Mga Baroganan sa Pagpangalagad
Yano nga Pagserbisyo Mahimong Makahuloganon
Ayaw pagpanuko tungod kay gahunahuna ka nga ang imong halad gamay ra kaayo.
Gilitratohan ni Bradley Slade
Ang pamilya sa among anak nga babaye nagsagubang og seryoso nga hagit nga medikal, ug ang mga mabination nga mga silingan nagpuli-puli sa paghatag og panihapon. Sa unang gabii, usa ka init nga sinabaw nga chicken noodle miabot, inubanan sa init init pa nga chocolate chip nga mga cookie. Pagkasunod hapon, ang kahigalaan mihatod og paniudto—sinabaw nga chicken noodle ug mga chocolate chip nga mga cookie. Ug nianang gabhiona, oo, sinabaw nga chicken noodle ug mga chocolate chip nga mga cookie mao ang panihapon nga gipili gihatag sa laing maayong Samarianhon. Ug sa sunod nga gabii—imo na kining matag-an—laing sinabaw nga chicken noodle ug mga chocolate chip nga mga cookie ang miabot alang sa panihapon.
Dili lang kini usa ka kataw-anan nga istorya mahitungod sa sinabaw nga chicken noodle ug mga chocolate chip nga mga cookie. Usa kini sa istorya sa pag-amuma alang sa usa ka sister ug sa iyang pamilya nga nagkinahanglan. Uban sa matag kutsara nga sabaw ug ingkit sa chocolate chip nga cookie, ang among anak nga babaye ug ang iyang pamilya mibati nga gihigugma ug gisuportahan. Ang matag kaldero sa sabaw ug plato sa mga cookie gihimo gikan sa lain-laing resipe lahi ngadto sa matag sister. Dili ba kana ang paagi nga atong gibuhat sa atong pagserbisyo? Kita motabang gamit ang atong kaugalingong pagkalahi, uban sa atong kaugalingong pamaagi ug dinasig sa kaugalingon nga mga resipe. Kita dili mabalaka sa unsay atong buhaton; kita mobuhat lamang niini.
Rebecca L. Craven
Ikaduhang Magtatambag sa Kinatibuk-ang Kapangulohan sa Young Women
Ang Yano nga mga Buhat Makahuluganon
Isip usa ka katawhan sa pakigsaad, kita misaad sa pagserbisyo sa usag usa. Ang pagkaandam sa pagserbisyo sa yano nga mga paagi motugot sa Dios sa pagpanalangin sa uban pinaagi kanato—ug mopalangin kanato sa samang higayon. Ang usa ka buhat sa pagserbisyo nga yano lang dili minos ang kamakahuloganon.
Rebecca diha sa Tabay, ni Michael Deas
Si Rebecca sa Daang Tugon mao ang usa ka ehemplo sa yano, maamumahon nga pagserbisyo. Sa dihang ang mga biyahero miabot ngadto sa iyang panimalay ug nangayo og mainom gikan sa tabay, malipayon siya nga miserbisyo kanila—ug dayon mihimo og labaw pa pinaagi sa pagtanyag sa pagkawos sa tubig alang sa ilang mga kamelyo. Kini nga yanong pagserbisyo wala nagpasabot nga dili kadto lisod—ang mga kamelyo makainom og ginalon-galon, ug sanglit andam nga miserbisyo, mibalik-balik og hakot og dugang tubig hangtod ang 10 ka kamelyo nahuman sa pag-inom sa tubig nga makapabuhi. Si Rebecca wala nagpaabot og pagdayeg agig balos tungod sa iyang yano nga pagserbisyo, apan pinaagi sa pagpakita sa iyang kinaiya, siya gihangop ngadto sa pamilya ni Isaac ug mipanalangin sa mga henerasyon pinaagi sa iyang anak nga si Jacob, ug ang amahan sa balay ni Israel. (Tan-awa sa Genesis 24.)
Mga Baroganan nga Hunahunaon
Samtang maghunahuna sa imong mga oportunidad ug mga buluhaton sa pagpangalagad sa uban, hunahunaa kining mga baroganan nga gipakita diha sa mga istorya:
-
Ang yano nga pagserbisyo mahimong makahuloganon. Ayaw pagpaabot hangtod nga ikaw makabaton sa hingpit nga kahigayonan sa pagserbisyo. Buhata dayon ug buhata unsay imong mahimo kon imong makita ang usa ka panginahanglan.
-
Ayaw ikaulaw kon unsa man ang imong ikatanyag. Kon kitaandam sa pagbuhat unsa ang atong mahimo sa unsay anaa kanato, ang Dios makahimo og daghan gamit ang usa ka gamayng butang (tan-awa sa Marcos 6:34–44).
-
“Ang Ginoo ganahan og paningkamot, ug ang paningkamot magdala og mga ganti.”1 Sama sa istorya bahin ni Rebecca, ang Dios makagamit sa atong yano nga mga paningkamot sa pagserbisyo sa pagpanalangin kanato ug sa uban, usahay alang sa mga henerasyon nga umaabot.
Unsa ang Atong Mabuhat?
Kon kamo makakita og usa ka oportunidad sa pagserbisyo, ayaw paghulat tungod kay kamo naghunahuna pa kon kamo aduna bay bisan unsang ikatanyag. Ang Dios mopanalangin kaninyo ug ang sa uban tungod sa inyong kaandam sa pagserbisyo.