“Makatabang ba Ako Kanimo?”
Sa dihang nadungog nako ang tingog, nakahinumdom ko nga bag-ohay lang kong nakadawat sa gasa sa Espiritu Santo.
Paghulagway sa litrato gikan sa Getty Images
Mga duha ka bulan human sa akong bunyag, milabang ako sa usa ka dakong dalan diha sa usa ka tulay nga agianan sa mga tawo [walkway bridge] diha sa usa ka dapit nga ginganlan og Posto Dudu, diha sa siyudad sa Parnamirim sa Brazil. Nagpadulong ako ngadto sa hunonganan og bus sa pikas nga bahin.
Samtang milabang ako, naagian nako ang usa ka babaye nga nagkupot sa usa ka gunitanan [safety railing]. Nagduko siya ug nagkurog ang iyang lawas. Murag nahadlok ang mga tawo kaniya sa dihang naagian nila siya. Naghunahuna ako nga tingali siya adunay mga problema sa pangisip.
Human nga naagian nako siya, nakadungog ko og tingog nga sama ka klaro sa bisan unsang tingog sa tawo nga miingon, “Balik!” Wala koy nakit-an nga bisan kinsang tawo nga duol kanako ug naghunahuna ko nga basin sa ako ra kadtong hunahuna.
Milakaw ko og mas layo-layo sa dihang nakadungog ako sa tingog pag-usab: “Balik!” Naghunahuna ako nga mobalik apan mipadayon sa paglakaw, nagduhaduha nga tingali pasakitan ako sa babaye kon mobalik ako ngadto kaniya.
Sa dihang miabot ako sa pikas nga bahin sa agianan, nakadungog ako sa tingog sa ikatulong higayon: “Balik!” Mihunong ako, nga nakahinumdom nga bag-ohay lang akong nakadawat sa gasa sa Espiritu Santo ug sa panalangin nga makadawat sa giya gikan sa Espiritu. Nagdali-dali akong mibalik paingon ngadto sa babaye.
“Kanang, makatabang ba ako kanimo?” Nangutana ko.
“Oo,” miingon siya nga nagluha. “Gikinahanglan nakong makatabok sa pikas nga bahin aron makasakay sa akong bus, apan dili ako makahimo tungod kay mahadlok ako sa gihabogon. Dugay na akong nagbarog dinhi nga wala makahibalo kon unsay buhaton.”
“Tabangan ko ikaw,” gisultihan nako siya. “Kupti ang akong bukton, piyonga ang imong mga mata, ug magkauban kitang makaabot sa pikas nga bahin.”
Gikuptan niya pag-ayo ang akong bukton, gipiyong ang iyang mga mata, ug hinay nga milakaw uban kanako paingon ngadto sa pikas nga bahin. Taodtaod na siyang nag-ampo nga tabangan siya sa Dios nga makatabok. Dayon nagpasalamat siya kanako ug mihangyo sa Dios sa pagpanalangin kanako. Human siya nakasakay sa iyang bus, naghunahuna ako sulod sa pipila ka minuto mahitungod sa unsay bag-ohay lang nahitabo.
“Ang akong mga karnero mamati sa akong tingog. Nakaila ako kanila ug sila nagsunod kanako,” miingon ang Manluluwas (Juan 10:27). Nianang adlawa akong nakat-onan nga ang usa sa labing maayo nga mga paagi sa pagsunod Kaniya ug sa pagbati sa Iyang gugma mao ang pagpatalinghog sa tingog sa Espiritu kon kini motawag kanato sa pagtabang sa uban.