“Paghimo og mga Sumbanan sa Relasyon,” Alang sa Kalig-on sa mga Kabatan-onan, Ago. 2022.
Tabang sa Kinabuhi
Paghimo og mga Sumbanan sa Relasyon
Bisan ang labing maayo nga mga panaghigalaay nagkinahanglan og hustong pagkahimo nga mga sumbanan.
Mga paghulagway pinaagi ni Jarom Vogel
Ang mga sumbanan anaa bisan asa, ug alang sa maayong rason! Paghunahuna mahitungod niini: Ang mga dula adunay mga linya sa pag-ila sa natad nga dulaanan o korte nga dulaanan. Kon ikaw magdudula sa usa ka drama, mahibalo ka asa mosulod o mogawas sa entablado. Sa eskwelahan, adunay gihimo nga mga sumbanan kabahin sa unsay ikaw makahimo o dili makahimo sa paggamit isip usa ka kapangohaan atol sa usa ka eksamin. Handurawa kon unsa ang mahitabo kon kita walay klaro nga mga sumbanan. Kini makamugna og daghan nga mga problema!
Sa samang paagi, ang mga relasyon mahimong mamaayo kaayo nga may mga sumbanan nga nagtabang kanato sa pagtataw kon sa unsa kita komportable samtang nakigsinultihay ngadto sa uban. Ang paghimo og mga sumbanan nagpahibalo sa uban kon unsay atong gipaabot nga pagtagad ug nagtabang kanato nga mas maayong mosunod sa pagtulon-an sa Manluluwas nga “higugmaa ang imong silingan” (Mateo 22:39).
Mga Sumbanan ug Pagtahod sa Kaugalingon
Kon kita maghimo og mga sumbanan, magpakita kita og pagtahod sa atong mga kaugalingon ug sa atong kaayohan. Atol sa Iyang mortal nga pangalagad, gitudlo ug gipakita ni Jesukristo ang ehemplo kon unsaon sa pag-amuma ang atong mga kaugalingon pinaagi sa paghimo og mga sumbanan. Usahay Siya mibulag sa Iyang Kaugalingon gikan sa uban sa pagpamalandong ug sa pag-ampo: “Ug sa napapauli na niya ang mga panon sa katawhan, sa kabungtoran mitungas siya nga nag-inusara aron sa pag-ampo: ug sa pagkasawomsom na, siya mao rang usa didto” (Mateo 14:23). Niini nga panahon ang pag-inusara sa Iyang Kaugalingon mitabang Kaniya sa pagserbisyo og mas maayo sa uban.
Paghimo og mga Sumbanan ug Pagtukod og Pagsalig
Kon ang mga tawo mosabot ug motahod sa mga sumbanan sa usag usa, makasalig sila sa usag usa. Sa mga relasyon, ang pagsalig may gamay nga pagkasama sa kwarta sa bangko diin ang mga “deposito” nagdugang og pagsalig ug ang mga “pagkuha og kwarta” nagbakwi niini. Ania ang pipila ka butang nga hinumdoman samtang ikaw nagtukod og relasyon sa pagsalig ngadto sa usa ka tawo:
-
Gipanag-iya nimo ang relasyon. Ikaw ang magbuot kon unsa nga mga pamatasan ang mga “deposito” (sama sa pagtahod ug pagkamatinuoron) o mga “pagkuha” (sama sa pagkadili matinuoron, paglilong, o pagtabon sa mga kasaypanan).
-
Salig kon ikaw andam na. Ayaw pagbati nga napugos sa pagsalig sa usa ka tawo. Ang pagsalig madugay sa pagtukod ug sa pag-amuma.
-
Klaroha ang pagpatin-aw sa mga sumbanan. Pahibaloa ang uban kon unsa nga mga pamatasan ang nagtukod o nagbakwi sa imong pagsalig.
-
Ang pagkasuod sa imong mga relasyon nag-agad kanimo. Ikaw ang magbuot kon unsa kasuod ngadto sa usa ka tawo base sa gidak-on sa imong pagsalig diha kanila.1 Ang mga relasyon makatubo kon imong makita nga ang uban andam sa pagtukod, o pagtukod og usab, sa pagsalig diha kanimo.
-
Paminaw sa mga pag-aghat sa Espiritu Santo. Ang Espiritu makagiya kanimo kon unsaon pag-atubang og labing maayo ang matag sitwasyon kon ikaw maningkamot og pagpadayag ug molihok diha sa mga panghunahuna nga imong nadawat diha sa imong hunahuna ug kasingkasing.
-
Pagprangka ug pagmalig-on. Tingali mahimong maguol ka nga ikaw nakapasakit sa mga pagbati sa usa ka tawo, apan importante kini nga mahimong prangka ug malig-on sa imong mga sumbanan. Ayaw pagsugot ngadto sa usa ka butang nga naghimo kanimo nga dili komportable. Ikaw makatanyag og laing kapilian nga maayo ug mas bagay alang kanimo, apan usahay ang dili [no] mao ang angay nga tubag.
Pagtahod alang sa mga Sumbanan sa Uban
Sama lamang nga ang uban kinahanglang motahod sa imong mga sumbanan, ikaw kinahanglang motahod sa mga sumbanan sa uban. Pagmatinahuron kon ang usa ka tawo moingon og dili. Pagmatngon sa panahon ug sa paningkamot nga imong gipangayo sa uban. Ug ayaw pamugos sa usa ka tawo sa pagpasabot alang sa ilang mga sumbanan. Ikaw dili kinahanglan nga mahibalo sa tanang rason alang sa ilang mga sumbanan; ikaw lamang kinahanglan nga magmatinahuron.
Kon ang mga Sumbanan Dili Tahuron
Sa kasubo, ang pipila ka tawo mahimong mopili sa pagbale-wala sa mga sumbanan ug moabuso niadtong naglibot kanila. Ang abuso mao ang labing grabe nga paglapas sa mga sumbanan. Kon ikaw usa ka biktima sa pang-abuso, ang imong kahilwasan mao ang labing importante nga hunahunaon. Walay usa nga gidahom nga molahutay sa abusadong kinaiya. Ikaw makasulti sa usa ka hamtong nga tawo nga imong kasaligan, kinsa makatabang sa pagtudlo kanimo ngadto sa mga kapangohaan alang sa tabang ug sa pagtabang kanimo sa pagpalambo og makahilwas nga plano sa paghimo kanimo nga luwas gikan sa dugang nga pang-abuso. Adunay mga sitwasyon diin ikaw kinahanglan lamang nga mobiya.2 Pag-ampo alang sa kaisog sa pagbuhat kon unsa ang gikinahanglan sa paghimo sa imong kaugalingon nga luwas.
Pagpadayon sa Unahan uban sa mga Sumbanan
Ang paghimo og mga sumbanan mahimong dili mosulbad sa tanang problema sa relasyon. Apan kini makatabang kanimo sa paglig-on sa imong pagbati og bili sa kaugalingon, pagsalig, ug emosyonal nga kahimsog ug makatabang kanimo sa pakig-uban sa matinahuron ug luwas nga paagi ngadto sa uban. Sulayi ang paghimo og maayo nga mga sumbanan karon aron makita kon unsa nga kalainan kini mohimo alang kanimo.