Digital Lamang
Patriyarkal nga mga Panalangin—Mga Panabot gikan sa mga Propeta ug mga Patriyarka
Pagkat-on og dugang kabahin sa mga katuyoan ug mga saad sa patriyarkal nga mga panalangin.
Litrato pinaagi ni Jeremy Hall
“Nakahinumdom ko sa unang higayon nga ako mihatag og patriyarkal nga panalangin,” miingon si Vyacheslav A. Protopopov, usa ka patriyarka nga nagpuyo sa Moscow, Russia. “Siyempre, ako namalandong, nagtuon, ug nangandam sa espirituhanong paagi. Gikulbaan ko, apan sa dihang miabot ang higayon, ang Espiritu mipuno sa lawak ug mikuha sa bisan unsang kahadlok o pagpugong. Ang Espiritu mitabang kanako nga makadungog sa pulong nga miabot sa akong kasingkasing.”
Sama ni Brother Protopopov, ang mga patriyarka sa tibuok Simbahan mopahayag sa kaliwatan ug mohatag og patriyarkal nga mga panalangin pinaagi sa espiritu sa pagpadayag. Ania ang pipila sa mga pagtulun-an gikan sa mga propeta ug apostoles, uban sa mga hunahuna gikan sa upat ka patriyarka, mahitungod sa pagdawat ug pagsunod niini nga sagradong tinubdan sa espirituhanon nga giya.
Personal nga mga Mensahe gikan sa Langitnong Amahan
“Sa tibuok kalib[o]tan, ang halangdong mga patriyarka espiritwal nga mag-andam sa paghatag og patriyarkal nga mga panalangin,” miingon si Elder Gerrit W. Gong sa Korum sa Napulog Duha ka Apostoles. “Samtang ang patriyarka mopandong sa iyang mga kamot sa inyong ulo, siya mobati ug mopadayag sa gugma sa Dios alang kaninyo. Iyang isulti ang inyong gigikanan sa balay ni Israel. Siya mosulti og mga panalangin gikan sa Ginoo.”1
Si Patriyarka Clayne A. Steed sa Alberta, Canada, mipaambit: “Sa makadaghang higayon, ako nahimong mapainubsanon sa katalagsaon sa mga panalangin nga gihatag—ang mga pulong, hugpong sa mga pulong, ug mga kapahayag. Pinaagi sa pag-aghat sa Espiritu Santo, kini mahimong mga impresyon, mga hunahuna, ug mga pulong nga masulti pinaagi nako isip usa ka tigpataliwala aron ang Langitnong Amahan makapanalangin sa Iyang mga anak. Kutob ra ko pagpasalamat sa kamahinungdanon sa unsay nasulti tungod kay kini dili akong panalangin, kini panalangin sa Dios” ngadto sa Iyang mga anak.
“Sama nga adunay daghang butang nga naghimo kanato nga managlahi sa atong pagkaindibidwal ug sa atong mga kasinatian, ang atong patriyarkal nga panalangin personal usab,” miingon si Emile E. Bailly sa Loiret, France. “Ang matag usa sa mga anak sa atong Langitnong Amahan mahimong masayod, pinaagi sa gahom sa pagpadayag, nga kini nga panalangin naggikan sa Dios nga personal nga alang kaniya.”
“Ang inyong patriyarkal nga panalangin inyoha ug para ra gayod kaninyo,” miingon si Presidente Thomas S. Monson (1927–2018). “Kini mahimong mubo o taas, yano o makapamalandong. Ang gitas-on ug ang pinulongan dili maoy importante sa usa ka patriyarkal nga panalangin. “Ang Espiritu mao ang mopahayag sa tinuod nga kahulogan.”2
Atong Tahas diha sa Gisaad nga mga Panalangin
Si Elder David A. Bednar sa Korum sa Napulog Duha ka Apostoles mipahinumdom kanato nga “bisag asa niining duha pinaagi sa orihinal nga kaliwat o pagsagop,” kita “may katungod nga [mga] manununod sa mga gisaad sa Dios ngadto ni Abraham. Kita mga binhi ni Abraham. Usa sa mahinungdanong mga rason nga midawat kita sa patriyarkal nga panalangin [patriarchal blessing] mao nga matabangan kitang madugangan ang pagsabot kon kinsa kita isip mga kaliwat ni Abraham ug makamatngon sa atong responsibilidad.”3 Ang atong patriyarkal nga mga panalangin makatabang kanato nga makaila sa buhat ug sa mga panalangin nga giandam sa Langitnong Amahan alang kanato pinaagi sa atong pagkamatarong.
