“Patriyarkal nga mga Panalangin,” Mga Hilisgotan ug mga Pangutana (2023)
Giya sa Pagtuon sa Ebanghelyo
Patriyarkal nga mga Panalangin
Personal ug dinasig nga direksiyon gikan sa Langitnong Amahan
Sa Basahon ni Mormon, si propeta Lehi nakakita og lingin nga bola nga hinimo sa tumbaga, nga naay duha ka buburan (tan-awa sa 1 Nephi 16:10). Nadiskobrehan sa iyang pamilya nga kini nga bola o kompas, nga gitawag nila og “Liahona,” nagtudlo kon asa sila mopanaw sa kamingawan. Milihok kini sumala sa ilang hugot nga pagtuo sa Dios (tan-awa sa Alma 37:38–40). Ang patriyarkal nga panalangin mahimong magamit nato sama sa gibuhat sa Liahona sa pamilya ni Lehi.
Si Presidente Thomas S. Monson mipahayag: “Ang sama nga Ginoo kinsa mihatag og Liahona alang kang Lehi naghatag kanimo ug kanako karon og usa ka talagsaon ug bililhon nga gasa sa paghatag og direksiyon sa atong mga kinabuhi, sa pagbutang og timaan sa mga kapeligrohan ngadto sa atong kahilwasan, ug sa pagplano sa dalan, bisan sa luwas nga agianan—dili ngadto sa gisaad nga yuta, apan sa atong langitnong puloy-anan. Ang gasa nga akong gipasabot mao ang imong patriyarkal nga panalangin.”
Ang Langitnong Amahan naghatag og balaanong giya ngari kanato sa daghang mga paagi—pinaagi sa pag-ampo, sa mga kasulatan, sa mga pulong sa buhing mga propeta, ug sa gasa sa Espiritu Santo. Ang imong patriyarkal nga panalangin maoy lain pang importanteng himan nga makahatag nimo og espirituwal nga direksyon, tambag, ug pasalig samtang imong atubangon ang kawalay kasegurohan ug mga hagit sa kinabuhi.
Unsa Ang Patriyarkal nga Panalangin?
Ang patriyarkal nga panalangin usa ka indibidwal nga panalangin sa pagkapari nga nadawat gikan sa gi-orden ug awtorisado nga patriyarka pinaagi sa pagpandong sa mga kamot. Kasagaran naglangkob kini og personal ug dinasig nga direksyon ug tambag gikan sa Langitnong Amahan. Ang patriyarkal nga panalangin naglakip usab og deklarasyon sa kaliwat sa usa ka tawo diha sa balay ni Israel, o isip usa ka kaliwat ni Abraham. Ang patriyarkal nga panalangin gisulat, diin hatagan og kopya ang miyembro ug ang laing kopya tipigan didto sa mga rekord sa Simbahan. Gidasig ang kada miyembro sa Ang Simbahan ni Jesukristo sa mga Santos sa Ulahing mga Adlaw nga modawat og patriyarkal nga panalangin.
Katibuk-ang pagpasabot sa hilisgotan: Patriyarkal nga mga Panalangin
May kalabotan nga mga giya sa pagtuon sa ebanghelyo: Panalangin sa Pagkapari, Personal nga Pagpadayag, Pakigsaad ni Abraham
Seksiyon 1
Unsa Ang Patriyarkal nga Panalangin?
Ang mga miyembro sa Ang Simbahan ni Jesukristo sa mga Santos sa Ulahing mga Adlaw mahimong makadawat og mga panalangin sa pagkapari pinaagi sa pagpandong sa mga kamot sa daghang higayon sa ilang kinabuhi. Ang mga miyembro makapangayo og mga panalangin sa pagkapari gikan sa usa ka naghupot og Melchizedek nga Pagkapari bisan unsang orasa nga sila nagkinahanglan og kaayohan o nagtinguha og kahupayan, kaalam, ug balaanong giya. Apan, ang patriyarkal nga mga panalangin lahi gikan niini nga mga panalangin sa pagkapari.
Ang mga patriyarka naghupot og talagsaong katungdanan sa pagkapari ug gi-set apart aron mohatag og espesyal nga mga panalangin ngadto sa takos nga mga miyembro sa Simbahan. Ang usa ka tawo kinahanglang andam sa espirituhanon nga paagi ug igo ang kahingkod aron masabtan ang kaimportante sa iyang patriyarkal nga panalangin, bisan tuod walay minimum o maximum nga edad ang gikinahanglan. Kasagaran ang usa ka tawo makadawat og usa lang ka patriyarkal nga panalangin sa tibuok niyang kinabuhi. Ang patriyarkal nga mga panalangin girekord, gi-transcribe, ug gipreserbar sa mga rekord sa Simbahan. Sagrado kini ug dili mahimong basahon sa publiko o hubaron sa uban.
