“Pilia nga Ipatigbabaw ang Dios,” Alang sa Kalig-on sa mga Kabatan-onan, Agosto 2022.
Pilia nga Ipatigbabaw ang Dios
Tulo ka kapilian nga ikaw makahimo nga modapit pa og dugang sa gahom sa Dios nganha sa imong kinabuhi.
Mga paghulagway ni Adam Howling
Sa atong mortal nga panaw, nagdapit kanato ang Ginoo sa pagkuha Kaniya isip atong Giya. Mas nahigugma Siya kanato ug nakaila kanato og mas maayo kay sa atong paghigugma o pagkaila sa atong mga kaugalingon. Naghatag Siya kanato og mga kasulatan, mga propeta, pag-ampo, sa gasa sa Espiritu Santo, ug ubang mga paagi sa pagdawat sa Iyang paggiya.
Salig Kaniya. Pamandoa Siya sa imong mga agianan (tan-awa sa Proverbio 3:5–6). Samtang ikaw naghimo niini, nagtugot ka nga ipatigbabaw ang Dios diha sa imong kinabuhi. Kini mao ang unsay giaghat ni Presidente Russell M. Nelson kanato nga buhaton (tan-awa sa “Ipatigbabaw ang Dios ,” Okt. 2020 nga kinatibuk-ang komperensiya [Liahona, Nob.2020, 92–95]).
Ania ang tulo ka kapilian nga makatabang kanimo sa paghimo sa Dios nga ipatigbabaw sa imong kinabuhi.
1. Pilia nga Motuo
Ang pagtuo usa ka pagpili. Ang hugot nga pagtuo naglakip sa imong tinguha ug sa imong pagkaandam sa paglihok. Kon imong pilion ang hugot nga pagtuo, ikaw makakita ug magpuyo diha sa lahi nga paagi––sa paagi sa Diios.
Bati-a ang imong kalipay ug hingpit nga kalipay nga nagtubo ug nagkalig-on samtang ikaw nagpili sa pagtuo ug sa pagpuyo nga may hugot nga pagtuo diha sa dalan sa pakigsaad sa Dios.
Kon ikaw magtuon ug mag-ampo nga mahimo ang imong labing maayo nga mga desisyon, sa kasagaran imong madawat ang paggiya, panalipod, o mga paagi padulong sa kasulbaran nga ikaw wala maghunahuna o magdahom.
Ang Ginoo moabli og talagsaong mga oportunidad alang kanimo. Ang pagpadayag gikan sa Espiritu Santo bation sa imong hunahuna ug kasingkasing. Kini kasagarang gihulagway isip mainiton ug haruhay nga mga pagbati. Kini moawhag kanimo sa pagbuhat lamang kon unsa ang maayo ug matarong.
Palihog ayaw paghunahuna nga ang uban adunay espirituhanong mga kasinatian ug ikaw wala. Palihog pagmapailubon sa Dios ug sa imong kaugalingon. Ang espirituhanong mga kasinatian moabot pagtulon-an human sa usa ka pagtulon-an, kasinatian human sa usa ka kasinatian.
Kada semana samtang ikaw naghimo ug nagbag-o og mga pakigsaad pinaagi sa ordinansa sa sakramento, palihog palandonga ug hinumdomi si Jesukristo. Hinumdomi uban sa pasalamat ang imong mga paningkamot sa pagserbisyo sa Dios ug niadtong naglibot kanimo. Samtang ikaw naggamit sa hugot nga pagtuo ug paningkamot, nagsaad ako nga ang imong tinguha ug pagpili sa pagtuo mopanalangin kanimo ug niadtong imong gihigugma sa tibuok nimong kinabuhi.
Pinaagi sa pagpili sa pagtuo, ikaw naghimo og importanting lakang ngadto sa pagtugot sa Dios nga magpatigbabaw sa imong kinabuhi.
2. Pilia nga Magminaayo
Mobati kita og kalipay kon kita naghimo og maayong mga desisyon.
Usahay, ikaw magkinahanglan og kaisog sa pagsuporta sa imong mga higala. Sa ubang mga higayon ikaw mahimong magkinahanglan og kaisog sa pagbarog nga lahi––dili maghukom kanila o mobati nga labaw apan sa pagpili sa matarong pinaagi sa pagbuhat og usa ka butang nga lahi.
Palihog hinumdomi: Ang tinuod nga mga higala dili mohangyo kanato sa pagtan-aw sa mga butang, sa pagbuhat sa mga butang, o sa pagkaon, pag-inom, o paggamit sa mga butang nga makapasakit kanato o sa uban. Ang labing suod nga mga higala magtinabangay sa usag usa nga mahimo ang ilang labing maayo.
Pagpakatinuod nga higala ug imong makaplagan o mapalambo ang tinuod nga panaghigalaay. Pagmatinud-anon, masaligan nga higala kinsa nagtabang niadtong naglibot kanimo sa paghigugma sa Ginoo ug sa pagpuyo sa Iyang gipahiuli nga ebanghelyo. Ang imong tinuod nga mga higala mahimong diyotay o daghan, apan mga tuig gikan karon ikaw ug sila malipay nga kamo nag-uban nga lig-on diha sa ebanghelyo.
