Suba sa Susquehanna duol sa Harmony, Pennsylvania

Pebrero 17–23: “Diha Kaninyo Akong Kauban nga mga Sulugoon”

Doktrina ug mga Pakigsaad 12–17; Joseph Smith—Kasaysayan 1:66–75

Kadaghanan sa mga tawo sa tibuok kalibotan tingali wala gayod makadungog sa usa ka dapit nga gitawag og Harmony, Pennsylvania. Ang Ginoo kanunay nga mopili og kasarangan nga mga dapit alang sa labing mahinungdanon nga mga panghitabo sa Iyang gingharian. Diha dapit sa usa ka kakahoyan nga duol sa Harmony niadtong Mayo 15, 1829, si Juan Bautista mipakita ngadto nila ni Joseph Smith ug Oliver Cowdery. Siya mipandong sa iyang mga kamot sa ilang mga ulo ug mitugyan sa Aaronic nga Pagkapari diha kanila, mitawag kanila nga “akong kauban nga mga sulugoon” (Doktrina ug mga Pakigsaad 13:1).

Si Juan Bautista mao ang sinaligan nga sulugoon sa Dios nga mibunyag sa Manluluwas ug miandam sa agianan alang sa Iyang pag-anhi (tan-awa sa Mateo 3:1–6, 13–17). Ngadto niining duha ka batan-ong lalaki sa ilang pangidaron nga anaa sa mga bayente, mibati og kamapainubsanon, tingali bisan wala makatuo nga tawagon nga kauban nga mga sulugoon ni Juan. Nianang panahona, si Joseph ug Oliver wala pa hiilhi, labaw pa sa Harmony. Apan ang pagserbisyo diha sa buhat sa Dios kanunay gayod mahitungod sa unsaon nato sa pagserbisyo, dili mahitungod kon kinsa ang makamatikod. Bisan unsa pa man ka gamay o dili makita ang imong tampo usahay, ikaw usab usa ka kauban nga sulugoon sa “mahinungdanon ug kahibulongan nga buhat” sa Ginoo (Doktrina ug mga Pakigsaad 14:1).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 12; 14

Ako mahimong makasalmot diha sa “mahinungdanon ug kahibulongan nga buhat” sa Dios

Sila si Joseph Knight ug David Whitmer gusto nga makahibalo unsaon nila sa pagtabang sa buhat sa Ginoo. Samtang imong basahon ang tubag sa Ginoo ngadto kanila (Doktrina ug mga Pakigsaad 12; 14), hunahunaa unsay gipasabot niini nganha kanimo “sa pagdala ug pagtukod sa kahimoan sa Zion” (12:6; tan-awa usab sa 14:6). Unsa nga mga baroganan ug Kristohanong mga hiyas ang imong nakita niini nga mga seksiyon nga makatabang nimo sa paghimo niini?

Tan-awa usab sa “The Knight and Whitmer Families,” sa Konteksto sa mga Pagpadayag [Revelations in Context], 20–24.

Doktrina ug mga Pakigsaad 13

Si Jesukristo mipadala ni Juan Bautista aron sa pagpahiuli sa Aaronic nga Pagkapari.

Si Juan Bautista mitawag ni Joseph Smith ug Oliver Cowdery nga iyang “kauban nga mga sulugoon.” Unsa sa imong hunahuna ang gipasabot nga mahimong kauban nga sulugoon uban ni Juan Bautista? (tan-awa sa Mateo 3:13–17; Lucas 1:13–17; 3:2–20).

Samtang basahon nimo unsa ang gisulti ni Juan Bautista mahitungod sa Aaronic nga Pagkapari diha sa seksiyon 13, pamalandongi sa unsa nga paagi nga ang mga yawe niini nga pagkapari makatabang nga matuman ang misyon ni Juan sa pag-andam sa agianan sa Ginoo. Pananglitan:

• Unsa ang “pagpangalagad sa mga anghel”? (tan-awa sa 2 Nephi 32:2–3; Moroni 7:29–32; Ang Giya ngadto sa mga Kasulatan, “Anghel, mga,” Gospel Library).

