“Paglabang sa Malisod nga mga Panahon,” Alang sa Kalig-on sa mga Kabatan-onan, Ago. 2022.
Dali, Sunod Kanako
Job
Paglabang sa Malisod nga mga Panahon
Adunay daghan nga atong makat-onan gikan ni Job mahitungod sa paglabang sa mga pagsulay.
Litrato gikan sa Getty Images
Ngano nga ang daotang mga butang mahitabo ngadto sa buotan nga mga tawo?
Kana nga pangutana ingon og diha na nga walay kataposan, ug usa kini nga malisod tubagon. Kon ang alaot nga mga butang mahitabo, sayon kini sa pagpangutana, “Nganong kinahanglan kini nga mahitabo?” o “Nganong karon man?” Apan kini nga matang sa mga pangutana sa tinuod dili gayod makatabang bisan unsaon. Adunay daghan kaayo nga wala nato mahibaloi o masabti. Salamat na lang, anaa kanato ang gugma sa Langitnong Amahan ug ang gipahiuli nga ebanghelyo ni Jesukristo sa pagpakita kanato og usa ka mas maayo nga paagi.
Usa ka mas maayo nga pangutana kay sa “ngano?”
Usa sa labing importanting mga butang nga kita makakat-on niini nga kinabuhi mao ang paghunong sa paghatag og importansya sa ngano nga ang ngil-ad nga mga butang mahitabo ug hinoon mangutana sa atong mga kaugalingon: “Unsaon nako sa pagtubag?” Mao kana ang unsay nakat-onan ni Job sa Daang Tugon.
Mga Pagsulay ni Job
Job ug Iyang Pamilya, ni Greg K. Olsen
Matarong nga tawo si Job kinsa gipanalanginan og usa ka dako nga pamilya ug daghang katigayonan (tan-awa sa Job 1:1–3). Apan ang iyang hugot nga pagtuo ug pagkamaunungon ngadto sa Dios gisulayan sa dihang ang tanan gikuha gikan kaniya.
Sa una, ang mga kahayopan ni Job gipangawat o gipamatay. Dayon usa ka kusog nga hangin mipukan sa iyang balay ug mipatay sa iyang anak nga mga lalaki sa sulod. Kay sa masuko, miingon si Job, “Ang Ginoo mihatag, ug ang Ginoo mikuha; bulahan ang ngalan sa Ginoo” (Job 1:21).
Daghan pang mga pagsulay ang miabot sa kinabuhi ni Job sa dihang siya nasakit og mga “hubag nga mahapdos gikan sa lapalapa sa iyang tiil hangtod sa alimpulo” (Job 2:7). Ang mga higala ni Job misulti kaniya nga ang iyang mga pag-antos tingali sala ang nakaingon. Gani sila misugyot nga “tungloha ang Dios ug magpakamatay ka” (Job 2:9). (Unsa nga matang sa “mga higala” ang mosugyot niana!?)
Sa gihapon, midumili si Job sa pagtunglo sa Ginoo ug mipabiling matinud-anon. (Kana mao ang buhaton sa usa ka tinuod nga higala!)
Pinaagi niining tanan, nasinati ni Job ang mga higayon sa pagkanawad-an og paglaom. Apan sa dihang nakita sa Ginoo ang pagkamatinud-anon ni Job, gipanalanginan Niya si Job ug “duha ka pilo kay sa una” (Job 42:10).
Wala mahibalo si Job sa tanang mga rason kon nganong kinahanglan siyang mag-antos. Apan ang Ginoo mihatag ni Job og mga rason sa pagbaton og hugot nga pagtuo ug pailob kon ang mga panahon malisod. Ang ehemplo ni Job makatabang kanato sa mga pagsulay nga atong gisinati.
