Mga Pasidaan sa Kahalang

Ni Curtis Collins

Unsa ang buot ipasabot sa pagpuyo sa kalibotan apan dili magpakalibutanon?

Kita mailhan nga lahi isip mga miyembro sa Simbahan. Sama pananglit, dili kita moinom og kape o tsa, kasarangan kitang magsinina, dili law-ay ang atong pinulongan, ug nagsunod kita sa balaod sa kaputli. Apan kana wala nagpasabot nga ang mga butang sa kalibotan mawala! Nagbuhat si Satanas sa tanan diha sa iyang gahom sa pagtintal kanato, ug kinahanglan kitang kanunay nga magbantay (tan-awa sa Doktrina ug mga Pakigsaad 29:39).

Apan unsaon sa eksakto nga paagi kita mopanalipod sa atong mga kaugalingon? Magkat-on kita pinaagi sa pagbuhat og gamay nga eksperimento sa tubig, paminta, ug sabon. Bitara ang imong pamilya ug pag-andam alang sa pipila ka kalingawan!

Leksyon nga Maggamit og Butang [Object Lesson]

Pagsugod pinaagi sa pagpuno sa usa ka panaksan og tubig. Ang tubig nagrepresentar sa kalibotan nga atong gipuy-an.

Pagbu-bo og pipila ka paminta ngadto sa tubig. Mga 10 ka pag-uyog igo na aron mo-epekto kini. Ang paminta nagrepresentar sa mga butang sa kalibotan, sama sa tintasyon, pagkalinga, o sala. Pakigsulti sa imong pamilya mahitungod sa “paminta” nga ilang nahibalag sa ilang kaugalingong mga kinabuhi.
Ituslob ang imong tudlo ngadto sa tunga sa halang nga tubig. Nakita kon giunsa pagpilit sa paminta diha sa imong tudlo? Ipasabot nga kini sama sa pag-adto sa kalibotan nga walay kahibalo sa ebanghelyo. Wala niana nga kahibalo, malisod kini nga mahibaloan hain nga mga kapilian ang husto ug hain nga mga kapilian ang sayop.

Ipakigbahin ang mosunod nga kutlo gikan ni Presidente Russell M. Nelson: “Sa umaabot nga mga adlaw, dili na posible ang espirituhanong pagsugakod kon wala ang giya, direksyon, makahupay, ug kanunay nga impluwensya sa Espiritu Santo.”¹
Karon alang sa kulbahinam nga bahin. Una kuhaa ang imong tudlo ug hinloi sa paminta. Karon butangi ang imong tudlo ug nipis nga sapaw sa sabon sa plato. Ang sabon sa plato nagrepresentar sa mapanalipdanong gahom sa Espiritu Santo. Unsa kaha ang mahitabo kon kini modapat sa paminta?
Ituslob og balik ang imong tudlo diha sa tunga sa tubig. Bantayi samtang ang paminta molukso ngadto sa mga daplin sa panaksan! Katingalahan, di ba? Samtang imong kuhaon ang imong tudlo gikan sa tubig, imong makita nga kini hingpit nga walay paminta! Mahimong moingon ka nga ang imong tudlo diha sa paminta apan dili iya sa paminta.

Paghisgot!

Timan-i nga ang paminta wala nagbiya sa tubig, ug usa ka sapaw sa sabon dili molungtad sa hangtod. Ang mga butang sa kalibotan kanunay nga maanaa, ug ang pakig-uban sa Espiritu Santo nagkinahanglan og makanunayon, inadlaw nga paningkamot. Apan kutob nga kita nagsunod sa atong mga pakigsaad, kita adunay panalipod gikan sa kahitas-an!

Unsa ang imong mabuhat nga makabaton sa panalipod sa Espiritu Santo diha sa imong kinabuhi?