• Unsa “ang ebanghelyo sa paghinulsol”? (tan-awa sa Doktrina ug mga Pakigsaad 84:26–27; Dale G. Renlund, “Ang Priesthood ug ang Matubsanong Gahom sa Manluluwas,” Liahona, Nob. 2017, 64–67).

Sa unsa nga paagi nga ang mga ordinansa sa Aaronic nga Pagkapari (sama sa bunyag ug sa sakramento) makatabang sa pag-andam sa agianan alang nimo nga modawat sa Manluluwas sa imong kinabuhi?

Unsa ang mga yawe sa pagkapari?

Si Elder Dale G. Renlund ug ang iyang asawa, si Ruth, mihatag niini nga pagpasabot mahitungod sa mga yawe sa pagkapari:

“Ang termino nga mga yawe sa pagkapari gigamit sa duha ka managlahing paagi. Ang una nagpasabot sa piho nga katungod o pribilehiyo nga gitugyan ngadto sa tanang modawat sa Aaronic o Melchizedek nga Pagkapari. … Sama pananglit, ang mga naghupot sa Aaronic nga Pagkapari nakadawat sa mga yawe sa pagpangalagad sa mga anghel ug sa mga yawe sa pagpangandam nga ebanghelyo sa bunyag pinaagi sa pagpaunlod alang sa kapasayloan sa mga sala (tan-awa sa Doktrina ug mga Pakigsaad 13:1; 84:26–27). Ang mga naghupot sa Melchizedek nga Pagkapari nakadawat sa yawe sa mga misteryo sa gingharian, sa yawe sa kahibalo sa Dios, ug sa mga yawe sa tanang espirituhanong mga panalangin sa Simbahan (tan-awa sa Doktrina ug mga Pakigsaad 84:19; 107:18). …

“Ang ikaduhang paagi nga gigamit ang termino nga mga yawe sa pagkapari nagpasabot sa pagpangulo. Ang mga lider sa pagkapari nakadawat og dugang nga mga yawe sa pagkapari, ang katungod sa pagdumala sa usa ka organisasyon nga bahin sa Simbahan o usa ka korum. Kalabot niini, ang mga yawe sa pagkapari mao ang awtoridad ug gahom sa pagdirekta, paggiya, ug pagdumala sa Simbahan” (The Melchizedek Priesthood: Understanding the Doctrine, Living the Principles [2018], 26).

Joseph Smith Nagbunyag ni Oliver Cowdery, ni Del Parson

Joseph Smith—Kasaysayan 1:66–75

Ang mga ordinansa nakahatag nako og akses sa gahom sa Dios.

Naghunahuna ba ikaw kon unsa kaha ang sitwasyon nga makig-uban nila Joseph Smith ug Oliver Cowdery atol sa mahinungdanong mga hitabo sa Pagpahiuli? Samtang magbasa ka sa Joseph Smith—Kasaysayan 1:66–75, lakip sa mubo nga sulat sa kataposan sa bersikulo 71, mahimong imong masabtan bisan gamay unsay ilang gibati. Unsay nakapadani nimo sa ilang mga pulong? Hinumdomi, labi na, ang mga panalangin nga ilang nadawat tungod kay sila nakadawat sa pagkapari ug nabunyagan. Unsa nga mga panalangin ang gihatag sa Manluluwas kanimo pinaagi sa mga ordinansa sa pagkapari?

Aron makat-on pa og dugang, ikonsiderar ang paghimo og tsart nga adunay mga ulohan nga Mga Ordinansa ug mga Panalangin. Dayon makasiksik ka sa mga kasulatan sama niini sa paglista sa mg ordinansa ug mga panalangin nga moabot gikan niini: Juan 14:26; Mga Buhat 2:38; Doktrina ug mga Pakigsaad 84:19–22; 131:1–4; Joseph Smith—Kasaysayan 1:73–74. Unsa pa ang ubang mga panalangin nga imong idugang sa lista? Sa unsa nga paagi nga ang mga ordinansa nga imong nadawat nakahimo sa gahom sa Manluluwas nga moabot sa imong kinabuhi?

