, kanus-an kita mohunong sa pagkat-on? Akong ihatag kaninyo ang akong opinyon kabahin niini: walay paghunong, wala gayud (DBY, 249).

Ang kasinatian nagtudlo kanato nga ang pagkat-on og pila ka mga sanga sa mekanismo nagkinahanglan og panahon, ingon man sa mga prinsipyo ug mga ideya diin kita nangandoy nga mahimong mga hanas. Kon unsa ka dali ang tawo mogamit sa ilang mga hunahuna sa bisan unsang husto nga mga katuyoan mao usab kadali silang motubo sa kahibalo sa kamatuoran. Kon makakat-on sila sa pagbuntog sa ilang mga pagbati, sila sa kadugayan makakat-on sa pagbuntog sa ilang mga pamalandong ug mga hunahuna sa matag higayon nga gikinahanglan alang sa pagkab-ot sa mga butang nga ilang gitinguha. Apan samtang sila mopailawom ngadto sa usa ka pagbati o espiritu nga mobalda sa ilang mga hunahuna gikan sa usa ka butang nga gipangandoy nila nga tun-an ug kat-unan, bisan kanus-a dili gayud sila makaangkon og kahanas sa ilang mga hunahuna (DBY, 250).

Ang usa ka lig-on, dili mausab-usab nga dalan sa pagkamatarung sa kinabuhi mao ang maghatag og kasiguroan sa usa ka tawo ngadto sa tinuod (DBY, 245).

Kinahanglan natong edukahon ang atong mga kaugalingon ug ang atong mga anak sa pagkat-on sa kalibutan ug sa mga butang sa Dios.

Tudloi ang mga bata, ihatag kanila ang pagtulun-an sa kalibutan ug sa mga butang sa Dios; iugmad ang ilang mga hunahuna, nga sila unta dili lamang makasabut sa kalibutan nga atong gilaktan, apan sa hangin nga atong giginhawa, sa tubig nga atong giinom, ug sa tanang mga elemento kalabut sa yuta (DBY, 251).

Tan-awa nga ang inyong mga anak tukma nga natudloan sa mga sukaranan sa ilang mga pinulongan, ug dayon tuguti silang mopadayon ngadto sa mas taas nga ang-ang sa pagkat-on; tuguti sila nga mas makahibalo sa matag departamento sa tinuod ug mapuslanon nga pagkat-on kay sa ilang mga amahan. Kon sila kahibalo na kaayo sa ilang pinulongan, patun-a sila og lain nga mga pinulongan, ug himoa ang ilang mga kaugalingon nga sa makahibalo sa hingpit sa mga batasan, mga kinaiya, mga balaod, mga panggobyerno ug literetura sa laing mga nasud, mga katawhan,ug mga pinulongan. Tuguti usab silang makakat-on sa tanang kamatuoran kalabut sa mga arte ug mga siyensya, ug unsaon sa paggamit sa mao ngadto sa ilang temporal nga mga panginahanglan. Tuguti sila nga magtuon sa mga butang nga anaa ibabaw sa yuta, ilawom sa yuta, ug mga butang nga anaa sa langit (DBY, 252).

Ang matag kalampusan, matag butang nga hinashasan, matag mapuslanon nga mga nakab-ot sama sa matematika, musika, ug sa tanang siyensya ug sa arte iya sa mga Santos, ug sila kinahanglang makabaton sa ilang kaugalingon sa labing dali nga panahon kutob sa mahimo sa bahandi sa kahibalo nga gitanyag sa siyensya ngadto sa matag makugihon ug makanunayon nga mga eskolar (DBY, 252).

Malipayon akong makakita sa atong mga anak nga nag-atiman sa pagtuon ug pagbansay sa musika. Tuguti sila nga matudloan diha sa matag butang nga mapuslanon, kay kita, isip mga katawhan, adunay kahigayunan sa umaabut nga mohawod sa tanang kanasuran dinhi sa yuta sa relihiyon, siyensya ug pilosopiya (DBY, 256).

Adunay gatusan ka batan-ong mga lalaki dinhi ang mahimong moeskwela,nga mas maayo pa kay sa mag-usik-usik sa panahon. Tun-i ang mga pinulongan, angkona ang kahibalo ug panabut, ug samtang naghimo niini, pagkuha og kaalam gikan sa Dios, ug ayaw kini kalimti, ug kat-uni unsaon kini sa paggamit, nga mamaayo kamo niini sa tibuok ninyong kinabuhi (DBY, 252).