Ang mga Pagsulay Moabot ngadto sa Tanan, Lakip sa Matarong
Ang mga higala ni Job sayop nga misugyot nga ang Dios tingali nagsilot ni Job tungod sa pipila ka sala (tan-awa sa, sama pananglit, sa Job 22). Ang kamatuoran mao nga bisan tuod ang pag-antos mahimong usa ka sangpotanan sa sala, tanan kita magsinati og mga pagsulay––bisan kon nagpuyo kita sa matarong nga paagi. Si Jesukristo mao lamang ang hingpit nga tawo kinsa buhi sukad, apan Siya miantos og labaw kay ni bisan kinsang uban nga tawo. Ang mga kasulatan nagtudlo nga ang mga pagsulay ug mga hagit moabot “ngadto sa matarong ug sa dili matarong” (Mateo 5:45).
Bisan Kon ang Dios dili Motubag, Siya Anaa Gihapon Diha
Ang pag-antos ni Job misamot sa dihang iyang gibati nga mibiya ang Dios kaniya. Sa dihang ang wala pagtubag sa Dios nahimong dili na maagwanta, sa kataposan si Job mitawag gumikan sa kasakit, “Ako nagatuaw kanimo, ug ikaw dili motubag kanako” (Job 30:20). Usahay, kita mahimong mobati sama ni Job. Unsa ang atong buhaton kon ang Dios ingon og nagpakahilom diha sa atong pag-antos?
Makasunod kita sa ehemplo ni Job ug sa gihapon moduol ngadto sa Dios diha sa atong mga pagbati nga gitalikdan, kasuko, kasakit, o kasubo. Mahimong kita wala makamatikod niini niana nga higayon, apan ang Dios anaa gihapon uban kanato. Mahimong Siya dili moluwas kanato gikan sa atong mga pagsulay, apan Siya molig-on kanato diha sa atong mga panahon sa panginahanglan. Ug hinumdomi, human sa mga pagsulay ni Job, ang Ginoo nakigsulti og usab kaniya, mitudlo kaniya, mipanton sa iyang mga higala, ug mipanalangin pag-ayo ni Job.
Jesukristo Nahibalo
Atol sa malisod nga mga panahon, kini mahimong lisod nga hunahunaon nga bisan kinsa makasabot kon unsay imong gibati. Apan dihay Usa kinsa misabot ni Job, ug Siya mao ang samang Usa kinsa mosabot unsay imong gisinati.
Si Jesukristo [nag]antos sa mga sakit ug mga kasakit ug mga pagtintal sa matag matang” (Alma 7:11). Siya mibuhat niini aron Siya sa personal makabati ug makahibalo sa atong mga tintasyon, atong mga pakigbisog, atong mga sakit sa kasingkasing, ug atong mga pag-antos. Tungod kay Siya nahibalo niining mga butanga, nahibalo Siya kon unsaon pagtabang kanato sa paglabang niini. (Tan-awa sa Alma 7:12.)
Ang Tanan Mahimong Matarong
Pipila ka tawo aduna niining sama kalisod ni Job. Apan ang imong mga pakigbisog mga tinuod, usab. Pinaagi sa ehemplo ni Job, kita makakita sa mga panalangin nga moabot pinaagi sa pagpabilin nga matinud-anon, nagsalig diha sa kabubut-on sa Dios, ug nagpili sa pagtuo bisan ingon og adunay daghang mga rason sa dili pagtuo.
Si Elder Dale G. Renlund sa Korum sa Napulog Duha ka Apostoles mitudlo: “Didto sa kahangtoran, ang Langitnong Amahan ug si Jesukristo mosulbad sa tanan nga pagkadili makiangayon. … Sila wala motug-an unsaon kaha o kanus-a kaha. Unsa ang akong nahibaloan mao nga Sila mohimoniini.”1
Kon kita matinud-anong motubag sa malisod nga mga pagsulay sama sa gibuhat ni Job, kita makakat-on ug motubo ug mapanalanginan sa mga paagi nga kita dili gayod makabaton sa bisan unsa nga paagi.
Busa hupot, pabilin nga matinud-anon, ug hinumdomi nga ang Dios nagauban kanimo sa kanunay.