Digital Lamang: Mga Young Adult
Sa Unsang Paagi ang BYU-Pathway Mitabang Niining mga Young Adult sa Pagpa-usbaw sa Ilang Hugot nga Pagtuo
Ang edukasyon mao ang solusyon alang niining tulo ka estudyante aron ang kangitngit mahimong kahayag.
Katahap. Kangitngit. Diborsyo. Depresyon. Tulo ka young adults gikan sa tibuok kalibotan nag-atubang niining malisod nga mga kahimtang sa dihang sila mienrol sa BYU–Pathway Worldwide. Ug pinaagi sa programa sa online nga paglampos og kurso, wala lang sila nakapadayon sa ilang edukasyon, nakakita usab sila og mas dakong kalinaw ug nakadiskobre—o nakadiskobre pag-usab—sa kahayag sa ebanghelyo.
Ang Ginoo nagdapit kanato nga “pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118;). Basaha kon sa unsang paagi kining mga young adult mibuhat lang gayod niana ug sa unsang paagi ang pagtinguha og pagtulun-an ug mas taas nga edukasyon midala kanila ngadto sa mas taas nga gahom.
Napuno sa Kahayag
Dwight (taliwala) uban sa iyang mama ug higala nga si Jeff sa iyang adlaw sa bunyag.
Litrato sa maayong kabubut-on ni Dwight G.
Nagdako ko nga nagkat-on og mga Kristiyanong mithi. Ako nasayod nga ako gilalang sa Dios ug nga Siya mopanalipod kanako kon ako motuman sa Iyang mga sugo. Apan sa kataposan nahilayo ako gikan sa akong pagtuo ug napuno sa pagduhaduha. Niadtong 2020, ang akong higala si Jeff, kinsa usa ka miyembro sa Simbahan, mipasabot kanako sa BYU–Pathway Worldwide, kon sa unsang paagi kini makatabang sa mga estudyante nga makakat-on og English ug makahuman og online nga bachelor’s degree.
Gusto kong makakat-on pa og dugang!
Sa akong nasod, kadaghanan sa batan-on dili makahimo sa paglangyaw alang sa mas maayo nga edukasyon. Ang BYU–Pathway mao ang solusyon nga akong gikinahanglan nga wala nako mahibaloi. Ang akong kahadlok sa umaabot napulihan og usa ka bag-ong paglaom nga nagdilaab sa akong kahiladman, ug ako nasayod nga ang Dios wala mibiya kanako.
Akong nakat-onan ang daghang bililhong mga pamatasan ug mga kahanas diha sa akong mga klase, sama sa unsaon sa pagdumala sa akong panalapi, pagpalambo sa akong English, ug mamahimong empleyado nga aktibo sa buhat. Dali nakong nadiskobre nga ang BYU–Pathway dili lang usa ka panaw nga pang-edukasyon apan usa sab ka espirituwal nga panaw. Sa akong mga klase, nahibaloan usab nako ang mahitungod ni Nephi ug sa mga propeta sa bag-ong panahon ug nahibaloan nga ang ilang mga pagtulun-an tinuod. Ug akong naamgohan nga, kon ako gusto nga hingpit nga makasabot unsa ang akong nakat-onan, ako kinahanglan magkat-on pa og dugang mahitungod sa Simbahan.
Akong gipaambit ang akong mga pagbati ngadto ni Jeff, ug siya daling mikontak sa mga full-time nga mga misyonaryo. Ang matag adlaw sa pagtuon uban sa mga misyonaryo mipuno kanako og kahayag nga naglamdag sa akong panglantaw sa kalibotan. Sama ako sa usa ka batang nahisalaag nga sa kataposan mauli na sa panimalay. Akong nadiskobrihan nga ako anak sa Dios, Ako adunay katuyoan, ug adunay lain nga basahon (ang Basahon ni Mormon) sinulat sa karaan nga mga tawo kinsa mirekord sa mga milagro nga gihatag sa Langitnong Amahan ug ni Jesukristo alang kanila.
Sa kataposan ako nabunyagan ug nakompirmahan nga usa ka miyembro sa Simbahan ni Jesukristo. Ug ang akong hugot nga pagtuo ni Jesukristo miabot sa kahabogon nga wala nako damha nga mahimo.
Dwight G., Maritime, Togo
Balik sa Maanindot nga Dalan sa Ginoo
Litrato sa maayong kabubut-on ni Stefanie D.
Kanunay ako nga aktibo nga miyembro sa Simbahan, apan human sa akong diborsiyo, nawad-an ko og pagpokus sa plano sa Langitnong Amahan bahin sa kaluwasan ug sa akong hugot nga pagtuo. Nakahimamat ko og usa ka tawo, ug kami misugod sa pag-ipon. Ang akong tibuok kinabuhi nausab. Mibati ko nga ako anaa sa hingpit nga kangitngit, ug mihunong ko sa pagtambong sa simbahan tungod kay nabati nako nga wala ako nahisakop.
Apan mipadayon ko sa pagtambong sa institute. Ug atol niining higayona, usa ka pangserbisyo nga misyonaryo nga akong nahimamat diha sa institute midapit kanako sa pag-apil sa BYU-Pathway. Nagpanuko ako, apan misaad siya nga makapausab kini sa akong kinabuhi. Mao nga mihukom ko nga sulayan kini og usa lang ka semester. Hinoon, wala madugay nanganak ako sa akong unang anak ug wala ko masayod kon unsaon sa pagdala ang mahimong usa ka bag-ong inahan nga mopadayon sa edukasyon, busa miundang ko.
