Pagkahimong usa ka Tawo sa Pakigsaad taliwala sa Katawhan sa Pakigsaad
Ni Elder Neil L. Andersen
Sa Korum sa Napulog Duhaka Apostoles
Kita mausab kon kita modawat ug motuman sa mga pakigsaad nga gitanyag sa Dios sa matag usa sa Iyang mga anak.
Sa pagkadungog sa gipahiuli nga ebanghelyo, si Charlotte ug si Morgan (sa pikas nga pahina) andam nga misunod sa Manluluwas. Ubos: Si Charlotte ug Laurent samtang nag-date (gisal-ot [inset]) ug sa ilang pagsilyo sa Bern Switzerland Temple niadtong 1995.
Background sa album ug mga kilid ug mga kanto sa litrato gikan sa Getty Images
Nahimamat nako si Regis Carlus sa unang higayon niadtong 1995 sa France. Dili siya miyembro sa Simbahan. Ang iyang anak nga babaye, si Charlotte, gisilyo sa Bern Switzerland Temple pagkasunod adlaw, ug misulat siya, nga naghangyo kon makahapit ba siya sa akong opisina aron sa paghimamat nako. Nakadungog siya nga pirme akong nangutana kabahin niya, ug naglibog siya kon ngano.
Ako nakaila ug nakadayeg sa iyang duha ka young adult nga mga anak, si Charlotte ug si Morgan, kinsa nabunyagan pipila ka tuig ang milabay niadtong 1991 samtang nagserbisyo ako isip presidente sa France Bordeaux Mission. Human nahimamat si Charlotte ug si Morgan, ang akong asawa, si Kathy, ug ako natingala sa ilang kamaayo.
Bag-ohay lang kong gisulatan ni Morgan mahitungod sa iyang bunyag ug paghimo og mga pakigsaad, nga nag-ingon: “Sa wala pa [nako nakaplagan ang ebanghelyo], usa ako ka 18 anyos nga wala mituo og dios, nga nagtinguha alang sa tinuod nga kalipay apan wala makahibalo kon asa kini pangitaon. Kusog kaayo nga mitandog sa akong kasingkasing ang Espiritu Santo nga dili nako gusto nga pakyason ang akong Langitnong Amahan ug ang Iyang Anak, si Jesukristo. Mao kana ang rason kon nganong gituman nako ang akong mga pakigsaad sa bunyag ug sa templo ug naningkamot nga mahimong usa ka tawo nga nagtahod niadto nga mga pakigsaad.”1
Alang ni Charlotte, ang iyang desisyon nga magpuyo og kinabuhi nga tukma sa balaod sa Dios nagsugod bisan sa wala pa siya mipasakop sa Simbahan. Daghang tuig ang milabay, ang iyang anak nga babaye nga si Amélie misulti kanako nga sa dihang tin-edyer pa si Charlotte, “mibati siya nga lahi sa iyang mga higala. Ang iyang mga higala miinom og makahubog nga ilimnon, nanigarilyo, ug wala nagtuman sa balaod sa kaputli, apan si Charlotte wala mibati og tinguha sa pagbuhat sa bisan unsa niini nga mga butang.”
Dili igsapayan sa ilang mga kahimtang, sa dihang miabot ang kahigayonan, mipili si Morgan ug si Charlotte sa paghimo og mga pakigsaad ngadto sa Ginoo ug nausab tungod niini.
Pagkahuman sa ilang bunyag, miadto si Charlotte sa Estados Unidos alang sa usa ka master’s degree sa lengguwahe ug literatura ug natugahan sa templo. Miserbisyo si Morgan og misyon sa England.
Nahibulong ako nga kining duha ka estudyante sa kolehiyo andam kaayo sa pagsunod sa Manluluwas. Ug naglaom ako nga makadungog nga ang ilang mga ginikanan mosunod sa ilang ehemplo.
Human matawag isip usa ka General Authority ug gitahasan nga moserbisyo sa Kapangulohan sa Area sa Europe/Mediterranean, nadawat nako ang hangyo ni Mr. Carlus nga makighimamat ug naglaom nga mosunod siya sa iyang mga anak ngadto sa gipahiuli nga ebanghelyo.
