Ang Tema ug Ako

Ang kabatan-onan nakigbahin kon giunsa nila pagpuyo ang mga pulong sa mga Tema sa Young Women ug sa Korum sa Aaronic nga Pagkapari

Mobarog ingon nga usa ka Saksi diha sa Klase

“Ako mobarog ingon nga usa ka saksi sa Dios sa tanan nga mga panahon ug diha sa tanan nga mga butang ug diha sa tanan nga mga dapit.”

Ni Naomi Kharrl

Sa klase sa English, ang among titser mihatag sa tanan og usa ka artikulo nga misaway sa Ang Simbahan ni Jesukristo sa mga Santos sa Ulahing mga Adlaw ug miingon nga among pagahisgotan kini sa sunod nga adlaw. Samtang nagbasa ako niini, mga pagbati sa kahadlok ug kasuko mitubo sulod kanako. Nianang gabhiona, misulat ako og daw walay kalooy nga “lista sa inandam nga mga tubag” agi og tubag ngadto sa artikulo.

Ang akong mama naminaw kanako nga nagyawyaw mahitungod sa akong mga plano alang sa panaghisgotan. Nakuratan ako og gamay sa dihang siya miingon, “Ikaw kinahanglang mag-ampo mahitungod niini.”

Nianang gabhiona, ako nag-ampo alang sa panabang ug kapasayloan. Dayon usa ka bersikulo mitunga sa akong ulo: “Ang espiritu sa panagbingkil dili gikan sa [Dios], apan gikan sa yawa, … ug siya nagkutaw sa mga kasingkasing sa mga tawo sa panagbangi uban ang kasuko sa usag usa” (3 Nephi 11:29).

Sa pagkasunod buntag, mibati ako nga nagmalinawon. Nahibalo ako nga ang Langitnong Amahan gusto kanako nga magmaloloy-on. Apan sa dihang ako miabot sa klase , misugod ako sa pagbati og kanerbiyos.

Ang mga kauban sa klase namulong nga uyon sa artikulo. Akong gibati nga kinahanglan akong mosulti, apan naguol ako mahitungod sa pagkawala o pagkadaot sa akong sosyal nga kinabuhi. Dayon akong nahinumdoman ang usa ka kinutlo nga akong nakita sa social media niana nga buntag gikan ni Elder Jeffrey R. Holland sa Korum sa Napulog Duha ka Apostoles: “Panalipdi ang inyong mga gituohan uban sa maayong pamatasan ug kamanggiloy-on, apan panalipdi kini” (Abr. 2014 kinatibuk-ang komperensiya [Liahona, Mayo 2014, 9]).

Busa mipataas ako sa akong kamot ug misulti kanila nga ako miyembro sa Ang Simbahan ni Jesukristo sa mga Santos sa Ulahing mga Adlaw ug miklaro ug mga punto diha sa artikulo nga dili klaro o dili tinuod. Nangurog ang akong mga kamot, apan ang akong mga pulong wala. Mitutok ang klase kanako, apan nahibalo ako nga gibuhat ko ang husto nga butang.

Akong nakat-onan nga ang manggiloy-ong pagpanalipod sa ebanghelyo usa ka panalangin, dili usa ka palas-anon. Ang Espiritu nag-uban kanako, ug ako dihay makasanap nga pagbati sa gugma gikan sa Langitnong Amahan. Ako nahibalo nga Siya mapagarbuhon kanako, ug mapagarbuhon usab ako sa akong kaugalingon.

Ang tagsulat nagpuyo sa Arizona, USA.