Lakaw sa eskwelahan ug pagtuon. … Gusto ako nga adunay mga eskwelahan aron sa paglingaw sa hunahuna sa mga tawo ug pagsugyot kanila sa pagkat-on og arte ug mga siyensya. Paeskwelaha ang dagko nga mga bata, ug ang mga gagmay usab; wala akoy mas labaw nga gusto kay sa pagkat-on og chemistry [kinaadman bahin sa mga kemikal], botany [kinaadman bahin sa mga tanum], geology [kinaadman bahin sa kabhang], ug mineralogy [kinaadman bahin sa mga mineral sa yuta], aron makahibalo ako kon unsa ang akong gitumban, ang mga kinaiya sa hangin nga akong giginhawa, ug sa tubig nga akong giinom, ug uban pa (DBY, 253).

Kita kinahanglan mao ang mga katawhan nga walay kinutuban ang pagkat-on.

Kita kinahanglan mao ang mga katawhan nga walay kinutuban ang pagkat- on mahitungod sa mga butang sa kalibutan. Kinahanglang pamilyar kita sa nagkalain-laing mga pinulongan, kay nangandoy kita nga makapadala ug mga misyonaryo ngadto sa lain-laing mga nasud ug sa mga isla sa kadagatan. Nanghinaut kita nga ang mga misyonaryo nga moadto unya sa France makasulti og maayo sa pinulongan nga French, ug kadtong moadto sa Germany, Italy, Spain, ug ngadto sa uban pang kanasuran, unta sila mapamilyar sa mga pinulongan niini nga mga nasud (DBY, 254).

Nanghinaut usab kita nga sila unta makasabut sa hiyograpiya nga mga batasan, mga kinaiya, ug mga balaod sa kanasuran ug mga gingharian. … Kini girekomendar diha sa mga pagpadayag nga gihatag ngari kanato [tanawa sa D&P 88:78–80; 93:53]. Gikan niini gitudloan kita nga magtuon gikan sa labing maayo nga mga basahon, aron mahimo kita nga makahibalo usab sa mga hiyograpiya sa kalibutan sama sa atong kahibalo sa atong mga tanaman, ug isip mga pamilya unta kita masinati sa ubang mga katawhan— bisan kutob lamang diha sa paghulagway pinaagi sa panulat—sama sa atong nahimo sa atong pamilya ug mga silingan (DBY, 254–55).

Ania kita sa usa ka talagsaon nga eskwelahan, ug kinahanglan nga makugihon kita sa pagkat-on, ug magpadayon nga magpundo og kahibalo kabahin sa langit ug sa yuta, ug mobasa og maayo nga mga basahon, bisan og ako dili mosulti nga morekomendar sa pagbasa sa tanang mga basahon, kay dili tanan nga basahon maayo. Pagbasa og maayo nga mga basahon, ug kuhaa gikan niini ang kaalam ug panabut kutob sa inyong mahimo, inabagan sa Espiritu sa Dios (DBY, 248).

Tambagan ko kamo sa pagbasa og mga basahon nga takus gayud nga basahon, basa og husto nga kasaysayan, ug siksika ang kaalam gikan sa maayong mga basahon nga inyong makuha (DBY, 256).

Pagkamalipayon nato nga makasabut sa matag baruganan mahitungod sa siyensya ug sa arte, ug makahibalo pag-ayo sa matag lisud sabton nga mga kalihokan sa kinaiyahan, ug uban sa tanang kemikal nga mga kausaban nga nagpadayon paglibut kanato! Unsa ka makalipay kini, ug unsa ka walay utlanan nga kamatuoran ug gahum ang bukas alang kanato sa pagusisa! Nagsingabut pa lamang kita sa mga baybayon sa halapad nga lawod sa impormasyon kabahin niining pisikal nga kalibutan, sa dili pag-apil niana nga may kalabutan sa mga kalangitan, sa mga anghel ug sa mga binuhat nga celestial, sa mga dapit nga ilang gipuy-an, sa matang sa ilang kinabuhi, ug sa ilang pag-uswag ngadto sa mas hataas nga ang-ang sa kahingpitan (DBY, 255).

Ang mga pagpadayag ni Ginoong Jesukristo ngadto sa tawhanong pamilya mao ang tanang kahibalo nga ato gayud nga maangkon. Daghan niini nga mga kahibalo nakuha gikan sa mga basahon nga gisulat pinaagi sa mga tawo kinsa lawom nga namalandong sa nagkalain-lain nga mga hilisgutan, ug ang mga pagpadayag ni Jesus miabli sa ilang mga hunahuna, bisan kon sila nakahibalo niini o miila niini, o wala (DBY, 257–58).