Mga butang nga angayang hunahunaon
-
Aron mas masabtan ang kasaysayan sa patriyarkal nga mga panalangin sa Simbahan, rebyoha ang Hilisgotan sa Kasaysayan sa Simbahan nga “Patriyarkal nga mga Panalangin,” nga maktia sa Librarya sa Ebanghelyo. Unsay imong nakat-onan bahin sa patriyarkal nga mga panalangin gikan niini nga artikulo? Ngano kaha nga kanunay kining irekord ug tipigan sa mga rekord sa Simbahan? Unsay gitudlo niini kanimo bahin sa kaugalingon nimong patriyarkal nga panalangin ug sa kamahinungdanon niini?
-
Basaha ang Mga Artikulo sa Hugot nga Pagtuo 1:6. Si Joseph Smith mitudlo nga ang terminong “ebanghelista” sa Simbahan ni Jesukristo nagpasabot sa gi-orden nga katungdanan sa pagkapari nga patriyarka. Alang sa dugang nga impormasyon bahin niini, ikonsiderar ang pagbasa sa pakigpulong ni Presidente Boyd K. Packer nga “Ang Patriyarka sa Stake.”
Kalihokan alang sa pagkat-on uban sa laing mga tawo
-
Ang proseso sa pagdawat og patriyarkal nga panalangin dili tingali pamilyar sa tanang sakop sa grupo. Dapita sila nga mangutana bahin sa patriyarkal nga mga panalangin, ug ilista ang mga pangutana para sa tibuok grupo aron makita kon posible kini. Dayon rebyoha ang Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 18.17, sa Librarya sa Ebanghelyo, nga mangita sa mga tubag sa mga pangutana sa mga sakop sa grupo. Unsay gitudlo kanimo niini nga kalihokan bahin sa patriyarkal nga mga panalangin?
Pagkat-on pa og dugang
-
Hubad ni Joseph Smith, Genesis 48:5–11 (sa apendiks sa Biblia); Hubad ni Joseph Smith, Genesis 50:24–37 (sa apendiks sa Biblia); Mga Taga-Efeso 4:11; 2 Nephi 4:1–12; Doktrina ug mga Pakigsaad 107:39, 53, 56
-
Kazuhiko Yamashita, “Kanus-a Ka Angay nga Makadawat og Patriyarkal nga Panalangin,” Liahona, Mayo 2023, 88–90
Seksiyon 2
Unsa Ang Pagdeklarar sa Linya sa Kaliwatan diha sa Patriyarkal nga Panalangin?
Ang matag patriyarkal nga panalangin naglangkob og pagdeklarar sa linya sa kaliwatant. Dihang ang mga anak sa Dios nabunyagan ug nahimong miyembro sa Ang Simbahan ni Jesukristo sa mga Santos sa Ulahing mga Adlaw, mapanunod nila ang mga saad sa Dios kang Abraham ug sa Iyang kaliwatan kon magpabilin sila nga matarong (tan-awa sa Abraham 2:9–11). Bisan ang usa ka tawo mahimong maggikan sa kapin sa usa ka kaliwat sa pamilya gikan sa balay ni Israel, kasagaran usa ka piho nga tribo ang mailhan, nga nagmatuod nga ang indibidwal adunay koneksiyon sa pamilya ngadto kang Abraham. Dili importante bisan kon kini nga deklarasyon nagpasabot nga ang maong tawo literal nga kaliwat pinaagi sa dugo o pinaagi sa espirituhanon nga pagsagop(tan-awa sa Abraham 2:10). Kini nga deklarasyon sa kaliwat nagpakita og usa ka linya sa pamilya diin ang indibidwal makapanunod sa gisaad nga mga panalangin kang Abraham. Magpahinumdom usab kini sa usa ka matinud-anong tawo sa iyang espirituhanon nga mga responsibilidad isip kaliwat ni Abraham (tan-awa sa Abraham 2:11).
Mga butang nga angayang hunahunaon
-
Nganong mahinungdanon nga ikaw kabahin sa pamilya ni Abraham? Si Elder David A. Bednar mitudlo, “Usa sa mahinungdanong mga rason nga midawat kita sa patriyarkal nga panalangin mao nga matabangan kitang madugangan ang pagsabot kon kinsa kita isip mga kaliwat ni Abraham ug makamatngon sa atong responsibilidad.” Unsa ang imong mga responsibilidad isip manununod sa mga panalangin nga gisaad ngadto kang Abraham? Unsay imong nakat-onan gikan sa imong patriyarkal nga panalangin bahin sa imong indibidwal nga mga talento ug mga kinaiya nga makatabang nimo sa pagtukod sa gingharian sa Dios?
