Mga Young Adult
Pagkab-ot sa Inyong Potensiyal pinaagi sa Edukasyon
Usa ka young adult gikan sa Papua New Guinea nagpakita kon sa unsang paagi ang pagpangita og mga oportunidad sa pagkat-on motabang kanato sa pagkab-ot sa atong potensiyal.
Paghulagway ni Julia Yellow
Nasayod ba kamo kon si kinsa kamo nga mamahimo? Nasayod ba kamo unsa ang makatabang kaninyo nga makaabot niana? Si Elder Joseph W. Sitati sa Seventy nagtudlo, “Kon kamo makapalambo og usa ka tin-aw nga panan-awon sa unsa ang inyong maabot, ang Ginoo moabli og mga dalan alang kaninyo.”1
Ang edukasyon nagtabang ni Christina Augerea gikan sa Hula, Papua New Guinea, nga makab-ot ang iyang tumong. Sukad nga siya gamay pa, aduna na siyay gugma sa pagbasa ug tumong sa pagtambong sa unibersidad. Ang Iyang gugma sa pagbasa mao ang naggiya kaniya ngadto sa Simbahan.
“Sa dihang ako diha pa sa ikalimang ang-ang, kami walay mga libro sa akong eskwelahan,” miingon siya. “Ang akong magtutudlo usa ka miyembro sa Simbahan. Siya walay laing mga basahon, busa siya mihatag kanamo sa Basahon ni Mormon.”
Mga katuigan ang milabay, si Christina miserbisyo og misyon sa Pilipinas ug dayon misugod sa pagtambong sa Brigham Young University–Hawaii, diin siya nagtrabaho sa pagkaabogado nga dunay dobling major sa political science ug sa administrasyon sa patigayon ug usa ka minor sa Mandarin.
Ang istorya ni Christina na-usab human sa COVID-19 nga pandemya nga nakapugos kaniya sa pagpauli sa panimalay. Usa ka adlaw samtang nagbisita sa iyang balangay, nahibaloan niya nga ang librarya sa iyang unang eskwelahan gianay na. Sa tabang sa lokal nga mga organisasyon ug sa Simbahan, gidumala ni Christina ang konstruksiyon sa usa ka bag-ong librarya, gamit ang mga sistema nga makapadayon niini sulod sa daghang katuigan.
Sama sa iyang kamalipayon nga siya nakahimo sa pagtabang sa iyang komunidad, si Christina mipasabot nga kini nagkinahanglan og hugot nga pagtuo ug buhat aron makab-ot kon asa siya karon. “Ako nasayod kon unsa ang bation kon kamo walay bisan unsang butang apan gusto ninyong moeskwela,” miingon siya. Ug pinaagi sa tanan niyang kasinatian, siya nakakat-on og daghan mahitungod sa bili ug katuyoan sa edukasyon.
Labaw pa Kay sa mga Grado
Ang mga lider sa Simbahan kanunayng nagtudlo nga importante ang pagtinguha og bisan unsang edukasyon kutob sa atong mahimo. “Ang Ginoo ug ang Iyang Simbahan kanunayng nag-awhag og edukasyon aron sa pag-usbaw sa atong abilidad sa pagserbisyo Kaniya ug sa mga anak sa atong Langitnong Amahan,” nagtudlo si Presidente Henry B. Eyring, Ikaduhang Magtatambag sa Unang kapangulohan.2
Apan, sama sa gipaambit ni Christina, ang edukasyon labaw pa kay sa maglingkod sa klasehanan. “Usa sa akong mga propesor nagsulti kanamo nga ang pagkat-on dili lang basta mahitungod sa pagkuha og grado, usa ka sertipiko, o sa kataposan usa ka trabaho. Mahitungod kini sa pagsabot sa mga konsepto.” Ug aron ang edukasyon makahimo gayod og kalainan sa inyong kinabuhi unsa ang inyong nakat-onan nahimong kabahin ninyo. “Kinahanglan inyong higugmaon ang pagkat-on,” midugang si Christina.
Adunay daghang paagi nga kita mahimong edukado. “Kita dili lang basta nagkat-on diha sa eskwelahan,” miingon si Christina. “Kita magkat-on usab sa Simbahan. Kita magkat-on sa panimalay. Kita makakat-on sa bisan asang dapit.” Samtang kita mopahimulos sa mga oportunidad sa paglugway sa atong kahibalo, mamahimo kitang mas edukado, ug ang proseso sa pagkat-on mamahimong mas sentro sa atong mga kinabuhi.
Ang Edukasyon Makatabang Kanato sa Pagserbisyo
Nagpamatuod si Christina nga ang kahibalo mao ang yawe sa pagtabang kanato sa “pagpangandam sa pagsugat sa Dios” (Alma 34:32). “Kita mahimong molambo ug makab-ot ang atong potensiyal pinaagi sa pagkat-on,” miingon si Christina. Samtang mapainubsanon kitang magtinguha sa kahibalo, kita mamahimong mas sama sa atong Langitnong Amahan ug ni Jesukristo ug moandam sa pagpuyo og usab uban kanila.
Pinaagi sa pagbukas sa atong mga potensiyal, ang edukasyon makapalambo usab sa atong abilidad sa pagserbisyo sa uban. Si Presidente Russell M. Nelson miingon, “Ang edukasyon mao ang kalainan tali sa paghandom nga makatabang mo sa ubang tawo ug sa paghimo sa pagtabang kanila.”3
Mao kini usa sa kinadak-an nga mga panalangin nga nakita ni Christina gikan sa edukasyon. “Ang edukasyon makahatag kanako og pagkamasaligon sa pagkahibalo nga ako makatudlo og kahanas sa uban,” miingon siya. “Bisan ang pagtudlo diha sa Simbahan usa ka dakong responsibilidad. Busa ang pag-angkon og pagkamasaligon aron makahimo sa pagtudlo sa mga batan-ong babaye o sa kabatan-onan talagsaon.”
Ang Dios Motabang Kanato
Ang pag-angkon og usa ka edukasyon nagkinahanglan og kamakanunayon ug kalig-on—apan kini mahimo. Sa sinugdanan, si Christina wala masayod kon sa unsang paagi nga siya makatuman sa iyang mga tumong. “Wala ako makahibalo kon asa ako og kwarta,” miingon siya. Apan si Christina nakakaplag nga kon ikaw mosalig sa Dios ug magtinguha sa Iyang tabang, Siya motabang kanimo nga makatuman sa unsa ang Iyang gikinahanglan nga imong buhaton.
“Sa tanan nakong mga damgo ug mga plano, duha ka butang nga ako kanunayng gihangyo sa Langitnong Amahan mao ang pagtudlo kanako kon unsa ang akong buhaton ug unsaon nako sa pagbuhat niini. Ug Siya wala gayod mobiya kanako. Siya nasayod nga adunay butang nga mas maayo alang kanako, ug Siya migiya kanako. Ako nasayod nga sa tanang panahon ang Langitnong Amahan nag-uban kanako ug nga Siya nag-uban gihapon.”
Ug samtang kita magtinguha sa tabang sa Langitnong Amahan, Siya mopanalangin kanato sa mga oportunidad sa pag-angkon og dugang pa nga edukasyon ug kahibalo.
Si Christina nasayod nga ang pagbaton og usa ka edukasyon angay lang paningkamotan. “Ako mosulti sa mga tawo kinsa naghunahuna nga sila dili makahimo niini sa paghinumdom sa dakong potensiyal nga gihatag sa Dios ngari kanato. Kita makaabli niana nga potensiyal pinaagi sa pagtuo nga Siya naghatag niini ngari kanato.”