Ang atong relihiyon dili mosupak o mosukwahi sa mga kamatuoran sa siyensya sa bisan asa nga dapit. Mahimong hisgutan ninyo ang geology, pananglitan, ug kini tinuod nga siyensya; dili nga ako moingon sa bisan unsa nga higayon nga ang mga panapos ug ang pagbanabana sa mga magtutudlo tinuod, apan ang naggiya nga mga baruganan tinuod; kini mga kamatuoran—kini mahangturon; ug sa pagpugos nga ang Ginoo mimugna niini nga kalibutan gikan sa dili katuhoan ug dili mahitabo [tan-awa sa Abraham 3:24; D&P 131:7]. Ang Ginoo wala gayud mohimo og butang gikan sa wala; wala kana sa paagi o balaod diin ang mga kalibutan ingon nga mao kaniadto, karon ug moabut. Adunay kahangturan sa atong atubangan, ug kini puno sa mga butang; ug kon kita makasabut lamang og igo sa Dios ug sa iyang mga pamaagi makaingon kita nga siya mikuha niini nga mga butang ug gihimo kini nga kalibutan pinaagi niana. Unsa ka dugay kini nga gihimo dili ako ang pagsulti, ug wala ako magsapayan mahitungod niana. … Kon kita nakasabut sa paagi sa pagmugna wala gayuy misteryo kabahin niini, kini tanan makatarunganon ug yano, kay walay misteryo gawas lamang ngadto sa mga walay kahibalo. Ato kining nahibaloan gikan sa unsay atong nakat-unan sa yano nga paagi sukad nga aduna nay mga tawo sa kalibutan (DBY, 258–59).

Aduna kitay kahigayunan sa pagsiksik sa kaalam sa Dios.

Usa ka kahigayunan sa tawo ang pagsiksik sa kaalam sa Dios mahitungod sa yuta ug sa mga kalangitan. Ang tinuod nga kahibalo usa ka tinuod nga kalipay; tinuod nga kahibalo, mainampingon, ug ang pagkamasinabtunon, usa ka tinuod nga kahupayan (DBY, 262).

Ang tawo nga mogamit sa iyang kasingkasing ngadto sa kahibalo, ug makugihon nga mosiksik alang sa panabut, motubo nga bantugan sa Israel (DBY, 261).

Himoa nga ang kaalam matanum diha sa inyong mga kasingkasing, ug himoa nga modala kini og daghan nga ani. Mas maayo kini alang kaninyo kay sa tanang bulawan ug mga pilak ug uban pang mga katigayunan sa yuta. Himoa nga ang kaalam motubo diha sa inyong mga kasingkasing, ug alimahi kini (DBY, 261).

Sama nga kita nag-andam og mga materyales sa pagtukod og usa ka balay o templo, ingon man usab ang tawo makaandam sa iyang kaugalingon alang sa pagdawat sa maghangturon nga kaalam. Kita moadto asa tua ang mga materyales alang sa usa ka balay, ug andamon kini aron matubag ang atong katuyoan; busa kita moadto asa tua ang kaalam makaplagan ug didto makugihon nga mosiksik aron maangkon kini, kay ang bili niini labaw pa kay sa mutya [tan-awa sa Job 28:18] (DBY, 261–62).

Human sa tanan natong mga paningkamot sa pag-angkon og kaalam gikan sa maayo nga mga basahon, ug uban pa, aduna pay nagpabiling bukas nga tuburan alang sa tanan; “Kon aduna man kaninyoy nakulangan og kaalam, papangayoa siya sa Dios” [tan-awa sa Santiago 1:5] (DBY, 261).

Kon kamo nagpakabuhi nga nakaangkon sa pakig-uban sa Espiritu Santo, … makita dihadiha dayon ninyo ang kalainan tali sa kaalam sa tawo ug sa kaalam sa Dios, ug imong mahukman ang mga butang ug mabanabana kini sa ilang tinuod nga bili (DBY, 323).

Tuguti nga ang matag Santos sa Ulahing mga Adlaw kanunay nga magbansay sa ilang mga kaugalingon diha sa pagbuhat sa matag maayo nga mga pulong ug buhat, sa pag-ila sa Dios nga siya Dios, sa higpit nga pagsunod sa iyang mga balaod, ug pagkat-on sa paghigugma sa kalooy, paglikay sa dautan ug paglipay kanunay sa paghimo nianang makapahimuot sa Dios (DBY, 261).

Adunay usa lamang ka Tinubdan diin ang mga tawo makakuha og kaalam, ug kana mao ang Dios, ang Tuburan sa tanang kaalam; ug bisan ang mga tawo moangkon nga nakahimo sila og mga pagdiskobre pinaagi sa ilang kaugalingon nga kaalam, pinaagi sa paghunahuna ug pamalandong, sila mga utangan sa atong Amahan sa Langit sa tanan gayud (DBY, 259–60).

