Digital Lamang: Mga Hulagway sa Hugot nga Pagtuo
Ang Pagpangalagad Midala Kanako Balik
Ang Pagbalik ngadto sa simbahan mihatag kanako og kalinaw ug mipakita kanako kon unsa gayod ang importante sa kinabuhi.
Gilitratohan ni Leslie Nilsson
Ang akong home teacher nga si Val Riggs mao ang among bishop ug sa kadugayan among presidente sa stake. Siya ang midumala sa lokal nga institute of religion. Andam na siya sa pagretiro ug mobalik sa iyang panimalay sa Utah, USA, apan miingon siya nako nga dili diya mobiya hangtod nga ako maminyo sa templo.
“Kon mao, ania ka dinhi hangtod sa kahangtoran,” miingon ko kaniya. “Wala ko kahibalo kon mahitabo ba gayod kana.”
“Aw, oo, mahitabo kana,” motubag siya.
Siya adunay pagtuo diri kanako ug wala gayod miundang ngari kanako. Gani motawag siya nako samtang naa ko sa trabaho. Moingon ko, “President, nagsibya ko karon!” Ug moingon siya, “ang akong asawa nagluto og mga cookie. Moanha kami unyang gabii!”
Nagpuyo siya sa Baton Rouge sa kinatibuk-an sa akong pagbalik sa simbahan ug nagbantay sa akong espirituhanong paglambo. Sa dihang nahugno ang ekonomiya niadtong 2008, siya ang unang tawo nga akong gitawag.
“President Riggs,” miingon ko, “nawala ang akong trabaho sa estasyonan sa radyo!”
“Maayo!” mitubag siya.
“Maayo?” Mitubag ko.
“Ma-OK ra ka,” misulti siya nako.
Sa dihang mitawag ko sa akong visiting teacher, miingon usab siya, “Maayo!”
Nganong nalipay man sila nga nawad-an ko sa akong trabaho? Tungod kay sa matag higayon nga sila makig-istorya nako, makadungog sila sa akong panglimbasog. Ang akong usa ka tiil anaa sa Simbahan ug ang usa anaa sa kalibotan. Ang pagkawala sa akong trabaho nahimong usa ka dakong panalangin. Mitabang kini nako nga hingpit nga malambigit sa Simbahan.
Nahimo ako nga dili aktibo. Natumpawak ako sa abusado nga relasyon. Naglisod gayod kaayo ako niini isip usa ka batan-on. Nag-ampo ko alang sa akong kinabuhi ug naningkamot nga makapadayon.
Ang mga tawo moingon, “O, makahimamat ka og mga inila, makabiyahe-biyahe pa, makahimo ka niini, makahimo ka niana.” Apan dili kana ang kalinaw. Dili kana ang kalamposan.
Ang kalinaw sa Manluluwas walay sama. Ang pagbalik ngadto sa simbahan mao ang nakahatag kanako og kalinaw. Ang maminyo sa templo mao ang kalamposan. Ang pag-angkon og mahangtoron nga pamilya mao ang kinabuhi.
Ang Plano sa Ginoo
Kon ang Ginoo adunay usa ka plano, Siya adunay usa ka plano, bisan og kini tingali dili mao ang imong plano. Human ko nawad-an og trabaho, nagsugod ako sa pagkaamgo, ug ang mga butang nausab alang kanako. Si Presidente Riggs mipabilin, ug siya nagbantay sa akong paglambo. Ang akong pagpamatuod lig-on gayod kabahin sa pagpangalagad. Importante ang dili pag-undang sa usa ka tawo. Ang pagpangalagad mao ang midala kanako balik ngadto sa Simbahan.
Akong nahimamat ang akong bana, si Dustin, atol sa usa ka kalihokan ni Gladys Knight sa dihang miabot siya uban sa iyang choir. Siya ug ang iyang mga ginikanan mao ang labing maayong ehemplo alang kanako. Mitabang sila kanako nga makabaton og usa ka mas maayong pagpamatuod, ug ang akong ugangan nga babaye mitabang sa pag-umol kanako nga mahimong unsa ko karon. Siya ug ang akong mama mao ang naghatag kanako og kalig-on. Husto si Presidente Riggs: ang akong kaminyoon sa templo nahitabo—niadtong 2009 sa Baton Rouge Louisiana Temple.
Karon ako nagdumala og akong kaugalingon nga dili pangnegosyo nga organisasyon alang sa mga batang babaye. Ako kanhi ang presidente sa Young Women, ug akong gidala ang mga himan ug estraktura ug tanang butang nga among nakat-onan sa simbahan ngadto sa akong organisasyon. Akong gitugotan ang Ginoo nga mangulo ug mogiya.
Ang mga batang babaye sa akong organisasyon nakapahinumdom sa akong kaugalingon sa batan-on pa—naningkamot lang nga makit-an ang ilang dalan sa kinabuhi. Mga maalam sila, maabilidad, ug dunay gamayng apan ug naglambo pa. Makasabot kaayo ko nila. Makasabot ko sa mga butang nga ilang isulti. Tingali mao kana ang hinungdan nganong nakatrabaho ko sa industriya sa hip-hop.
Sa matag tuig aduna kami usa sa kinadak-an nga komperensiya sa kabatan-onan sa among dapit alang sa mga batan-ong babaye. Magdala kami og mga mamumulong, ug akong gigamit ang akong mga koneksiyon sa pagdala og mga inila. Kapin sa 800 ka mga batang babaye ang motambong. Aduna kami makapadasig nga mga leksiyon, ug kami mohatag og gugma sa mga batang babaye ug giya sa paghimo og responsabling mga pagpili.
Naningkamot ko sa paggiya niining batan-ong mga babaye gamit ang Kristohanong gugma. Nasayod ko sa ilang mga panglimbasog. Magkinataw-anay kami, manghilak, ug magdungan sa pagserbisyo sa komunidad. Akong gipaambit ang mga istorya mahitungod sa akong kinabuhi.
“Ayaw buhata ang kasaypanan nga akong nahimo,” ako mosulti kanila. “Ako nasayod sa inyong giagian, apan uban sa hugot nga pagtuo, pag-ampo, gugma, ug espirituwal nga giya inyong mabuntog ang kalibotan.”