“Imong Basahon sa mga Oportunidad,” Alang sa Kalig-on sa mga Kabatan-onan, Ago. 2022.
Imong Basahon sa mga Oportunidad
Ang imong patriyarkal nga panalangin mahimong usa ka mahinungdanong tabang nganha kanimo. Ug ikaw makapangandam karon sa pagdawat niini.
Mga paghulagway ni Joshua Dennis
Ang mga kabatan-onan kasagarang mangutana kanako, “Unsaon nako pagkahibalo kon ako andam na sa pagdawat sa akong patriyarkal nga panalangin?” Unsa ka importante nga pangutana! Ang kalagmitan mao nga kon ikaw mangutana, ikaw mahimong andam na.
Unsa ang Patriyarkal nga Panalangin?
Ang patriyarkal nga panalangin mao ang usa ka dinasig nga panalangin gikan sa Langitnong Amahan gihatag pinaagi sa gi-orden nga patriyarka, kasagaran gikan sa sulod sa imong stake. Kini usa ka personal, pinadayag nga mensahe nga alang lamang kanimo. Ang imong panalangin mohatag kanimo og tambag, mga pasidaan, maymay, ug mga saad sa pagtabang sa paggiya sa imong kinabuhi.
Si Karl G. Maeser, usa ka kanhi prinsipal sa Brigham Young Academy, mihulagway niini nga mga panalangin isip “mga parapo gikan sa basahon sa mga oportunidad sa usa ka tawo.”1 Ang pagdawat sa akong patriyarkal nga panalangin sa dihang ako usa ka batan-ong babaye usa ka importanting tabang ngari kanako. Kini makahimo og usa ka importanting tabang nganha usab kanimo!
Unsa ang Imong Makat-onan gikan sa Imong Patriyarkal nga Panalangin?
Ang Imong Pagkatawo
Ang imong panalangin mopaniguro pag-usab kanimo sa imong balaang panulundon isip usa ka anak nga babaye o lalaki sa langitnong mga ginikanan. Pinaagi sa imong panalangin, ang Langitnong Amahan momatuod pag-usab sa Iyang gugma alang kanimo. Gusto Siya kanimo nga mobalik ug mopuyo uban Kaniya pag-usab. Ang direksyon nga Siya nagpadayag nganha kanimo diha sa imong panalangin motabang kanimo sa pagpabilin diha sa dalan sa pakigsaad balik ngadto Kaniya. Ikaw makabati sa Iyang gugma sa matag higayon nga imong basahon ang imong panalangin.
Ang imong patriyarkal nga panalangin naglakip usab og usa ka pamahayag sa imong kagikanan, nagpahayag nga ikaw sakop sa balay ni Israel––usa ka kaliwat ni Abraham ug may katungod sa tanang mga panalangin nga gisaad ngadto sa iyang kaliwatan.2
Indibidwal nga Tabang ug Direksyon
Usa sa labing importante nga mga bahin sa imong patriyarkal nga panalangin mao ang indibidwal nga tambag nga imong madawat. Ang Langitnong Amahan mas nakaila kanimo og maayo kay sa ikaw nakaila sa imong kaugalingon. Kana mao nganong ang pagsunod sa piho nga tambag nga Iyang gihatag kanimo motabang kanimo karon ug sa imong tibuok nga kinabuhi.
Isip usa ka batan-ong babaye, nahinumdom ako nga natintal sa tanang matang sa kalibutanon nga mga kapilian. Kon moabot kadto nga mga tintasyon , akong hunahunaon ang mahitungod sa akong patriyarkal nga panalangin. Ang tambag ug ang mga saad sa akong panalangin mihatag kanako sa kalig-on ug kaisog sa paghimo og maayong mga pagpili.
Ayaw pagkawala og kadasig kon pipila ka mga butang nga gipahayag sa imong panalangin dili mahitabo diha dayon. Ang imong panalangin naglugway ngadto sa mga kahangtoran. Samtang ikaw naninguha sa pagpabilin nga takos, madawat nimo ang tanan nga gisaad sa Langitnong Amahan kanimo.
Ang Imong Katuyoan
Ang Langitnong Amahan adunay buhat alang kanimo nga buhaton diha sa Iyang mahimungdanong plano sa kalipay. Ang imong panalangin mahimong magsulti kanimo mahitungod sa piho nga mga butang nga Siya nagkinahanglan kanimo sa pagbuhat. Kini mahimo usab nga magsulti kanimo mahitungod sa imong talagsaong mga gasa ug mga talento. Ug makakat-on ka usab kon unsa ang Iyang gikinahanglan kanimo nga palamboon sa pagpanalangin sa imong kinabuhi ug sa mga kinabuhi sa uban. Hunahunaa lamang ang tanang mga oportunidad!
Unsaon Nimo nga Makapangandam sa Pagdawat sa Imong mga Panalangin?
Si Brother Dennis Liffereth, usa ka patriyarka sa Centerville, Utah, USA, adunay pipila ka importanting tambag kon unsaon sa pagpangandam. Miingon siya:”Ang pagpangandam alang sa imong patriyarkal nga panalangin hapit sama ka importante sa panalangin mismo. Kini panahon sa imong pagpangandam nga ikaw makapamalandong sa imong kinabuhi, makahunahuna sa dalan nga ikaw anaa, unsa ang imong gilaoman nga mahimo, ug unsa nga espirituhanong gasa ang imong gusto nga ipalambo.”
Ikaw naninguha ba sa pag-ampo, nagtuon sa imong mga kasulatan, ug naghimo sa imong labing maayo sa pagsunod sa Manluluwas? Kining mga butanga motabang kanimo sa pag-andam.
Dili ka kinahanglang mahimong hingpit sa pagdawat sa imong patriyarkal nga panalangin, apan ikaw kinahanglan gayod nga mahimong takos. Kon ikaw takos sa paghupot og usa ka rekomen sa templo, ikaw takos sa pagdawat sa imong patriyarkal nga panalangin. Samtang ang imong interes ug tinguha sa pagdawat niini nga panalangin nagtubo, pagtakda og usa ka miting sa imong bishop.
Tibuok Kinabuhi nga Panalangin
Tungod nga ang matag patriyarkal nga panalangin sagrado ug personal, kinahanglan nga dili nimo itandi ang imong panalangin sa uban. Hinumdomi, kini nga panalangin alang lamang gayod kanimo! Kinahanglan nga imo kining ribyuhon uban sa ligdong nga pagtahod ug makigbahin lamang niini ngadto sa suod nga mga miyembro sa pamilya.3
Ikaw malig-on samtang ikaw magbasa sa imong panalangin kanunay ug mamalandong sa mga pulong nga gihatag nganha kanimo. Samtang ikaw maninguha sa pagpuyo nga takos sa pagdawat sa imong gisaad nga mga panalangin, imong makaplagan ang kalinaw, direksiyon, ug hingpit nga kalipay nga ang atong Langitnong Amahan gusto alang kanimo.