Digital Lamang
Pagbansay sa Pagkahingpit
Gikan sa usa ka 2021 nga pakigpulong sa Komperensiya sa Kababayen-an sa Brigham Young University.
Ang Manluluwas, kansang grasya naghimong posible sa mahangtorong pagkahingpit, naghatag kanato og mga oportunidad sa pagbansay sa pagkahingpit niini nga kinabuhi.
Sa miaging 30 kapin ka tuig ako nagbansay sa balaod. Nagtuo ko nga adunay rason nga gitawag nila kini isip ang pagbansay sa balaod.
Wala pa gayod ako nakahimo og hingpit nga pagrekord og panghimatuod sa gawas sa korte [deposition] ni nakapahigayon og hingpit nga pagsukit-sukit sa testigo sa pikas partido [cross-examination]—kanunay nga adunay laing pangutana o mas maayo nga akong ikapangutana.
Wala pa gayod ako nakasulat og hingpit nga katingbanan sa nag-unang mga hitabo sa kaso [brief], tungod kay sa paghandom, kanunay nga adunay punto nga ako unta nga mas mapasabot og klaro.
Ug wala gayod ako nakapresentar og hingpit nga argumento sa atubangan sa usa ka huwes o mga huwes. Hapit kanunay sa tunga-tunga sa gabii human sa argumento, makahunahuna ako og usa ka butang nga igmat gayod ug madanihon nga unta akong nasulti.
Apan nagtuo ko nga ang serbisyo nga akong gihatag ngadto sa akong mga kliyente dili lamang makatagbaw apan may bili usab. Ako nagbansay sa balaod nga adunay katuyoan sa pag-usab, paglambo, ug paghingpit. Ang akong mga paningkamot, bisan og dili hingpit, paigo na tungod kay ako nagbansay.
Ehemplo ni Sariah
Usa sa akong labing suod nga mga higala sa Basahon ni Mormon mao si Sariah. Kanunay akong malipay sa pagbasa mahitungod niya diha sa 1 Nephi. Nakita nako ang akong kaugalingon diha sa iyaha. Nakasabot gayod ako sa iyang mga reaksiyon. Si Sariah nagbansay og hugot nga pagtuo sa dihang mibiya siya sa Jerusalem ug sa iyang bulawan ug pilak ug walay lain nga gidala ngadto sa kamingawan gawas sa iyang pamilya ug sa pipila ka gikinahanglan nga mga butang. Dayon hinumdomi gikan sa kapitulo 3, si Lehi nagdamgo nga ang mga anak nga lalaki ni Lehi ug Sariah kinahanglang mobalik sa Jerusalem aron sa pagkuha sa mga palid nga tumbaga gikan kang Laban.
Ang sitwasyon migrabe alang kang Sariah, sa atong makat-onan human sa duha ka kapitulo diha sa 1 Nephi 5. Ang iyang mga anak nga lalaki taodtaod nang mibiya—wala gayod kita masayod kon unsa ka dugay, apan nasayod kita nga mibiyahe sila balik ngadto sa Jerusalem, miuli aron sa pagdala sa tanan nilang bililhon nga mga butang, ug migamit og pipila ka estratehiya aron sa pagkuha sa mga palid gikan sa nagmagahi nga Laban. Ug nabalaka si Sariah!
Nagtuo ko nga tingali mao gihapon ang akong reaksiyon sa kang Sariah. Nabalaka siya mahitungod sa iyang mga anak nga lalaki, nagsubo siya tungod kanila, mireklamo siya og gamay, ug sa usa ka punto aduna siyay gisulti kang Lehi nga tingali iyang gimahayan pagkahuman mahitungod sa iyang pagkahimong usa ka tawo nga may panan-awon.
Apan si Sariah nagbansay og hugot nga pagtuo. Naminaw siya sa makapahupay nga mga pulong nga gisulti ni Lehi kaniya. Siya nagbansay og pagpailob. Siya nagbansay sa paghulat sa Ginoo. Siya nagbansay sa pagsuporta sa iyang bana. Ug sa dihang mibalik ang iyang mga anak nga lalaki uban sa mga palid nga tumbaga, ang iyang kalipay hingpit! Ug dayon nasayod siya nga “nakatino” (1 Nephi 5:8) nga sila anaa sa usa ka misyon gikan sa Ginoo. Ang iyang nabansay nga hugot nga pagtuo milambo pag-ayo, sa pagkatinuod, nga andam siya nga mosakay sa usa ka barko nga gitukod sa iyang mga anak nga lalaki, kinsa dili mga tighimo og barko, aron molawig ngadto sa wala mailhi nga destinasyon, nga mao diay ang gisaad nga yuta.
Si Sariah nagbansay. Nagbansay siya og hugot nga pagtuo sa Ginoong Jesukristo ug pailob ug pagkamainantoson. Nagbansay siya sa pagkahingpit.
