Ang Tema ug Ako

Ang kabatan-onan nakigbahin kon giunsa nila pagpuyo ang mga pulong sa mga Tema sa Young Women ug sa Korum sa Aaronic nga Pagkapari

Mas Magpaduol ngadto ni Kristo pinaagi sa Serbisyo

“Pinaagi sa pagdapit sa tanan nga moduol ngadto kang Kristo ug modawat sa mga panalangin sa Iyang Pag-ula.”

Ni Joseph McCracken

batan-ong lalaki

Niining milabay nga ting-init miadto ako sa Brazil uban sa usa ka humanitarian nga organisasyon. Ang unang katuyoan mao ang pagtukod og usa ka klasehanan alang sa usa ka komunidad nga nanginahanglan. Sulod sa duha ka semana akong gihatag ang tibuok kong paningkamot. Miayag ako og balas, mimasa sa semento, ug mipahiluna sa mga bika nga tukuron og mga bongbong sa klasehanan. Apan unsa ang akong nadawat sa espirituhanong paagi gikan niini nga kasinatian mas importante pa kaayo kay sa bisan unsa nga butang nga akong naamot sa pisikal nga paagi.

Sa tibuok nga biyahe, ang usa sa akong mga lider, si Scott, midala og positibo nga enerhiya nga mi-impluwensiya sa tanan nga naglibot kaniya. Kanunay si Scott nga nakig-istorya ngadto sa mga tawo diha sa dapit nga among gitrabahoan ug diha sa dalan mahitungod ni Jesukristo. Gidapit niya ang mga tawo sa pagsimba kon siya adunay higayon. Gusto ni Scott ang pagpakigbahin sa ebanghelyo pinaagi sa iyang mga pulong ug mga buhat.

Usa ka adlaw niana gidapit ako sa paghatag og usa ka pamulong diha sa lokal nga miting sa sakramento sa ward sa hisgotanan kabahin sa sakripisyo. Sa sinugdanan miukon-ukon ako tungod kay wala pa gayod ako makapamulong sa gawas sa akong kaugalingong ward, apan mitando ako. Ako nalipay kaayo nga mitando ako! Ang akong pagpamatuod kabahin ni Jesukristo ug sa akong hugot nga pagtuo diha kaniya mitubo isip usa ka resulta. Karon ako nahibalo sa bili sa pagtando sa pagserbisyo––walay pagsapayan unsa ka gamay––ug sa pagsunod ni Jesukristo ug sa pagdala sa uban kuyog kanako––sama gayod sa akong nakita nga gibuhat ni Scott.

Karon nakaplagan ko ang akong kaugalingon nga naghunahuna pa og dugang mahitungod sa uban ug unsaon ko sa pagtabang kanila. Mas kanunay akong makigsulti ngadto sa mga tawo mahitungod sa ebanghelyo. Nagdapit ako sa batan-ong mga lalaki sa akong korum kinsa wala nako makita og dugay-dugay na sa pag-adto sa simbahan ug sa mga kalihokan. Ug ako magpamatuod kon ako makahimo.

Mapasalamaton ako alang sa mga oportunidad sa pagsunod ug pagkahimong mas sama ni Jesukristo ug sa pagtabang sa uban nga moduol ngadto Kaniya. Ako gani karon mas naghinam-hinam sa pagserbisyo og usa ka misyon! Nakagusto ako sa akong pagbati kon akong ihatag ang akong tibuok kaugalingon ngadto sa pagserbisyo sa uban––nga mao ang gibuhat ni Kristo alang kanato.

Ang tagsulat nagpuyo sa Washington, USA.