Ang Saad sa Ginoo sa Pagpundok sa Iyang Katawhan
Samtang nagpaabot ako nga mahimamat si Mr. Carlus, naghunahuna ako sa saad sa Ginoo nga “mopundok [sa Israel] gikan sa upat ka mga suok sa yuta” (3 Nephi 16:5) sa ulahing mga adlaw. Siya moestablisar og katawhan sa pakigsaad kinsa “moab[o]t sa kasay[o]ran sa kahingpitan sa akong ebanghelyo” (3 Nephi 16:12). Sa atong dispensasyon, miingon Siya, “ang Zion mosanay, … ug siya mahimo nga bandila ngadto sa mga katawhan, ug adunay moduol nganha kaniya gikan sa matag nas[o]d ubos sa langit” (Doktrina ug mga Pakigsaad 64:41–42).
Samtang ang tingog sa Ginoo modangat ngadto sa tanan nga mga katawhan (tan-awa sa Doktrina ug mga Pakigsaad 1:4), ang Ginoo miingon nga sa ulahing mga adlaw ang Iyang katawhan sa pakigsaad “diyutay ra” ikomparar sa tibuok populasyon sa kalibotan apan “nga ang simbahan sa Kordero, kinsa mao ang mga santos sa Dios, diha usab sa ibabaw sa tibuok yuta” (1 Nephi 14:12). Kini nga mga Santos, nabugkos pinaagi sa mga pakigsaad sa Dios (tan-awa sa Doktrina ug mga Pakigsaad 82:11), mobarog sa balaan nga mga dapit ug dili mabalhin (tan-awa sa Doktrina ug mga Pakigsaad 45:32) samtang nangandam sila sa Ikaduhang Pag-anhi sa Manluluwas (tan-awa sa Doktrina ug mga Pakigsaad 45:43–44).
Si Nephi mihulagway sa katawhan sa pakigsaad sa kataposang mga adlaw, “Ako, si Nephi, nakakita sa gah[o]m sa Kordero sa Dios, nga kini mikunsad diha sa mga Santos sa simbahan sa Kordero, ug diha sa mga katawhan sa pakigsaad sa Ginoo, kinsa nagkatibulaag diha sa ibabaw sa tibuok yuta; ug sila gisangkapan sa katar[o]ng ug uban sa gah[o]m sa Dios sa dako nga himaya.”(1 Nephi 14:14).
Subo lang, adunay mga tawo usab “kinsa dili maminaw sa tingog sa Ginoo, ni sa tingog sa iyang mga sulugoon” (Doktrina ug mga Pakigsaad 1:14).
Usa ka Pagdapit nga Gibalibaran
Sa dihang ang amahan ni Charlotte usa ka estudyante sa unibersidad niadtong mga 1960, ang mga misyonaryo mitudlo kaniya sa ebanghelyo. Nadani siya sa gipahiuli nga ebanghelyo ug mibati sa gahom sa Basahon ni Mormon. Apan, mihukom siya nga ang pag-apil sa usa ka gamay nga simbahan nga nakabase sa Amerika dili makatabang sa iyang propesyonal nga panarbaho.
Karon, samtang akong gitimbaya si Mr. Carlus ug nagkumustahay sa usag usa nianang adlawa sa 1995, nangutana siya nganong nagpakita ako og dako nga interes kaniya.
Human mag-ampo uban kaniya, gisultihan nako siya nga kining pipila ka minuto nga uban siya tingali mao lamang ang higayon niining kinabuhia nga ako siyang igkita. Gidayeg nako siya sa iyang talagsaon nga anak nga babaye ug anak nga lalaki ug gisultihan siya nga gitahod gayod nako siya sa pagpadako og duha ka matarong nga mga anak.
Dayon namulong ako kaniya bahin sa mga katuyoan sa Manluluwas sa pagpahiuli sa Iyang ebanghleyo sa yuta, sa tahas sa pagkapari, sa kamahinungdanon sa pamilya ug sa gahom sa pagsilyo, ug sa pagpundok sa katawhan sa pakigsaad sa tibuok kalibotan.