Kalihokan alang sa pagkat-on uban sa laing mga tawo
-
Ipakigbahin ang mosunod nga pahayag sa mga sakop sa imong grupo. Si Presidente Russell M. Nelson mitudlo, “Sa atong panahon kita adunay pribilehiyo sa pagdawat og patriyarkal nga mga panalangin ug makahibalo sa atong koneksiyon ngadto sa karaang mga patriyarka.” Pwede nimong pangutan-on ang mga sakop sa grupo kon unsay ipasabot para nila ang pagkahibalo nga sila konektado isip pamilya ngadto ni Abraham ug ang uban pang karaang patriyarka.
Pagkat-on pa og dugang
-
Randall K. Bennett, “Ang Inyong Patriyarkal nga Panalangin—Dinasig nga Direksiyon gikan sa Langitnong Amahan,” Liahona, Mayo 2023, 42–43
-
Julie B. Beck, “Ikaw Adunay Dungganon nga Katungod sa Pagkatawo,” Liahona, Mayo 2006, 106–8
Seksiyon 3
Tabangan Ka sa Langitnong Amahan nga Mabati ang Iyang Gugma pinaagi sa Imong Patriyarkal nga Panalangin
Ang patriyarkal nga panalangin usa ka pagpadayag sa gugma sa Langinong Amahan para sa matag usa sa Iyang mga anak. Kini nagpamatuod nga personal Siyang nakaila nato. Kon mainampoon nimong tun-an ang imong patriyarkal nga panalangin, mabati nimo nga naghunahuna ang Langitnong Amahan nimo ug dunay balaanong plano alang sa imong kalipay. Ang pagdawat og patriyarkal nga panalangin usa ka bililhon nga gasa.
Ang patriyarkal nga panalangin mahimong adunay mga pasidaan, tambag, ug mga saad nga para lang gyod nimo. Kining dinasig nga panalangin mahimong ikonsiderar isip personal nga kasulatan para sa nakadawat ug makatabang nimo nga masabtan ang imong potensyal ug mga posibilidad. Makahatag usab kini og kalinaw ug paglaom sa panahon sa kalisdanan ug kawalay-kasegurohan. Ug bisan ang patriyarkal nga panalangin wala magdetalye sa tanan nga mahitabo sa imong kinabuhi, kini usa ka mapuslanon nga giya aron matabangan ka nga makakita og katuyoan ug mabati ang gugma sa Dios. Ang tanang panalangin ug mga saad sa patriyarkal nga mga panalangin adunay kondisyon, depende sa atong pagkamatinud-anon (tan-awa sa Doktrina ug mga Pakigsaad 130:20–21). Tungod kay ang patriyarkal nga mga panalangin para sa atong mahangtorong pagpakabuhi, ang pipila sa atong gisaad nga mga panalangin dili tingali matuman hangtod human niining mortal nga kinabuhi.
Mga butang nga angayang hunahunaon
-
Si Presidente Russell M. Nelson mitudlo: “Nakita ba ninyo ang importansiya sa inyong patriyarkal nga panalangin? … Bililhon kini. Personal kini nga kasulatan alang kaninyo. Nagdeklarar kini sa inyong espesyal nga kaliwat. Nagpahinumdom kini sa inyong koneksiyon sa nangagi. Ug kini motabang kaninyo nga matinuod ang inyong potensiyal sa umaabot. Sa literal nga paagi, makapangangkon kamo sa Ginoo alang sa katumanan niana nga mga panalangin pinaagi sa inyong pagkamatinud-anon.” Unsay imong bation dihang imong gikonsiderar kini nga mga pagtulon-an?
Kalihokan alang sa pagkat-on uban sa laing mga tawo
-
Pahinumdomi ang mga sakop sa imong grupo nga usahay mahimong lisod nga mahibaloan kon unsaon paghubad sa imong patriyarkal nga panalangin. Ang pipila ka tudling o hugpong sa mga pulong tingali adunay daghang posibleng mga kahulogan. Ipakigbahin ang tambag ni Presidente Dallin H. Oaks: “[Ang patriyarkal nga panalangin] gihatag pinaagi sa inspirasyon sa Balaang Espiritu ug kinahanglang basahon ug hubaron ubos sa impluwensiya sa mao gihapon nga Espiritu.” Unsaon nimo pagdapit ang Balaang Espiritu samtang imong basahon ug hubaron ang imong patriyarkal nga panalangin? Sa unsang paagi ang imong pagsabot sa mga tudling sa imong patriyarkal nga panalangin makapausab sa imong tibuok kinabuhi?
Pagkat-on pa og dugang
-
Thomas S. Monson, “Your Patriarchal Blessing: A Liahona of Light,” Ensign, Nov. 1986, 65–67
Uban pang mga Kapanguhaan bahin sa Patriyarkal nga mga Panalangin