Digital Lamang

Unsay Buot Ipasabot nga Mahimong Katawhan sa Pakigsaad?

Ni Chakell Wardleigh Herbert

Mga Magasin sa Simbahan

Ang pagsabot sa atong mga panalangin ug mga responsibilidad isip mga miyembro sa pakigsaad sa Simbahan makatabang kanato nga makasinati og mas dako nga katuyoan sa kinabuhi.

Kinahanglan natong dawaton nga: sakit ang napakyas nga mga saad. Daghan kanato ang nakasinati sa kasubo nga naggikan niana nga sitwasyon. Apan maayo gani, bisan kon napakyas ang mga saad sa yuta, atong mahinumdoman nga ang mahangtoron nga mga saad dili gayod mapakyas.

Kon makigsaad kita sa Langitnong Amahan ug ni Jesukristo, mahimo kitang masayod nga adunay hingpit nga kaseguroan nga Sila kanunayng motuman sa Ilang mga saad kon kita magmasulundon (tan-awa sa Doktrina ug mga Pakigsaad 82:10). Siyempre, anaa na kanato ug sa atong andam nga mga kasingkasing ang pagtuman niadto nga mga pakigsaad nga magdala og katumanan sa Ilang gisaad nga mga panalangin.

Apan unsa nga mga panalangin ang moabot gikan sa paghimo ug pagtuman og mga pakigsaad? Ug unsa ang atong mga responsibilidad isip mga miyembro sa pakigsaad sa Simbahan? Rebyohon nato ang pipila ka baroganan.

Mga Panalangin sa Pagkahimong Mga Tigtuman sa Pakigsaad

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, nailhan kita isip katawhan sa pakigsaad sa Langitnong Amahan (tan-awa sa 1 Nephi 14:14).

Samtang kita mohimo ug motuman sa sagrado nga mga pakigsaad ngadto Kaniya atol sa bunyag ug diha sa templo, gisaaran kita sa mga panalangin nga may kalabotan sa pakigsaad nga gihimo ni Jehova sa karaang panahon ngadto kang Abraham (tan-awa sa Genesis 17:4–8; Abraham 2:10–11; Giya ngadto sa mga Kasulatan, “Pakigsaad Sama Kang Abraham”). Duha niini nga mga panalangin naglakip sa pagkapari ug sa mahangtoron nga paglambo. Isip mga miyembro sa pakigsaad sa Simbahan, makadawat usab kita

sa Espiritu Santo isip atong makanunayon nga kauban,
sa oportunidad nga mabuhi pag-usab nga kauban ang Langitnong Amahan,
sa panalangin nga maselyo ngadto sa atong mga pamilya alang sa kahangtoran,
sa kahimayaan pinaagi sa Manluluwas ug sa Iyang Pag-ula, ug
“[sa] tanan nga iya sa … Amahan” (Doktrina ug mga Pakigsaad 84:38; tan-awa usab sa mga bersikulo 33–34).

Si Elder D. Todd Christofferson sa Korum sa Napulog Duha ka Apostoles mihisgot og piho nga gamhanan nga saad mahitungod sa mga pakigsaad: “Ang mga pakigsaad nga gitanyag sa Dios ngadto sa Iyang mga anak makahimo og labaw pa kay sa paggiya kanato. Kini mobugkos kanato ngadto Kaniya, ug, kay nabugkos ngadto Kaniya, kita makabuntog sa tanang mga butang.”¹

Makahimo kita pagbuntog sa tanang butang pinaagi sa pagtuman sa pakigsaad.

Pagkagamhanan nga kamatuoran!

Atong Responsibilidad isip Mga Tigtuman sa Pakigsaad

Apan ang pagkahimong mga tigtuman sa pakigsaad dili lang mahitungod sa pagdawat sa mga panalangin alang sa atong kaugalingon. Naglakip usab kini sa responsibilidad sa pagtabang sa uban nga makadawat niana nga mga panalangin. Ang Langitnong Amahan mihatag kanato sa responsibilidad, gahom, ug awtoridad sa paghimo sa buhat nga Iyang ipabuhat kanato—sa pagdala sa Iyang tanang anak ngadto sa kamatuoran sa ebanghelyo ni Jesukristo. Isip katawhan sa pakigsaad, matag usa kanato adunay oportunidad ug gahom sa pagpalambo sa buhat ug himaya sa Langitnong Amahan pinaagi sa pag-apil sa buhat sa kaluwasan ug kahimayaan pinaagi sa mosunod:

