“Ako wala pay bisan unsang gamhanan nga espirituhanong mga kasinatian. Unsaon nako sa pagpakigbahin sa akong pagpamatuod?,” Alang sa Kalig-on sa mga Kabatan-onan, Ago. 2022.
Mga Pangutana ug Mga Tubag
“Ako wala pay bisan unsang gamhanan nga espirituhanong mga kasinatian. Unsaon nako sa pagpakigbahin sa akong pagpamatuod?”
Ipatigbabaw ang Dios
“Ikaw makaangkon og usa ka pagpamatuod samtang ikaw nagsunod sa mga pagtulon-an ni Presidente Nelson nga ipatigbabaw ang Dios diha sa imong kinabuhi pinaagi sa pagsunod sa mga sugo, pagtuman sa mga pakigsaad, pagbasa sa mga kasulatan, pag-ampo, ug sa pagbaton sa pakig-uban sa Espiritu Santo. Ang Langitnong Amahan makatabang kanimo sa pagmatikod ug sa pagpasalamat sa gagmay nga mga milagro nga mahitabo diha sa imong kinabuhi aron ikaw sa anam-anam makapalig-on sa imong pagpamatuod.”
Rosewin C., 19, Pilipinas
Pag-ampo nga “[Maka]paminaw Kaniya”
“Bisan og ikaw wala pa makabaton og bisan unsa nga espirituhanong mga kasinatian, pag-ampo ngadto sa Langitnong Amahan alang sa gahom nga ‘[maka]paminaw Kaniya’ ug modawat og panghimatuod sa pipila ka mga butang nga ikaw nahibalo nga mga tinuod. Kon bukas ang imong hunahuna ug kasingkasing, ang kahayag ug pagpadayag modagayday og mas kanunay nganha sa imong kinabuhi. Sa dili madugay imong mahibaloan kon unsay labing maayo alang kanimo kon magdawat og pagpadayag gikan Kaniya.”
Chloe L., 13, Arizona, USA
Pagbaton og Hugot nga Pagtuo
“Ikaw wala magkinahanglan og gamhanang espirituhanong mga kasinatian sama sa panan-awon. Ikaw nagkinahanglan lamang og hugot nga pagtuo. Sa Doktrina ug mga Pakigsaad 63:9 kini nag-ingon, ‘ang hugot nga pagtuo moabot dili pinaagi sa mga timailhan, apan ang mga timailhan mosunod niadto nga motuo.’ Pagbaton og hugot nga pagtuo, pagmakanunayon sa pagsunod sa mga baroganan sa Ginoo, ug paningkamot sa pagsunod sa Iyang impluwensya diha sa imong kinabuhi. Ang pagkamapasalamaton usa ka bahin usab sa pagpamatuod.”
Rebecca J., 14, India
Ang Matag Usa Lahi
“Ang matag usa adunay managlahi nga mga kasinatian. Mahimong kita walay lisod sabton nga mga pagpakita sama ni Propeta Joseph Smith, apan kana wala magpasabot nga kita walay espirituhanong kasinatian. Ang pagkadawat og tubag sa usa ka pag-ampo mahimong usa ka espirituhanong kasinatian. Kana ingon og gamay, apan ang atong pagpamatuod takos nga ipakigbahin kon kini gibase sa kamatuoran, bisan kon ang mga tubag nga atong nadawat dako o gamay.”
Ramon S., 17, Mexico
Pakigbahin og Yano nga mga Tinuohan
“Ang imong pagpakigbahin og pagpamatuod maoy usa ka pagpahayag sa imong pasalamat ug pagtuo sa Langitnong Amahan ug ni Jesukristo. Sa Alma 37:6 kini nag-ingon, ‘Pinaagi sa gagmay ug yanong mga butang ang dagkong butang ipahinabo.’ Ikaw makapamatuod mahitungod sa usa ka kasulatan o sa usa ka butang nga ikaw mapasalamaton alang niana nga gihatag sa Dios kanimo. Imong mahibaloan nga ikaw adunay usa ka lig-ong pagpamatuod pinaagi sa pagpakigbahin og yanong mga butang nga ikaw nagtuo.”
Hannah H., 16, Utah, USA
Pagkat-on gikan sa Nanglabay nga mga Kasinatian
“Kitang tanan masayop, apan pinaagi sa paghinulsol, ang atong mga sayop mahimo nga mga leksiyon. Ang atong mga kasinatian makatabang kanato sa pagtabang sa uban nga mahibalo nga ang Ginoo anaa kanunay alang kanila ug motabang. Ipakigbahin ang imong mga pagbati ug ang imong mga leksiyon sa kinabuhi. Dili ka gayod mahibalo kon kinsay nagkinahanglan niini.”
Andrea R., 18, Mexico
Pangutana
“Makabaton ka og pagpamatuod pinaagi sa pagbasa sa mga kasulatan, pagkat-on gikan sa mga lider, ug pinaagi sa pagtinguha sa pagpakig-uban sa Balaang Espiritu. Sa 3 Nephi 14:7 atong makat-onan: “Pangayo, ug kini ihatag.” Kon kita mangayo uban sa hugot nga pagtuo ug usa ka andam nga kasingkasing, ang atong tanan nga mga pangutana matubag, ug kita makabaton og usa ka lig-on, kinasingkasing nga pagpamatuod.”
David R., 18, Mexico
Padayon sa Unahan
“Pagbasa kanunay sa balaang mga kasulatan. Pag-ampo kanunay. Paningkamot kanunay. Walay usa kinsa kanunay nga naninguha ug kanunay nga nag-ampo nga napakyas. Ang Ginoo mopanalangin kanimo og usa ka lig-ong pagpamatuod nga ipakigbahin samtang ikaw molahutay sa pagpadayon sa unahan.”
Edezza T., 18, Pilipinas
Lihoka
“Isip usa ka misyonaryo og bag-ong kinabig, akong naangkon ang akong daghan nga espirituhanong mga kasinatian sulod sa duha ka tuig sukad sa akong bunyag. Nakat-onan ko nga kon ikaw gusto og usa ka pagpamatuod sa bisan unsa, paninguha sa pagbuhat niini. Sa pagpalambo og usa ka pagpamatuod sa pakigbahin sa ebanghelyo, paningkamot sa pagpakigbahin niini. O basa sa Basahon ni Mormon, pag-ampo, ug tan-awa unsa ang isulti sa Espiritu kanimo.”
Elder Benavente, 27, California, USA