“Mga Tingog sa Pagpahiuli: Ang mga Saksi sa Basahon ni Mormon,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Ang mga Saksi sa Basahon ni Mormon,” Dali, Sunod Kanako—Alang sa Panimalay ug sa Simbahan: 2025
Mga Tingog sa Pagpahiuli
Ang mga Saksi sa Basahon ni Mormon
Ang anghel nga si Moroni mipakita sa bulawan nga mga palid ngadto nilang Joseph Smith, Oliver Cowdery, David Whitmer, ug Martin Harris diha sa kakahoyan duol sa panimalay sa Whitmer didto sa Fayette, New York. Ang mga ginikanan ni Joseph mibisita sa mga Whitmer nianang higayona. Si Lucy Mack Smith, ang inahan ni Joseph, mihulagway sa epekto niining milagroso nga kasinatian diha sa mga saksi:
“Diha kadto sa mga alas tres ug alas kwatro. Si Mrs. Whitmer ug Mr. Smith ug ako naglingkod diha sa lawak katulganan. Naglingkod ko daplin sa higdaanan. Sa dihang misulod si Joseph, mihigda siya sa akong kiliran. ‘Pa! Ma!’ miingon siya. ‘Wala mo masayod kon unsa ko ka malipayon. Ang Ginoo mitugot nga ang mga palid mapakita ngadto sa dugang tulo gawas nako, kinsa nakakita usab sa usa ka anghel ug kinahanglan mopamatuod sa kamatuoran sa unsay akong gisulti. Tungod kay sila nakahibalo mismo nga ako wala manglingla sa katawhan. Ug akong gibati nga daw nahaw-as sa bug-at kaayo nga palas-anon, nga hapit sobra ra kaayo nga maantos nako. Apan karon sila kinahanglan nang modala og usa ka bahin, ug kini nakapalipay sa akong kalag nga wala na gyod ko nag-inusara sa kalibotan.’ Dayon misulod si Martin Harris. Ingon og gibuntog siya sa naghingapin nga kalipay. Dayon mipamatuod siya sa unsay iyang nakita ug nadungog, sama sa gibuhat sa uban, ni Oliver ug ni David. Ang ilang pagpamatuod managsama og kahulogan sumala nianang gilangkoban sa Basahon ni Mormon. …
“Ilabi na ni Martin Harris daw hingpit nga walay pulong nga ikahulagway sa iyang gibati. Miingon siya, ‘karon nakakita na ako og usa ka anghel gikan sa Langit kinsa adunay kaseguroan sa kamatuoran sa tanan nga akong nadungog kalabot sa talaan, ug ang akong mga mata nakakita kaniya. Nakakita usab ako sa mga palid ug gitunol kini sa akong mga kamot ug makapamatuod og mao gihapon ngadto sa tibuok kalibotan. Apan ako nakadawat alang sa akong kaugalingon nga saksi nga dili malitok sa mga pulong, nga walay dila nga makahulagway, ug akong gidayeg ang Dios diha sa kabug-os sa akong kalag nga siya mipili aron sa paghimo nako, gani ako, nga usa ka saksi sa kahalangdon sa iyang buhat ug mga plano alang sa kaayohan [sa] mga anak sa mga tawo.’ Sila si Oliver ug David miapil usab kaniya diha sa balaan nga pagdayeg sa Dios tungod sa iyang kamaayo ug kaluoy. Namauli kami [ngadto sa Palmyra, New York,] pagkasunod nga adlaw usa ka malipayon, nagmaya nga gamayng pundok.”
Oliver Cowdery, David Whitmer, ug Martin Harris
Si Lucy Mack Smith anaa usab sa dihang ang Walo ka Saksi mibalik gikan sa ilang kasinatian:
“Human kining mga saksi nakabalik ngadto sa balay, ang anghel mipakita pag-usab ngadto ni Joseph; diin nianang tungora gihatag ni Joseph ang mga palid ngadto sa iyang mga kamot. Nianang gabhiona mipahigayon kami og usa ka panagtigom, diin ang tanang saksi mipamatuod sa pagkatinuod sa gipahayag sa ibabaw; ug ang tanan sa among pamilya, gani si Don Carlos [Smith], kinsa 14 anyos pa lang ang pangidaron, mipamatuod sa kamatuoran sa dispensasyon sa ulahing mga adlaw—nga kini hingpit nang gisugdan.”
Nagbuntaog nga kinulit nila ni Joseph Smith ug sa Walo ka Saksi
Dugang ngadto sa Tuo ka Saksi ug sa Walo ka Saksi, si Mary Whitmer, ang inahan ni David Whitmer, napanalanginan usab nga mahimong saksi sa bulawan nga mga palid. Ang anghel nga si Moroni mipakita niini ngadto kaniya isip usa ka pagdawat sa mga sakripisyo nga iyang gihimo samtang si Joseph ug Emma, ug Oliver nagpuyo diha sa iyang panimalay. “Matinud-anon ka kaayo ug makugihon sa imong mga buluhaton,” si Moroni misulti kaniya. “Busa, angay lang, nga makadawat ka og pagsaksi aron ang imong pagtuo malig-on.”