Mga Sugyot alang sa Pagtuon

Kita “kinahanglan nga magtuon,” magkat-on ug magsunod sa mahangturon nga mga baruganan.

• Samtang ang uban “mitugyan sa tanan nilang mga abilidad … diha sa mga butang nga mahanaw,” unsaon sa mga Santos sa Ulahing mga Adlaw sa pagpahimutang sa ilang mga panahon ug mga kusog? Unsa ang mga “butang nga mahanaw”? Ilista ang pipila “niadtong mga baruganan nga gibanabana nga mohangtud, ug … motubo … sa kalibutan nga moabut.”

• Kinsa ang tinubdan sa tanang dakong mga kalampusan sa kahibalo? Sa kasagaran ngadto kang kinsa gihatag sa mga tawo ang pasidungog alang niini nga mga kalampusan?

• Sa unsang mga paagi nga ang ebanghelyo makaawhag sa mga sakop sa Simbahan sa “pagtubo sa kahibalo ug sa salabutan”? Ngano nga walay laing … katawhan nga labaw kaayo ang tinguha nga makakita, makadu-ngog, makakaton ug makasabut sa kamatuoran? Nganong kinahanglan kitang maningkamot sa dili paghunong nga makakat-on?

• Unsaon nato “sa pagbansay ang atong mga hunahuna hangtud nga kita magmaya sa unsay maayo, maanindot ug balaan”? Unsay mga sangputanan sa “pagpalambo sa atong mga hunahuna”?

Gitawag kita sa pagtubo diha sa grasya ug sa kahibalo alang sa kahangturan.

• Sumala ni Presidente Young, kanus-a ang tawo mohunong sa pagkat-on?

• Unsa nga dalan ang atong subayon aron makaangkon og kahanas sa atong mga hunahuna ug makaangkon og tinuod nga salabutan?

Kinahanglan natong edukahon ang atong mga kaugalingon ug ang atong mga anak sa pagkat-on sa kalibutan ug sa mga butang sa Dios.

• Si Presidente Young mimando kanato sa pagtudlo sa atong mga anak. Unsa man ang atong itudlo kanila? Unsa ang atong mahimo sa pagdasig sa atong mga anak aron makaangkon og edukasyon?

• Unsaon nato pagbalanse ang pag-angkon og kalibutanon nga kahibalo sa pag-angkon og kaalam gikan sa Dios? Sa unsang mga paagi kini nga mga tumong magkatinabangay?

• Sa pagtudlo sa mga bata, unsa ang mga responsibilidad sa mga magtutudlo? sa mga ginikanan? sa ubang mga hingkod?

Kita kinahanglan mao ang mga katawhan nga walay kinutuban ang pagkat-on.

• Nganong kinahanglan kita magtinguha og “walay kinutuban nga pagkaton”? Unsa ang kinahanglan natong tun-an? Nganong kinahanglan kitang mobasa og uban kay sa mga kasulatan lamang?

• Si Presidente Young miawhag kanato sa “pagtuon sa labing maayo nga mga basahon.” Unsa nga mga basahon ang iyang gipasabut? Unsaon nato sa pag-ila sa maayo nga basahon gikan sa dili maayo? Unsang mga basahon ang nakahatag og kaayohan kaninyo gikan sa pagtuon nga mahimong inyong ilhon nga usa sa labing maayo nga mga basahon”? Gawas sa pagtuon sa maayo nga mga basahon, unsaon pa ang pag-angkon ninyo og kahibalo?

• Unsa ang mga tinubdan sa “tanang kahibalo nga ato ra gayud nga maangkon”? Unsaon man nato nga epektibo kitang makakat-on gikan niana nga tinubdan?

• Sumala ni Presidente Young, unsa ang kalambigitan tali sa tinuod nga relihiyon ug sa “kamatuoran sa siyensya”?

Aduna kitay kahigayunan sa pagsiksik sa kaalam sa Dios.

• Si Presidente Young miingon nga ang kaalam sa Dios “mas maayo kini alang kaninyo kay sa tanang bulawan ug mga pilak ug uban pang mga katigayunan sa yuta. Sa unsang paagi nga ang tinuod nga kaalam mahimong usa ka “kalipay” ug usa ka “kahupayan”?

• Kang kinsa kita moadto aron sa pag-angkon og “mahangturon nga kaalam”? Unsaon nato sa pagpangandam aron makadawat og mahangturon nga kaalam? Unsaon nato “sa pagkakita sa kalainan tali sa kaalam sa tawo ug sa kaalam sa Dios”?

Litrato ni Karl G. Maeser, ang una nga magtutudlo sa Brigham Young Academy, nga sa wala madugay nahimong Brigham Young University.

Mga magtutudlo sa Brigham Young Academy sa mga tuig 1885.