“Ang usa ka patriyarkal nga panalangin makatabang kanato nga molambo diha sa hugot nga pagtuo ug pagpamatuod, mobuntog sa mga pagsulay, ug mahimong malipayon,” miingon si Brother Protopopov. “Samtang tun-an nato ang panalangin, dugang pa ang ipadayag kanato pinaagi sa inspirasyon, sa atong tinguha nga mahimong matarong, ug sa atong pagpaningkamot nga mosunod sa mga lagda ug mga pagtulun-an sa buhi nga mga propeta. Kon makanunayon kitang magtuon sa atong panalangin, motabang kini kanato nga mas maduol kang Jesukristo ug makakita ug makapasalamat sa pagkamatarong dinhi sa atong yutan-on nga mga kasinatian.”
“Ang kabubut-on usa ka diosnon nga gasa,” miingon si Brother Steed. “Kon malaamon natong gamiton kana nga gasa pinaagi sa paghimo og matarong nga mga pagpili, kana nga usa ka posibilidad mahimong reyalidad sa makadaghang higayon samtang indibidwal kitang panalanginan sa Ginoo. Ang Ginoo dili mopugos sa mga panalangin diha sa Iyang mga anak. Kinahanglan nga molihok kita diha sa pagkamatarong ug pagkamasulundon aron makaangkon sa gisaad nga mga panalangin.”
Sama sa gitudlo ni Presidente Russell M. Nelson, “Ang inyong patriyarkal nga panalangin … motabang kaninyo nga matinuod ang inyong potensiyal sa umaabot. Sa literal nga paagi, makapangangkon kamo sa Ginoo alang sa katumanan niana nga mga panalangin pinaagi sa inyong pagkamatinud-anon.”4
Usa ka Mahangtorong Panglantaw
“Nanghinaot ako nga mas daghan pang tawo ang makasabot nga ang inyong patriyarkal nga panalangin dili lamang para niini nga kinabuhi sa yuta apan alang sa kahangtoran usab,” miingon si Keith L. Stapleton sa Georgia, USA. “Hinumdomi nga ang Langitnong Amahan nakaila kanato sukad gayod sa sinugdanan. Kita Iyang mga anak. Nasayod Siya sa tanang butang mahitungod kanato gikan niana nga panahon hangtod niini nga kinabuhi sa yuta ug hangtod ngadto sa kahangtoran. Busa, ang atong patriyarkal nga panalangin mahimong magamit ngadto sa bisan unsang bahin sa atong kinabuhi.”
“Usahay mabalaka ang usa ka tawo tungod kay ang usa ka saad nga gihimo diha sa patriyarkal nga panalangin wala pa matuman,” mitudlo si Presidente Boyd K. Packer (1924–2015), kanhi Presidente sa Korum sa Napulog Duha ka Apostoles. “Sama pananglit, ang usa ka panalangin mahimong moingon nga maminyo ang usa ka miyembro, apan wala sila makakita og kauban. Kana wala nagpasabot nga ang panalangin dili matuman. Maayo nga mahibalo nga ang mga butang mahitabo sumala sa tukmang panahon sa Ginoo, dili kay sumala kanunay sa atong panahon. Ang mga butang nga adunay mahangtoron nga kinaiya walay mga utlanan. Gikan sa kinabuhi sa wala pa dinhi sa yuta hangtod sa atong kinabuhi latas sa mga tabil sa kamatayon, ang atong kinabuhi usa ka mahangtoron nga kinabuhi.”5
Si Presidente James E. Faust (1920–2007), kanhi Ikaduhang Magtatambag sa Unang Kapangulohan, susamang mipaambit nga “ang usa ka patriyarkal nga panalangin usa ka sagrado nga sumbanan sa tambag, mga saad, ug impormasyon gikan sa Ginoo. Apan, ang usa ka tawo kinahanglang dili magdahom nga ang panalangin modetalye sa tanang mahitabo kaniya, o mahimong tubag sa tanang pangutana. Ang dili paglakip sa panalangin sa usa ka mahinungdanon nga panghitabo sa kinabuhi sama sa usa ka misyon o kaminyoon diha sa panalangin wala magpasabot nga kini dili mahitabo. Ang akong kaugalingong panalangin mubo ug limitado sa tingali tulo sa upat ka bahin sa usa ka pahina sa usa ka habig, apan hingpit nga paigo kini alang kanako.” Si Presidente Faust miingon usab nga ang “patriyarkal nga mga panalangin kinahanglang mapainubsanon ug mainampoon ug makanunayon nga basahon.”6
“Ang atong espirituhanon nga pagkahamtong kanunay nga mausab alang sa kaayohan sumala sa atong mga paningkamot,” miingon si Brother Bailly. “Mao kana nganong maayo nga basahon og balik ang atong patriyarkal nga panalangin matag karon ug unya, tungod kay bag-o nga mga impresyon ug mga pagbati ug dugang nga pagsabot ang mahimong ihatag kanato alang sa atong kaayohan. Dili gayod mohunong ang Langitnong Amahan sa paghinaot alang sa matag usa kanato sa tanang maayo nga kita makahimo sa pagdawat. Kining tanan nga mga butang moabot sa tukma nga panahon, kon kita andam na alang niini, dinhi niini nga kinabuhi o sa sunod.”