Gisultihan nako siya nga sa dihang ang mga misyonaryo mitudlo kaniya isip usa ka estudyante sa unibersidad, ang iyang matarong nga kapalaran mao ang pag-apil sa katawhan sa pakigsaad sa Simbahan. Mihangyo ako nga dili siya masilo samtang basahon namo ang duha ka bersikulo nga gibati nako nga magamit kaniya.
Magkauban namong gibasa diha sa Alma ang mahitungod niadtong “gitawag ug giandam gikan sa katuk[o]-ran sa kalib[o]tan … tungod sa ilang naghingapin nga hugot nga pagtuo ug maayo nga mga buhat; sa unang bahin ingon nga gitug[o]tan sa pagpili sa maayo ug sa da[o]tan; busa sila ingon nga nakapili sa maayo, ug mipakita og hilabihan ka dako nga hugot nga pagtuo, gitawag uban sa usa ka balaan nga katungdanan … samtang ang uban nagdumili sa pagdawat sa Espiritu sa Dios tungod sa katig-a sa ilang mga kasingkasing ug ka kulang sa panab[o]t, samtang, kon dili pa tungod niini [kay sila anaa sa sama nga kahimtang] sila unta makaangkon og dako nga kahigay[o]nan ingon sa ilang mga kaigsoonan” (Alma 13:3–4).
Matinahoron akong mipaambit kang Mr. Carlus nga nagtuo ako nga giandam siya nga mahimong kauban kanato, ug sa dihang mibalibad siya tungod sa mga kawilihan sa kalibotan, ang Ginoo mipadayon sa pagpanalangin kaniya og duha ka pinili nga mga espiritu nga mahimong mga anak niya. Gihangop nila ang dalan sa pakigsaad nga giandam alang sa iyang pamilya. Dayon gidapit nako siya sa pagdawat sa imbitasyon nga gihatag kaniya 30 ka tuig kaniadto.
Si Regis Carlus wala mipasakop sa Simbahan niining kinabuhia, apan ang iyang mga anak mipili sa dalan sa pakigsaad, ug sila nagpabilin sa dalan.
Usa ka Lig-on nga Pagpamatuod, usa ka Madasigon nga Hugotnga Pagtuo
Ibabaw hangtod sa ubos: Si Laurent ug Charlotte uban ang ilang unang duha ka anak, sila Amélie ug Valentine; diha sa usa ka pagbaklay [hike] sa Utah; uban sa ilang pamilya diha sa Rexburg, Idaho, niadtong Disyembre 2008. Pikas nga pahina: Ang pamilya Passe kauban ang amahan ni Charlotte, si Regis Carlus.
Ang sunod nga higayon nga ang akong asawa ug ako nakakita ni Charlotte ug sa iyang bana, si Laurent, diha na sa kataposang bahin sa 1998 didto sa Siyudad sa Salt Lake, Utah, diin mibalik si Charlotte ngadto sa University of Utah alang sa usa ka PhD sa comparative literature.
Anaa sa dalan sa pakigsaad si Charlotte ug si Laurent, apan among nahibaloan nga lisod ang ilang panalapi. Tapakan ni Charlotte ug ni Laurent ang mga liki sa ilang apartment aron dili makasulod ang bugnaw nga hangin. Gisul-oban nila ang ilang tulo ka anak og mainiton nga mga sinina tungod kay dili sila makabayad sa pagpainit sa ilang apartment. Ang ilang anak nga babaye nga si Valentine natawo sa balay tungod kay dili sila makabayad og insurance o sa ospital.
Mipadayon ang pinansiyal nga mga hagit human sila mibalik sa France. Naglisod si Charlotte ug Laurent sa pagkaplag og paigo nga panarbaho. Sa usa ka higayon, nangutana si Charlotte sa usa ka higala kon unsay angay nilang buhaton kon wala silay igong kwarta sa pagpakaon sa mga bata ug sa pagbayad og ikapulo. Mitambag ang iyang higala, “Bayari og una ang inyong ikapulo, ug kon magkinahanglan kamo og pagkaon, pakigkita sa bishop.”
