Mga Sukaranan sa Ebanghelyo
Ang Mga Pakigsaad Mokonektar Kanato sa Dios
Ang paghimo ug pagtuman sa mga pakigsaad magdala og mga panalangin.
Glory in Degrees [Himaya diha sa mga Ang-ang], ni Annie Henrie Nader
Ang usa ka pakigsaad mao ang usa ka saad tali sa Langitnong Amahan ug sa Iyang mga anak. Siya ang nagtakda sa mga kondisyon alang sa mga pakigsaad nga atong gihimo ngadto Kaniya. Kon kita mobuhat sa unsay Iyang gipabuhat, kita makadawat og daghang panalangin. Ug kita dili lang basta makadawat og mga panalangin sa yuta—kon kita mohimo ug motuman sa mga pakigsaad, kita makabalik sa pagpuyo uban sa Dios ug sa atong mga pamilya sa langit ugma damlag.
Mga Pakigsaad ug mga Ordinansa
Kita mohimo og mga pakigsaad atol sa piho nga mga ordinansa. Kinahanglan kita nga modawat niadtong mga ordinansa ug motuman niadtong mga pakigsaad aron makabalik sa pagpuyo uban sa Dios. Ang mga ordinansa gipahigayon pinaagi sa awtoridad sa pagkapari. Kadto nga mga ordinansa naglakip sa bunyag ug kompirmasyon, pagdawat sa Melchizedek nga Pagkapari (alang sa kalalakin-an), ug sa mga ordinansa nga atong madawat diha sa templo. Atol sa sakramento, ang mga miyembro sa Simbahan mobag-o sa mga saad nga ilang gihimo ngadto sa Dios (tan-awa sa Doktrina ug mga Pakigsaad 20:77, 79).
Ang mga Pakigsaad Magtabang Kanato nga Magpakabuhi nga Matarong
Atol sa bunyag, kita mosaad sa pagsunod ni Jesukristo, kanunayng mohinumdom Kaniya, ug motuman sa mga sugo (tan-awa sa Doktrina ug mga Pakigsaad 20:37). Ang Dios misaad nga ang Espiritu Santo magauban kanato.
Kon ang kalalakin-an makadawat sa pagkapari, sila mosaad sa pagpakabuhi nga takos sa gahom sa pagkapari sa Dios. Ang Diosnagsaad sa pagpanalangin kanila. (Tan-awa sa Doktrina ug mga Pakigsaad 84:33–40.)
Mga Pakigsaad nga Atong Gihimo diha sa Templo
Paghulagway sa Recife Brazil Temple ni James Porter
Kon ang mga miyembro sa Simbahan makadawat sa ilang pagtoga diha sa templo, sila mosaad sa pagpakabuhi nga matarong ug mosakripisyo alang sa ebanghelyo. Sila gisaaran og gahom gikan sa Dios (tan-awa sa Doktrina ug mga Pakigsaad 38:32; 109:22).
Atol sa pagsilyo diha sa templo, usa ka bana ug asawa maminyo alang sa kahangturan ug mosaad nga magmatinud-anon sa usag usa ug ngadto sa Dios. Ang Dios nagsaad nga sila makabalik ngadto Kaniya ug magpuyo isip mga pamilya sa kahangtoran. (Tan-awa sa Doktrina ug mga Pakigsaad 132:19–20.)
Kita mga Katawhan sa Pakigsaad
Kadtong moapil sa Ang Simbahan ni Jesukristo sa mga Santos sa Ulahing mga Adlaw mahimong katawhan sa pakigsaad sa Dios. Sila makapanunod usab sa mga panalangin ug mga responsibilidad sa mga pakigsaad sama ni Abraham (tan-awa sa Galatians 3:27–29). Isip kabahin sa katawhan sa pakigsaad sa Dios nagpasabot nga kita magtinabangay sa usag usa samtang kita mas magpaduol ngadto kang Kristo. Kini nagpasabot usab nga kita mopalig-on sa Simbahan sa Dios dinhi sa yuta. Kon kita motuman sa atong mga pakigsaad, kita makakaplag og gahom ug kalig-on gikan sa Dios.