“Pagsunod sa ebanghelyo ni Jesukristo.
Pag-atiman niadtong nanginahanglan.
Pagdapit sa tanan nga dawaton ang ebanghelyo.
Paghiusa sa mga pamilya alang sa kahangtoran.”²

Isip katawhan nga nakigsaad sa Dios, kita gihatagan og walay kataposan nga mga panalangin. Buhaton nato ang atong bahin sa pagpaambit niadto nga mga panalangin ngadto niadtong wala pa nakahibalo sa kamatuoran. Tinuorayng makapalipay ang pagsinati sa unsay mahimo sa atong kinabuhi sa paghimo ug pagtuman sa sagrado nga mga pakigsaad ngadto sa atong Langitnong Amahan ug ni Jesukristo.

Kini ang gisulti sa mga Santos sa tibuok kalibotan kon unsay kahulogan alang kanila sa pagkahimong kabahin sa katawhan sa pakigsaad.

Hingpit nga Kalipay, Kalinaw, ug Pagbati og Bili sa Kaugalingon

Ang paghimo ug pagtuman sa akong mga pakigsaad nakatabang kanako nga makasabot sa akong tinuod nga bili isip usa ka anak sa Dios. Nakita nako nga kon ako matinuoron ug matinud-anon sa akong mga pakigsaad, hilabihan akong panalanginan sa Ginoo. Mas nabati gayod nako karon ang gugma sa Langitnong Amahan pinaagi sa paghimo og mga pakigsaad diha sa templo. Ug bisan pa man sa kagubot sa akong palibot dinhi sa kalibotan, kanunay akong makabati sa Iyang presensiya. Nasayod ko nga makasalig ko sa Langitnong Amahan sa pagtuman sa Iyang mga saad. Ang pagkahimong kabahin sa katawhan sa pakigsaad nakatabang kanako nga mahibalo nga bisan pa man sa mga kalisod ug sa mga hagit nga akong masinati sa mortalidad, kanunay akong makasinati og kamaya ug kalinaw sa akong agianan pabalik ngadto Kaniya.

Shalini Chand, Naitasiri, Fiji

Usa ka Pagpahayag sa Pagkamaunongon

Alang nako, ang pagkahimong kabahin sa katawhan sa pakigsaad nagpasabot sa pagbaton sa kahibalo nga dili mahatag sa kalibotan kanako. Pinaagi niini nga kahibalo gikan sa Langitnong Amahan, ako makapalambo sa akong kinabuhi aron mahimong sama Kaniya ug magpuyo og kinabuhi nga puno sa kamaya ug nakasentro sa ebanghelyo. Ang paghimo ug pagtuman sa mga pakigsaad ngadto sa Dios motugot kanako nga magpakita Kaniya sa akong pagkamaunongon, hugot nga pagtuo, ug pagsalig diha Kaniya; pinaagi niana, makadawat ako sa mga panalangin nga gisaad sa Dios kanako isip sangpotanan.

Ang pagtuman sa akong mga pagkigsaad ug pagsunod sa mga sugo sa ebanghelyo nakaapekto sa akong kinabuhi sa positibo nga paagi. Bisan atol sa malisod nga mga panahon, ang pagkamatinuoron ngadto sa akong mga pagkigsaad nagtabang kanako nga makabatyag sa kamot sa Dios sa akong kinabuhi, nga Siya motubag sa akong mga pag-ampo, ug nga ako makadawat ug makaila sa mga panalangin nga Iyang gihatag kanako.

Salvo Patamia, Lombardy, Italy

Pagsinati sa Kahingpitan sa Ebanghelyo

Ang Langitnong Amahan nasayod nga kita dili hingpit. Apan bisan hain kita sa atong panaw isip mga disipulo ni Jesukristo, kon kita maningkamot sa paghimo ug pagtuman sa sagrado nga mga pakigsaad, makasinati kita sa kahingpitan sa ebanghelyo ni Jesukristo ug sa kamaya ug sa dili matugkad nga mga panalangin nga gisaad ngari kanato, sama gayod sa matinud-anon nga mga Santos sa kahitas-an.

Sama sa pagdapit ug gisaad ni Presidente Russell M. Nelson kanato: “Pabilin diha sa dalan sa pakigsaad. Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, babaye, ug mga bata bisan asa.”³