Miatubang usab sila og ubang mga hagit. Ang inahan ni Charlotte misupak sa iyang bunyag, sa iyang kasal, ug sa iyang espirituhanon nga mga pagpili human siya miapil sa Simbahan. Kini nga pagsupak mipadayon, apan misalig si Charlotte sa Ginoo, miamuma sa iyang pagpamatuod, ug mituman sa iyang mga pakigsaad.
Niadtong 2008, gidapit si Charlotte sa interbiyo alang sa usa ka posisyon sa Brigham Young University–Idaho. Diha sa Rexburg Idaho Temple, nabati niya ang pag-aghat sa Ginoo sa pagdala sa iyang pamilya ngadto sa Estados Unidos.
Ang desisyon sa pagbiya sa France lisod kaayo. Mahagiton usab ang pagpahiuyon sa usa ka bag-o nga kultura sa Rexburg. Samtang kadaghanan sa mga tawo miabi-abi ug mitabang sa pamilya Passe, usahay nabati ni Charlotte nga ang uban wala nakasabot kon nganong nagtrabaho siya sa unibersidad kay sa magpabilin sa balay uban sa iyang mga anak.
Sa dihang ang ilang anak nga babaye nga si Amélie nagduhaduha sa pagtambong sa Simbahan, si Charlotte misulti kaniya, “Amélie, mosimba ko aron moambit sa sakramento ug mohinumdom sa akong mga pakigsaad. Kadtong [kinsa wala makasabot sa atong kahimtang] wala nakaapekto sa akong pagpamatuod.”
Gitudloan ni Charlotte ang iyang mga anak sa importante nga kalainan tali sa Simbahan (nga adunay dako nga S) ug sa simbahan (nga adunay gamay nga s). Miingon siya, “Ang Simbahan mao ang institusyon sa Ginoo uban sa Iyang mga propeta ug apostoles. Dili gayod kini mopakyas kanato. Ang simbahan mao ang mga miyembero, ug walay usa kanato nga hingpit.”
Ang iyang pamilya mahimong mopili unta sa paghunong og tambong tungod niini nga mga hagit, apan nasayod si Charlotte nga ang pagkahimong kabahin sa katawhan sa pakigsaad nagpasabot nga mahimong tawo sa pakigsaad—usa ka tawo nga matinuoron ngadto sa mga pakigsaad nga iyang gihimo ngadto sa Ginoo.
Pagpadayon sa Unahan diha sa Dalan sa Pakigsaad
Samtang nagbuhat sa iyang labing maayo nga mahimong full-time nga inahan, mitabang si Charlotte sa homework ug sa pag-eskwela nga diha sa panimalay [homeschooling] samtang miuswag si Laurent sa iyang kahanas sa Iningles. Sa usa ka sulat sa journal, siya misulat, “Daghan ra kaayo og buluhaton, ug ang pagpaningkamot sa pag-atiman sa akong panimalay ug sa akong pamilya sa samang higayon nakapahimo niini nga dako nga palas-anon.”
Apan mipadayon siya sa unahan, nga nagsulat nga ang Espiritu misulti kaniya sa iyang mga pag-ampo: “Kinahanglan kang mopadayon og trabaho. Ang gidaghanon sa buluhaton nga kinahanglan himoon dili mohunong dihadiha dayon. Pahimusli ang maayo nga kinitaan nga imong gidawat aron sa pagpangandam sa imong kaugalingon ug sa imong panimalay … alang sa unsay umaabot.”
Niadtong 2016, nahibaloan ni Charlotte nga siya adunay kanser sa tutoy. Uban sa pagtambal, nawala ang iyang kanser apan mibalik niadtong 2019. Mipadayon siya sa pagserbisyo ug sa paglig-on sa uban hangtod mipanaw siya niadtong Abril 2021, sa edad nga 50.
Mipasakop si Charlotte sa katawhan sa pakigsaad sa edad nga 20 sa Montpellier, France. Ug samtang paspas siyang moingon nga layo ra siya sa pagkahingpit, gimahal niya ang iyang mga pakigsaad ug nagpabilin sa dalan sa pakigsaad sulod sa nahibilin nga 30 ka tuig sa iyang kinabuhi.