Mahimo bang mopakigbahin ako og usa ka butang nga akong nahibaloan mahitungod sa pagpili og mga higala? Bantayi kon unsa ang makapakatawa kanila. Kon unsa ang makapakatawa kanato nagsulti og daghan mahitungod kanato.
Pangitaa kadtong kinsa mokatawa kauban ang, kinsa dili mabiaybiayon sa; kinsa nag-apil sa uban ug naghimo sa alirong nga mas modako, dili mas mogamay; kinsa maloloy-on ug dili modaug-daog o mobugal-bogal sa uban sa personal o sa online, ilabi na niadtong may pisikal o mental nga mga hagit o niadtong kinsa bag-o o gikan sa ubang mga nasod o mga kagikan.
Pagmasadyaon, dili walay buot. Masadyaon nagpasabot nga malipayon, maayo nga pasiaw––daghan niini. Agi og kalainan, ang walay buot mahimong maglakip sa pagbugalbugal sa sagradong mga butang, paggamit og ngil-ad nga mga pulong, o paghimo og mapangahasong mga butang nga makadani ngadto sa kalibotan.
Ingon nga ang Doktrina ug mga Pakigsaad 88:40 nagtudlo, ang magkaparehas nga mga butang magdani sa usag usa. Pagpakahigala nga ikaw gusto sa uban nga himoon nganha kanimo. Pangita og mga higala kinsa motabang kanimo nga mahimo kon unsa ikaw sa tinuod gusto nga mahimo.
Ang pagpili nga mahimong maayo ug ang pagpatigbabaw sa Dios diha sa imong kinabuhi naglakip sa pag-usab ug pagpaduol pa sa Dios bisan kon kita makahimo og mga kasaypanan, nga kitang tanan makabuhat. Kon ikaw adunay mga pagbati nga nakasala o dili takos, palihog, patabang sa imong bishop, mga lider, ug uban kinsa nahigugma kanimo. Himoa nga ang Dios ug ang atong komunidad sa mga Santos motabang ug modasig kanimo kon nag-atubang ikaw og mga hagit o walay mga kasigurohan. Kanunay, kanunay ang Dios nagsuporta kanimo, nag-uban kanimo. Bisan kon ikaw nahisalaag, siya nagtawag, andam sa paghangop kanimo og balik. Diha sa Dios, bisan unsa pa ang atong nabuhat kanunay nga Siya anaa alang kanato.
Atong ipatigbabaw ang Dios kon atong pilion nga magbinuotan.
3. Pilia ang “Humilom”
Ang Langitnong Amahan mahigugmaong nagsaad, “Humilom kamo, ug ilhon ninyo nga ako mao ang Dios” (Salmo 46:10).
Nagkinahanglan og mabuot nga paningkamot ang paghinay ug “humilom.” Nagkinahanglan kini og espirituhanon nga pagkamadayganon ug pagpaubos ang “pag-ila nga ang [Dios mao] ang Dios.” Usahay ang paghinay sa mga butang nga dili kaayo importante magtabang kanato sa pagkaplag sa mga butang nga labing importante.
Pagkat-on sa pagtan-aw sa impluwensiya sa Dios diha sa Iyang mga nilalang.
Pangita alang sa kamaayo ug kahulogan sa balaang mga relasyon––pagkamaloloy-on, serbisyo, kalipay, ug maayong kalingawan.
Usahay, palihog paghinay, tangtanga ang mga kabanha, ug sumpay sa espirituhanong mga paagi ngadto sa langit ug ngadto sa naglibot kanimo.
Palihog “hunong ug ilha nga ang [Dios mao] ang Dios.” Ipatigbabaw ang Dios diha sa imong kinabuhi.
Naninguha Siya sa Pagpanalangin Kanato
Ang Ginoo maloloy-on ug mabination. Samtang atong buhaton ang labing maayo, Siya mohimo kanato sa pagbuhat og labaw pa kay sa atong mahimo.
Gipilopilo sa Ginoo ang gidaghanon sa mga piraso sa pan ug sa mga isda (tan-awa sa Mateo 6; 14). Sa samang paagi, nagpadako Siya sa unsay atong gihalad ug naghimo niini nga mas labaw kaysa kita makahanduraw.
Naghigugma kanimo ang Langitnong Amahan ug gusto lamang kon unsay labing maayo alang kanimo. Himoa Siya nga mao ang imong Giya diha sa imong dalan ngadto sa kinabuhi. Kon imong ipatigbabaw ang Dios diha sa imong kinabuhi, gihimo nimo Siya sa pagpilo-pilo sa mga panalangin nga Siya nagtinguha sa paghatag kanimo. Kini nagdala og malungtarong hingpit nga kalipay ngadto Kaniya ug kanimo.