Tan-awa usab sa David A. Bednar, “Uban sa Gahom sa Dios sa Dako nga Himaya,” Liahona, Nob. 2021, 28–30; Mga Santos, 1:72–75; “Dios sa Gahom, Dios sa Katarong,” Mga Himno, nu. 14; Topics and Questions [Mga Hilisgotan ug mga Pangutana], “Covenants and Ordinances,” [Mga Pakigsaad ug mga Ordinansa] Gospel Library.

Doktrina ug mga Pakigsaad 15–16

Ang pagdala og mga kalag ngadto kang Kristo mao ang labing bililhon.

Naghunahuna ka ba, sama sa gihunahuna nila ni John ug Peter Whitmer, unsa “ang labing bililhon” sa imong kinabuhi? (Doktrina ug mga Pakigsaad 15:4; 16:4). Samtang magbasa ka sa Doktrina ug mga Pakigsaad 15–16, pamalandongi kon nganong ang pagdala og mga kalag ngadto kang Kristo dako man kaayo og bili. Unsa may imong gibuhat aron “makadala og mga kalag” ngadto ni Kristo?

Tan-awa usab sa Mga Santos, 1:75–77.

Doktrina ug mga Pakigsaad 17

Ang Ginoo mogamit og mga saksi aron sa paglig-on sa Iyang pulong.

Unsa man ang usa ka saksi? Nganong ang Ginoo mogamit og mga saksi diha sa Iyang buhat? (tan-awa sa 2 Mga Taga-Corinto 13:1). Pamalandongi kining mga pangutana samtang magbasa ka sa mga pulong sa Dios ngadto sa Tulo ka Saksi diha sa Doktrina ug mga Pakigsaad 17. (Tan-awa usab sa “Ang Pagpamatuod sa Tulo ka Saksi” diha sa Basahon ni Mormon.) Sa unsang paagi ang mga saksi makatabang sa pagpatuman sa “matarong nga mga katuyoan” sa Dios”? (bersikulo 4).

Unsa ang imong ikasaksi?

Tan-awa usab sa Mga Santos, 1:81–84; “A Day for the Eternities” [Usa ka Adlaw alang sa Kahangtoran] (bidyo), Gospel Library.

A Day for the Eternities

This film features the experiences of David Whitmer as Joseph Smith and Oliver Cowdery stay with his family in Fayette, New York, to finish the translation of the Book of Mormon.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Joseph Knight Sr.

• Dapit sa Pagpahiuli sa Pagkapari

• Pagpahiuli sa Aaronic Priesthood

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 13; Joseph Smith—Kasaysayan 1:68–74

Si Juan Bautista mipahiuli sa Aaronic nga Pagkapari.

• Ang artwork niini nga latid makatabang sa imong mga bata sa paghanduraw sa pagpahiuli sa Aaronic nga Pagkapari (tan-awa usab sa “Kapitulo 6: Joseph ug Oliver Gihatagan sa Gahom sa Priesthood,” sa Mga Istorya sa Doktrina ug mga Pakigsaad, 26–27, o sa tugbang nga bidyo nga anaa sa Gospel Library). Malingaw ba sila nga magdrowing og usa ka hulagway sa panghitabo base sa unsay imong mabasa uban kanila sa Joseph Smith—Kasaysayan 1:68–74?

  Chapter 6: Joseph and Oliver Are Given the Priesthood: May 1829

• Makapakita usab ikaw og litrato ni Juan Bautista samtang magbasa kamo og dungan sa Mateo 3:13–17; Joseph Smith—Kasaysayan 1:68–70. Ngano nga importante man nga gipadala sa Ginoo si Juan Bautista aron ihatag ni Joseph Smith ang awtoridad sa pagkapari sa pagbunyag?

Pag-andam sa imong mga anak alang sa tibuok kinabuhi nga anaa sa dalan sa Dios sa pakigsaad. Alang sa dugang nga mga ideya sa pagtabang sa imong mga anak nga makakat-on mahitungod sa gahom, awtoridad, ug mga yawe, tan-awa sa apendiks A o apendiks B.