Atol sa iyang panglimbasog sa kanser, misulat si Charlotte sa iyang journal: “Mapasalamaton kaayo ko, mapasalamaton kaayo alang sa Espiritu Santo ug sa abilidad … nga makadawat og personal nga pagpadayag. Wala ko kahibalo kon unsay akong buhaton sa akong kinabuhi kon wala kini. Mahisalaag ko.”
Sa dihang nabasa nako ang iyang mga pulong, nakahunahuna ako sa tambag ni Presidente Russell M. Nelson ngari kanatong tanan nga anaa sa dalan sa pakigsaad: “Sa umaab[o]t nga mga adlaw, dili na posible ang espirituhanong pagsugakod kon wala ang giya, direks[i]yon, ug makahupay nga impluwens[i]ya sa Espiritu Santo.”2
Si Connie Ruesch Cosman usa ka kanhi sister nga misyonaryo sa France sa pagsulod ni Charlotte sa dalan sa pakigsaad. Nagpabilin sila nga mga higala, ug miabot si Connie gikan sa Arizona aron sa pagtabang og atiman ni Charlotte sa iyang kataposang duha ka semana sa mortalidad. Misulat si Sister Cosman: “Wala gayod magduhaduha si Charlotte ug mobuhat gayod sa bisan unsa nga gihangyo sa Ginoo kaniya. Nagtinguha siya sa iyang kaugalingon nga mga tubag ug nakadawat niini. Nagpadayon siya nga usa ka talagsaon nga ehemplo alang kanako ug sa uban.”
Pagkasunod adlaw human sa pagpanaw ni Charlotte, ang iyang igsoon nga lalaki, nga si Morgan, misulat kanako, “Gimingaw gayod kaayo ko kaniya; suod kaayo kami.” Namulong dayon siya bahin sa usa ka espirituhanon nga kasinatian nga miabot kaniya sa unang gabii human sa iyang [Charlotte] pagpanaw.
“[Nasayod ako] nga mas malipayon siya kay sa kaniadto,” miingon siya, nga nagdugang nga ang iyang espirituhanon nga kasinatian “kusganong mikumpirmar sa unsay akong nahibaloan na, ug kini mialim sa akong masulub-on nga kasingkasing.”
Mga Anak sa Pakigsaad
Kon kita mopili nga hingpit nga mohangop sa mga pakigsaad nga gitanyag sa Dios diha sa dalan sa pakigsaad, mausab ang atong kinabuhi. Si Alma mipasabot sa atong pagka “[natawo … sa Dios sa] espirituhanon nga paagi ” (Alma 5:14). Ang Manluluwas mitawag niini nga kausaban nga “matawo pag-usab” (Juan 3:3). Ug Siya miingon nga kita mahimong “mga anak sa pakigsaad” (3 Nephi 20:26). Kini mao ang sama nga pakigsaad nga Iyang gihimo kang Amahang Abraham: “Tumanon ko ang akong saad kanimo ug sa umaabot mong mga kaliwat ingon nga walay kataposang kasabotan. Mahimo akong imong Dios ug sa imong mga kaliwat” (Genesis 17:7).
Isip mga anak sa pakigsaad, makita nato ang atong kinabuhi pinaagi sa panglantaw sa plano sa atong Langitnong Amahan. Maningkamot kita nga mahimong masulundon ug mopalambo sa atong hugot nga pagtuo kang Jesukristo. Makanunayon kitang mag-ampo. Nahibalo kita sa atong kahuyang, apan kita adunay paglaom. Maninguha kita nga ipatigbabaw ang Dios labaw sa tanan samtang atubangon nato ang atong mga hagit, ug magpadayon kita nga maghinulsol ug dili gayod moundang sa atong mga paningkamot nga mahimong mas sama sa Manluluwas.
Isip sulugoon sa Ginoo, ako mosaad nga ang Iyang grasya ug kamaayo motubos kanato samtang atong ipabilin ang atong hugot nga pagtuo diha Kaniya ug maningkamot sa pagbuhat sa atong labing maayo sa pagtuman sa atong mga pakigsaad Kaniya.