“Diha sa Komunidad sa mga Bungol” Alang sa Kalig-on sa mga Kabatan-onan, Ago. 2022.
Giunsa Namo Pagsimba
Diha sa Komunidad sa mga Bungol
Litrato gikan sa Getty Images
Pakighimamat ni Meg, Reagan, ug Kate! Motudlo sila kanato og dugang pa mahitungod kon sama sa unsa ang pagsimba isip mga sakop sa bungol nga komunidad.
Hi, Ako si Meg!
Mga litrato ni Meg ug sa iyang igsoong lalaki sa Opal ug Olive Photos
16 anyos ang akong edad ug ang ikaduhang kinamagulangan sa pamilya nga walo. Ang among kinabuhi nausab sa dihang ang akong kinamanghorang igsoong lalaki natawo. Natawo siya nga bungol. Misugod kami sa pagtambong sa ward sa mga bungol sa among dapit, ug kini nahimong lahi, apan kini usab nahimong katingalahan nga panalangin.
Ang mga tawo mahimong maghunahuna nga bungol ang tanan diha sa ward sa mga bungol, apan daghan kanamo dili. Sama pananglit, ang pipila sa mga kabatan-onan sa among ward makadungog, apan sila adunay mga ginikanan kinsa mga bungol o naglisod sa pagdungog ug naggamit og ASL sa ilang tibuok nga mga kinabuhi. Kamo usab dili kinahanglan nga mahimong experto nga tigsenyas aron makaanhi sa among ASL ward, tungod kay kami adunay mga tighubad.
Ang kamanghorang igsoong lalaki ni Meg, kinsa natawo nga bungol.
Ako gitawag sa pagtugtog sa piyano sa miting sa sakramento alang sa ward sa mga bungol, ug nagustohan ko ang akong calling. Kini talagsaon tungod kay daghan sa mga miyembro nagsenyas sa mga himno samtang ako nagtutog. Gihigugma ko ang akong ward, ug nagustohan ko ang oportunidad nga makakat-on pa og dugang mahitungod sa kultura sa akong igsoong lalaki.
Hi, Ako si Reagan!
Ako ang kinamagulangan; may upat ako ka manghod nga mga igsoon. Ako lamang ang bungol nga tawo sa akong pamilya. Nakat-onan sa akong mga ginikanan ang senyas nga pinulongan human sa akong pagkatawo, ug akong gitudloan ang akong mas manghod nga mga igsoon kon unsaon sa pagsenyas. Nagtuo ako nga ang pagkabungol usa ka gasa nga sa tinuod nakahatag kanako og kaayohan. Kini nagtudlo kanako kon unsaon sa pagtabang ngadto sa ubang mga tawo kinsa tingali mibati usab og kalahi.
Usa ako ka sakop sa ASL (American Sign Language) nga konseho sa seminary sa USA. Kami adunay 10 ka mga sakop nga kabatan-onan sa tibuok nasod kinsa nagrepresentar sa bungol nga mga kabatan-onan ug nagtabang og plano sa mga kalihokan. Kami adunay virtual nga mga klase sa seminary ug institute uban sa mga estudyante kinsa mga bungol o hanas sa ASL. Gani nagpasalida ako og usa ka video sa social media nga nagdapit sa ubang kabatan-onan sa pag-anha sa among klase sa seminary. Ako mapasalamaton kaayo nga ako makagamit sa akong talento sa pagsenyas sa pagdapit sa mga tawo nga mas magpaduol ngadto ni Jesukristo.
Si Reagan ganahan sa pamilya, mga higala, ug mga dula.
Daghan ako og mga oportunidad sa pagserbisyo tungod sa gasa nga gihatag sa akong Langitnong Amahan kanako nga makahibalo sa ASL. Sama pananglit, nakatudlo ako sa bungol nga mga tawo kinsa dili sa atong tinuohan mahitungod sa plano sa kaluwasan. Nakahimo ako sa pagtudlo sa usa ka higala kinsa naghunahuna nga siya dili na gayod makakita pag-usab sa iyang mga sakop sa pamilya human mamatay. Dili ako misyonaryo nga may name tag, apan makahimo ako sa pagkamisyonaryo 24/7. Naghinamhinam ako nga makaserbisyo og ASL nga misyon.
Kinahanglan nga ikaw dili gayod maghukom sa usa ka tawo tungod nga sila adunay kakulangan. Sila makahimo gihapon sa pagbuhat og mga butang nga ang ubang mga tawo makabuhat. Ang tanang tawo anak sa Dios. Kini dili igsapayan kon sila walay sama nga mga abilidad sama kanimo.
Hi, ako si Kate!
Ang akong paborito nga bahin sa pagkabungol nga miyembro sa Simbahan mao nga ang senyas nga pinulongan nagtabang kanako nga makahimo sa pagpahayag og mga konsepto sa ebanghelyo sa usa ka paagi nga ako dili makahimo sa isulti nga pinulongan, ilabi kon ako magsenyas sa mga himno. Sama pananglit, kon ikaw magsenyas sa pulong Jesus ikaw motudlo ngadto sa mga palad sa imong mga kamot, simbolikanhon sa mga lansang nga milapos sa mga palad ni Jesus.
Si Kate nagsenyas sa ngalan ni Jesus.
Ako mao lamang ang naglisod sa pagdungog nga tawo sa akong pamilya, ug kami nagtambong og usa ka makadungog nga ward, apan adunay ubang pipila ka bungol nga mga miyembro sa akong ward. Kini sa tinuod makatabang kon ang ubang mga miyembro maniguro nga kami naapil. Sama pananglit, kon sila nagpili sa pagpakita og usa ka video diha sa klase o diha sa usa ka kalihokan, kini makatabang ang pagbutang og mga ulohan diha sa video.
Sa nanglabay nga mga katuigan akong nakat-onan nga si Jesus nakasabot sa akong tanan nga mga kasakit sa kasingkasing. Bisan tuod og dili daghan kaayong mga tawo nga sama kanako, nahibalo si Kristo unsa ang akong gisinati, ug anaa Siya sa pagtabang kanako sa bisan unsang panahon nga ako magpatabang Kaniya.