Paghulagway kang Jesukristo nga gibunyagan, ni Dan Burr

Doktrina ug mga Pakigsaad 13

Ang Langitnong Amahan mipanalangin nako pinaagi sa Aaronic nga Pagkapari.

• Aron makaaghat og panaghisgotan mahitungod sa mga yawe nga gihisgotan sa Doktrina ug mga Pakigsaad 13, ikaw ug ang imong mga anak makapangita og pungpong sa mga yawe ug maghisgot kon unsay atong mahimo sa mga yawe. Tingali makatabang ka nila sa pagpangita sa pulong nga mga yawe sa seksiyon 13. Unsa ang ubang mga pulong o hugpong sa mga pulong sa Doktrina ug mga Pakigsaad 13 nga naghulagway sa mga panalangin sa Aaronic nga Pagkapari? Ang imong mga anak mahimo usab nga moila og mga paagi nga ang Langitnong Amahan mipanalangin nato pinaagi sa pagkapari diha sa bidyo nga “Blessings of the Priesthood” [Mga Panalangin sa Pagkapari] (Gospel Library).

Blessings of the Priesthood

The priesthood is the power of God, which is given to man to act in His name.

Doktrina ug mga Pakigsaad 15:4–6; 16:4–6

Ang pagtabang sa uban nga moduol ngadto ni Jesukristo mao “ang labing bililhon.”

• Si John ug si Peter Whitmer gustong masayod unsa ang “labing bililhon” ngadto kanila (tan-awa sa Doktrina ug mga Pakigsaad 15:4; 16:4). Tingali ikaw ug ang imong mga anak makahisgot mahitungod sa mga butang nga bililhon kaayo kaninyo. Basaha ang Doktrina ug mga Pakigsaad 15:6 o 16:6, ug hangyoa ang imong mga anak sa pagpataas sa ilang mga kamot kon makadungog sila kon unsa ang gisulti sa Ginoo nga “labing bililhon.”

• Unsa ang buot ipasabot sa “pagdala og mga kalag ngadto ni [Jesukristo]”? Tabangi ang imong mga anak sa paghimo og lista sa mga ideya, sama sa pakighigala sa uban, pakigbahin sa mga kasulatan ngadto sa usa ka higala, o sa pag-ampo alang sa usa ka tawo nga nanginahanglan. Ang imong mga anak makapangita og mga litrato niini nga mga butang diha sa mga magasin sa Simbahan o sa Pakete sa mga Hulagway sa Ebanghelyo. O makadrowing sila sa ilang kaugalingong mga litrato. Dapita sila sa pagpili og usa ka butang gikan sa lista nga ilang gusto nga buhaton. Mahimo usab nga magdungan kamo sa pagpanganta sa ikaupat nga bersikulo sa “Gibati Ko ang Gugma sa Akong Manluluwas” (Songbook sa mga Bata, 42–43).

Doktrina ug mga Pakigsaad 17

Ako mahimo nga mosaksi sa Basahon ni Mormon.

• “Kapitulo 7: Mga Saksi Nakakita sa Bulawan nga mga Palid” (sa Mga Istorya sa Doktrina ug mga Pakigsaad, 31–33, o sa katugbang nga bidyo nga anaa sa Gospel Library) makatabang sa inyong mga anak nga makat-on mahitungod sa Tulo ka Saksi. Human mobasa sa Doktrina ug mga Pakigsaad 17:5–6, sultihi ang mga bata giunsa nimo pagkahibalo nga ang Basahon ni Mormon tinuod. Sa unsang paagi nga kita mamahimong mga saksi sa Basahon ni Mormon?

  Chapter 7: Witnesses See the Gold Plates: 1829–1830

Alang sa dugang nga mga ideya, tan-awa ang isyu karong bulana sa Higala nga magasin.

Diha Kaninyo nga Akong Kauban nga mga Sulugoon, ni Linda Curley Christensen