Dali, Sunod Kanako
Mga Simbolo sa Daang Tugon
Ang mga kasulatan naggamit og mga simbolo sa pagtudlo og importante nga mga ideya. Ang pagsabot sa mga simbolo nga makita diha sa Daang Tugon makapanindot sa inyong kasinatian sa pagbasa, makapalawom sa inyong pagsabot sa mga kamatuoran sa ebanghelyo, ug makapalambo sa inyong paghatag og bili sa mga pulong sa Ginoo.
Ang ubang mga simbolo mahimong masabtan sa nagkalain-laing paagi. Importante ang paghinumdom nga ang husto nga mga paghatag og kahulogansa mga simbolo nagagikan sa unsay klarong gitudlo sa ubang mga kasulatan ug sa atong mga lider sa Simbahan.
Ania ang upat ka simbolo nga inyong masugatan sa pagbasa sa Dali, Sunod Kanako niini nga bulan.
Sanga sa Oliba
Tuyok padulong sa tuo gikan sa wala nga bahin sa ibabaw: mga litrato pinaagi sa iStock.com/RayTango; James Jeffery; Matt Reier; ug Stephen Peel
Kadaghan gihisgotan sa kasulatan ang mga kahoy nga oliba. Ang mga kahoy nga oliba nagsimbolo sa balay ni Israel, ug “ang sanga sa oliba giisip sa kadaghanan isip usa ka simbolo sa kalinaw.”1 Ang sanga sa oliba mao ang unang tanom nga gihisgotan pagkahuman sa Lunop (tan-awa sa Genesis 8:11), nga nagsimbolo nga mibalik na ang kalinaw sa yuta samtang mihunas ang mga tubig sa lunop.
Bangaw
Human sa Lunop, ang Dios mibutang og bangaw sa kalangitan (tan-awa sa Genesis 9:12–17). Ang bangaw labaw pa kay sa usa ka matahom nga talan-awon, kini usa ka simbolo sa saad sa Dios nga ang yuta dili na gayod malunopan ug nga ang Ginoo mopuyo pag-usab sa yuta (tan-awa sa Ang Hubad ni Joseph Smith, Genesis 9:21–25 [sa appendix sa Ang Hubad ni Joseph Smith]).
Laking Karnero
Sa dihang gihangyo si Abraham sa pagsakripisyo ni Isaac, ang Dios mihatag og usa ka laking karnero nga isakripisyo puli ni Isaac (tan-awa sa Genesis 22:13–14). Sama sa gipasabot ni Presidente Dallin H. Oaks, Unang Magtatambag sa Unang Kapangulohan: “Tungod sa atong mga sala ug sa atong pagkamortal, kita … gipanghimaraot ngadto sa kamatayon. Kon ang tanang paglaom mawala na, ang atong Amahan sa Langit mohatag sa Kordero sa Dios, ug luwason kita pinaagi sa iyang sakripisyo.”2
Atabay sa Tubig
Sa Genesis 26, mabasa ninyo ang mahitungod sa mga atabay ni Isaac. Ang tubig kasagaran nga nagsimbolo sa atong pagdepende sa Manluluwas, si Jesukristo. “Ingon nga ang tubig gikinahanglan sa pagtabang sa lawasnon nga kinabuhi, ang Manluluwas ug ang Iyang mga pagtulun-an (buhi nga tubig) mga gikinahanglan alang sa kinabuhi nga dayon.”3