Mortal nga Pagkahingpit batok sa Mahangtoron nga Pagkahingpit
Mahimo kitang mahingpit sa piho nga mga buluhaton. Sama pananglit, mahimo kitang mahingpit sa pagbasa sa Basahon ni Mormon matag adlaw. Hingpit kitang makabayad sa atong ikapulo. O makatukar kita og usa ka piyesa sa musika sa hilabihang katukma, nga hustong matukar ang matag nota. Apan naghunahuna ako kon ang usa ka musikero kinsa nagpasundayag og musika nga walay nahimo nga sayop naghunahuna ba gihapon kon napadayag ba ang hustong kabug-os sa emosyon. Alang nako mao kini ang kalainan tali sa mortal nga pagkahingpit—hustong pagtukar sa matag nota—ug mahangtoron nga pagkahingpit—paghimo og langitnon nga awit. Kana nga langitnon nga awit matukar lamang kauban ug tungod sa Manluluwas.
Si Presidente Russell M. Nelson mitudlo kanato: “Ang pagkahingpit umaabot pa. Moabot kini sa hingpit human lamang sa Pagkabanhaw ug pinaagi lamang sa Ginoo. Kini nagpaabot sa tanan kinsa nahigugma kaniya ug nagsunod sa iyang mga sugo.”1
Sa kataposang pangamuyo ni Moroni kanato, miingon siya, “Duol ngadto kang Kristo, ug paghingpit diha kaniya, ug ilim[o]d ang inyong mga kaugalingon sa tanan nga dili diosnon; ug kon kamo molim[o]d sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gah[o]m, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo” (Moroni 10:32).
Ang Ehemplo sa mga Jaredite
Hinumdomi ang igsoong lalaki ni Jared ug iyang katawhan, kinsa gisugo sa paghimo og mga kasko [barge] sumala sa mga instruksiyon sa Ginoo? Ang mga kasko gagmay, gaan diha sa tubig, ug hugot sama sa usa ka tadyaw.
Ug diha sa usa ka buhat sa hilabihan ka dako nga hugot nga pagtuo, kadto nga mga Jaredite misakay diha sa mga kasko nga ilang gihimo ug “sa daghan nga mga higayon nalubong diha sa … dagat, tungod sa … mga bal[o]d nga mihasmag diha kanila. … Ug … ang hangin wala gay[o]d mohunong sa paghuyop … samtang sila diha sa mga tubig,” hangtod human sa 344 ka adlaw naabot sila sa gisaad nga yuta. (Tan-awa sa Ether 6:6, 8, 11, 12.)
Apan hinumdomi nga sa wala pa ang mga Jaredite misakay ngadto sa mga kasko paingon sa gisaad nga yuta, samtang mipanaw sila diha sa kamingawan, sila “mitukod og mga kasko, diin sila mitabok sa daghan nga mga tubig, ingon nga gimandoan sa kanunay pinaagi sa kamot sa Ginoo” (Ether 2:6). Sila nagbansay na sa paghimo og kasko ug nagbansay og hugot nga pagtuo sa Ginoo sa wala pa ang ilang 344 ka adlaw nga panaw. Siyempre, ang Ginoo mahimong mogiya unta kanila libot niadtong mga katubigan samtang nagpanaw sila sa kamingawan. Apan wala Niya buhata! Siya mitugot kanila sa pagbansay sa paghimo og kasko, ug, mas importante, Siya mihatag kanila og mga oportunidad sa pagbansay sa ilang hugot nga pagtuo diha Kaniya. Nagtuo ko nga ang ilang pagbansay miandam kanila alang nianang dugay kaayo nga panaw ngadto sa gisaad nga yuta.
Ang Manluluwas Mohimong Posible sa Pagkahingpit
Kita nagbansay og pagkahingpit aron mobalik ngadto sa atong langitnong panimalay. Ug ang Manluluwas, kansang grasya naghimong posible sa mahangtorong pagkahingpit, naghatag kanato og mga oportunidad sa pagbansay.
Ang pagkahingpit, mortal ug mahangtoron, mao ang atong tumong. Ang pagbansay makapahingpit uban sa Manluluwas. Siya ang mohimo sa tanang kalainan. Si Presidente Russell M. Nelson mitambag kanato: “Buhaton nato ang labing maayo natong mahimo ug maningkamot nga molambo sa matag adlaw. Kon motumaw ang atong mga kahuyang, makapadayon kita sa pagpaningkamot sa pagkorihir niini. Kita makahimo nga mas mapasayloon sa atong mga sayop ug niadtong atong mga gihigugma. Mahimo kita nga mahupay ug mapugnganon.”2
Padayon sa pagbansay! Ang atong minahal nga propeta mipahinumdom kanato, “Ang Ginoo ganahan og paningkamot, tungod kay ang paningkamot maghatag og mga ganti nga dili moab[o]t kon wala kini.”3
Mopamatuod ako nga ang Ginoo nahigugma kaninyo ug gusto nga kamo mopauli sa panimalay. Ang pagkahingpit umaabot pa diha Kaniya ug uban Kaniya.