2022
Pagtudlo mahitungod sa mga Saad sa Dios
Pebrero 2022

Alang sa mga Ginikanan

Pagtudlo mahitungod sa mga Saad sa Dios

dad with son sitting on his shoulders

Minahal nga mga Ginikanan,

Ang matag usa kanato mahimong mas maduol sa Dios kon kita mohimo og mga pakigsaad Kaniya. Ang isyu niini nga bulan makatabang kaninyo sa pagtudlo sa inyong mga anak mahitungod sa mga pakigsaad nga gihimo sa Dios ngadto sa Iyang katawhan sa karaang mga panahon ingon man sa mga pakigsaad nga atong gihimo ngadto Kaniya karon. Ang mga ideya sa ubos makatabang kaninyo nga magkaanaa og mga panaghisgotan uban sa inyong mga anak mahitungod sa mga pakigsaad ug sa pagpabiling lig-on latas sa malisod nga mga panahon.

Mga Panaghisgotan sa Ebanghelyo

Pagkahimong Katawhan sa Pakigsaad

Aron sa pagtudlo sa mga ideya sa “Mga Sukaranan sa Ebanghelyo” sa pahina 10, mahimo kamong magdrowing og agianan padulong sa langit. Pagbutang og mga timailhan subay sa agianan nga nagrepresentar sa gikinahanglan nga mga ordinansa, sama sa bunyag, ug sa may kalabotan nga mga pakigsaad nga atong himoon. Unsa ang mahimo sa inyong mga anak aron sa pagpangandam alang sa ilang sunod nga ordinansa? Sa unsang paagi ang pagtuman sa mga pakigsaad nga atong nahimo na makaandam kanato sa paghimo og dugang nga mga pakigsaad? Sa unsang paagi ang atong mga saad sa Dios makatabang kanato nga magpabiling duol Kaniya?

Makapaambit usab kamo og mga baroganan gikan sa artikulo ni Elder Neil L. Andersen sa pahina 6. Unsa nga mga panalangin ug mga responsibilidad ang moabot gikan sa pagkahimong kabahin sa katawhan sa pakigsaad sa Dios?

Pag-atubang sa mga Hagit uban sa Hugot nga Pagtuo

Basaha ang pipila ka kinutlo gikan sa artikulo bahin sa pagpalambo og kalig-on (pahina 16). Dapita ang mga sakop sa pamilya sa pagpaambit og usa ka panahon nga napanalanginan sila tungod sa paglahutay sa usa ka malisod nga butang. Dayon hisgoti kini nga mga pangutana: Giunsa sa Dios sa pagtabang kanimo latas nianang malisod nga panahon? Unsa ang atong makat-onan gikan niini nga artikulo nga makatabang kanato sa pagpadayon kon kita maglisod, makahimo og mga sayop, o mapakyas? Unsa pa ang atong mabuhat isip usa ka pamilya aron makapangandam alang sa mga hagit nga mahimong moabot?

Mahimo usab ninyong basahon ang artikulo ni Elder Ojediran sa pahina 42 aron makakat-on kon unsa ang gipasabot nga magbaton og “masulub-on nga kasingkasing” (3 Nephi 9:20). Sa unsang paagi ang pagkamapainubsanon makatabang kanato sa pagbuntog sa atong mga hagit?

Suporta sa Dali, Sunod Kanako

Tan-awa sa pahina 46–48 aron makakat-on og dugang mahitungod sa arka ni Noe ug ubang materyal aron sa pagsuporta sa inyong sinemana nga pagtuon sa Dali, Sunod Kanako.

Dali, Sunod Kanako Kalingawan sa Pamilya

Ang Ikapulo Makapahimo Kanatong Mapasalamaton

Sa Genesis 14:20, atong mabasa nga si Abraham mibayad og ikapulo. Si Elder David A. Bednar mitudlo nga ang espirituhanon nga mga panalangin “ibu[bo] pinaagi sa mga tamboanan sa langit ug madawat sa atong kinabuhi kon kita mosunod sa balaod sa ikapulo” (“Ang mga Tamboanan sa Langit,” Liahona, Nob. 2013, 18).

  1. Isip usa ka pamilya, hisgoti ang mga panalangin nga inyong nakita gumikan sa pagsunod sa balaod sa ikapulo.

  2. Tahasi ang usa ka tawo nga isulat ang mga panalangin.

  3. Magkauban, rebyoha pag-usab ang lista ug hisgoti ang pipila sa mga paagi nga kini nga mga panalangin nakapahimong mas maayo sa inyong kinabuhi.

Si Elder Bednar mitudlo pag-usab nga “ang dili dayon makita apan importante nga panalangin nga atong nadawat [kon motuman kita sa balaod sa ikapulo] mao ang espirituhanong gasa sa pasalamat sa mga butang nga anaa nato. … Ang mapasalamatong tawo kontento kaayo” (“Ang mga Tamboanan sa Langit,” 18). Sa unsang paagi nga ang inyong pamilya nakakita sa pagpasalamat isip usa ka panalangin sa pagbayad sa ikapulo?

Mga Hayop ni Noe—20 ka Pangutana

Genesis 6–11; Moises 8

Ang Ginoo mihatag ni Noe og piho nga mga instruksiyon aron sa pag-andam kaniya ug sa iyang pamilya alang sa umaabot nga lunop. “Ug gituman ni Noe ang tanan nga gisugo sa Ginoo kaniya.” (Genesis 7:5). Bisan og walay ebidensiya sa ulan, si Noe naminaw ug mipundok sa mga hayop ngadto sa arka.

  1. Isugilon og kadiyot ang istorya ni Noe ug sa arka (tan-awa sa Genesis 6-8). Hisgoti kon sa unsang paagi si Noe gisugo sa pagtabang sa mga hayop nga makasulod sa arka (tan-awa sa Genesis 6:20; 7:14).

  2. Nganli ang lain-laing matang sa mga hayop nga tingali gidala ni Noe ngadto sa arka.

  3. Dayon pagdula uban sa inyong pamilya gamit ang 20 ka pangutana. Tahasi ang usa ka tawo nga maghunahuna og usa ka hayop nga anaa sa arka. Ang nahibilin magpuli-puli sa pagpangutana og oo o dili nga mga pangutana aron sa pagsulay ug pagtagna sa hayop.

  4. Padayon sa pagpangutana hangtod usa ka tawo ang hustong makatagna sa hayop o hangtod napangutana na ang 20 ka pangutana.

  5. Sublia ang dula hangtod ang tanan aduna nay turno sa paghunahuna og usa ka hayop.

Panaghisgotan: Unsa ang pipila ka paagi nga si Noe milihok inubanan sa hugot nga pagtuo? Unsa ang pipila ka butang nga gipabuhat kanato sa Langitnong Amahan? Sa unsang paagi kita mapanalanginan isip mga pamilya pinaagi sa pagsunod sa mga pagtulun-an ni Jesukristo?