Sa kadugayan, nahinumdom ko kon unsa ka nindot ang akong gibati atol nianang usa ka semester. Akong gibati nga nasuod ngadto sa Langitnong Amahan ug ganahan ko nga mobalik kana nga pagbati. Busa paglabay sa usa ka tuig, misugod na usab ko sa BYU-Pathway, ug daghang panalangin ang miabot sa akong kinabuhi pagkahuman.
Gisugdan nako og usa ka matahom nga proseso sa paghinulsol, giminyoan ang tawo nga akong gikapuyo, ug gani nakadawat sa akong rekomend sa templo. Sa kadugayan, natawag ko nga mahimong presidente sa Relief Society. Karon ako nagserbisyo isip usa ka magtutudlo sa institute ug ganahan ko niini! Ang akong bana nagkat-on na usab og dugang mahitungod sa ebanghelyo ni Jesukristo.
Kami makadala sa tanang kahibalo nga among nakat-onan ngadto sa sunod nga kinabuhi (tan-awa sa Doktrina ug mga Pakigsaad 130:18–19). Ang BYU–Pathway dili lang usa ka edukasyon—nakapabalik kini kanako ngadto sa maanindot nga dalan sa Ginoo.
Stefanie D., Wanica, Suriname
Gikan sa Kangitngit ngadto sa Pagkamasaligon
Litrato sa maayong kabubut-on ni Dance W.
Sa high school, ako nanglimbasog tungod sa daghang kabalaka ug depresyon, busa miundang ko. Sulod sa mga lima ka tuig, akong gipalayo ang akong kaugalingon gikan sa Simbahan ug gikan sa akong pamilya. Nianang mga panahona, misugod usab ako sa paggamit og drugas ug ilimnong makahubog aron mahulipan ang kahaw-ang nga akong gibati.
Malisod kadto nga panahon.
Sa usa ka punto, ang akong mama nakahibalo mahitungod sa BYU–Pathway Worldwide ug misugod sa pag-awhag kanako sa pag-apil. Ang edukasyon mao ang usa ka butang nga kanunay nakong gipangandoy, apan ang akong kanhi mga kasinatian sa eskwelahan miguba sa akong pagsalig sa kaugalingon.
Akong gibaliwala ang gitanyag sa akong mama sa sinugdanan, apan nianang semanaha, akong gipangita ang BYU–Pathway sa internet. Ingon kini og usa ka haom para nako. Bisan pa man sa akong mga pagduhaduha, mihukom ko nga mopadayon niini. Sa samang higayon, gisugdan nako pagpahiuyon pag-usab ang akong kinabuhi ngadto sa ebanghelyo.
Sa dihang misugod ko sa akong mga kurso, mibati ko og kakiwaw ug wala nahimutang. Wala ko nahimong aktibo sa Simbahan sa daghang katuigan, apan ang mga tawo sa akong klase naggikan sa tanang matang sa kinabuhi ug mipakita nako nga dili ko kinahanglan nga hingpit aron maanaa didto.
Sa wala madugay misugod ko sa pagbati og dugang sa Espiritu ug ganahan sa mga butang nga padulong sa husto nga direksiyon. Sa una, mibati ko nga pakyas ko sa tanang butang sa kinabuhi. Apan sa unang higayon sa taas nga panahon, mibati ko nga nagmauswagon sa akademiya ug sa espirituhanon nga paagi.
Ang pagbati sa Espiritu pinaagi sa akong edukasyon nakatabang kanako nga mahiuyon pag-usab sa akong pagpamatuod ug midala og katin-awan sa akong hunahuna. Tungod kay ako nasayod nga ang Langitnong Amahan ug si Jesukristo nag-uban kanako, nakabaton ako og kamasaligon sa pagbuhat og mga butang nga wala ko damha sa una nga akong mabuhat sa dihang ako napalibotan sa kalisdanan. Paghuman sa tanang butang nga akong nalahutay, wala gayod nako nabati nga ang edukasyon ako rang makab-ot—Ang BYU–Pathway miusab niana alang kanako ug mitabang kanako nga makaangkon pag-usab og hugot nga pagtuo sa akong kaugalingon ug ni Jesukristo.
Dane W., Utah, USA
Si Presidente Russell M. Nelson mitambag:
“Kab-ota ang inyong edukasyon isip usa ka prayoridad sa kinatas-an nga han-ay. Angkona ang tanang edukasyon kutob sa inyong mahimo. Para kanato isip mga Santos sa Ulahing mga adlaw, ang edukasyon usa ka relihiyosong responsibilidad. …
“Ang inyong personal nga salab[o]tan—ang inyong personal nga pagkatawo—mahangtoron ug balaan (tan-awa sa Doktrina ug mga Pakigsaad 93:29).”1
Agig dugang sa BYU–Pathway Worldwide, adunay daghang oportunidad alang sa edukasyon sulod sa Church Educational System o diha sa inyong lokal nga dapit. Bisan hain nga dalan sa edukasyon ang inyong pilion, ang pagtinguha og mga oportunidad sa pagpalig-on sa inyong hunahuna ug hugot nga pagtuo mopanalangin kaninyo ug sa inyong pamilya, dili lang niining kinabuhia apan sa mga kahangtoran!